ཁ་སང་དགོང་མོར་ངྷ་ས་མེག་གྷན་གྱི་རྒྱ་གར་ཡུལ་མིའི་ཚོང་ཁང་སྐོར་ཞིག་ལ་མེ་སྐྱོན་བྱུང་སྟེ། ནང་གི་ཅ་ལག་ཡོངས་རྫོགས་ཕྱིར་འདོན་བྱེད་མ་ཐུབ་པར་མེས་ཚིག་འདུག་ཀྱང་། ཐེངས་འདིའི་མེ་སྐྱོན་ཁྲོད་མིའི་ཚེ་སྲོག་ལ་གནོད་སྐྱོན་གང་ཡང་བྱུང་མེད།
མདང་དགོང་ཆུ་ཚོད་ ༡༢ ཡོལ་ཙམ་ལ། མེག་གྷན་ནས་ཁ་པར་ཞིག་འབྱོར་ཏེ་ངྷ་ས་མེག་གྷན་དུ་ཚོང་ཁང་མང་བོ་ཞིག་མེས་འཚིག་གིན་པ་དང་། ད་ལྟ་ང་ཚོ་མེ་སྐྱོན་བྱུང་སར་ཡོད། མེ་འབར་བ་ཚབས་ཆེ་བས་ཉེན་ཁ་ཧ་ཅང་ཆེ། མི་མང་བོ་གང་བྱེད་འདི་བྱེད་མེད་པར་ལྷག་འདུག་ལ། མྱུར་སྐྱོབ་ཚན་ཁག་ཀྱང་ད་དུང་བསླེབས་མ་སོང་ཟེར།
མེག་གྷན་དུ་མེ་སྐྱོན་བྱུང་བ་ཤེས་རྗེས་གསར་འགོད་པ་དུས་ལྟར་ལམ་ལ་ཆས་ཏེ་གངས་སྐྱིད་ནས་མེག་གྷན་དུ་འབྱོར་སྐབས། མཚན་གྱི་ཆུ་ཚོད་ ༡༢ དང་སྐར་མ་ ༢༠ ཙམ་རེད་ལ། རྒྱ་གར་བའི་ཡུལ་མི་དང་བོད་མི་སྐྱབས་བཅོལ་བ། ཕྱི་གླིང་བའི་ཡུལ་སྐོར་བ་སོགས་མི་བརྒྱ་ལྷག་གིས་ལག་ཏུ་ཆུ་སྣོད་ཆེ་ཆུང་སྣ་ཚོགས་བཟུང་སྟེ་འཚང་ཁ་ཤིག་ཤིག་གིས་མེ་གསོད་ཀྱི་བྱ་བར་ཞུགས་ཀྱིན་འདུག་ལ། ཡང་མི་མང་བོ་ཞིག་གང་བྱེད་འདི་བྱེད་མེད་པར་རང་སར་ལྟད་མོ་ལྟ་བཞིན་ལྷག་འདུག
མེ་སྐྱོན་བྱུང་ཡུལ་ནི་མེག་གྷན་བོད་གཞུང་སྣེ་ལེན་ཁང་རྙིང་པ་དང་ཐག་ཉེ་བའི་བཀྲ་ཤིས་འཁྱིལ་ཟ་ཁང་གི་མདུན་ཕྱོགས་དང་མཉམ་འབྲེལ་གྱི་ཁང་བརྩེགས་ཞོལ། Memory ཟ་ཁང་གི་གོང་དུ་ཡོད་པའི་རྒྱ་གར་ཡུལ་མིའི་དྲ་ཁང་དང་ཚོང་ཁང་། ཆང་བཙོང་ཁང་། པར་ཁང་། འཚེམ་ཁང་། ཤ་བཙོང་ཁང་བཅས་རེད།
