རྒྱ་ནག་གི་བཟོ་བའི་ངོ་རྒོལ།

རྒྱ་ནག་ཧྲན་ཞི་ཞིང་ཆེན་འཁལ་འཐག་བཟོ་གྲྭ་དགུ་བའི་བཟོ་བ་རྣམས་ཀྱིས་ལས་མཚམས་བཞག་སྟེ་ངོ་རྒོལ་ལས་འགུལ་སྤེལ་ཡོད་པ་མ་ཟད།  ལུགས་མཐུན་རོགས་དངུལ་རེག་ཐབས་སུ་བཟོ་གྲྭའི་མགོ་བ་གཉིས་བཀག་ཉར་བྱས་ཡོད་པ་རེད།

ཉེ་ལམ་ཧྲན་ཞི་འཁལ་འཐག་བཟོ་གྲྭ་དགུ་པའི་མ་རྩ་བརྡིབས་ཡོད་པའི་དབང་གིས་པའོ་ཅི་འཁལ་འཐག་བཟོ་གྲྭ་དང་ཟླ་སྒྲིལ་བཏང་ཡོད་པ་དང་། ཧྲན་ཞི་འཁལ་འཐག་བཟོ་གྲྭ་དེར་ལོ་ངོ་ ༣༠ ལྷག་རིང་ལས་ཀ་བྱས་མྱོང་བའི་ངལ་རྩོལ་བཟོ་བ་རྣམས་ལ་རྒྱ་སྒོར་ཁྲི་ ༣ རེ་སྤྲད་དེ་བཟོ་གྲྭ་ནས་ཕྱིར་ཕུད་བྱས་ཡོད་སྟབས། ཟླ་འདིའི་ཕྱི་ཚེས་ ༡༥ ནས་མགོ་འཛུགས་ཀྱིས་བཟོ་བ་ཚོས་ལས་མཚམས་བཞག་སྟེ། ལས་གནས་ནས་ཕུད་པའི་བཟོ་བ་རྣམས་ལ་ལུགས་མཐུན་གྱི་རོགས་དངུལ་སྤྲོད་དགོས་པའི་དགོས་འདུན་བཏོན་ཡོད་པ་རེད།

འོན་ཀྱང་བཟོ་གྲྭ་དེའི་མགོ་ཁྲིད་དག་གིས་བཟོ་བ་རྣམས་ཀྱི་དགོས་འདུན་ལ་ཉན་འཇོག་བྱས་མེད་སྟབས། བཟོ་བ་རྣམས་འུ་ཐུག་སྟེ་ཕྱི་ཚེས་ ༡༧ ཉིན་བཟོ་གྲྭའི་མགོ་བ་གཉིས་བཀག་ཉར་བྱས་ཏེ། ཁོང་ཅག་གི་དགོས་འདུན་ལ་བཟང་ཕྱོགས་ཀྱི་ལན་འདེབས་ཤིག་ཡོང་བའི་རེ་བ་བརྒྱབ་ཡོད་ཀྱང་། ཕྱི་ཚེས་ ༡༩ ཉིན་གྱི་ཞོགས་པ་གློ་བུར་དུ་རྒྱ་གཞུང་གི་དྲག་ཆས་ཉེན་རྟོག་དམག་མི་བརྒྱ་ཕྲག་འགའ་བཟོ་གྲྭའི་ནང་འཛུལ་ཏེ། བཟོ་བ་རྣམས་ཀྱི་ལག་ནས་མགོ་བ་གཅིག་བཙན་འཕྲོག་བྱས་ཡོད་པ་དང་། ཉིན་དེའི་ཕྱི་དྲོ་ཡང་བསྐྱར་དམག་མི་ ༣༠༠༠ ལྷག་གིས་བཟོ་གྲྭའི་མཐའ་ཡོངས་སུ་བསྐོར་ཏེ། མགོ་བ་གཞན་པ་དེ་ཡང་བཙན་འཕྲོག་བྱས་ཡོད་པ་མ་ཟད། བཟོ་བ་རྣམས་ལ་གཅར་རྡུང་དྲག་པོ་བྱས་ཏེ་མང་པོ་ཞིག་ལ་རྨས་སྐྱོན་ཚབས་ཆེན་ཕོག་སྟེ་སྨན་ཁང་དུ་བསྐྱལ་དགོས་བྱུང་ཡོད་འདུག

གནས་ཚུལ་འདིའི་སྐོར་བཟོ་བ་ཞིག་གིས་གསར་ལམ་ཁག་ཏུ་བརྗོད་དོན། ཁོ་ཚོའི་དགོས་འདུན་ལ་བཟོ་གྲྭའི་ངོས་ནས་ད་དུང་བརྡ་ལན་ཅི་ཡང་མ་སྤྲད་བའི་རྐྱེན་གྱིས། ལས་བཟོ་བ་རྣམས་རང་རང་གི་ནང་ལ་ལོག་སྟེ་ད་ལྟ་བཟོ་གྲྭ་ལས་མཚམས་བཞག་ཡོད་པ་རེད། ད་དུང་བཟོ་གྲྭའི་འཐའ་འཁོར་ཡོངས་སུ་དམག་མི་འགྲེམས་འཇོག་གིས་སྐོར་ཞིབ་བྱེད་བཞིན་འདུག ཅེས་བརྗོད་འདུག

གསར་འགོད་པ། ཚེ་རིང་རྒྱལ།