རྒྱ་ནག་ཏུ་ནང་པ་ས་ཡ་ ༣༠༠ འདུག

ཟླ་འདིའི་ཕྱི་ཚེས་ ༡༨ ཉིན་༧གོང་ས་མཆོག་གིས་འབྲས་ལྗོངས་བྲག་དཀར་བཀྲ་ཤིས་སྟེང་ཉེ་འདབས་ཀྱི་མཚམས་ཁང་ཞིག་ཏུ་ཉིན་གཉིས་རིང་གི་སྐུ་མཚམས་གྲོལ་རྗེས། ར་བང་ལ་བོད་མིའི་གཞིས་ཆགས་སུ་ཆིབས་བསྒྱུར་གྱིས་ཡུལ་དེའི་མང་ཚོགས་ལ་བཀའ་སློབ་གནང་སྐབས་ཁོང་གིས། ད་ཆར་བཙན་བྱོལ་སློབ་གྲྭ་ཁག་ཏུ་བོད་ཡིག་ཤེས་ཚད་སྐྱོ་རུ་འགྲོ་བཞིན་འདུག འདིའི་ཐད་བོད་ཡིག་དགེ་རྒན་ཚོས་འགན་འཁུར་ཆེ་ཙམ་ལེན་དགོས་ལ། སློབ་ཕྲུག་ཚོས་ཀྱང་རང་ངོས་ནས་བོད་ཡིག་ཐོག་དོ་སྣང་མང་ཙམ་སྤྲོད་དགོས། བོད་ཡིག་ནི་དཔལ་འབྱོར་དང་ཁྲིམས་ལུགས་སློབ་སྦྱོང་ནང་བེད་སྤྱོད་དེ་ཙམ་མེད་ཀྱང་། སངས་རྒྱས་པའི་བཀའ་བསྟན་འགྱུར་པོད་ ༣༠༠ ལྷག་ཡོད་པ་རྣམས་སློབ་སྦྱོང་བྱ་དགོས་ཚེ་བོད་ཡིག་ལས་ལྷག་པའི་སྐད་ཡིག་གཞན་མེད། དེང་སང་ཕྱི་རྒྱལ་ནང་པའི་མཁས་པ་ཚོས་བོད་ཡིག་ལ་དོ་སྣང་བྱས་ཏེ་ཡག་པོ་ཀློག་ཐུབ་ཀྱི་ཡོད། བོད་ཡིག་ང་ཚོའི་ཕ་སྐད་ཡིན་དུས་བདག་པོ་རྒྱག་མཁན་ཡང་ང་ཚོས་ཆགས་ཡོད། ཕྱི་མི་ཚོས་བོད་ཡིག་ལ་དོ་སྣང་བྱས་ཡོང་ན་ང་ཚོས་དེ་བས་ཀྱང་བདག་པོ་རྒྱག་རྒྱུ་གལ་ཆེན་རེད། ཅེས་གསུངས་འདུག

ཡང་ཁོང་གིས་བོད་རྒྱ་འབྲེལ་མོལ་སྐོར་ལ། ཕྱི་ལོ་ ༢༠༠༨ ལོར་བོད་ནང་དུ་དོན་རྐྱེན་བྱུང་རྗེས་ངོས་ཀྱིས་རྒྱ་ནག་གཞུང་ལ་ཡིད་ཆེས་བྱ་རྒྱུ་ཁག་པོ་འདུག་ཀྱང་། རྒྱ་ནག་མི་མང་ལ་ཡིད་ཆེས་རྩ་བ་ནས་བརླག་གི་མ་རེད་ཟེར་གྱི་ཡོད། རྒྱ་རིགས་ཤེས་ཡོན་ཅན་དང་ཆོས་པ་གང་མང་ཞིག་གིས་ངོས་ཀྱི་ལམ་དབུ་མར་མཐའ་གཅིག་ཏུ་རྒྱབ་སྐྱོར་བྱེད་ཀྱི་འདུག གལ་སྲིད་ང་ཚོས་རང་བཙན་བཤད་བསྡད་ན་རྒྱ་རིགས་མང་པོའི་རྒྱབ་སྐྱོར་རག་རྒྱུར་ཁག་པོ་རེད། ཅེས་དང་། ངས་གོ་ཐོས་ལྟར་ན། ཉེ་ཆར་རྒྱ་ནག་སློབ་ཆེན་ཞིག་གིས་རྒྱ་ནག་ཏུ་ནང་པ་ཅི་ཙམ་ཡོད་མེད་གྲངས་བཤེར་ཅིག་བྱས་པའི་ནང་། རྒྱ་ནག་ཏུ་ནང་པ་ས་ཡ་ ༣༠༠ ཙམ་ཡོད་འདུག་ལ། དེ་ལྟར་བྱས་ན་རྒྱ་ནག་ནི་འཛམ་གླིང་ཐོག་ནང་པ་མང་ཤོས་ཀྱི་རྒྱལ་ཁབ་དེ་ཆགས་ཡོད་པ་རེད། དེང་སང་རྒྱ་ནག་སྐམ་ས་ཆེན་མོ་ནས་བདུན་ཕྲག་རེར་མི་བཅུ་ཙམ་ངྷ་སར་ངོས་ལ་ཐུག་འཕྲད་དུ་ཡོང་གི་འདུག ཐུག་འཕྲད་སྐབས་མང་ཆེ་བས་མིག་ཆུ་བཏང་སྟེ་རྒྱ་ནག་གི་ནང་པ་ཐུགས་ནས་མ་བརྗེད་རོགས་ཞེས་བཤད་ཀྱི་འདུག ཁག་ཅིག་གིས་རྒྱ་མིས་བོད་ནང་སྡུག་སྦྱོང་བཏང་ཡོད་སྟབས་ངོ་ཚ་གི་འདུག དེར་རྒྱལ་བ་རིན་པོ་ཆེར་དགོངས་དག་ཞུས་པ་ཡིན་ཞེས་བཤད་ཀྱི་འདུག། ཅེས་བཀའ་བསྩལ་ཡོད།

གསར་འགོད་པ། དཔལ་ལྡན།