ཉེ་ཆར་རྒྱ་གར་ལྷོ་ཕྱོགས་བོད་མི་གཞིས་སྒར་དུ་བོད་གཞུང་དམངས་རྒྱལ་ཡོངས་ཚོགས་ཆེན་ཐེངས་དང་པོ་ཚོགས་པའི་གོ་སྐབས་དང་བསྟུན་ཏེ། སྤེལ་ཀོབ་བོད་མིའི་གཞིས་གྲོང་ཁག་ཏུ་ཚོང་ལས་གཉེར་གྱིན་པའི་བོད་ནས་གསར་དུ་འབྱོར་བ་སྐོར་ཞིག་གིས་སྤྱི་འཐུས་ཚོགས་གཙོ་གཞོན་གཉིས་བརྒྱུད་མི་གྲངས་ ༡༢༦ ཙམ་གྱིས་ས་རྟགས་བརྒྱབ་ཡོད་པའི་སྙན་ཞུ་ཞིག་ཚོགས་ཆེན་སྟེང་ཕུལ་འདུག སྙན་ཞུ་དེའི་ནང་དོན། སྦེལ་ཀོབ་ཁུལ་གྱི་བོད་ནས་གསར་དུ་ཕེབས་མཁན་མང་པོ་ཞིག་ལ་ས་ཞིང་དང་སྡོད་ཁང་སོགས་ཀྱི་ཐོབ་ཐང་རག་གི་མེད་པ་མ་ཟད། ཐ་ན་གཞིས་ཆགས་ནང་གི་མི་ཁོངས་ལ་ཡང་ཚུད་ཐུབ་ཀྱི་མེད་པའི་དཀའ་ངལ་མང་པོ་ཞིག་ཡོད་སྐོར་བཀོད་འདུག
སྙན་ཞུ་དེའི་ནང་དོན་དངོས་ནི། ཕྱི་ལོ་ ༡༩༧༠ ཡས་མས་ནས་བོད་གཞིས་བྱེས་གཉིས་བར་གཉེན་འཕྲད་འགྲོ་འོང་གི་སྒོ་ཕྱེས་ཏེ། གཞིས་བྱེས་ངོ་འཕྲད་ཀྱི་གོ་སྐབས་བྱུང་། སྐབས་དེ་ནས་བཟུང་བཙན་བྱོལ་བོད་གཞུང་དམངས་ལ་རེ་ལྟོས་བྱས་ཏེ་ཧི་མ་ལ་ཡི་རི་བོ་བརྒྱུད་བཙན་བྱོལ་དུ་ཡོང་མཁན་ཉིན་རེ་བཞིན་ཇེ་མང་དུ་ཕྱིན་ཡོད། དེ་དག་བཙན་བྱོལ་བོད་གཞུང་དམངས་ཀྱི་ལྟ་སྐྱོང་འོག་སློབ་འཇུག་དང་དགོན་སྡེ་ཁག་ཏུ་གཏོང་གནང་མཛད་ཡོད་ཀྱང་། སློབ་གྲྭ་ཁག་ནས་ཐོན་པའི་སློབ་ཕྲུག་གིས་མཚོན་པའི་མང་པོ་ཞིག་ལ་ཆབ་སྲིད་ཀྱི་གནད་དོན་དབང་གིས་ཕྱིར་ཕ་ཡུལ་དུ་ལོག་ས་མེད་པ་ཆགས་ཡོད་ལ། བཙན་བྱོལ་ནང་འཚོ་བ་སྐྱེལ་རྒྱུར་འཚོ་རྟེན་དང་ས་ཞིང་ཅི་གང་མེད་པ་མ་ཟད། ཐ་ན་སྡོད་ཁང་ཙམ་ཡང་མེད་སྟབས། ཡ་ང་བའི་དཀའ་ངལ་མི་ཉུང་བ་ཞིག་ཕྲད་དང་འཕྲད་ཀྱིན་ཡོད།
བོད་པ་སྐྱབས་བཅོལ་དུ་ཐོག་མར་འབྱོར་སྐབས་རྒྱ་གར་གཞུང་གིས་གནང་བའི་ས་ཆ་དེ་དག་མི་སྒེར་ལ་གནང་བ་ཡིན་ནམ། ༧གོང་ས་མཆོག་གིས་དབུ་འཁྲིད་པའི་བཙན་བྱོལ་བོད་གཞུང་ལ་གནང་བ་ཡིན་གསལ་བོ་བྱུང་ན་བསམ་གྱི་འདུག གང་ཡིན་ཞེ་ན། གཞིས་ཆགས་ཁག་ལ་མཚོན་ན་ཁྱིམ་མི་ཡོངས་རྫོགས་ཕྱི་རྒྱལ་ཁག་ཏུ་ཕྱིན་ཚར་ཡང་། ས་ཁང་མུ་མཐུད་བདག་འཛིན་དང་ཉོ་ཚོང་བྱེད་བཞིན་ཡོད། གསར་འབྱོར་བ་ཞིག་གཞིས་ཆགས་ཤིག་ལ་གཉེན་སྒྲིག་བྱས་ཀྱང་། གཞིས་ཆགས་ཀྱི་ཐོབ་ཐང་གཏན་ནས་རག་གི་མེད་པ་མ་ཟད། ཁྱོད་ལ་གྲོང་སྡེའི་ཐོབ་ཐང་མེད་པས་ཐུགས་འགན་བཞེས་མི་དགོས་ཚུལ་བཤད་དེ། གྲོང་སྡེའི་འཐུས་མི་དང་སྤྱི་མིའི་དབང་ཚད་སྤྲོད་ཀྱི་མེད་ལ། ཐ་ན་རྐང་རྩེད་སྤོ་ལོ་རྩེད་རྒྱུ་ཚུན་ལ་བཀག་འགོག་བྱེད་ཀྱིན་ཡོད།