གསར་འགོད་པ་དེར་འབྱོར་སྐབས་མེ་སྐྱོན་བྱུང་སའི་ཚོང་ཁང་སྐོར་ཞིག་གི་ཤུལ་དུ་ད་དུང་མེ་དམར་ལྷམ་ལྷམ་དུ་འབར་གྱིན་འདུག་ལ། ཡུལ་མི་དང་བོད་མི་གཞོན་སྐྱེས་ཁག་ཅིག་གིས་དྲ་ཁང་ཞིག་གི་ལྕགས་སྒོ་བཙན་གྱིས་གཏོར་གྱིན་འདུག་མོད། ལྕགས་སྒོ་གཏོར་རྗེས་དྲ་ཁང་ནང་གི་གློག་ཀླད་ ༡༥ ཙམ་ཡོད་པ་དང་དེ་མིན་གྱི་ཅ་དངོས་གཞན་ཚང་མ་མེས་ཚིག་སྟེ་ཤུལ་མེད་དུ་གྱུར་ཡོད་འདུག དེ་བཞིན་དེའི་འཁྲིས་ཀྱི་དྲ་ཁང་དང་ཚོང་ཁང་། ཆང་བཙོང་ཁང་སོགས་ཚོང་ཁང་ཡོད་ཚད་ཀྱི་ཅ་དངོས་རྣམས་ཕྱིར་འདོན་བྱེད་མ་ཐུབ་པར་མེས་ཚིག་ཡོད་འདུག
དེའི་རྗེས་མེ་གསོད་རུ་ཁག་བསླེབས་པ་དང་མྱུར་ཏུ་མེ་གསོད་ཀྱི་བྱ་བར་ཞུགས་ཐོག སྔར་ནས་མེ་གསོད་ཀྱི་བྱ་བར་ཞུགས་ཡོད་པའི་བོད་མི་སྐྱབས་བཅོལ་བ་དང་རྒྱ་གར་ཡུལ་མི་སོགས་ཚང་མ་མཉམ་འབྲེལ་ཐོག ཆུ་ཚོད་གཉིས་པ་ཡོལ་ཙམ་ལ་མེ་ཕལ་ཆེ་བ་གསོད་ཐུབ་ཙམ་བྱུང་།
དགོང་མོ་དེར་མེ་གསོད་རོགས་སྐྱོར་ནང་ཞུགས་པའི་ངྷ་སར་གནས་སྡོད་ནོར་བུ་ལགས་ཀྱིས་གསུངས་དོན། ང་ཚོས་ཧུར་ཐག་གིས་མེ་གསོད་ཐབས་དང་ཚོང་ཁང་ནང་གི་ཅ་དངོས་ཕྱིར་འདོན་རྒྱུར་ཐབས་ཤེས་བྱས་ཀྱང་། ཚོང་ཁང་གི་ལྕགས་སྒོ་འབྱེད་མ་ཐུབ་པར་ནང་གི་ཅ་དངོས་ཚང་མ་མེས་ཚིག་སོང་། ཡིན་ནའང་། མཚན་མོར་ཚོང་ཁང་ནང་དུ་མི་མེད་སྟབས་ཐེངས་འདིའི་མེ་སྐྱོན་ཁྲོད་མིའི་ཚེ་སྲོག་ལ་གནོད་སྐྱོན་གང་ཡང་བྱུང་མི་འདུག་ཅེས་ངོ་སྤྲོད་གནང་བྱུང་།
མེ་ཤོར་བའི་ཚོང་ཁང་དག་གི་ཁ་གཏད་དུ་ཡོད་པའི་བཀྲ་ཤིས་འཁྱིལ་ཟ་ཁང་གི་བདག་པོ་བོད་མི་ཡེ་ཤེས་ལགས་སུ། མེ་ག་དུས་ཤོར་བ་དང་། ཁོང་གིས་མེ་ཤོར་བའི་སྐོར་ཅི་ལྟར་ཤེས་རྟོགས་བྱུང་མིན་དྲིས་པར་གསུངས་དོན། ང་ནང་དུ་ཡོད་སྐབས་རྒྱ་གར་གཡོག་པོས་ཁ་པར་བསླེབས་ཏེ་མེ་ཤོར་སོང་ཟེར། སྐབས་དེར་ང་ལམ་སང་ནང་ནས་ཐོན་ཏེ་ཡར་ཡོང་བ་ཡིན། འདིར་འབྱོར་དུས་ལམ་གྱི་དར་སྐུད་ཚང་མ་མེ་འབར་གྱིན་འདུག་ལ། ངའི་ཟ་ཁང་མདུན་གྱི་དྲ་ཁང་དེ་ཡང་མེ་འབར་གྱིན་འདུག