ཨང་སིན་སུའུ་ཀེ་ཀློད་གྲོལ།

ཁ་སང་ཕྱི་ཚེས་ ༡༣ རེས་གཟའ་སྤེན་པའི་ཉིན། འབར་མའི་དམངས་གཙོ་ཚོགས་པའི་དབུ་ཁྲིད་ལྕམ་ཨང་སིན་སུའུ་ཀེ་བཟང་བཙོན་ལས་ཀློད་གྲོལ་ཐོབ་ཡོད་འདུག སྐབས་དེར་མོ་རང་གི་རྗེས་འབྲང་བ་མི་སེར་སྟོང་ཕྲག་མང་པོ་ཁོང་མོའི་སྡོད་ཁང་གི་མཐའ་འཁོར་དུ་འཛོམས་ཏེ། དགའ་འབོད་ཤུགས་ཆེན་བྱས་ཡོད་འདུག་ལ། སྐབས་དེར་ཨང་སིན་སུའུ་ཀེ་མཆོག་གིས་ཀྱང་། ང་ཚོས་ད་བར་དཀའ་ལས་བརྒྱབ་པའི་དམིགས་འདུན་དེ་འགྲུབ་ཆེད་ཆིག་སྒྲིལ་ལ་ཤུགས་སྣོན་རྒྱག་རྒྱུ་གལ་ཆེན་ཡིན་ལ། གནད་དོན་གང་འདྲ་ཞིག་ཡིན་རུང་ཁུ་སིམ་པོ་དང་ཞི་ལྷོད་པོའི་ཐོག་བསྒྲུབ་རྒྱུ་གལ་ཆེན་ཡིན། སྐད་ཆ་བཤད་རྒྱུ་དང་ལས་དོན་བསྒྲུབ་རྒྱུའི་དུས་ཚོད་མ་འདྲ་བའི་གནས་སྐབས་ལ་བལྟ་དགོས་པ་རེད། འོན་ཀྱང་ང་ཚོའི་དམིགས་ཡུལ་དེ་མི་མང་མཐུན་ལམ་རྡོག་རྩ་ཆིག་སྒྲིལ་ཁོ་ནའི་ཐོག་འགྲུབ་ཐུབ་པ་ཞིག་ཡིན། ཞེས་བརྗོད་འདུག

ཁ་སང་གཟའ་སྤེན་པའི་ཉིན་གུང་ཙམ་ལ་ནམ་རྒྱུན་འབར་མའི་དམག་དཔུང་གིས་ཨང་སིན་སུའུ་ཀེ་ཡི་སྡོད་ཤག་གི་མཐའ་བསྐོར་ཏེ་བཀག་སྡོམ་བྱས་ཡོད་པ་དེ་ཕྱིར་འཐེན་བྱས་ཡོད་འདུག འོན་ཀྱང་འབར་མ་དྲག་པོའི་གཞུང་གིས་ཁོང་མོ་རྦད་དེ་ཀློད་གྲོལ་བཏང་ཡོད་མེད་ཀྱི་གསལ་བསྒྲགས་གང་ཡང་བྱས་མི་འདུག་ལ། ཨང་སིན་སུའུ་ཀེ་ཡི་ཕྱོགས་གཏོགས་དམངས་གཙོ་ཚོགས་པ་སོགས་ནས་ཀྱང་ཁོང་མོ་ཀློད་གྲོལ་ཐོབ་ཡོད་མེད་ཀྱི་ཁུངས་གནས་གསལ་བོ་འདྲ་ད་སྔ་གསལ་བསྒྲགས་བྱས་མི་འདུག

གོང་གི་གནད་ཚུལ་དེའི་ཐད་༧གོང་ས་མཆོག་གིས་ཉི་ཧོང་གི་གྲོང་ཁྱེར་ཧེ་རོ་ཞཱི་མའི་ནང་གསར་འགོད་པ་ཚོར། ཐེངས་འདིར་ལྕམ་ཨང་སིན་སུའུ་ཀེ་ཁོང་ཀློད་གྲོལ་བཏང་ཡོད་ཚེ་འདི་ནི་ཧ་ཅང་གི་དོན་དག་ཡག་པོ་ཞིག་རེད། འོན་ཀྱང་མོ་རང་བཙོན་གྲོལ་ཐོབ་པ་འདི་ཁོང་མོ་སྒེར་གྱི་དོན་དག་ཅིག་མ་རེད། དམངས་གཙོ་དང་རང་དབང་ལ་འཐབ་རྩོད་གནང་མཁན་འབར་མའི་མི་དམངས་ཡོངས་ལ་རང་དབང་ཐོབ་པ་ཞིག་མཚོན་ཐུབ་ཀྱི་ཡོད་པ་མ་ཟད། འབར་མ་གཞུང་ལའང་རྒྱལ་སྤྱིའི་སྡིངས་ཆའི་སྟེང་ཆེ་མཐོང་ཡོང་གི་རེད། ཅེས་སོགས་གསུངས་འདུག