སྤྱོད་ཚུལ་འདི་དག་བཙན་བྱོལ་བོད་གཞུང་གིས་བཟོས་པའི་སྒྲིག་གཞི་ཞིག་ཡིན་ནམ། ཡང་ན་ས་གནས་ལས་བྱེད་ཁག་ཅིག་གིས་རང་བཟོ་བྱས་པ་རེད། གང་ལྟར་གཞིས་ཆགས་ཀྱི་ཐོབ་ཐང་གཡུགས་ཏེ། ཕྱི་རྒྱལ་གྱི་མི་སེར་ཆགས་ཟིན་པ་ཚོར་མུ་མཐུད་སྔར་གྱི་ས་ཞིང་བདག་གི་ཡོད་དམ། གལ་ཏེ་བདག་གི་མེད་ན་དེ་ལུགས་དང་། བདག་གི་ཡོད་ན་དེ་མཐུན་གྱིས་བོད་ནས་༧གོང་ས་མཆོག་དང་བཙན་བྱོལ་བོད་གཞུང་ལ་རེ་བ་བརྒྱབ་ནས་ཡོང་བའི་གསར་འབྱོར་བ་ཚོས་མི་ཚེ་གང་བོར་ཁང་པ་གཡར་ནས་འདུག་མི་དགོས་པ་ཞིག་དང་། བཙན་བྱོལ་བོད་མི་སྤྱི་མཚུངས་ལྟར་མི་ཚེ་སྐྱེལ་ཐབས་ཀྱི་བདག་སྐྱོང་ཞིག་ངེས་པར་གནང་སྐྱོང་ཡོང་བའི་རེ་བ་ཞུ་བཞིན་ཡོད། བཙན་བྱོལ་བོད་གཞུང་གིས་བོད་མི་ཚང་མར་བདག་སྐྱོང་བྱེད་སྟངས་གཅིག་མཚུངས་ལས་གསར་རྙིང་གི་དབྱེ་བ་མེད་ན། གསར་འབྱོར་བ་དཀའ་ངལ་ཅན་དག་ལ་དེ་ལུགས་ཀྱི་བདག་སྐྱོང་ལམ་སྟོན་ནུས་ལྡན་ཞིག་གནང་སྐྱོང་ཡོང་པ་མཁྱེན། ཞེས་བཀོད་འདུག
གསར་འགོད་པས་ཞུ་ཡིག་དེ་འབྲི་མཁན་བཀྲ་ཤིས་དོན་གྲུབ་བཙལ་ཏེ། སྙན་ཞུ་དེ་འདྲ་ཞིག་འབྲི་དགོས་པའི་རྒྱུ་མཚན་དང་། དངོས་ཡོད་གནས་སྟངས་གང་འདྲ་ཡིན་མིན་བཅར་འདྲི་ཞུས་པར་ཁོས་ངོ་སྤྲོད་གནང་དོན། ངས་སྔོན་མ་ནས་འདིའི་སྐོར་གྱི་དཀའ་ངལ་མང་པོ་ཞིག་མཐོང་གི་ཡོད། ཉིན་ཞིག་གྲོང་སྡེ་དང་པོའི་ནང་ལཱེང་ཧྥིན་བཙོང་མཁན་ཀརྨ་ཟེར་བ་ཞིག་ཡོད་པ་ཁོ་ལ་འདིའི་སྐོར་བཤད་དེ། ངེད་གཉིས་སྙན་ཞུ་འདི་འདྲ་ཞིག་འབྲི་རྒྱུ་བྱས་པ་ཡིན། བྲིས་ཚར་རྗེས་ནང་དོན་ལ་ཁོང་ཚོས་ཞིབ་འཇུག་བྱས་པ་རེད། སྐབས་དེར་མི་མང་པོ་ཞིག་གིས་ངེད་གཉིས་ཀྱི་སྙན་ཞུ་དེ་ལ་རྒྱབ་སྐྱོར་ཡོད་ཟེར། དེ་ནས་ང་ཚོ་མི་ ༤ གྲོང་སྡེ་ཁག་ཏུ་ཕྱིན་ཏེ་སྙན་ཞུ་དེའི་ནང་དོན་ལ་འདོད་པ་ཡོད་མེད་དང་། ཡོད་ན་ས་ཡིག་རྒྱག་བཅུག་པ་ཡིན། གྲོང་སྡེ་ཚང་མའི་ནང་འགྲོ་མ་ཐུབ་ཀྱང་ས་ཡིག་ ༡༢༦ ཙམ་བྱུང་སོང་། ཞེས་བརྗོད་བྱུང་།
ཁོས་མུ་མཐུད་དུ་ཁོ་རང་སྒེར་གྱི་ལོ་རྒྱུས་སྐོར་བརྗོད་དོན། ང་རང་སྒེར་ལ་མཚོན་ན་དཀའ་ངལ་མེད། གང་ཡིན་ཟེར་ན། སྤྱིར་ངའི་ཕ་ཡུལ་རྫ་ཆུའི་ཁ་བ་ཡིན། ༡༩༩༦ ལོར་རྒྱ་གར་དུ་ཡོང་སྟེ་གསོག་སྒར་སློབ་གྲྭར་ཞུགས་པ་ཡིན། ལོ་གཉིས་བསྡད་རྗེས་ལྷོ་ཕྱོགས་ལ་ཡོང་སྟེ་བཀའ་བརྒྱུད་དགོན་པ་ནས་ཚེམ་བུ་བརྒྱབ་པ་དང་། རིམ་གྱིས་གཞིས་ཆགས་གསར་པ་གྲོང་སྡེ་བཅུ་གསུམ་པའི་བུ་མོ་ཞིག་དང་མཉམ་དུ་འཚོ་བ་བསྐྱལ་བ་ཡིན། ༢༠༠༦ ལོར་ང་རང་གི་བཟའ་ཟླ་གྲོངས་སོང་། ང་མུ་མཐུད་དུ་མོ་རང་གི་ས་ཆའི་ཐོག་ལ་ཁང་པ་བརྒྱབ་སྟེ་བསྡད་ཡོད། འདི་དག་ངའི་སྐྱེས་དམན་གྱི་གཉེན་ཉེ་ཚོའི་བཀའ་དྲིན་ཡིན། འོན་ཀྱང་ངས་སྙན་ཞུ་འདི་འདྲ་ཞིག་འབྲི་དོན། ང་བོད་པ་ཞིག་ཡིན་པ་དང་། ངས་འདིའི་སྐོར་གྱི་དཀའ་ངལ་མང་པོ་ཞིག་ཡོད་པ་མཐོང་བཞིན་དུ་སྣང་མེད་བཏང་ན་འགྲིག་གི་མ་རེད། སོ་སོར་དཀའ་ངལ་མེད་ཀྱང་གཞན་གྱི་དཀའ་ངལ་ལ་མ་བཟོད་པར་བྲིས་པ་ཡིན། ཡང་སྙན་ཞུ་འདི་བརྒྱུད་དེ་གླེང་ཕྱོགས་འདྲ་མིན་བཟོ་བ་དང་། སྙན་ཞུའི་ནང་དོན་ལ་མཚོན་མདོག་སྣ་ཚོགས་བྱུག་ན་འགྲིག་གི་མ་རེད། མི་མང་གིས་སྙན་ཞུའི་ནང་དུ་གང་བཀོད་ཡོད་པ་དེ་ལ་ཞིབ་ཚགས་ཀྱིས་གཟིགས་ཏེ་ས་རྟགས་བསྐྱོན་པ་རེད། ཅེས་ངོ་སྤྲོད་གནང་བྱུང་།
གོང་གི་གནད་དོན་དེའི་ཐད་གསར་འགོད་པ་སྦེལ་ཀོབ་ལུགས་ཟུང་བསམ་འགྲུབ་གླིང་ས་གནས་མགོ་འཛིན་མགོ་མགོན་པོ་བཀྲ་ཤིས་ལགས་སུ་ཐུག་འཕྲད་བྱས་ཏེ། གསར་འབྱོར་བ་ཚོའི་དཀའ་ངལ་དེ་དག་མཁྱེན་རྟོགས་ཡོད་མེད་དང་། མཁྱེན་རྟོགས་ཡོད་ན་སེལ་ཐབས་གང་འདྲ་གནང་གི་ཡོད་མེད་བཅར་འདྲི་ཞུས་པར་ཁོང་གིས། བོད་ནས་གསར་དུ་ཕེབས་མཁན་གཞིས་ཆགས་དང་ས་ཁང་མེད་པའི་མི་བརྒྱ་སྐོར་ཞིག་གིས་སྙན་ཞུ་ཞིག་བྲིས་འདུག དེའི་ནང་ས་ཆ་དང་ཁང་པའི་དཀའ་ངལ་སྐོར་བཀོད་འདུག གནད་དོན་འདིའི་ཐོག་ལ་ཚོགས་གཞོན་རྒྱ་རི་སྒྲོལ་མ་མཆོག་ས་གནས་མགོ་འཛིན་ལས་ཁུངས་ལ་བཅར་ཏེ། དཀའ་ངལ་འདི་རིགས་ལ་བདག་པོ་ཇི་
ལྟར་རྒྱག་གི་ཡོད་མེད་བཀའ་འདྲི་གནང་སོང་ལ། བོད་ནས་གསར་དུ་ཕེབས་མཁན་ཚོ་གཞིས་ཆགས་ཀྱི་མི་ཁོངས་སུ་ཚུད་ཐབས་བྱ་དགོས་པའི་སྐོར་གྱི་ལམ་སྟོན་ཡང་གནང་སོང་། མ་འོངས་པར་ང་ཚོས་བོད་ནས་གསར་དུ་ཕེབས་མཁན་ཚོ་གཞིས་ཆགས་ཀྱི་མི་ཁོངས་སུ་ཚུད་ཐབས་བྱ་རྒྱུ་ཡིན། ཅེས་དང་།
གནད་དོན་གཉིས་པ་ཁོང་ཚོས་ས་ཁང་གནང་དགོས་པའི་སྐོར་ཞིག་ཞུས་འདུག ཕྱི་རྒྱལ་ཁག་ཏུ་ཕྱིན་ཚར་བ་ཚོའི་ས་ཁང་ཁོང་ཚོར་ཐོབ་ཐབས་ཤིག་གནང་རོགས་ཟེར་གྱི་འདུག