བོད་སྐད་ཡིག་གི་ཚེ་སྲོག་བརླག་རྒྱུར་ཐེ་ཚོམ་མི་འདུག་ཟེར།

དགེ་རྒན་གྱི་འདུ་ཤེས་འཛིན་སྟངས་ནི་སློབ་མ་གཙོ་བོ་ཡིན་དགོས་པ་ལས་སོ་སོའི་མིང་གྲགས་དང་ཆེ་མཐོང་ཐད་བསམ་བློའི་འདུ་ཤེས་འཛིན་མི་རུང་། འདུ་ཤེས་རྣམ་དག་ཡིན་པ་ཁོ་ནས་ཀྱང་འགྲིག་གི་མེད། སློབ་ཚན་ཁྲིད་ཐབས་ནི་སློབ་མ་སྐྱེད་སྲིང་ཡོང་མིན་གྱི་འགག་རྩ་རེད། སོ་སོར་དགེ་རྒན་གྱི་ཉམས་མྱོང་ཡོད་སྟབས། ད་ལྟའི་སློབ་དེབ་དང་སློབ་ཚན་ཁྲིད་ཐབས་འདི་མུ་མཐུད་ལག་བསྟར་བྱས་ཚེ་དུས་ཡུན་རིང་པོ་ཞིག་མི་དགོས་པར་བོད་ཀྱི་སྐད་ཡིག་གི་ཚེ་སྲོག་བརླག་རྒྱུར་ཐེ་ཚོམ་མི་འདུག་ཟེར།

དེ་རིང་ཕྱི་ཚེས་ ༡༣ ཉིན་བོད་ཀྱི་སྐད་ཡིག་རྒྱུན་འཛིན་ཚོགས་པའི་གོ་སྒྲིག་འོག ངྷ་ས་ཉིན་སློབ་རྒྱལ་ཡུལ་ཆེན་མོིའི་ཚོགས་ཁང་དུ་༼ ད་ལྟའི་བོད་ཀྱི་སྐད་ཡིག་གི་གནས་བབ ༽ ཅེས་པའི་བརྗོད་གཞིའི་ཐོག་བགྲོ་གླེང་འདུ་འཛོམས་ཤིག་གོ་སྒྲིག་ཞུས་འདུག་ལ། བགྲོ་གླེང་གཏམ་བཤད་གནང་མཁན་ལ་ས་ར་མཐོ་སློབ་ཀྱི་རྒྱལ་རབས་དགེ་རྒན་བསོད་ནམས་རྒྱན་མཚན་ལགས་དང་རྩོམ་པ་པོ་ཤེས་རབ་དར་རྒྱས་ལགས། ངྷ་ཤོད་བོད་ཁྱིམ་སློབ་གྲྭའི་སློབ་སྤྱི་ཆོས་དབྱངས་དོན་གྲུབ་ལགས། ཤེས་རབ་དགའ་ཚལ་སློབ་གླིང་གི་བོད་དགེ་སྐལ་བཟང་ཉི་མ་བཅས་ཕེབས་འདུག་ལ། གཏམ་བཤད་ཀྱི་ལས་རིམ་རྫོགས་རྗེས་མང་ཚོགས་དང་ལྷན་དུ་དྲི་བ་དྲིས་ལན་མགོ་འཛུགས་བྱས་ཡོད།  

