ནམ་ཞིག་༧རྒྱལ་བ་རིན་པོ་ཆེ་ཚང་ཡང་ངེད་ཅག་འགྲོ་བ་མི་སྤྱི་མཚུངས་ལྟར། འཛམ་གླིང་ཟླུམ་པོ་འདི་དང་ཞལ་གྱེས་ངེས་ཡིན། དེ་ནི་ལྡོག་དུ་མེད་པའི་སྐྱེ་བའི་མཐར་འཆི་བ་ཟེར་བ་དེ་ཡིན་པ་ཀུན་ལ་གསལ། དེས་ན་ང་ཚོས་ད་ལྟ་ནས་ལོ་ངོ་ག་ཚོད་ཅིག་གི་རིང་དུ་༧ཁོང་གི་སྐུ་ཚེ་བརྟན་མིན་ཡང་མི་ཤེས། མི་ཤེས་པའི་རྒྱུ་མཚན་དེ་ལ་བརྟེན་ནས། བོད་ཡུལ་གྱི་སྐྱེ་འགྲོ་ཡོངས་ཀྱི་ཁོང་ཉིད་ལ་སྐྱེ་ཡུལ་བོད་ནས་མ་གཤེགས་སྔོན་དུ་མཇལ་འདོད་ཀྱི་མདུན་པ་དེ་ནི་བོད་མི་ཡིན་ཚད་ཀྱི་སེམས་ཁོང་དུ་ཤར་སེ་ཡོད།
སྤྱི་དོན་ལྡོག་ལྡོག་རང་ཞུས་པ་ཡིན་ན། རྒྱལ་བ་རིན་པོ་ཆེ་ཚང་། རང་ཡུལ་དུ་ཕེབས་མ་པར་གཞན་ཡུལ་གང་ཞིག་ནས་ཞིང་དུ་ཕེབས་ཚེ། དེ་ཡི་ནག་ཉེས་དངོས་ནས་དེ་སུ་ལ་འཁེལ་དགོས་ཀྱི་ཡོད། དེ་ལ་བསམ་བློ་གཏོང་ས་ཆེན་པོ་གཉིས་འདུག གཅིག་ཤོས་དེ་ནི་ཚང་མས་ཤེས་གསལ་རེད། རྒྱ་ནག་སྲིད་གཞུང་གི་ལྟས་ངན་སྲིད་འཛིན་པ་དེ་དག་ལ་ངག་ཁག་དཀྲིས་ཆོག་ཆོག་ཡིན། འོན་ཀྱང་། བསམ་བློ་ཕྱོགས་གཞན་ནས་བཏང་བ་ཡིན་ན། བོད་གཞིས་བྱེས་གཉིས་ལ་འགན་ཞིག་ཡོད།
གཞིས་བྱེས་གཉིས་ཀྱི་རྒྱལ་བ་རིན་པོ་ཆེ་ཚང་བོད་དུ་ཕེབས་རྒྱུར་དངོས་ཤུགས་རྒྱུད་གསུམ་གང་ཅིའི་ཐད་ནས་འབད་བརྩོན་བྱས་ཡོད་དང་མེད་ཟེར་བ་དེ་ཡིན། དེ་ནི་དངོས་ནས་བོད་ཀྱི་མ་འོངས་པའི་གཞོན་རབས་པ་དེ་དག་གི་ད་ལྟའི་མི་རབས་འདི་ལ་དྲི་བ་འདོན་སྲིད་པ་ཡིན་ལ། དེ་ཡི་ལན་ཡང་ད་ལྟ་ནས་གྲྭ་འགྲིག་པོ་ཞིག་བྱེད་དགོས་པ་ཡིན། དེ་ལྟར་བྱེད་མ་ཐུབ་པ་ཡིན་ན། ད་གཟོད་ད་ལྟའི་མི་རབས་འདིའི་བོད་ཀྱི་སྤྱི་ནོར་དུ་འབོད་པའི་རྒྱལ་བ་རིན་པོ་ཆེ་གཞན་ཡུལ་ནས་ཞིང་དུ་ཕེབས་བཅུགས་པའི་ནག་ཉེས་བཀལ་ཆོག་པ་ཡིན།