དེ་ཁག་པོ་རེད། ས་ཆ་དང་ཁང་པའི་སྐོར་ལ་སྔོན་མ་ནས་སྒྲིག་གཞི་གཏན་འབེབས་ཡོད་པ་རེད། སྒྲིག་གཞི་གཞིར་བཟུང་འགྲོ་དགོས་པ་རེད། བོད་ནས་གསར་དུ་ཕེབས་མཁན་ཚོ་ལ། ས་ཞིང་དང་ཁང་པ་གཉིས་ཕུད་པའི་བདེ་སྡུག་གང་ཞིག་ཡོད་ཀྱང་། ང་ཚོས་སེལ་ཐབས་བྱ་དགོས་པ་ང་ཚོའི་ལས་འགན་རེད། ཁོ་ཚོ་མི་ཁོངས་སུ་འཇུག་དགོས་པའི་རྒྱུ་མཚན་གང་ཡིན་ཟེར་ན། ཉམ་ཐག་ཞིབ་འཇུག་ཚོགས་ཆུང་ལ་མི་ཁོངས་ཞིག་དགོས་པ་རེད། མི་ཁོངས་མེད་ན་ཉམ་ཐག་ནང་འཇུག་ཐུབ་ཀྱི་ཡོད་པ་མ་རེད། ཁོང་ཚོས་ས་ཞིང་དང་ཁང་པའི་སྐོར་བཤད་ཡོད་པ་དེ་རིགས་བོད་གཞུང་དང་འབྲེལ་བ་ཞུས་ཏེ། ཐབས་ལམ་བཙལ་དགོས་པ་རེད་མ་གཏོགས་ང་ཚོར་དབང་ཚད་ཡོད་པ་མ་རེད། ཅེས་གསལ་བཤད་གནང་སོང་།
བོད་གཞུང་དམངས་རྒྱལ་ཡོངས་ཚོགས་ཆེན་སྟེང་སྙན་ཞུ་དེ་དང་འབྲེལ་ཏེ་གྲོས་ཆོད་ཅིག་བཞག་ཡོད་པའི་ནང་། “གཞིས་ཆགས་སྲ་བརྟན་ཆེད་གཞིས་ཆགས་ནང་གནས་སྡོད་བྱེད་མཁན་མི་འབོར་དགོས་པ་དང་། ཁ་ཐོར་དུ་གནས་སྡོད་བྱེད་བཞིན་པའི་ཁ་ཐོར་མི་མང་གི་དཀའ་ངལ་སེལ་རྒྱུ་སོགས་ལ་དམིགས་ཏེ། རྒྱ་བལ་འབྲུག་གསུམ་ནང་ལོ་མང་ཁ་ཐོར་དུ་གནས་སྡོད་བྱེད་བཞིན་པའི་བོད་མི་དང་། རྒྱ་བལ་འབྲུག་གསུམ་གྱི་ས་གནས་གང་སར་གནས་པའི་གསར་འབྱོར་བ་སོགས་ཁ་ཐོར་ཡོངས་ལ་བཀའ་ཤག་དང་། སྤྱི་འཐུས་ལྷན་ཚོགས་སོགས་འབྲེལ་ཡོད་ལས་ཁུངས་ནས་སྡོད་ཁང་བསྐྲུན་ཐབས་སོགས་ཀྱི་དགོངས་བཞེས་དང་། མཛད་ཕྱོགས་གནང་སྐྱབས་ཡོང་རྒྱུར་འབྲེལ་ཡོད་ལ་འབོད་སྐུལ་ཞུ་རྒྱུ” ཞེས་སྤྱི་མོས་བྱུང་འདུག
ཉེ་ཆར་གསར་འགོད་པ་བོད་མི་མང་སྤྱི་འཐུས་ཚོགས་གཙོ་མཆོག་གི་དྲུང་དུ་བཅར་ཏེ། གྲོས་དོན་དེའི་ཐད་བཀའ་སྤྱི་གཉིས་ནས་མཇུག་སྐྱོང་གང་འདྲ་གནང་གི་ཡོད་མེད་སྐོར་བཀའ་འདྲི་ཞུས་སྐབས་ཁོང་གིས། རྒྱལ་ཡོངས་ཚོགས་སྐབས་ང་ཚོར་སྙན་ཞུ་དེ་སྤྲད་སོང་། ཚོགས་ཆེན་ཐོག་གཞིས་ཆགས་སྲ་བརྟན་དང་འབྲེལ་བའི་ཚོགས་ཆུང་ཁག་གཉིས་ཡོད་སྟབས། དེ་གཉིས་ལ་སྙན་ཞུ་དེའི་ངོ་བཤུས་རེ་ཕུལ་དེ། སྤྱི་ཡོངས་ཀྱི་གཞིས་ཆགས་སྲ་བརྟན་གྱི་དོན་ཚན་ ༢༨ པའི་ནང་བཀོད་ཡོད་པའི་ནང་དོན་དེ་ཆགས་ཡོད། དེའི་ཐོག་ལ་བོད་ནས་གསར་དུ་འབྱོར་བ་ཚོ་ལ། གཞིས་ཆགས་ནང་ཁང་སྟོང་དང་། ས་ཞིང་འདེབས་ལས་བྱེད་མཁན་མེད་པ་དེ་དག་བསྡུ་རུབ་ཀྱིས་བགོ་བཤའ་བརྒྱབ་སྟེ། ཁོང་ཚོའི་སྡོད་གནས་དང་འཚོ་བ་བསྐྱལ་བར་འགྲོ་སྟངས་བཟོ་ཐུབ་མིན་སྐོར་ཞིག་བཀོད་ཡོད། ཉེ་ཆར་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་བའི་ཐོག གཞུང་དམངས་ཚོགས་ཆེན་དང་འབྲེལ་བའི་གྲོས་མཆོད་བཞག་པ་ཁག སྤྱི་འཐུས་རྒྱུན་ལས་ཀྱིས་དབྱེ་བསྲེས་བྱས་ཏེ་བཀའ་ཤག་གིས་བྱ་དགོས་པ་གང་དང་། སྤྱི་འཐུས་ཀྱི་བྱ་དགོས་པ་གང་སོགས་ཁ་ཁ་བཟོས་ཏེ་བཀའ་ཤག་ལ་ཕུལ་ཡོད། ཅེས་དང་།