ང་ཚོ་མི་མང་བོས་གཡས་གཡོན་གྱི་ཁང་སྟེང་ནས་ཆུ་གཤོ་བ་སོགས་བྱས་པ་ཡིན་མོད། མེ་འབར་བ་ཤུགས་ཆེ་བས་དེ་ལྟ་བུ་ཞིག་གིས་མེ་གསོད་མ་ཐུབ་པར་མ་ཟད། མེ་སྐྱོན་བྱུང་སའི་ས་ཆ་གུ་དོག་དྲགས་པ་དང་མི་མང་བོ་མེ་གསོད་ཀྱི་བྱ་བར་ཞུགས་རྒྱུར་ལམ་ཁ་འགག་སྟེ། ཡོང་ཐུབ་མ་སོང་། དེ་བཞིན་མེ་གསོད་རུ་ཁག་གི་རླངས་འཁོར་བསླེབས་སྐབས་ཚོང་ཁང་ནང་གི་ཅ་དངོས་ཕལ་ཆེ་བ་མེས་ཚིག་ཚར་འདུག་ཟེར།
དགོང་མོ་དེར་ངྷ་ས་བདེ་དོན་ཚེ་རིང་ཕུན་ཚོགས་ལགས་ཀྱང་མེ་གསོད་སར་ཕེབས་ཏེ། མེ་གསོད་ཀྱི་བྱ་བར་བཀོལ་འདོམ་བྱེད་ཀྱིན་འདུག་སྟབས། འདི་གའི་གསར་འགོད་པས་ཁོང་ལ་མེ་ཤོར་བའི་སྐོར་ཇི་ལྟར་མཁྱེན་རྟོགས་བྱུང་བ་དང་། ཁོང་ག་དུས་མེ་སྐྱོན་བྱུང་ཡུལ་དུ་ཕེབས་མིན་སྐོར་དྲིས་པར་ཁོང་གིས་གསུངས་དོན། ང་ལ་ཆུ་ཚོད་བཅུ་གཉིས་ཡས་མས་སུ་རང་བདེན་ཚོགས་ཆུང་གི་ཚོགས་གཙོས་ཁ་པར་འབྱོར་ཏེ། མེ་ཤོར་བའི་གནས་ཚུལ་གསུངས་བྱུང་། སྐབས་དེར་ང་ལམ་སང་ནང་ནས་ཐོན་པ་དང་མེ་གསོད་རི་ཁག་ལ་ཁ་པར་བཏང་བ་ཡིན་མོད། མེ་གསོད་རུ་ཁག་ལ་སྔོན་ནས་ཁ་པར་འབྱོར་ཚར་འདུག་ཅེས་དང་།
ཡང་ཁོང་གིས་མེ་ཤོར་བའི་སྐོར་ལ་གསུངས་དོན། ཆུ་ཚོད་ ༡༠ དང་ཕྱེད་ཀ་ཡས་མེས་སུ་མེ་ཤོར་འདུག་ལ། ད་ལྟའི་ཆར་མེ་ཤོར་བའི་རྒྱུ་རྐྱེན་འདི་རེད་ཟེར་བ་ཞིག་ཤེས་རྟོགས་ཐུབ་ཀྱི་མི་འདུག་ཀྱང་། གཙོ་བོ་མེ་ཤོར་བའི་དྲ་ཁང་ཞིག་ཏུ་གློག་སྐུད་ཐོལ་ཐུག་སྟེ་མེ་ཤོར་མགོ་བརྩམས་པ་འདྲ། གང་ལྟར་དྲ་ཁང་གཉིས་དང་གྱོན་གོས་ཚོང་ཁང་གཅིག ཆང་བཙོང་ཁང་གཅིག པར་ཁང་གཅིག ཚེམ་ཁང་གཅིག ཤ་བཙོང་ཁང་གཅིག་བཅས་ཚོང་ཁང་སྐོར་ཁག་ཅིག་མེས་ཚིག་འདུག