བགྲོ་གླེང་གི་ཐོག་མར་ཨ་རིག་འགྱུར་མེད་ཀྱིས་ངོ་སྤྲོད་དང་འབྲེལ་སློབ་སྤྱི་ཆོས་དབྱངས་དོན་གྲུབ་ལགས་ཀྱིས་གཏན་བཤད་གནང་དོན། ད་ལྟའི་ཆར་བོད་ཀྱི་སྐད་ཡིག་གི་གནས་སྟངས་འདི་ཛ་དྲག་པོ་ཞིག་ཏུ་གྱུར་ཡོད་པ་དངོས་ཡོད་རེད། དེའི་རྒྱུ་རྐྱེན་གཅིག་ཐབས་ལམ་ག་འདྲ་ཞིག་ལག་བསྟར་བྱེད་ཀྱི་ཡོད་མིན་ལ་མ་ལྟོས་བར་རྒྱ་ནག་གཞུང་གིས་བོད་སྐད་2ཡིག་རྩ་མེད་བཟོ་བའི་སྲིད་ཇུས་དེ་རེད། བཙན་བྱོལ་ལ་མཚོན་ན་ཕྱིའི་སྐད་ཡིག་གིས་བོད་ཀྱི་སྐད་ཡིག་བེད་སྤྱོད་ཁོར་ཡུག་ལ་བཙན་འཛུལ་ཐེབས་ཀྱི་ཡོད། དེ་ནི་ལ་གཙོ་བོ་སྐད་དང་ཡི་གེ་གཉིས་ཀྱི་ཐད་ནས་བཙན་འཛུལ་ཡོང་གི་ཡོད་པ་སྟེ། བོད་རིགས་བཙན་བྱོལ་བ་རྒན་གཞོན་ཚང་མས་ཕྱིའི་སྐད་རིགས་ལ་དགའ་སྣང་དང་སྦྱང་འདོད་ཆེན་པོ་བྱེད་པ་དང་། ཡི་གེའི་ཐད་ནས་ཕྱིའི་རིག་གནས་ཀྱི་ཐ་སྙད་མང་པོ་ཞིག་བོད་སྐད་ཡིག་ཐོག་མེད་པ་དང་། ཡོད་ནའང་མང་པོ་ཞིག་གིས་ཤེས་རྟོགས་ཐུབ་ཀྱི་མེད་པར་བརྟེན་སྐད་ཡིག་གཞན་དང་སྲེ་ལྷད་ཅན་གྱི་བོད་སྐད་ཅིག་བཤད་ཡོང་གི་ཡོད་རེད། དེ་བཞིན། ཕ་མ་དང་སློབ་ཕྲུག་ཚོའི་ངོས་ནས་བོད་ཡིག་སྦྱང་ན་མདུན་ལམ་དེ་ཙམ་མེད་པའི་ཚོར་སྣང་ཐོག་ཕྱིའི་སྐད་ཡིག་ལ་སྦྱང་བརྩོན་བྱེད་ཀྱི་ཡོད་པ་བཅས་ཀྱི་གནས་བབ་འོག་བོད་ཀྱི་སྐད་ཡིག་གི་གནས་བབ་ཛ་དྲག་ཆགས་ཡོང་གི་ཡོད་པ་རེད། ཅེས་བརྗོད་བྱུང་།

རྩོམ་པ་བོ་ཤེས་རབ་དར་རྒྱས་ལགས་ཀྱིས་བཙན་འོག་གི་བོད་སྐད་ཡིག་དང་དེའི་སྲུང་སྐྱོབ་སྐོར་ནས་བརྗོད་དོན། མི་རིགས་ཤིག་གི་སྐད་ཡིག་སྲུང་སྐྱོབ་དང་ཚད་ལྡན་དུ་གོམ་པ་སྤོ་རྒྱུར་དང་པོ་མི་རིགས་དེའི་རིག་གཞུང་གི་ཤེས་ཡོན་སྲིད་བྱུས་བརྟན་པོ་ཞིག་དགོས་ཀྱི་འདུག་ལ། ཤེས་ཡོན་སྲིད་བྱུས་དེ་གཏན་འབེབ་བྱེད་སྐབས་འགན་ཁུར་མཁན་དང་གཙོ་སྒྲིག་པ་དེ་ཚོ་ངེས་བར་དུ་སྐད་ཡིག་གཉིས་ཀྱི་སྟེང་ལ་ཚད་ངེས་ཅན་ཡོད་པ་གང་ཞིག་ལ། སྐད་ཡིག་ལ་དམིགས་བསལ་དུང་བ་དང་ཞེན་ཁོག རྒྱུས་མངའ་བཅས་ཡོད་མཁན་རྐྱང་ཡིན་དགོས། གཉིས་པ་མི་རིགས་དང་སྐད་ཡིག་བར་གྱི་འབྲེལ་བ་རེད། སྐད་ཡིག་རྩ་བརླག་ཏུ་ཕྱིན་ཚེ་མི་རིགས་བྱེ་བྲག་པ་དེ་འཚོ་གནས་ཐུབ་མིན་གྱི་གནད་དོན་ཐད་མང་ཚོགས་ལ་གོ་རྟོགས་སད་དགོས་པ། གསུམ་པ་དགེ་རྒན་རེད། དགེ་རྒན་གྱི་འདུ་ཤེས་འཛིན་སྟངས་ནི་སློབ་མ་གཙོ་བོ་ཡིན་དགོས་པ་ལས་སོ་སོའི་མིང་གྲགས་དང་ཆེ་མཐོང་ཐད་བསམ་བློའི་འདུ་ཤེས་འཛིན་མི་རུང་། ཅེས་དང་།

