ཕྱི་ཚེས་ ༧ ཉིན་འབར་མའི་རྒྱལ་ཡོངས་འོས་བསྡུ་བྱས་པའི་ཉིན་གཉིས་པ་ནས་འབར་མའི་གྲངས་ཉུང་མི་རིགས་སྟོང་ཕྲག་མང་པོ་ས་མཚམས་བརྒལ་ཏེ། ཐེ་ལན་ཌི་དང་ཉེ་ཁོར་ས་ཁུལ་ཁག་ལ་བྲོས་བྱོལ་དུ་འགྲོ་བཞིན་ཡོད་འདུག འབར་མའི་མའེ་ཡ་ཝ་ཊེ་ Myawaddy གྲོང་ཁྱེར་ཕྱི་ནང་། མང་ཚོགས་ཀྱིས་ཐེངས་འདིའི་འོས་བསྡུར་རང་དབང་དང་དྲང་བདེན་མེད་པའི་ངོ་རྒོལ་ཤུགས་ཆེན་པོ་བྱས་ཏེ། མཐར་གཞུང་གི་དམག་མི་དང་གདོང་ཐུག་གིས་ཟིང་འཁྲུག་ཆེན་པོ་བྱུང་ཡོད་འདུག་ལ། གཟའ་ཟླ་བ་ནས་བཟུང་གཞུང་ལ་ངོ་རྒོལ་རྒྱག་མཁན་ཚོ་ཁྱིམ་མཚེས་རྒྱལ་ཁབ་ཐེ་ལན་ཌིའི་ནང་སྐྱབས་བཅོལ་དུ་འགྲོ་མགོ་བརྩམས་ཡོད་པ་དང་། ཁ་སང་དང་དེ་རིང་ཉིན་གཉིས་རིང་འབར་མའི་སྐྱབས་བཅོལ་བའི་གྲངས་ཚད་ཆིག་ཁྲི་ ༡༠༠༠༠ ལས་བརྒལ་ཡོད་འདུག་ལ། དེ་དེག་ཕལ་ཆེ་བ་བུད་མེད་དང་བྱིས་པ་ཡིན་འདུག
གནད་དོན་འདིའི་སྐོར་ཐེ་ལན་ཌིའི་ཊཀ་མངའ་སྡེའི་སྲིད་སྐྱོང་བ་སཱ་མར་ཊི་ལགས་ཀྱིས་བརྗོད་པ་ལྟར་ན། ད་ལྟའི་ཆར་ཐེ་ལན་ཌིའི་དམག་མི་དང་ཉེན་རྟོག་པ། ས་གནས་སྲིད་གཞུང་བཅས་ཀྱིས་ས་མཚམས་ནས་སྤྱི་ལེ་ ༥ ལྷག་གི་སར་འབར་མའི་བྲོས་བྱོལ་བ་ཚོར་སྡོད་གནས་གོ་སྒྲིག་བྱེད་བཞིན་ཡོད་འདུག འོས་བསྡུའི་སྔ་གཞུག་ཏུ་འབར་མའི་དམག་མིའི་གཞུང་གིས་ཕྱི་ནང་གི་གསར་འགྱུར་བརྒྱུད་ལམ་ཐོག་དམ་དྲག་བྱས་ཏེ། འབར་མ་ནང་ཁུལ་དུ་གནས་ཚུལ་ཞིབ་ཕྲ་ཤེས་རྟོགས་ཐུབ་ཀྱི་མེད་ཀྱང་། གཞུང་འབྲེལ་གསར་ལམ་ཐོག་གནས་ཚུལ་ཐོན་པའི་ནང་། ཐེངས་འདིའི་འོས་བསྡུ་དེ་རྒྱལ་ཁའི་ངང་ལེགས་གྲུབ་བྱུང་སྐོར་བཀོད་ཡོད། ཐེ་ལན་ཌིའི་མཐའ་སྲུང་དམག་མིས་བརྗོད་པ་ལྟར་ན། གཟའ་ཟླ་བའི་ཉིན་ནས་གཞུང་དམག་དང་མང་ཚོགས་བར་ཟིང་འཁྲུག་བྱུང་བའི་ཁྲོད་དམར་གསོད་དང་རྨས་སྐྱོན་ཅི་བྱུང་གི་གནས་ཚུལ་ད་སྔ་ཤེས་རྟོགས་དཀའ་ཡང་། ད་ཆར་གཞུང་ཕྱོགས་ནས་འབར་མ་ལྷོ་ཕྱོགས་ཁུལ་དུ་དྲག་ཆས་དམག་དཔུང་གི་སྟོབས་ཤུགས་ཆེ་རུ་གཏོང་གི་ཡོད་ཚུལ་བརྗོད་འདུག