ཁོང་གིས་མུ་མཐུད་དུ། སྤྱིར་བཏང་ལས་དོན་དེ་འཛིན་སྐྱོང་གིས་བསྒྲུབ་དགོས་པ་ཞིག་རེད། རྒྱལ་ཡོངས་ཚོགས་ཆེན་གྱི་བསམ་ཚུལ་ཕྱོགས་བསྡོམས་ཀྱི་དོན་ཚན་ཁག་གི་ཐོག ད་སྔ་སྤྱི་འཐུས་རྒྱུན་ལས་ནང་གོ་བསྡུར་བྱ་རྒྱུ་བྱུང་མ་སོང་། མི་འགྱངས་པར་སྔོན་རྩིས་བསྐྱར་བཅོས་ཀྱི་ལས་དོན་ཞིག་ཡོད་པ་རེད། དེ་དུས་ཏན་ཏན་གོ་བསྡུར་ཡོང་གི་རེད། གནད་དོན་འདིའི་ཐོག་སྤྱི་འཐུས་རྒྱུན་ལས་ལ་བསམ་ཚུལ་ག་རེ་ཡོད་པ་དང་། དེའི་རྗེས་བཀའ་ཤག་ལ་དགོངས་ཚུལ་གང་ཡོད་པའང་གསལ་བོ་ཤེས་ཡོང་གི་རེད། སྤྱིར་སྙན་ཞུ་འབུལ་མཁན་མང་པོ་འདུག་ལ། དཀའ་ངལ་ཡོད་པའང་དངོས་ཡོད་རེད། འདིའི་སྐོར་སྔོན་མ་བཀའ་ཤག་གིས་སྤྱི་འཐུས་ནང་གསལ་བཤད་ཀྱང་གནང་བ་རེད།
ས་ཁང་སྒྲིག་གཞིའི་ནང་ཁྱིམ་ཚང་གཅིག་ཏུ་མི་གཅིག་ལས་ལྷག་མེད་ཀྱང་། ས་ཁང་མུ་མཐུད་ཉར་ཆོག་གི་རེད། དེ་དག་ལ་ཞིབ་འཇུག་མཐིལ་ཕྱིན་པ་ཞིག་བྱས་ཏེ། ཐབས་ལམ་འཚོལ་དགོས་པ་རེད་མ་གཏོགས་སེམས་ཚོར་ཙམ་གྱི་རྗེས་སུ་བརྒྱུགས་ཏེ། འདི་འདྲ་ཞིག་དགོས་ཀྱི་འདུག་ཟེར་ན་ཏག་ཏག་བསྡད་ཡོད་པ་མ་རེད། ད་སྔ་གནད་དོན་འདིའི་ཐོག་ལ་ང་ཚོགས་གཙོ་སྒེར་གྱི་ངོས་ནས་བསམ་ཚུལ་བཤད་ན་འགྲིག་གི་མ་རེད། རྒྱུན་ལས་ནང་གོ་བསྡུར་བྱ་དགོས་པ་རེད། ཅེས་གསུངས་སོང་།
ཡང་ཁོང་ལ་སྙན་ཞུའི་ནང་གཞིས་ཆགས་ནང་གི་ས་ཁང་གི་བདག་དབང་སྐོར་བཤད་ཡོད་པའི་ཐད་ལ། ཞིབ་ཚགས་ཤེས་ཀྱི་མེད་མོད། སྤྱི་ཡོངས་ནས་བཤད་ན། ནང་མི་ཆ་ཚང་ཕྱི་རྒྱལ་དུ་ཕྱིན་ཏེ་ཁང་པ་སྟོང་བར་ལུས་ཡོད་པ་དེ་འདྲ་དཀོན་པོ་ཡིན་རྒྱུ་རེད། ཅེས་དང་།
གཞིས་ཆགས་ཀྱི་མི་ཁོངས་སུ་ཚུད་མིན་ཐད་ལ་ཁོང་གིས། དངོས་གནས་བྱས་ན་བོད་པ་ཞིག་ཡིན་པའི་ཆ་ནས་གཞིས་མིའི་ཁུངས་སུ་ཚུད་དགོས་པ་རེད་ལ། ཐོབ་ཐང་ཆ་ཚང་རག་དགོས་པ་རེད། སྔོན་མ་ཞིག་ལ་ཟམ་གདོང་རིན་པོ་ཆེ་མཆོག་གིས་གྲོས་ཚོགས་ནང་གསལ་བཤད་གནང་སྐབས། ས་གནས་གཅིག་ནས་གཞན་ཞིག་ལ་མག་པར་འགྲོ་མཁན་ཞིག་ལ་མཚོན་ན། ཁོ་རང་ཡོང་ཁོངས་ཀྱི་ས་ཁང་ཆ་ཚང་བློས་བཏང་ཟིན་སྟབས། མག་པར་འགྲོ་ཡུལ་དེའི་གཞིས་ཁོངས་སུ་ཚུད་དགོས་པ་རེད། དེ་ལ་སོ་སོ་ཡོང་ཁོངས་ནས་དཔུང་ཡིག་ཅིག་དགོས་པ་རེད། འོན་ཀྱང་། བོད་ནས་གསར་དུ་ཕེབས་མཁན་ཞིག་ལ་མཚོན་ན། ས་ཁུལ་གཞན་གྱི་ཐོབ་ཐང་ཐོག་མ་ནས་མེད་སྟབས། སྣེ་ལེན་ཁང་དང་ངྷ་ས་གཞིས་མགོ་གང་རུང་ཞིག་གི་དཔུང་ཡིག་ཡོད་ན་འགྲིག་གི་ཡོད་པ་རེད་ཟེར་ནས་གསལ་བཤད་གནང་སོང་། དེར་བརྟེན། ས་ཁུལ་གཞན་གྱི་ཐོབ་ཐང་ཡོད་ན་འདྲ་ལ། གང་ཡང་མེད་པའི་དང་ཟུར་དེ་འདྲ་ཡིན་ནའང་འདྲ། བོད་ནས་གསར་དུ་ཕེབས་མཁན་སུ་ཞིག་ཡིན་ན་ཡང་། གཞིས་ཆགས་ཐོབ་ཁོངས་ཡོད་མཁན་ཞིག་དང་གཉེན་སྒྲིག་བྱས་པ་ཡིན་ན། གཞིས་ཆགས་དེའི་མི་ཁོངས་ཆགས་འགྲོ་བཞིན་ཡོད། ས་གནས་ཤིག་གི་མི་ཁོངས་ཆགས་མིན་དེ་འོས་བསྡུའི་སྒྲིག་གཞིའི་ནང་གསལ་བོར་ཡོད། ས་གནས་གཅིག་ཏུ་བསླེབས་ཏེ་ལོ་ ༥ ཕྱིན་པ་ཡིན་ན། ས་གནས་དེ་ཀའི་མི་ཁོངས་ཆགས་ཀྱི་ཡོད་ཅེས་གསལ་ཡོད། དེ་གཞིར་བཟུང་ས་གནས་འབྲེལ་ཡོད་ཚོས་ངོས་འཛིན་བྱ་དགོས་པ་རེད། ཅེས་གསུངས་སོང་།
གསར་འགོད་པ། དོན་འགྲུབ་བཀྲ་ཤིས།
འོ་འདི་འདྲའི་རིགས་ལ་ཚང་མས་དོ་སྣང་བྱེད་རྒྱུ་གལ་ཆེན་རེད་འདུག གང་ཡིན་ཞེ་ན་ང་ཚོ་ཚང་མ་བཙན་བྱོལ་བ་ཡིན་པ་གཅིག་པ་དང་ལས་འགན་དང་ཐོབ་ཐང་དེ་ཡང་གཅིག་པ་ཡིན་དགོས་སྙམ།
རྒྱབ་སྐྱོར་ཡོད།
བཙན་བྱོལ་གཞུང་གི་ངོས་ནས་གསར་འབྱོར་རྣམས་ལ་ལྟ་སྐྱོང་གནང་གི་ཡོད་ཀྱང་ད་དུང་ལྡང་གིན་མེད། དེ་དངོས་ཡོད་རེད། སྤྱིར་བཏང་གི་རྒྱལ་སྤྱིའི་སྐྱབས་བཅོལ་བའི་ཐོབ་ཐང་ཁག་ཀྱང་དོ་བདག་ལ་ཡག་པོ་ཞིག་ཐོབ་ཀྱི་མི་འདུག རྒྱལ་སྤྱིའི་ནང་སྐྱབས་བཅོལ་བ་མི་རེ་ལ་ཉིན་རེར་མ་མཐར་འཚོ་དོད་འདི་ཙམ་དགོས་པ་རེད་ཟེར་བའི་གཏན་འབེབས་ཀྱང་ཡོད་པ་རེད།
རྩོམ་མཆན་འདེབས་སྐབས་འདས་མ་འོངས་ད་ལྟ་གསུམ་ཀ་ལ་བསམ་མནོ་གཏོང་ནས་མཆན་འདེབས་ན་ལེགས་སྙམ་ མ་གཏོགས་བོད་མི་རིགས་དབར་ལ་དཀྲུགས་ཤིང་ཐེབས་ཉེན་ཡོད་
རེད་ཡ་དཀྲུགས་ཤིང་རྒྱག་མཁན་རིགས་རྣམས་ཕྱིར་ལ་ཕྱིན་ཀྱང་བཙན་བྱོལ་དུ་སྡོད་མཁན་ནང་དུ་མི་མཐུན་པ་དང་ཡིད་མི་ཆེས་པའི་གནས་སུ་ལྷུང་ན་ཡག་པོ་མེད་སྙམ་ སྤྱིར་བཏང་ས་ཁུལ་གང་དུ་བསྡད་ཀྱང་དཀའ་ངལ་ཤིག་མེད་པ་ཁྱོན་ནས་མེད་ ད་ལྟའི་དཀའ་ངལ་འདི་ནི་གསར་འབྱོར་བ་འགས་བཙན་བྱོལ་བའི་ཁྲོད་དུ་གནས་སྐབས་ཀྱི་དཀའ་ངལ་ཤིག་ཡིན་ ཡང་ཕྱོགས་གཞན་ཞིག་ནས་གཞིས་ཆགས་ནས་འཚར་ལོངས་བྱུང་མཁན་རྣམས་གསར་འབྱོར་བ་གྲངས་མང་ཀྱི་ཁྲོད་དུ་གནས་སྐབས་མཐོང་ཆུང་དང་ཁྱད་གསོད་ ཕན་མེད་གནོད་མེད་ཟེར་བ་དང་ མི་རིགས་ལ་ལར་ཞེན་མེད་པ་ཟེར་བ་དང་ གྲོད་ཁོག་བཙོང་དུ་སླེབས་པ་རེད་ཟེར་བ་སོགས་ཀྱི་ཚིག་ངན་སྨྲས་པ་སོགས་ཀྱིས་གཞིས་ཆགས་ཀྱི་སེམས་ཁོངས་སུ་ན་ཟུག་ཇི་ཙམ་སློང་གིན་ཡོད་མེད་འདི་ཕྱོགས་གཞན་གྱི་སེམས་ནང་ནམ་ཡང་འཁོར་མྱོང་མེད་ གང་ཡིན་ཟེར་ན་ཚོར་བ་དེ་ལྟ་བུ་ཚགས་པར་དང་མི་ཚོགས་ཁྲོད་དུ་སློང་མྱོང་མེད་
