ལྕཊ་སྒྲོག་ལས་ཐར་བའི་སྨྱུག་ཐོགས་པ་ཞིག་གི་ཤུལ་ལམ།

འདས་པའི་དུས་ནས་བཟུང་རྒྱ་ནག་གཞུང་གིས་བྱེད་ཐབས་འདྲ་མིན་གྱི་ལམ་ནས་བོད་ནང་གི་ཤེས་ལྡན་པ་དང་རྩོམ་པ་པོ་དག་ལ་ཉེས་མེད་ཉེས་འགལ་གྱིས་ཁྲིམས་ཆད་དང་བཙོན་འཇུག་མནར་གཅོད་གཏོང་གི་ཡོད་པའི་ཁྲོད་ཀྱི་མི་སྣ་མང་པོ་ཞིག་རྒྱ་ནག་གི་དབང་བསྒྱུར་ལས་ཐར་ཐུབ་མེད་ཀྱང་། ཁག་ཅིག་དཀའ་སྡུག་གི་འགག་འཕྲང་གང་མང་བརྒྱུད་ཕྱི་ཕྱོགས་སུ་བཙན་བྱོལ་དུ་ཡོང་གི་ཡོད། ཉེ་ཆར་བོད་ནས་བཙན་བྱོལ་ནང་འབྱོར་བའི་གྲྭ་དགེ་འདུན་ཚེ་རིང་ཡང་དེའི་ཁྲོད་ཀྱི་གཅིག་རེད། ཕྱི་ཚེས་ ༢༢ ཉིན་འདི་གའི་གསར་འགོད་པས་ཁོང་ལ་བོད་ནང་གི་ཤེས་ཡོན་པར་འཕྲད་ཀྱིན་པའི་དཀའ་ངལ་དང་འབྲེལ་ཏེ། ཁོང་གི་ཀྱག་ཀྱོག་གི་ཤུལ་ལམ་རིང་མོའི་ཐོག་བཅར་འདྲི་བྱས་ཡོད།

ཁོང་གིས་ཐོག་མར་བོད་ནང་ཤེས་ཡོན་པའི་སྡེ་ལ་འཕྲད་བཞིན་པའི་དཀའ་ངལ་སྐོར་ནས་བརྗོད་དོན། ད་ལྟའི་ཆར་བོད་ནང་ལ་མཚོན་ན། ཤེས་ལྡན་པ་དང་ལྷག་པར་དུ་གཞོན་སྐྱེས་ཚོར་མི་རིགས་ཀྱི་ལར་ཞེན་དང་རིགས་གཞུང་གི་དུང་བ་སོགས་ཕྱོགས་ཡོངས་ནས་སྔར་ལས་ཤུགས་ཆེ་རུ་འགྲོ་བཞིན་འདུག ཡིན་ནའང་། གཞུང་ཕྱོགས་ནས་ཐད་ཀར་དང་མངོན་གསལ་དོད་པོའི་ཐོག་ནས་རིག་གཞུང་གི་ལས་ཀ་གཉེར་མཁན་དང་ཤེས་ཡོན་པར་དམིགས་ཏེ་དྲག་གནོན་དང་། དེ་དག་གི་དམིགས་འབེན་བརླག་པའི་ཐབས་ཤེས་འདྲ་མིན་གཏོང་གི་ཡོད་པ་རེད། ངས་སྔོན་མ་དྲ་རྒྱ་དང་དུས་དེབ་སོགས་སུ་རྩོམ་ཡིག་རེ་གཉིས་སྤེལ་མཁན་མྱོང་ཡོད། ད་ཆར་བོད་ནང་གི་རྩོམ་པ་པོ་སྐད་གྲགས་ཅན་དག་ཕར་ཞོག ཐ་ན་ང་དང་ང་ལྟ་བུའི་རྩོམ་ཡིག་ཐབ་ཆག་རེ་གཉིས་སྤེལ་མཁན་ཚོར་ཡང་དཀའ་ངལ་རབ་དང་རིམ་པ་སྤྲོད་ཀྱི་འདུག་ལ། ང་དེ་རིང་སྐྱབས་བཅོལ་ལུང་པར་འབྱོར་ཏེ་སྡུག་སྐད་འདོན་བཞིན་ཡོད་པ་འདི་ཡང་བོད་ནང་གི་རྩོམ་པ་པོ་དག་གི་གནས་སྟངས་ཀྱི་ཟུར་ཙམ་ཡིན།