དེས་ན་རྒྱལ་བ་རིན་པོ་ཆེ། བོད་ཡུལ་དུ་ཕེབས་འདོད་ཡོད་མེད་ཀྱི་བསམ་གཞིགས་ཀྱང་བྱེད་མཁན་དེང་དུས་ཀྱི་མི་རབས་གསར་བ་དག་གི་སེམས་ངོགས་སུ་ཡོང་གི་ཡོད་ལ། སྐད་ཆ་ལྡོམ་པོ་འགའ་དང་འགྲོགས་ནས་ཁ་ཤས་ཀྱི་དེ་ཉིད་བདེན་དུ་རློམ་མཁན་ཡང་བྱུང་གི་ཡོད། དེ་ཡི་རིགས་ནི་དངོས་ནས་བཤད་ན་ཁ་ཤས་ཀྱི་གནད་འགག་ལ་མཐོང་གི་མེད་ཀྱང་། ལོ་དང་ཟླ་ངོ་མང་བོ་སོང་ན། མི་རབས་ཤིག་འཚར་ལོངས་བྱུང་དེ་འོང་དུས། ད་གཟོད་དེ་ཡང་གནད་འགག་གི་སྐད་ཆ་ཞིག་དུ་འགྱུར་ཆོག་པ་ཡིན། དེས་ན་བོད་མི་སྤྱི་བོ་ཡོངས་ཀྱིས་རྒྱལ་བ་རིན་པོ་ཆེ་ཚང་སྐུ་ངོ་མ་བོད་དུ་ཕེབས་འདོད་ཡོད་མེད་དེ་ཡང་གསལ་བོ་ཤེས་དགོས་ཀྱི་ཡོད། རེད་དེ། ང་རང་གི་བསམ་ཚུལ་ཞིག་ཞུས་ན། མི་ཞིག་གི་འདུ་ཤེས་ཀྱི་སྟེང་ནས་བཤད་ན། རྒྱལ་བ་རིན་པོ་ཆེ་ཚང་། རང་གི་སྐྱེ་ཡུལ་དུ་ཕེབས་རྒྱུར་འདོད་པ་ཏན་ཏན་ཡོད་ངེས་ཡིན།
ང་ཚོ་བོད་མི་ཡོངས་ཀྱིས་མཐར་ཐུག་གི་གནད་འགག་གཞན་ཞིག་གསལ་བོ་ཤེས་དགོས་ཀྱི་ཡོད། དེ་ནི་རྒྱ་ནག་སྲིད་གཞུང་གིས་རྒྱལ་བ་རིན་པོ་ཆེ་ཚང་། ཆ་རྐྱེན་གང་ཡང་མེད་པའི་ཐོག་བོད་ཡུལ་ལ་སྐུ་འཚོ་བཞུགས་སྐབས་སུ་གདན་འདྲེན་མ་ཞུས་པ་ཡིན་ན། བོད་མི་སྐྱེ་འགྲོ་ཡོངས་ཀྱིས་དེ་ཡི་ནག་ཉེས་རྒྱ་ནག་སྲིད་གཞུང་ལ་འགེལ་དགོས་པ་ཡིན་ལ། བསྐལ་བ་ཇི་སྲིད་བར་དུ་རྒྱ་ནག་སྲིད་གཞུང་ལ་རྒྱལ་བ་རིན་པོ་ཆེ་ཚང་གི་སྐུ་དབང་ལ་སྐད་ཆ་ཚིག་གཅིག་ཀྱང་བཤད་པའི་དབང་ཆ་གཏན་ནས་མེད་པར་ཡོངས་ཁྱབ་གསལ་བསྒྲགས་བྱེད་དགོས་ཀྱི་ཡོད། ལྷག་པར་དུ་དེ་ནས་བཟུང་། རྒྱ་ནག་སྲིད་གཞུང་ལ་བསམ་ཤེས་བྱེད་ཐུབ་མཁན་གྱི་མི་རབས་ཀྱང་མཇུག་རྫོགས་སྲིད་པ་དེ་རྒྱ་ནག་སྲིད་གཞུང་གི་དཔོན་ངན་དེ་དག་གིས་གསལ་བོ་ཤེས་དགོས་པ་ཡིན།
