རྒྱ་གར་དམངས་ཁྲོད་སྤྱི་ཚོགས་དང་རིག་གཞུང་བདེ་དོན་ཚོགས་པའི་ལོ་འཁོར་ཚོགས་ཆེན་ཐེངས་བཅོ་བརྒྱད་པ་དེ། ཕྱི་ཟླ་ ༡༠ པའི་ཚེས་ ༣༡ ཉིན་ངྷ་ཤོད་ཁུལ་གྱི་ལོན་བྷ་ཝང་ Liong Bhawaong ཞེས་པའི་ཚོགས་ཁང་དུ་ཚོགས་ཡོད་ཅིང་། མཛད་སྒོའི་སྐུ་མགྲོན་དུ་ཧི་མ་ཅལ་མངའ་སྡེའི་བཟོ་རིགས་བློན་ཆེན་ཁི་ཤིམ་ཁེ་པོར་མཆོག་ Sh.Kishan Kapoor ཕེབས་ཏེ། འདི་ལོའི་སྤྱི་ཚོགས་ཞབས་ཞུའི་གཟེངས་རྟགས་དེ་བོད་མི་མང་སྤྱི་འཐུས་ངག་དབང་ལྷ་མོ་ལགས་ཚུད་པའི་མི་དགུ་ལ་སྤྲད་ཡོད་འདུག
དེ་ནི་ཁོང་གིས་དབང་པོ་སྐྱོན་ཅན་ལ་དམིགས་བསལ་ལྟ་རྟོགས་གནང་བའི་སྟབས་ཀྱིས་ཆེ་བསྟོད་གཟེངས་རྟགས་ཕུལ་བ་ཞིག་རེད། ཚོགས་ཐོག་ཏུ་ངག་དབང་ལྷ་མོ་ལགས་ཀྱིས་ཁོང་གི་ད་ལྟའི་ལས་དོན་མུ་མཐུད་དེ་མཇུག་སྐྱོང་རྒྱུ་ཡིན་པར་མ་ཟད། དེང་ཕྱིན་ཕྱོགས་མཐའ་ནས་ཕེབས་པའི་རྒྱུན་རིང་སྨན་དགོས་མཁོ་ཡོད་རིགས་ལའང་མཐུན་འགྱུར་རོགས་རམ་བྱ་རྒྱུ་ཡིན་ཞེས་བརྗོད་ཡོད། ཚོགས་པ་དེས་བུད་མེད་དབུལ་ཕོངས་ལ་ཤེས་ཡོན་དང་ལག་ཤེས་སློབ་སྦྱོང་སྤྲོད་རྒྱུ་དང་། ཉམ་ཐག་སློབ་ཕྲུག་ཚོར་གྱོན་གོས་སོགས་ཀྱི་རོགས་རམ་གནང་གིན་ཡོད་པ་མ་ཟད། སྤྱི་ཚོགས་ཞབས་ཞུ་གནང་མཁན་ཚོར་ལོ་རེར་སྐུལ་ལྕག་གཟེངས་རྟགས་ཞིག་ཀྱང་སྤྲོད་ཀྱིན་ཡོད་འདུག
གསར་འགོད་པ། དཔལ་ལྡན།