འདུ་ཤེས་རྣམ་དག་ཡིན་པ་ཁོ་ནས་ཀྱང་འགྲིག་གི་མེད། སློབ་ཚན་ཁྲིད་ཐབས་ནི་སློབ་མ་སྐྱེད་སྲིང་ཡོང་མིན་གྱི་འགག་རྩ་རེད། སོ་སོར་དགེ་རྒན་གྱི་ཉམས་མྱོང་ཡོད་སྟབས། ད་ལྟའི་སློབ་དེབ་དང་སློབ་ཚན་ཁྲིད་ཐབས་འདི་མུ་མཐུད་ལག་བསྟར་བྱས་ཚེ་དུས་ཡུན་རིང་པོ་ཞིག་མི་དགོས་པར་བོད་ཀྱི་སྐད་ཡིག་གི་ཚེ་སྲོག་བརླག་རྒྱུར་ཐེ་ཚོམ་མི་འདུག དེ་བཞིན་སྐད་ཡིག་སྲུང་སྐྱོབ་དང་དར་སྤེལ་ཐད་རྩོམ་པ་པོ་ཚོར་འགན་འཁྲི་ཆེན་པོ་ཡོད། རྩོམ་པ་པོ་ཚོ་སྤྱི་ཚོགས་དངོས་དང་ཁ་མ་བྲལ་བར་གཙོ་བོ་ཀློག་པ་བོ་ལ་ཁ་ཕྱོགས་རྒྱུ་དང་། རྩོམ་པ་པོ་ཞིག་ཡིན་ན་སྡེབ་སྦྱོར་ལེགས་པའི་ཡིག་ཚོགས་ཤིག་གི་སྒྲོམ་གཞི་ཙམ་བཟོ་ཐུབ་པ་དེས་འགྲིག་གི་མེད། རྩོམ་པ་བོ་ཞིག་ཡིན་ན་ངེས་བར་དུ་བསམ་བློ་བ་ཡིན་དགོས། ཞེས་བརྗོད་བྱུང་།

