བཙལ་ཡང་མ་རྙེད་པའི་བརྩེ་དུང་། བཅུ་གསུམ།

བདེ་སྐྱིད་འཚོས་ང་ལ་ཡང་མི་སྤྱི་མཚུངས་ཀྱི་རྨི་ལམ་དེ་ནི་ལོས་ཡོད། འོན་ཀྱང་། ལས་ངན་མ་ང་ལ་ཚེ་རིང་དོན་འགྲུབ་ལྟ་བའི་ཁྱོ་ག་དེ་འདྲའི་བཟང་བོ་ཞིག་གི་ལས་དབང་དེ་མེད་འགྲོ་བ་གང་ནས་ཤེས། ངའི་ཕ་མ་གཉིས་ཀྱིས་ཀུན་ཐར་སྐྱབས་ཁྲིད་དེ་ཕྱིར་སྡེ་བའི་ནང་དུ་ལོག་པ་དང་། ཚེ་རིང་དོན་འགྲུབ་ཀྱི་ཕ་མ་གཉིས་ཀྱིས་ཁོ་རང་སྲུང་ནས་སྨན་ཁང་དུ་བསྡད། ང་རང་ཆང་ཁང་དུ་སྐོར་ར་རེ་མི་རྒྱགས་ཐབས་མེད་བྱུང་། སྔ་མོ་སོང་ནས་སྒོར་མོ་དག་རྩིས་ལེན་བྱས་པ་དང་། ཆང་ཁང་དུ་ག་རེ་ཉོ་དགོས་པའི་རིགས་དང་ཚོང་ལས་ཀྱི་སྐོར་ཚང་མ་ཟ་ཁང་གི་འགན་འཛིན་སྐལ་འཕྲིན་ལ་རྩིས་སྤྲད་པ་ཡིན།

དགེ་རྒན་འབྲུག་འབུམ་རྒྱལ་ཡང་ཡང་ང་དང་ཁྱོ་ག་ཡོད་སའི་སྨན་ཁང་དུ་བཅར་བ་དང་ང་རང་ལ་སེམས་གསོ་ཆེས་མི་ཉུང་བ་ཞིག་གནང་། སྨན་པས་བཤད་ན། ད་ནི་སྨན་ཁང་དུ་བསྡད་པ་ལས་ནང་དུ་ལོན་ནས་ངལ་གསོ་བརྒྱབས་དེ་སྨན་གསོས་ན་འགྲིག་གི་ཡོད། གཅིག་བྱས་ན་ཁོ་རང་གི་དྲན་པ་གསོས་ནས་སྔར་བཞིན་ཆགས་ངེས་ཡིན། གཅིག་བྱས་ན་དྲན་པ་སྔར་བཞིན་བསྡོད་མིན་དེ་ནི་བཤད་དཀའ་མོ་ཞིག་རེད། ཁོ་རང་གི་ནད་ཀྱི་འབྱུང་རྩ་ནི་ཀླད་པའི་ནང་དུ་སྐྱོན་ཕྲན་པུ་ཞིག་ཐོར་འདུག་པ་དེ་རེད། སེམས་པ་མི་སྐྱིད་པའི་རིགས་གཏན་ནས་བྱུང་མི་ཉན་གི རབས་ཡིན་ན་ཁོ་རང་དགའ་བའི་ཡུལ་ལྗོངས་དང་གླུ་དབྱངས། བརྙན་འཕྲིན་བཅས་ལ་བལྟ་རུ་བཅུགས་ན་་ཡག་ས་རེད།

སྨན་པས་བཤད་པའི་སྐད་ཆ་དེ་དག་གིས་ང་རང་གི་སེམས་ནང་དུ་བཤད་མི་ཤེས་པའི་སྐྱོ་སྣང་ཞིག་དྲངས་ན་ཡང་། ཚེ་རིང་དོན་འགྲུབ་ཀྱི་མཐོང་ས་ནས་ང་རང་གཏན་ནས་ངུས་མེད་ལ། སྐྱོ་གདུང་གི་རྣམ་འགྱུར་ཡང་བསྟན་མེད། གང་ཐུབ་ཅི་ཐུབ་ཀྱིས་མགྱོགས་པོ་དྲགས་བསྐྱེད་ཡོང་གི་འདུག་ཟེར་ནས་བཤད་ཀྱི་འདུག་ཟེར་ནས་ཡང་བཤད་པ་ཡིན། ཁོ་རང་གི་ཕ་མ་གཉིས་ཀྱིས་སྐད་ཆ་དེ་གོ་བ་དང་། ཨ་ལགས་ཚང་ལ་ཕྱག་མོ་རེ་གཟིགས་ནས་ཞབས་བརྟན་རེ་སྒྲུབ་ན་ཡག་ནི་རེད་ཟེར།

ཚེ་རིང་དོན་འགྲུབ་ཀྱི་ཕ་རྒན་བཀྲ་ཤིས་ལྗོངས་དགོན་པ་རུ་ཕྱག་མོ་གཟིགས་དུ་སོང་ཤུལ་ནས། ང་དང་ཁོ་བོའི་མ་རྒན་བདེ་འཚོ། དགེ་རྒན་འབྲུག་འབུམ་རྒྱལ་ང་ཚོས་ཁོ་རང་ནང་དུ་བསུས་པ་ཡིན། དེ་ནས་བཟུང་ཁོ་རང་ཉལ་སའི་ནང་དུ་ལུས་པ་དང་། ཕ་མ་གཉིས་ཀྱིས་ཀྱང་ཞབས་བརྟན་ཆེས་མི་ཉུང་བ་ཞིག་སྒྲུབ་ཀྱང་། ངོ་གང་ཡང་ཤར་མ་སོང་་ལ། སྨན་པས་སྤྲད་པའི་སྨན་གྱིས་ཀྱང་ཕན་ཐོག་གང་ཡང་ཐོན་སོང་བསམ་པ་ཞིག་བྱུང་མ་སོང་་ཟེར་བཞིན་ཁོ་མོ་ང་ལ་འཐམ་ནས་ངུས་སོང་།

ངས་ཅི་ཞིག་བྱེད་དགོས་མིན་དེ་ཡང་མ་ཤེས་པར་རེ་ཞིག་རིང་ཁོ་མོ་ལ་མ་ངུ་། ད་མ་ངུ་། འཇིག་རྟེན་བོད་ཀྱི་གཏམ་དཔེ་ལ། སྐྱིད་དུས་སེམས་པ་ཆུང་དགོས། སྡུག་དུས་མགོ་འཕོང་མཐོ་དགོས་ཟེར་བ་རེད་ཅེས། མགོ་ལ་ལག་པའི་ཕྱིད་ཕྱིད་ཅིག་བྱས་པ་ཡིན། ང་རང་ཡང་འཚབ་འཚུབ་ཅིག་ཆགས་ནས་གར་བྱེད་འདིར་བྱེད་མེད་པའི་སྐབས་སུ། ངའི་ཨམ་ཕྲག་ནས་ཁ་པར་གྱི་སྒྲ་གྲགས་ཤིང་། རྒྱང་རིང་གི་མཛའ་མོ། ང་ཡི་སེམས་གཏིང་མེ་ཏོག ཁྱེད་ནི་གངས་རིའི་ཕ་རོལ་་་་་་

ཨ་རོགས་སུ་ཡིན་་་་་