ཟླ་འདིའི་ཕྱི་ཚེས་ ༥ ཉིན། རྒྱ་ནག་རྒྱལ་ཡོངས་ཀྱི་གྲོང་ཁྱེར་ ༤༦ ཙམ་གྱི་མི་ཁྲི་ ༡༤༡ ལྷག་གཞུང་ཞབས་ལས་ཞུགས་ཀྱི་ཡིག་ཚད་ཁྲོད་ཞུགས་ཏེ། ལས་གནས་ ༡༦༠༠༠ བརྩོན་ལེན་བྱས་ཡོད་པ་དང་། ད་ལོ་ནི་རྒྱ་ནག་གི་ལོ་རྒྱུས་ཁྲོད་རྒྱུགས་ཞུགས་མི་གྲངས་ཆེས་མང་བའི་ལོ་དེ་ཆགས་ཡོད། གཞུང་ཞབས་ནང་འཛུལ་རྒྱུར་ཟབ་སྦྱོང་སྤྲོད་མཁན་གྱི་ཆེད་མཁས་པ་ཡཱིས་ཧོང་ཡེ་ཟེར་བ་དེས་བརྗོད་རྒྱུར། ད་ལྟ་རྒྱ་ནག་ཏུ་གཞུང་ཞབས་རྒྱུགས་ལེན་གྱི་ཚ་རླབས་འཕྱུར་བཞིན་པ་འདི་ནི། རྒྱ་ནག་མི་མང་ལ་ལས་ཀ་རག་གི་མེད་པའི་གནད་དོན་དེ་སྔར་ལས་ཛ་དྲག་ཏུ་འགྲོ་བཞིན་པས་རྐྱེན་གྱིས་རེད་ཟེར།
གཞུང་ཞབས་ཁོངས་འཛུལ་ཞུགས་བྱེད་མཁན་ལོ་རེ་བཞིན་ཇེ་མང་དུ་འགྲོ་བཞིན་ཡོད་པ་དེ་ནི། རྒྱ་གཞུང་གིས་སྒེར་གཅོད་ཤུགས་ཆེ་རུ་གྱུར་ཏེ། སྒེར་གཉེར་ཚོང་རའི་འཁོར་རྒྱུགས་གཏན་འཇགས་མེད་པ་དང་། གཞི་རིམ་མི་སེར་གྱི་ས་ཞིང་སྒེར་ལ་མི་དབང་བར་གྱུར་བ་སོགས་ལ་བརྟེན། རྒྱ་ནག་མང་ཚོགས་ཀྱི་སེམས་སུ། གཞུང་གི་ལས་བྱེད་དག་གི་གནས་བབ་དང་དངུལ་གྱི་ཡོང་འབབ། བྱ་བའི་ཁེ་ཕན་སོགས་ལས་གནས་གཞན་ལས་གཏན་འཇགས་ཡིན་པ་མ་ཟད། མ་འོངས་པར་གོ་གནས་འཕར་བའི་ལམ་ཁ་ཡང་ཡོད་པ་སོགས་ཀྱི་འདུ་ཤེས་སྔར་ལས་ཆེ་རུ་གྱུར་ཏེ། གཞུང་ཞབས་ཀྱི་ལས་གནས་ལ་ཧམ་སེམས་དང་ཡིད་སྨོན་བྱེད་ཡུལ་ཞིག་ཏུ་འགྱུར་བཞིན་ཡོད།