དེའི་རྗེས་དགེ་བསོད་ནམས་རྒྱལ་མཚན་ལགས་ཀྱིས་བཙན་བྱོལ་ནང་བོད་ཀྱི་སྐད་ཡིག་ཇི་ལྟར་འཐུས་ཤོར་དུ་ཕྱིན་པ་རེད་ཅེས་པའི་བརྗོད་གཞིའི་སྟེང་ནས་གསུང་དོན། གནད་དོན་འདིའི་ཐད་ནས་བསམ་བློ་གཏོང་དགོས་པ་ཞིག་ནི་བོད་ཀྱི་སྐད་ཡིག་ག་འདྲ་བྱས་ཏེ། རྒྱུན་འཛིན་འབྱུང་གི་ཡོད་པ་དེ་རེད། གཅིག་ཏེ། གཏན་ཚིགས་རིག་པ་དང་བརྡ་སྤྲོད་རིག་པ། མཚན་ཉིད་རིག་པ་བཅས་ཚུད་པའི་རིག་པའི་གཞུང་ལུགས་ལ་བརྟེན་ནས་བོད་ཀྱི་སྐད་ཡིག་རྒྱུན་འཛིན་བྱེད་ཡོང་གི་ཡོད་རེད། རྒྱུ་རྐྱེན་གཅིག་ནི་འཚོ་གནས་དང་འབྲེལ་བའི་ལས་རིགས་ཁག་རེད། རྒྱུ་རྐྱེན་གཞན་ཞིག་ནི་སྒྱུ་རྩལ་གྱི་སྟེང་ནས་རྒྱུན་འཛིན་བྱེད་ཡོང་གི་ཡོད་རེད། རྒྱུ་རྐྱེན་འདི་གསུམ་གྱི་སྟེང་ནས་མ་གཏོགས་བཙན་བྱོལ་ནང་བོད་སྐད་ཡིག་ཇི་ལྟར་འཐུས་ཤོར་ཕྱིན་ཡོད་མེད་ལ་མཛུབ་མོ་འཛུགས་ཁག་པོ་རེད། ཅེས་དང་།

ཁོས་མུ་མཐུད་དུ། རིག་པའི་གཞུང་ལུགས་ཐད་ནས་སྔར་ནང་བསྟན་ཆོས་ལུགས་བོད་སྒྱུར་བྱས་པ་དང་། དེའི་རྒྱབ་ལྗོངས་ལ་དཔྱད་ཞིབ་བྱེད་པའི་རིག་པའི་གཞུང་ལུགས། དེ་བཞིན་བོད་ལ་གསོ་བ་རིག་པའི་གཞུང་ལུགས་ཚད་ལྡན་ཞིག་ཡོད་པ་འདིས་བོད་སྐད་ཡིག་རྒྱུན་འཛིན་བྱེད་པ་ད་ལྟའི་བར་འཐུས་ཤོར་དེ་ཙམ་བྱུང་མེད་པ་རེད་ལ། མ་འོངས་པར་བོད་སྐད་ཡིག་རྒྱུན་གནས་ཐུབ་མིན་གྱི་གནད་དོན་ཡང་འདི་ལ་ཐུག་ཡོད་པ་ཞིག་ཡིན། ད་བཙན་བྱོལ་ནང་འཐུས་ཤོར་འགྲོ་ས་གཙོ་བོ་རྒྱུ་རྐྱེན་ཕྱི་མ་གཉིས་ཆགས་ཡོད་པ་རེད། ཉིན་རེའི་འཚོ་གནས་དང་འབྲེལ་བའི་ལས་རིགས་ཏེ། འཛིན་སྐྱོང་དང་འཚོ་གོས། སྒེར་དང་སྤྱི་ཚོགས་ཁོར་ཡུག་ནང་བོད་སྐད་ཡིག་གི་གནས་བབ་ལ་ཉམ་ཆགས་དང་འཐུས་ཤོར་ཕྱིན་པ་རེད། དེ་བཞིན་བོད་སྐད་ཡིག་གི་སྟེང་ནས་སྒྱུ་རྩལ་གྱི་ཟུར་ངོས་སྣ་ཚོགས་ནས་ཕར་སྤྱི་ཚོགས་ལ་ཞབས་འདེགས་སྒྲུབ་ཕྱོགས་ནས་འཐུས་ཤོར་ཕྱིན་ཡོད་པ་རེད། འོན་ཀྱང་སྔོན་མའི་བཙན་བྱོལ་ནང་གི་བོད་སྐད་ཡིག་གི་གནས་བབ་དང་། ད་ལྟའི་གནས་བབ་བསྡུར་ཡོང་ཚེ་ད་ལྟའི་ཆར་ཕྱོགས་ཡོངས་ནས་འཕེལ་རྒྱས་ཀྱི་འགྱུར་བ་ཆེན་པོ་བྱུང་དང་འབྱུང་བཞིན་ཡོད་པ་རེད། ཅེས་བརྗོད་བྱུང་།