ཐེངས་འདིའི་འབར་མའི་རྒྱལ་ཡོངས་འོས་བསྡུ་ལ་ངོ་རྒོལ་བྱེད་མཁན་ཁག་གསུམ་ཙམ་བྱུང་ཡོད་འདུག་ཅིང་། དེ་དག་ནི་དང་པོ་འབར་མའི་ནང་གི་གྲངས་ཉུང་མི་རིགས་ཁག་ཅིག་གིས་དེ་སྔོན་ ༡༩༤༨ ལོར་འབར་མ་དབྱིན་ཇིའི་དབང་སྒྱུར་འོག་ནས་རང་བཙན་ཐོབ་རྗེས། ཁོ་ཚོས་དམིགས་བསལ་ས་གནས་རང་སྐྱོང་རྩོད་ལེན་བྱས་ཡོད་ཀྱང་། ད་བར་གྲུབ་འབྲས་གང་ཡང་སོན་མེད་པ་མ་ཟད། ཐེངས་འདིར་ཟིང་འཁྲུག་བསླང་སྲིད་པའི་ཉེས་འཛུགས་འོག གཞུང་ཕྱོགས་ནས་ས་ཁུལ་དེ་དག་གི་མི་གྲངས་ས་ཡ་གཅིག་དང་ཕྱེད་ཙམ་གྱི་འོས་འཕེན་ཐོབ་ཐང་མེད་པ་བཟོས་པ། གཉིས་པ། ཀ་རན་དམངས་གཙོ་ནང་པའི་རྗེས་འཇུག་ Democratic Karen Buddhist Army ཕྱོགས་གཏོགས་ཀྱིས་ཐེངས་འདིའི་འོས་བསྡུར་འདོད་པ་མེད་པའི་རྣམ་འགྱུར་ཐོག གཟའ་ཉི་མར་གཞུང་གི་ཉེན་རྟོག་པའི་ལྟེ་གནས་ཤིག་དང་འོས་བསྡུའི་ས་གནས་གཅིག་བཅས་ལ་དབང་སྒྱུར་བྱས་པ། རྒྱུ་རྐྱེན་གསུམ་པ་དེ་གཟའ་ཉི་མིའི་འོས་བསྡུའི་སྐབས། མང་ཚོགས་ལ་བཙན་སྐུལ་གྱིས་དྲག་དམག་གཞུང་གི་བཀོལ་བྱུས་ལྟར་འོས་ཤོག་འཕེན་བཅུག་ཡོད་པ་དེར་མང་ཚོགས་ཀྱི་འདོད་བློ་ཁེངས་མེད་པ་བཅས་ཡིན་འདུག
གསར་འགོད་པ། བནྡེ་སྐྱབས།
འབར་མའི་མི་རིགས་རྣམས་ངེད་ཅག་གི་མི་རིགས་དང་ཧ་ཅང་འདྲ་ ངོ་གདོང་དང་ཆབ་སྲིད་ཀྱིད་གནས་སྟངས་ གཉིས་ཀ་དམར་ཤོག་གི་བཙན་གནོན་འོག་ གཉིས་ཀ་ནང་པ་ཡིན་པ་བཅས་རེད་ འབར་མ་དམག་གི་སྲིད་གཞུང་དང་བྱང་ཀོ་རི་ཡ་གཉིས་པོ་དེ་ལོ་ཡུན་
དི་དག་གི་རིང་སོན་གནས་ཐུབ་པ་ནི་གཙོ་བོ་རྒྱ་ནག་གིས་རྒྱབ་སྐྱོར་ཁོ་ན་ལ་བརྟེན་ནས་ཡིན་ རྒྱ་ནག་གིས་བོད་དང་ཤིང་ཅང་ཙམ་མ་ཡིན་པར་འབར་མ་དང་བྱང་ཀོ་རི་ཡ་ སུ་ཌན་མི་མང་བཅས་ལ་ཡང་གཉའ་གནོན་བྱེད་བཞིན་པས་རྒྱ་ནག་གི་དམར་ཤོག་དཔོན་རིགས་རྣམས་ལས་རྒྱུ་འབྲས་ཀྱི་ཞགས་པ་ལས་མི་ཐར་ཐག་གཅོད་རེད་