མེ་སྐྱོན་བྱུང་མ་ཐག་ང་ཚོས་མི་མང་ཚོས་གཡས་གཡོན་གྱི་ཁང་སྟེང་ནས་ཆུ་གཤོ་འདུག་ཀྱང་དེ་ལྟ་བུ་ཞིག་གིས་མེ་གསོད་ཐུབ་པ་དེ་འདྲ་མ་རེད་ལ། ཆུ་ཚོད་ ༡༢ ཡོལ་རྗེས་མ་གཏོགས་མེ་གསོད་རུ་ཁག་གི་རླངས་འཁོར་ཡང་བསླེབས་ཐུབ་མ་སོང་། དེའི་རྗེས་མེ་གསོད་རུ་ཁག་གི་རླངས་འཁོར་བསླེབས་པ་དང་། ཡུལ་མི་དང་བོད་མིའི་གཞོན་སྐྱེས་རྣམས་ཀྱིས་ལྕགས་ཁང་གི་སྒོ་བཅག་པ་སོགས་ད་ལྟ་མེ་གསོད་ཐུབ་ཙམ་བྱུང་ཞེས་གསུངས།
ཐེངས་འདིར་མེ་སྐྱོན་བྱུང་བའི་ཚོང་ཁང་ཚང་མའི་སྦྱིན་བདག་རྒྱ་གར་ཡུལ་མི་ཡིན་པ་དང་མེ་སྐྱོན་བྱུང་ཡུལ་གྱི་ཚོང་ཁང་དེ་དག་གི་ཁང་པའི་བཟོ་སྐྲུན་རྒྱུ་ཆ་ནི་ལྕགས་དང་ཤིང་ཡིན་ཐོག དེའི་ནང་གི་ཅ་ལག་རྣམས་ཀྱང་གློག་ཀླད་དང་གྱོན་གོས། ཆང་སོགས་མེས་འཚིག་སླ་བའི་ཅ་དངོས་རྐྱང་ཡིན་འདུག
གསར་འགོད་པ། ཨ་རིག་འགྱུར་མེད།
ཡུལ་མི་རྣམས་དང་ཁ་ཕན་ཚིག་གིས་རོགས་རམ་མཐུན་འབྲེལ་གོང་འཕེལ་གཏོང་ཐབས་ཀྱི་གོ་སྐབས་ཞིག་ཀྱང་རེད་སྙམ།
སྙིང་རྗེ་ཚོང་ཁང་དང་གློག་ཀླད་ཁང་མེ་འཚིག་པ་ལས་གོང་འོག་གི་ཤ་ཁང་དེ་གཉིས་མེ་འཚིག་ན་འགྲིག་འདུག རྡ་སའི་གནས་སྡོད་ཀྱི་མི་རྣམས་སྡུག་ཅན་ཡིན་པའི་རྐྱེན་གྱིས་ཤ་ཁང་དེ་གཉིས་མེ་འཚིག་མི་འདུག སྔར་བཞིན་ཤ་ཚོང་བྲིན་བཞིན་འདུག
ཨ་ཧོ་སྙིང་རྗེ་འབྱུང་བཞིའི་ཀོད་ཆག་འདི་ཅི་འདྲའི་ཡ་ང་བ་ཞིག་རེད་ཨང་།
དེ་ཡང་ལས་ཡིན་སྲིད་ལས་མི་བྱས་པ་དང་མི་འཕྲད་ལས་བྱས་པ་ཆུས་མི་ཟད་ཞེས་གསུངས་པའི་ཕྱིར་རོ།
གནས་ཚུལ་འདི་གོ་མ་ཐག་ལམ་སེང་སེམས་ལ་ཤར་བ་ནི་དགའ་ལྡན་ལྔ་མཆོད་རེད། ཉི་མ་ནུབ་མ་ཐག་བོད་པའི་ཁྱིམ་ཚང་མཐའ་དག་གི་ནང་དུ་མཆོད་མེ་རྐང་རེ་སྒྲོན་པ་དང་། ཡོད་མཁན་ཚོས་མཆོད་མེ་ཕྲེང་སྒྲིག་ནས་འབུལ་བའི་གོམས་སྲོལ་དེ་རེད། དེ་དང་མཉམ་དུ་གཙུག་ལག་ཁང་དང་དགོན་པ་སོ་སོའི་ནང་དུ་མཆོད་མེ་སྟོང་ཕྲག་རེ་སྒྲོན་བཞིན་པའི་རྣམ་པ་དེ་ཚོ་རེད། མེག་རྒན་ལ་མེ་ཤོར་བ་གོ་མ་ཐག་སེམས་ལ་དེ་ཚོ་ཤར།