༢༠༠༩ ལོར་ང་དང་ན་ཚོད་མཉམ་པའི་རྩོམ་པ་པོ་ ༡༢ ཙམ་གྱིས་གྲོས་བསྡུར་བྱས་ཏེ། རྒྱ་ནག་གི་རྩ་ཁྲིམས་གཞིར་བཞག་ཐོག ས་གནས་ཉེན་རྟོག་པ་དང་དམག་མིའི་ཁྲིམས་འགལ་གྱི་བྱ་སྤྱོད་རིགས་ཐེར་འདོན་བྱས་པ་ཡིན། ང་ཚོའི་ཁྲོད་བོད་ཆོལ་ཁ་གསུམ་གྱི་མི་སྣ་ཡོད། ང་ཚོས་ཐེར་འདོན་བྱེད་སྟངས་ཐད་ནས། དང་པོ། ཆོས་ལུགས་དད་མོས་རང་དབང་མེད་པའི་སྐོར། གཉིས་པ། རྒྱ་ནག་གི་བཅའ་ཁྲིམས་གཞིར་བཟུང་ཐོག་སྨྲ་བརྗོད་རྩོད་ལེན་བྱེད་པའི་དབང་ཆ་མེད་པའི་སྐོར། གསུམ་པ། རྒྱལ་ཁབ་ནང་ཁུལ་གྱི་མི་རིགས་ང་དྲུག་གི་ཐོབ་ཐང་འདྲ་མཉམ་མིན་པའི་སྐོར་བཅས་དོན་ཚན་ ༣ གྱི་ཐོག་ནས་ཞུ་གཏུག་ཡི་གེ་བྲིས་ཏེ། ཁམས་བྲག་མགོ་སྤྱི་བདེ་ལས་ཁུངས་སུ་གཏུག་བཤེར་དུ་ཕྱིན་པ་ཡིན། སྐབས་དེར་ང་ཚོར་སྐད་ཆ་ཚིག་གཅིག་བཤད་དབང་མ་བྱུང་བར་བཀག་ཉར་བྱས་སོང་ལ། ཉིན་ ༣ རིང་འདྲི་རྩད་དང་གཅར་རྡུང་བཏང་སོང་། ཕྱིས་སུ་སྲིད་གཞུང་གི་གནད་ཡོད་མི་སྣ་བསླེབས་ཏེ་ང་ཚོའི་དམིགས་ཡུལ་དང་བསམ་ཚུལ་ཅི་ཡོད་ཀྱི་སྐད་ཆ་དྲིས་པར། ང་ཚོས་དོན་ཚན་གསུམ་དང་འབྲེལ་ནས་ང་ཚོར་མི་རིགས་རང་སྐྱོང་ཁུལ་ཞེས་པ་དེ་མིང་སྟོང་ཙམ་ལས་རང་སྐྱང་གི་ཁེ་དབང་གཅིག་ཀྱང་མེད་པ་མ་ཟད། ཐ་ན་མི་རིགས་རང་གི་སྐད་ཡིག་བཀོད་སྤྱོད་ཀྱི་རང་དབང་ཙམ་ཡང་མེད་ཚུལ་སོགས་བཤད་སྐབས། ཁོང་ཚོས་གཞུང་གི་སྲིད་བྱུས་ལ་ངོ་རྒོལ་བྱེད་ཀྱིན་པའི་ཉེས་མིང་འོག་ང་ཚོ་ཟླ་གཉིས་རིང་བཀག་ཉར་བྱས་སོང་ལ། ཕྱིས་སུ་ནང་མིས་རྒྱ་སྒོར་ཁྲི་ ༡༠ ལྷག་སྤྲད་དེ་ཀློད་གྲོལ་ཐོབ་པ་རེད། ཅེས་བརྗོད་བྱུང་།