དེར་བརྟེན། ལོ་རེ་བཞིན་གཞུང་ཞབས་རྒྱུགས་ཞུགས་མི་གྲངས་ལྡབ་འགྱུར་གྱིས་ཇེ་མང་དུ་ཕྱིན་ཏེ། ཕྱི་ལོ་ ༢༠༠༤ ལོའི་རྒྱུགས་ཞུགས་མི་གྲངས་ཁྲི་ ༡༢ ནས་ད་ལོ་ཁྲི་ ༡༤༡ ལ་འཕར་ཡོད། ཡིན་ནའང་། རྒྱུགས་ཞུགས་པ་དང་ལས་ཞུགས་པ་བསྡུར་ན། མི་ ༥༠༠༠ ཡིས་ས་མིག་གཅིག་འཕྲོག་རྩོད་བྱེད་ཀྱིན་ཡོད་འདུག གོ་སྐབས་འདི་དང་བསྟུན་ཏེ། རྒྱ་ནག་ནང་གཞུང་ཞབས་རྒྱུགས་ལེན་ཟབ་སྦྱོང་གི་ཚོང་ར་ཆེན་པོ་ཞིག་ཀྱང་ཆགས་བཞིན་ཡོད་པ་དང་། བསྡོམས་རྩིས་ལྟར་ན་ལོ་རེར་རྒྱུགས་ཞུགས་པ་དག་གི་ལག་ནས་རྒྱ་སྒོར་དུང་ཕྱུར་ ༤༢ ཙམ་ཁྲལ་བསྡུ་བྱེད་ཀྱིན་ཡོད་འདུག
གསར་འགོད་པ། ཚེ་རིང་རྒྱལ།
གནས་ཚུལ་འདི་ལ་ང་ཧང་སང་མ་སོང་རྒྱ་ནག་མི་འབོར་ལ་ཆ་བཞག་ན་གང་མ་རེད་།
དེ་ལས་སྡུག་པ་བོད་ནང་ལ་དཀའ་ངལ་ཡོད་བོད་མིའི་མི་འབོར་ལ་བསམ་ཞིབ་བྱས་ན་བོད་ནང་ལ་ལས་བྱེད་ས་མིག་གཅིག་ལ་བོད་མི་སྟོང་ཕྲག་མང་པོ་ཚངས་ཀ་རྒྱག་དགོས་པ་དང་ད་དུང་ས་མིག་དེ་ལ་རྒྱ་མི་ཡང་མང་པོས་ཚངས་ཀ་རྒྱག་གི་ཡོད་པས་དེ་དངོས་ནས་ཧ་སང་དགོས་རེད་།
ཉིན་འགའི་སྔོན་ནས་བཟུང་དུས་བབ་ཚང་གི་གསར་འགྱུར་ཇེ་མང་དུ་འགྲོ་བཞིན་པ་ནི། ང་ཚོ་ལ་མཚོན་ན་སྒེའུ་ཁུང་མང་བོ་ཞིག་གསར་དུ་ཕྱེ་བ་དང་འདྲ་བས། ཧ་ཅང་དགའ་སྤྲོ་སྐྱེས་བྱུང་ལ། མུ་མཐུད་དུ་སྐད་ཡིག་དང་རྒྱལ་ཁབ་ཀྱི་ས་མཚམས་ལས་བརྒལ་ཏེ་གསར་འགྱུར་མང་བོ་ཞིག་འུ་ཅག་སྐྱེད་ཚལ་འདི་ནས་འོད་སྣང་གི་ཚུལ་དུ་མངོན་རྒྱུ་དེ་ཡང་ཆུ་ལོག་བཞིན་དུ་རེ་བ་འགོག་མེད་ངང་བརྗོད་པར་ཐལ་སོང་།
མ་དག་པ། དག་པ།
མ་འོང་པར། མ་འོངས་པར།
གཞུང་ཚབས། གཞུང་ཚབ།
དུང་ཕྱིར། དུང་ཕྱུར།
བསམ་པ་དཀར་པོས་དག་བཅོས་བྱས་འདི།།
རང་རིགས་ཡི་གེར་གཅེས་པའི་ཚོར་འདུ་ཡིན།།
ཡང་ཡང་སུན་སྣང་མེད་པར་བཅོས་པ་འདི།།
རང་གི་སེམས་ཀྱི་དམ་བཅའི་ཟུར་ཆ་ཞིག།