སྟབས་ཡག་ནས་ས་དེ་རུ་བོད་པའི་ཁྱིམ་ཚང་འདྲ་ཡོད་ས་མ་རེད། དེའི་ཁར་མེ་སྐྱོན་གྱི་ཁུངས་སྣེ་ཡང་དྲ་ཁང་དེ་ཡིན་པའི་ཚོད་དཔག་རབ་རིབ་ཅིག་ཀྱང་འདུག
བོད་པ་ཚོས་ངེས་པར་དུ་གཟབ་དགོས་པར་འདུག མཆོད་མེ་མང་པོ་སྒྲོན་པ་དེ་ཆོས་ཕྱོགས་ནས་བཤད་ན་ཡག་པོ་རེད་དེ། དེའི་ཕྱོགས་གཞན་ངོས་ཀྱི་ཉེན་ཁ་དེ་ཚོ་ཡང་ངེས་པར་དུ་ཤེས་དགོས་ཀྱི་འདུག
འཛམ་བུའི་གླིང་ཞེ་དྲག་གིས་ཡར་རྒྱས་ལ་ཕྱིན་ཏེ། མེ་འབུད་པའི་དུས་སྐབས་ཡལ་མགོ་བཙུགས་ཡོད་པ་དང་། ཟ་མ་གཡོས་སྦྱོར་དང་ཁྱིམ་གྱི་དྲོད་ཁོལ། ཐ་ན་མཆོད་མེ་མཚོན་བྱེད་དུ་ཡང་གློག་གི་མཆོད་མེ་སྒྲོན་གི་འདུག མིའི་རིགས་ཐོག་མའི་ལྟོག་སྐོམ་དང་གྲང་ངར་ལས་སྐྱོབ་མཁན་གྱི་མེ་ཟེར་བ་དེ་དེང་ཕྱིན་གཏན་དུ་མི་དགོས་པ་ཞིག་མིན་ཡང་བེད་སྤྱོད་ཇེ་ཆུང་ཡིན་ལ། ཡུལ་ལུང་མང་པོ་ཞིག་ལ་མེ་འབུད་མི་ཆོག་པའི་ཚད་དུ་ཡང་བསླེབས་ཡོད་པས། ང་ཚོས་ཀྱང་མེ་ཆོས་ཀྱི་རིགས་འདི་ག་ལེར་ལག་སྣེར་མི་ལེན་རྒྱུའི་ཐབས་ལ་འབད་དགོས་ཀྱི་འདུག
གསར་འགོད་པ་ཆེད་ལས་ཅན་ཞིག་མིན་འགྲོ་བསམ་བསམ་དྲན་གྱི་འདུག བོད་མི་ལས་ངན་རྣམས་ལ་ཧམ་ཅན་རྒྱ་གར་བས་ཡ་ལ་མ་བཙུགས་ན་བོད་གཞུང་གིས་རོགས་པ་བྱེད་དགོས་པ་ཡོད་པ་མ་རེད།
སྔོན་གྱི་ལས་དང་ཕྲད་ཀྱི་རྐྱེན་ཟེར་བ་དེ་ཅི་མ་བདེན་སྙིང་རྗེ་བདག་པོ་ཚོ་ལ་རོག་སྐྱོར་ཚོགས་པ་དང་དབུས་གཞུང་ནས་ལྟ་རྟོག་རེ་ཐུབ་ན་བཀའ་དྲིན་ཆེ་རྒྱུ་རེད་དེའི་ཕྱོགས་ལ་གཟིགས་རྟོག་རེ་ཡོངས་བའི་སྨོན་འདུན་ཞུ