འདི་ནི་སྦེལ་ཀོབ་གཞིས་ཆགས་གཅིག་བུ་མ་ཡིན་པ་དུས་རྒྱུན་དཀའ་ངལ་འདི་མྱོང་དང་མྱོང་མུས་ཡིན་པའི་བོད་ནས་གསར་དུ་ཕེབས་མཁན་རྣམ་པར་དངོས་གནས་ཐུགས་ཁག་མེད། ས་ཆ་དང་ཁང་པའི་བདག་དབང་སོགས་ཀྱི་སྐོར་སྔར་ནས་སྒྲིག་གཞི་གཏན་འབེབས་བྱས་ཟིན་ཡོད་ཀྱང་གོང་གི་དཀའ་ངལ་དེ་རིགས་མི་མཐུད་དུ་ཡོང་བཞིན་ཡོད་པས་འབྲེལ་ཡོད་ཚོགས་སྡེ་ཁག་ནས་ཞིབ་འཇུག་ཚད་ཐུབ་ཞིག་བྱེད་དགོས་པ་ནི་གནད་དུ་ཆེའོ།།
རེ་བའི་མིག་ཟུང་བཙན་བྱོལ་ལ་བཅོས་ཀྱང་། ཉམས་ཐག་མི་ལ་རེ་བ་མེད་ནས་སྐད་ངན་ཤོར་སོང་། བཙན་བྱོལ་ལགས་ཁ་མིག་ཆེ་རུ་ཕྱེས་ནས་ཀུན་ལ་ལྟས་ན་གཞན་གྱིས་གོ་ཡང་ངོ་ཚ་མེད་མོད། འདི་ན་གསལ་འབྱོར་བ་ཞིག་གིས་རེ་བ་ཡིན། སློབ་མཐར་ཕྱིན་ཀྱང་ཕྱིར་རང་ཡུལ་ཏུ་འགྲོ་ས་མེད་ནོ་བཙན་བྱོལ་བའི་ལོས་ཤེས་།
ན་ནིངས་ཤིག་ནས་འདིར་ཕྱོགས་སུ་གསར་འབྱོར་བའི་མྱོང་བཞིན་པ་
མང་པོ་གོ་ཐོས་སུ་གྱུར་འདུག བོད་མི་ཁ་ཤས་ནམ་རྒྱུན་ནང་ཁུལ་ལ་
ཚོར་བ་རྣོ་རྣོ་བྱེད་མཁན་དང་ཀླད་མཁྲེགས་པོ་རིགས་མང་ཞིང་།
ལྷག་པར་དུ་བཙན་བྱོལ་གཞིས་ཆགས་ཚོས་གསར་འབྱོར་ཟེར་དུས་
ཁོང་ཚོ་རྒྱང་ཕུད་རྒྱག་མཁན་ཡིན་འདོག་འདོག་གིས།
ཀླད་མེད་གླེན་པ་སོགས་ཀྱི་མིང་ལྷག་འབོད་ཅིང་ཁྱད་བསོད་ཀྱང་བྱས་མྱོང་།
གཞིས་གྲོང་ཁག་གི་ནང་གསར་འབྱོར་བཞག་ན་ང་ཚོའི་ས་ཞིང་དང་ཁང་ས་
འཕྲོག་འགྲོ་ཡི་འདུག་ཟེར་མཁན་བྱུང་ཡོད་ཚོད་རེད།
དེ་དག་ལ་གཞུང་འཛིན་ལས་སྣེ་བའི་ཞིབ་འཇུག་བསྟག་དཔྱད་ནན་མོ་རེ་གནང་རྒྱུ་ཧ་ཅང་གལ་ཆེན་པོ་ཡིན།
ང་ཚོ་སྐྱིད་སྡུག་གཅིག་པ་རེད་ལ། རིགས་རྒྱུད་གཅིག་པ་ཡིན་པ་ངོ་ཤེས་དགོས་ཤིང་། དེའི་འདུ་ཤེས་དར་སྤེལ་གཏོང་དགོས་པའི་སྟོང་ཆ་མང་དྲག་ནས། ད་ཆ་བཙན་བྱོལ་བ་རྣམས་རང་རང་སོ་སོ་གུ་དོགས་ངང་བསྡོད་མཁན་ལོ་རེ་ལ་
ཅེ་མང་ཅེ་མང་དུ་འགྲོ་བཞིན་ཡོད།
སྤྱིར་གསར་རྙིང་བཙན་བྱོལ་གྱི་ཐོབ་ཐང་འདི་དངོས་གནས་བཤད་ན་གླེང་ཕྱོགས་གསར་བ་
