དྲུང་ཆེ་ཡིས་སྤྲེའུ་ལད་འཁྲབ།

དེ་རིང་ཕྱི་ཚེས་ ༢ ཉིན་བྷི་བྷི་སིས་གནས་ཚུལ་སྤེལ་བ་ལྟར་ན། ཁ་སང་གཟའ་ཟླ་བའི་ཉིན་མཉམ་འབྲེལ་རྒྱལ་ཚོགས་ཀྱི་དྲུང་ཆེ་བྷན་ཀེ་མོན་རྒྱ་ནག་ཏུ་བསྐྱོད་ཡོད་ཅིང་། སྲིད་འཛིན་ཧུའུ་ཅིན་ཐོ་ཐུག་འཕྲད་སྐབས། བྷན་ཀེ་མོན་གྱིས་ཧུའུ་ཅིན་ཐོ་ལ་རྒྱ་ནག་གི་འགྲོ་བ་མིའི་ཐོབ་ཐང་སྐོར་ལ་གཏམ་གླེང་གང་ཡང་མ་བྱས་པར་སྣང་མེད་དུ་བཞག་པར། རྒྱལ་སྤྱིའི་འགྲོ་བ་མིའི་ཐོབ་ཐོང་ཚོགས་པ་ཁག་གིས་སྐྱོན་བརྗོད་ཤུགས་ཆེན་བྱེད་ཀྱིན་ཡོད་འདུག

ཨ་རིར་རྟེན་གཞི་བྱས་པའི་འགྲོ་བ་མིའི་ཐོང་ཐོང་ཚོགས་པས་དེ་སྔ་བྷན་ཀེ་མོན་ལ། ཐེངས་འདིར་སྲིད་འཛིན་ཧུའུ་ཅིན་ཐོ་དང་ཐུག་འཕྲད་བྱས་སྐབས་ད་ལོའི་ནོ་སྦེལ་ཞི་བདེ་གཟེངས་རྟགས་ཐོབ་མཁན་སྐུ་ཞབས་ལིག་ཞོ་པོ་ཀློད་གྲོལ་དང་། དེ་མིན་རྒྱ་ནག་གི་བཙོན་འོག་ཏུ་ཡོད་པའི་ཆབ་སྲིད་བཙོན་པ་ཚོའི་རང་དབང་དང་འབྲེལ་བའི་འགྲོ་བ་མིའི་ཐོབ་ཐོང་ཐད། འགན་ལེན་ཐོག་གླེང་སློང་བྱ་དགོས་པའི་འབོད་སྐུལ་ཞུས་ཡོད་རུང་། བྷན་ཀེ་མོན་གྱི་མགྲིན་ཚབ་པས་བརྗོད་པ་ལྟར་ན། ཐེངས་འདིར་བྷན་ཀེ་མོན་གྱིས་འགྲོ་བ་མིའི་ཐོབ་ཐང་དང་རང་དབང་ཐད་བཀའ་མོལ་གང་ཡང་གནང་མེད་ལ། ཐ་ན་སྒེར་ངོས་ནས་ཐུག་འཕྲད་སྐབས་སུ་ཡང་གླེང་སློང་བྱས་མེད། དེ་ནི་ཐེངས་འདིར་དྲུང་ཆེ་མཆོག་ལ་ལས་དོན་གཞན་མང་དྲགས་པས་རེད་ཟེར།

འགྲོ་བ་མིའི་ཐོབ་ཐང་རྩོད་ལེན་པ་ཚོས། བྷན་ཀེ་མོན་གྱིས་དེ་སྔོན་ནས་ལིག་ཞོ་པོ་ལ་འཛམ་གླིང་ཞི་བདེ་གཟེངས་རྟགས་ཐོབ་པ་དེར་ཐད་ཀར་རྒྱབ་སྐྱོར་གྱི་རྣམ་པ་གང་ཡང་བསྟན་མེད་པར་སྐྱོན་བརྗོད་བྱས་མྱོང་ཡོད་ལ། ད་ཐེངས་ཧུའུ་ཅིན་ཐོ་དང་མཇལ་འཕྲད་གནང་སྐབས་ཀྱང་སྐུ་ཞབས་ལིག་ཞོ་པོ་དང་། དེ་བཞིན། རྒྱ་ནག་ནང་གི་འགྲོ་བ་མིའི་ཐོབ་ཐོང་དང་རང་དབང་སྐོར་ལ་སྐད་ཆ་ཅི་ཡང་བཤད་མེད་པ་དེ། རྒྱ་ནག་ནི་མཉམ་འབྲེལ་རྒྱལ་ཚོགས་ཀྱི་བརྟན་འཇགས་ལྷན་ཚོགས་ཀྱི་ཚོགས་མི་ five Veto powers ཞེས་པའི་གྲས་ཡིན་ལ། རྒྱལ་ཚོགས་ཀྱི་ལས་དོན་གལ་ཆེན་ཁག་ཐག་གཅོད་བྱེད་སྐབས་རྒྱལ་ཁབ་དེ་ཚོས་དབང་ཤུགས་ཆེ་ཤོས་བཟུང་ཡོད་པར་བརྟེན། བྷན་ཀེ་མོན་གྱིས་རང་ཉིད་ལ་ཐེངས་རྗེས་མའི་མཉམ་འབྲེལ་རྒྱལ་ཚོགས་ཀྱི་དྲུང་ཆེའི་རྐུབ་སྟེགས་རག་རྒྱུར་རྒྱ་ནག་ལ་སྤྲེའུ་ལད་འཁྲབ་ཀྱིན་ཡོད་པར་ངོས་འཛིན་བྱེད་ཀྱིན་ཡོད་འདུག

གསར་འགོད་པ། བནྡེ་སྐྱབས།