ཀློག་དུ་ཕེབས་པ་དགའ་ནས་ཡོད།
གཅན་བཟོད་རྒྱམ་ཉིད་ནས་དེ་ལྟར་གདེང་འཇོག་བྱས་པ་བཀའ་དྲིན་ཆེ་ལགས།
དུར་ཁྱོད་ལགས། སྐྱེ་འཆི་གཉིས་ལ་བསམ་བློ་ཙམ་འཁོར་བ་དེ་ལ་ཡི་རུང་ལོས་བྱེད། ད་ལྟའི་འདི་ནས་གླེང་གཞིའི་སྐོར་ལ་བསམ་ཚུལ་རེ་ཞིབ་དུ་གསུང་ཡོད་ན་སྙམ་སོང་ལགས།
རེད། འཆི་བ་ཟེར་དུས་མགོ་འདར་ནི་ཞིག་དང་སྐྱེ་བ་ཟེར་དུས་འཛུམ་ལང་ནི་ཞིག་རེད། འོན་ཀྱང་གཞན་ཡུལ་ནས་ཁོང་སྐུ་གཤེགས་ཀྱང་དེ་ནི་བོད་ཀྱི་ཁ་དཔེ་ལྟར་ལས་དབང་ཟེར་བ་ཏེ་བེད་སྤྱོད་བྱས་ན་བཟང་ན་ཐང་།
ཁོང་གཤེགས་ཀྱང་རུང་འུ་ཚོ་ཤི་མེད་པས་སྔར་བཞིན་འཚོ་དགོས་ལ་སྔར་ལས་ལྷག་ཞིག་གསོན་ཉམས་དང་ལྡན་པའི་སྒང་བོད་མི་འཚོ་དགོས།
ང་ཡང་ཐོན་ནས་བཀླགས་ཟིན། བསམ་ཚུལ་ཅང་ཞུ་ཤེས་མ་སོང་། གྲོགས་ཁྱོད་ཀྱིས་རྩོམ་བྲིས་པའི་ཀ་ངས་ཆང་འཐུང་བའི་གྲགས་ཀ་གཉིས་ད་གཅིག་པ་ཡིན་ས་རེད། དེ་མིན་ངས་ཅང་འབྲི་མི་ཤེས་ཀི་ཡ། ཧ་ཧ་ཧ།
ཁྱོད་ཀྱི་བརྩོན་འགྲུས་པ་བསྔགས་བརྗོད་ཡོད། བོད་ནང་དུ་ཆོས་ཤུལ་བ་༼མིང་ངོ་མ་མི་སྨྲ༽ཟེར་བའི་རྩོམ་པ་པོ་ཚད་ལྡན་ཞིག་ཡོད། ༡༩༩༧ ལོར་ཙམ་ཁོའི་བོད་ཡིག་གི་ཆུ་ཚད་ནི་ཧ་ཅང་སྐྱོ་བོ་ཡིན། ངེད་གཉིས་གྲོས་པོ་ཡིན། འོན་ཀྱང་ཁོའི་བརྩོན་འགྲུས་ལ་ངེད་སློབ་མ་ཡོངས་ཀྱིས་བསྔགས་བརྗོད་བྱེད་ཀྱི་ཡོད། དེང་སང་ཁོང་རྩོམ་པ་པོ་ཚད་ལྡན་ཞིག་ཆགས་འདུག་པ་མ་ཟད། ཁོ་ནི་འགན་འཁྲི་རང་བཞིན་ཅན་གྱི་རྩོམ་པ་པོ་ཞིག་ཀྱང་ཆགས་འདུག ཁྱོད་ཀྱང་དེ་ལྟར་དུ་འགྱུར་བར་མི་རིང་གི་སྙམ། རེ་བ་ཡོད་ལགས།
བཀླགས་ནས་བུད་སོང་།