ཞིག་མ་ཡིན་མོད། ཆེས་ཐོག་མའི་ཞུ་གཏུགས་ལྟ་ཆགས་འདུག དངོས་ཡོད་གནས་གནས་ཚུལ་གྱིས་བཤད་ན། གསར་དུ་འབྱོར་བ་ཚོར་ས་དང་ཞིང་གི་བདག་དབང་ཡོད་དགོས་ཟེར་ན་ཅུང་ཙམ་ཚད་ལས་བརྒལ་ཡོད་ན་ཐང་མོད། བཙན་བྱོལ་བའི་གཞུང་གཅིག་གི་མི་ཡིན་པའི་ཆ་ནས་སྐྱིད་སྡུག་འདྲ་མཉམ་ཡིན་ན་ག་འདྲ་ཡག་པོ་མི་འདུག འདི་ནི་གསར་འབྱོར་རྙིང་འབྱོར་བར་གྱི་རྩོད་པ་ཞིག་མིན་ལ་༸གོང་ས་མཆོག་དབུ་བཞུགས་པའི་གཞུང་ལ་ཁ་བཏང་བ་བདེན་པར་མ་གྲུབ་ཀྱང། ས་གནས་སོ་སོའི་རྒྱུན་ལས་འགོ་འཛིན་ཚོས་གནས་ཚུལ་འདི་ཤེས་བཞིན་དུ་ད་བར་དུ་གླེང་སློང་ཙམ་ཡང་བྱས་མེད་པས། རྒྱུ་མཚན་འདིའི་རིགས་ལ་བརྟེན་ནས་ད་སྐབས་ང་ཚོས་འོས་འདེམས་ཀྱི་སྐབས་འདིར་ཡང་། ང་ཚོས་བསམ་བློ་ཞིབ་ཏུ་བཏང་སྟེ་ཕྱོགས་ཞེན་ཅན་དང་ཁེ་དབང་རྩོད་པའི་མི་ཞིག་ལས་
ལྷག་བསམ་ཅན་གྱི་བློ་ལྡན་ཞིག་འདེམས་ན་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་
སྙན་ཞུ་འབུལ་ལམ་ཞུས་པ་གནད་དུ་འཁེལ་སོང་ཀྱང་སྙན་ཞུའི་རིན་ཐང་དོར་ཟིན་ཡོད་གཞུང་དང་འབྲེལ་ཡོད་ཀྱིས་བདག་པོ་མ་རྒྱབ་རྒྱུ་ཐག་ཆོད་པ་རེད། དེ་ཡང་བདག་པོ་རྒྱབ་མ་རྒྱབ་ཟེར་བ་ནི་གཙོ་བོ་སྙན་ཞུའི་ནང་དོན་ལ་གཞིགས་པའི་འོས་མི་འོས་རྣམས་ལག་ལྟར་བྱེད་རྒྱུ་མ་རེད་ཟེར་བ་ཡིན།
དཀའ་ངལ་ཡོད་མཁན་གྱི་མིང་གཞུང་ནང་།་་་་་་་་་་་་་་་་་་དེང་དུས་ཀྱི་ཤེས་ཡོན་ཅན་གང་ཙམ་ཡོད་ཚད་འདུག་པས་ང་ཚོ་ནམ་དགའ་འོས།་་་་་་་་་་་་་་་་འོན་ཀྱང་སྙན་ཞུ་བོད་གཞུང་ལ་ཕུལ་བ་ཡིན་པ་ལས་རྒྱ་ག་གཞུང་ལ་ཕུལ་ཡག་མིན་པས་མིང་གཞུང་ནང་དབྱིང་ཇི་ཡི་གེ་བེད་སྤྱོད་གཏང་བ་སོགས་ནི་མ་གུས་པའི་རྣམ་པ་མཐོང་།་་་་་་་་་་་་་་་་བསམ་དོན་མ་འགྲུབ་ན་དགོངས་པ་མ་འཚོམས་ལོོ་་་་་་་་་་་་་་་་་་་་་་་་་་་་་་་་་་།་་་་་་་་་་རེ་བར་ཁྱོད་ཚོ་རྣམ་པར་རྒྱལ་བར་ཤོགས།།།།།།།།།།།།།།།།།།།།།།།།།།།།།།།།།།།།།།།།།།།།།།།
ད་ནི་གསར་འབྱོར་དང་གཞིས་ཆགས་དབར་གྱི་རྙོགས་དྲ་དེ་ལངས་ཡོངས་གི་འདུག། བཙན་འབྱོར་གཞུང་གི་དབུ་ཁྲིད་མཚོ་་་་་་་་ད་ཡིན་ན་་་་གནད་དོན་དེར་གཟབ་གཟབ་གནང། དེ་མིན་ན་བཙན་བྱོལ་བོད་པ་དང་བོད་ནང་གི་བོད་པ་རྣམས་ཤ་ཁག་ཁག་དང་གྲི་སོ་སོ་ཆགས་ཉེན་ཡོད་རེ་དདདདདདདདད
མི་ལོ་ལྔ་བཅུའི་རྗེས་སུ་གཞི་ནས་གཉིད་ལས་སད་པ་འདྲ་ཞིག་བྱེད་བཞིན་འདུག་ཀྱང་། གསར་འབྱོར་ལ་གཞིས་ཆགས་ཀྱི་ཐོབ་ཐང་སྟེར་རྒྱུ་ཟེར་ན་གཞིས་ཆགས་པ་མང་པོ་ཞིག་དྲན་པ་འཐོར་ནས་འཆི་གི་རེད། འདིའི་སྐོར་ནས་བཀའ་ཁྲིའི་འོས་མི་བློ་བཟང་སེང་གེས་ཅི་ཞིག་བརྗོད་འདུག བསྟན་འཛིན་རྣམ་རྒྱལ་གྱིས་ག་རེ་བརྗོད་འདུག རྒྱ་རི་སྒྲོལ་མས་ཀྱང་ག་རེ་བརྗོད་འདུག་ཞིབ་འཇུག་ཅིག་གནང་རོགས།