ཡང་ཁོང་གིས་མུ་མཐུད་དོན།  ཕྱིས་སུ་ང་དང་ངས་གྲོགས་པོ་ཚོས་སྔར་གྱི་དམ་བཅའ་བརྟན་པོའི་ཐོག་མི་རིགས་ཀྱི་བདེ་སྡུག་གླེང་རྒྱུ་དང་མི་མང་གི་དཀའ་ངལ་ངོ་མ་བོད་མི་ཡོད་དོ་ཅོག་ལ་ཤེས་རུ་འཇུག་ཆེད། དུས་ཡུན་རིང་བོ་གཉེར་མི་ཐུབ་ཀྱང་བོད་མི་མང་གི་དཀའ་ངལ་ངོ་མ་གླེང་སའི་དུས་དེབ་ཞིག་བསྒྲུབ་མགོ་བརྩམས་ཤིང་། ལྷོ་ནུབ་མི་རིགས་སློབ་ཆེན་དང་ནུབ་བྱང་མི་རིགས་སློབ་ཆེན། བོད་ལྗོངས་མི་རིགས་སློབ་ཆེན། བོད་ལྗོངས་གསོ་རིག་སློབ་གྲྭ་ཆེན་མོ། དར་མདོ་བོད་ཡིག་སློབ་གྲྭ་ཆེན། མཚོ་སྔོན་དགེ་ཐོན་སློབ་ཆེན། གངས་ལྗོངས་ཤེས་རིག་ནོར་བུའི་གླིང་དང་གསེར་རྟ་བླ་རུང་ལྔ་རིག་ནང་བསྟན་སློབ་གླིང་བཅས་ཀྱི་དགེ་སློབ་ཁག་ཅིག་ཟུར་ཞུགས་མི་སྣར་བདམས་ཏེ། ང་ཚོ་མཉམ་རུབ་ཀྱིས་འདི་ལོའི་ཕྱི་ཟླ་ ༡༠ ཚེས་ ༡ ཉིན་ཁྲིན་ཏུའུ་གྲོང་ཁྱེར་ནས་ ༼ གསོན་མིག ༽ ཞེས་པའི་དཔེ་དེབ་གྲངས་ ༢༠༠༠ དང་། ང་རང་གིས་ ༢༠༠༨ ལོ་ནས་བྲིས་པའི་ཟིན་ཐོ་ཕྱོགས་བསྒྲིགས་ཀྱི་དེབ་ ༼ མིག་ཆུ ༽དེབ་གྲངས་ ༣༠༠༠  །  ༼ ཞི་བདེའི་དྲག་རྒོལ ༽ ཞེས་པའི་ཚགས་པར་གྲངས་ ༥༠༠ བཅས་དཔར་སྐྲུན་བྱས་ཏེ། སྤྲགས་ཁང་བརྒྱུད་ཉིན་གཅིག་དུས་གཅིག་ལ་ས་གནས་སོ་སོའི་མི་སྣའི་ལག་ཏུ་ཐད་ཀར་བཏང་བ་ཡིན།

ཉིན་གྲངས་བཅུ་ཡས་མས་ཤིག་ཕྱིན་རྗེས་ང་ཚོ་རོང་ཐ་དགོན་པའི་ནང་དམག་མིའི་རླངས་འཁོར་དྲུག་ལྷག་བསླེབས་ཏེ། ང་འཚོལ་བཞིན་འདུག་ཟེར་ནས་གྲྭ་བ་ཞིག་གིས་ཁ་པར་འབྱོར་སོང་། སྐབས་དེར་ངས་དགོན་པ་དང་གྲྭ་བ་གཞན་དག་ལ་དཀའ་ངལ་མི་བཟོ་ཆེད། ནག་ཉེས་ཅི་ཡོད་ང་སྒེར་གྱིས་ངོས་ལེན་བྱ་དགོས་བསམ་ཡང་། དགོན་པའི་གནད་ཡོད་མི་སྣ་དང་གྲོགས་པོ་ཚོས་ཁོང་ཚོའི་སར་འགྲོ་རྒྱུ་ཡོད་པ་མ་རེད། དེ་བས་གནས་སྐབས་རིང་གཞའ་ཐབས་བྱས་ན་ཡག་གི་རེད་ཟེར་ནས་ཨུ་ཚུགས་བརྒྱབ་པ་ལྟར། ང་རང་རོང་ཐ་སྡེ་བའི་ཕྱུགས་ལས་ཀྱི་ཕྱོགས་སུ་བྲོས་བྱོལ་བྱས་པ་ཡིན། བྲོས་བྱོལ་གྱི་སྐབས་སུ་ངས་གྲོགས་པོ་གཉིས་འཛིན་བཟུང་བྱས་སོང་བ་གོ་སོང་། ཉིན་ཞིག་ང་ལྐོག་ནས་ཁོང་གཉིས་ཀྱི་ཁྱིམ་དུ་ཕྱིན་པ་ཡིན། ཁོང་གཉིས་ཀྱི་ཕ་མ་དང་ནང་མི་ཚོས་གཏན་ནས་ནག་ཉེས་ཁས་ལེན་བྱ་མི་ཉན་ཟེར་ནས་བཤད་སོང་།