སྐལ་བཟང་ཉི་མ་ལགས་ཀྱིས་༼ བཙན་བྱོལ་དུ་བོད་སྐད་ཡིག་འཐུས་ཤོར་གྱི་རྩ་གནད་སྐོར ༽ ཞེས་པའི་ཐད་གཏམ་བཤད་གནང་དོན། སྤྱིར་བོད་སྐད་ཡིག་གི་འཐུས་ཤོར་གྱི་རྩ་གནད་ཕྱིའི་ཁོར་ཡུག་གི་ཤུགས་རྐྱེན་དང་། ནང་ཁུལ་མང་ཚོགས་ཀྱི་བསམ་བློའི་ཁ་ཕྱོགས་སོགས་རྒྱུ་རྐྱེན་གཅིག་གཉིས་ཤིག་མིན་རུང་། ཁ་ཡོད་ལག་ཡོད་ཀྱི་གནད་དོན་འགས་བོད་སྐད་ཡིག་གི་འཐུས་ཤོར་ལ་ཤུགས་རྐྱེན་ཐེབས་ཡོད་པ་རེད། དེ་ནི་ང་ཚོས་ལོ་རྒྱུས་རང་བཞིན་གྱི་བོད་སྐད་ཡིག་གི་བྱེད་ལས་དང་འཕེལ་རྒྱས་ལམ་ལུགས་ལ་ངོས་འཛིན་དང་རྒྱུན་འཛིན་བྱས་མ་ཐུབ་པ། དེ་བཞིན་བོད་སྤྱི་ཚོགས་ཀྱི་ངོས་ནས་སྐད་ཡིག་ལ་འཛིན་པའི་འདུ་ཤེས་ནི་དགོན་སྡེ་གྲྭ་ཚང་གི་སྦྱང་བྱ་ཞིག་དང་། ཁ་འདོན་དགེ་སྦྱོར་དང་འབྲེལ་བའི་དཔེ་ཀློག་ལ་མཁོ་བ་ལས་མི་སྒེར་དང་སྤྱི་ཚོགས་ཁྱོན་ཡོངས་ཀྱི་དར་རྒུད་དང་འབྲེལ་བ་ཡོད་པའི་འདུ་ཤེས་ཀྱི་བསམ་བློའི་རྨང་གཞི་སྨིན་མེད་པ་དེས། མང་ཚོགས་བྱིངས་ངོས་ནས་བོད་སྐད་ཡིག་ལ་ཤེས་རྟོགས་བྱ་རྒྱུའི་འདུ་ཤེས་མེད་པ། ཅུང་ཙམ་སྦྱང་ཡང་དཔེ་ཀློག་ཐུབ་ཙམ་ལས་བརྩོན་སེམས་མི་བྱེད་པ་རེད།  ཕྱོགས་ངོས་གཞན་ཞིག་ནས། བོད་སྐད་ཡིག་ལ་སྲུང་སྐྱོབ་དང་འཕེལ་རྒྱས་ཀྱི་གོམ་པ་སྤོ་ཕྱོགས་ནས་མི་སྒེར་རེ་ཟུང་དང་ཚོགས་སྡེ་རེ་ཟུང་ཙམ་མ་ཡིན་པར། གཞུང་དང་ཚོགས་སྡེ་ཁག མང་ཚོགས་སྤྱི་ཡོངས་ཀྱིས་ཉིན་རེའི་ལས་དོན་ཁྲོད་དངོས་སུ་ལག་བསྟར་བྱ་དགོས་པའི་གནད་དོན་ཞིག་རེད། ཅེས་བརྗོད་བྱུང་།

གསར་འགོད་པ། བནྡེ་སྐྱབས།