དེ་ནས་ང་རང་ཡུལ་དུ་གནས་ཐབས་མེད་པ་ཤེས་ཏེ་དཔལ་ཡུལ་ནས་ཁམས་བྲག་མགོ་དང་། དེ་ནས་དཀར་མཛེས་བརྒྱུད་དེ་རི་བྱོལ་དང་འཁྱམས་མྱུལ་བྱས་པ་ཡིན། ད་ལོའི་ཡུལ་ཤུལ་ས་འགུལ་སྐབས། ང་དང་གྲོགས་པོ་ཁ་ཤས་ལྐོག་ནས་སྐྱེ་རྒུ་མདོར་ཕྱིན་སྟེ་གནས་ཚུལ་འཚོལ་བསྡུ་བྱས་ཏེ། ༼  ལྕེ  ༽ ཞེས་པའི་དེབ་ཅིག་བཀྲམས་པ་ཡིན། དེ་ལྟར་རྒྱ་གཞུང་ལ་མི་འདོད་པའི་ལས་ཀ་སྔ་ཕྱིར་བྱས་སྟབས། རྒྱ་ནག་གཞུང་གིས་ངའི་པར་གང་སར་བཀྲམས་ཏེ་ངའི་གནས་ཚུལ་སྲིད་གཞུང་ལ་སྙན་གསེང་ཞུ་མཁན་ཡོད་ན་རྒྱ་སྒོར་ཁྲི་ ༢ ནས་ ༣ བར་བྱ་དགའ་སྤྲོད་རྒྱུའི་གསལ་བསྒྲགས་བྱས་འདུག

མཐའ་ཁོང་ལ་རྒྱ་གར་ནང་བསླེབས་རྗེས་ཀྱི་ཚོར་སྣང་དང་མ་འོངས་པའི་དམིགས་ཡུལ་སྐོར་དྲིས་པར། ཐོག་མར་བལ་ཡུལ་སྣེ་ལེན་ཁང་དུ་བསླེབས་རྗེས་ཀྱི་ཉིན་ཁ་ཤས་རིང་། ད་ང་རང་དབང་ལོང་པར་བསླེབས་སོང་སྙམ་པའི་ཚོར་བ་ཞིག་ལས་བསམ་ཚུལ་གཞན་གང་ཡང་མི་འདུག ཡིན་ནའང་། མ་འོངས་པར་ངས་འདས་པའི་དུས་ཡུན་ནང་བོད་ཡིག་ཐོག་ལས་ཀ་ཕྲན་བུ་བྱས་པ་རྨང་གཞིའི་ཐོག་མུ་མཐུད་བོད་སྐད་ཡིག་གི་སྟེང་ནས་གོམ་པ་སྤོ་རྒྱུ་ཡིན་ལ། མ་འོངས་པའི་མི་ཚེ་ཡང་མི་རིགས་རང་གི་སྐད་ཡིག་གི་སྟེང་ནས་བསྐྱལ་དགོས་བསམ་ཡོད། ཞེས་བརྗོད་བྱུང་།

རང་ལོ་ ༢༠ ཡིན་པའི་གྲྭ་དགེ་འདུན་ཚེ་རིང་ནི། རྔ་བ་བོད་རིགས་རང་སྐྱོང་ཁུལ་དམར་ཐང་རྫོང་གསར་དེའུ་རོང་ཐ་མ་སྡེ་བ་རུ་སྐྱེས་ཤིང་། རང་ལོ་དྲུག་གི་སྟེང་སློབ་གྲྭར་ཕྱིན་ཏེ་སློབ་ཆུང་དང་དམའ་འབྲིང་། མཐོ་འབྲིང་བཅས་ཐེམ་སྐས་རིམ་འཛེགས་ཀྱིས་སློབ་སྦྱོང་གནང་མྱོང་མཁན་ཞིག་ཡིན་པར་མ་ཟད། རོང་ཐ་དགོན་པའི་གྲྭ་བ་བྱས་རྗེས་གསེར་རྟ་བླ་རུང་ལྔ་རིག་ནང་བསྟན་སློབ་གླིང་དུ་ལོ་གསུམ་རིང་སློབ་གཉེར་བྱས་ཤིང་། ཕྱིས་སུ་སྡེ་དགེ་ས་ཁུལ་དུ་ཡོད་པའི་དྭ་ཕྲུག་བྱམས་སྐྱོང་སློབ་གྲྭའི་དགེ་རྒན་གནང་སྟེ། ཞོར་དུ་བོད་ཁུལ་གྱི་དུས་དེབ་དང་ཚགས་པར་དྲ་ཚིགས་སོགས་སུ་བོད་མི་རིགས་ཀྱི་ལས་འདབང་དང་འབྲེལ་བའི་རྩོམ་ཡིག་མི་ཉུང་ཞིག་སྤེལ་ཡོད་འདུག

གསར་འགོད་པ། དོན་གོ