འདི་
ཕྱི་ཟླ་ ༡ ཚེས་ ༡༢ ཉིན། གྷོ་གྷིལ་དྲ་རྒྱའི་ལག་རྩལ་བཟོ་གྲྭ་ ༣༣ གྱི་རྨང་གཞིའི་སྒྲིག་བཀོལ་ལ་རྒྱ་ནག་གི་དྲ་འབུས་སིམ་འཛུལ་གཏོར་རྒོལ་བྱུང་བའི་རྗེས། གྷོ་གྷོལ་དྲ་བ་རྒྱ་ནག་ནང་ཕྱིར་འཕེན་བྱེད་མིན་ཐད་རྩོད་རྙོག་བྱུང་སྟེ་རྒྱལ་སྤྱིའི་བརྡ་འཕྲིན་དྲ་བའི་ཚོང་དོན་ཐད་ཤུགས་རྐྱེན་ཆེན་པོ་བྱུང་བར་མ་ཟད། ཨ་རྒྱ་གཉིས་ཀྱི་ཆབ་སྲིད་འབྲེལ་བའི་ཐད་ལའང་རྩོད་གླེང་བྱུང་། དེའི་འབྱུང་རྐྱེན་ནི། རྒྱ་ནག་གི་དཔོན་རིགས་ཚོའི་ནག་ཉེས་དང་། རྒྱ་ནག་གིས་བཀག་སྡོམ་བྱེད་བཞིན་པའི་གནས་ཚུལ་རིགས་གྷོ་གྷོལ་དྲ་བའི་ནང་འཚོལ་བཤེར་བྱུང་བས་ཡིན་འདུག
ཕྱི་ཟླ་ ༢ པ་ནས་བཟུང་། ཡུན་ནན་ཞིང་ཆེན་གཙོས་པའི། སི་ཁྲོན་དང་ཁྲུང་ཆིན། ཀོས་ཀྲུག ཀོང་ཞི་བཅས་རྒྱ་ནག་ལྷོ་ནུབ་ས་ཁུལ་གྱི་ཞིང་ཆེན་ལྔའི་ནང་ཆར་ཆུ་མ་བབས་པར་རྒྱུགས་ཆུ་སྐམ་པ་དང་། ས་གཞིར་ཚ་དྲོད་རྒྱས་ཏེ་འདས་པའི་ལོ་ ༥༠ ནང་གི་ཐན་སྐྱོན་ཆེ་ཤོས་བྱུང་ཞིང་། མི་གྲངས་ཁྲི་ ༥༡༠༤་༩ ལྷག་གི་འཚོ་བར་གནོད་འཚེ་དང་། མི་ཁྲི་ ༡༦༠༩ དང་ཕྱུགས་རིགས་ཁྲི་ ༡༡༠༥་༥ ལ་འཐུང་ཆུའི་དཀའ་ངལ་བྱུང་པ་དང་། ས་ཞིང་མུའུ་ཁྲི་ ༤༣༤༨༦ ལྷག་ཐན་པས་བསྐམས་ཏེ་ཁྱོན་བསྡོམས་རྒྱ་སྒོར་དུར་ཕྱིར་ ༡༩༠་༢ ལྷག་གི་གྱོང་གུད་ཐེབས་ཡོད།
ཕྱི་ཟླ་ ༡ ཚེས་ ༡༨ ནས་ ༢༠ ཉིན་བར། པེ་ཅིན་དུ་བོད་དོན་བཞུགས་མོལ་ཚོགས་འདུ་ཐེངས་ལྔ་བ་ཚོགས་ཏེ། རྒྱ་ནག་དབུས་བོད་ལྗོངས་ལས་དོན་ཚོགས་ཆུང་ཟེར་བ་དེ་རྒྱ་ནག་དབུས་བོད་ཁུལ་ལས་དོན་ཚོགས་ཆུང་དུ་བསྒྱུར་ཞིང་། བོད་རང་སྐྱོང་ལྗོངས་དང་མཚོ་སྔོན། ཡུན་ནན། སི་ཁྲོན། ཀན་སུའུ་བཅས་ཀྱི་བོད་ཁུལ་ཡོངས་ཀྱི་ལས་དོན་ཐད་བསྐྱར་དུ་སྲིད་ཇུས་གཏན་འབེབས་བྱས་ཏེ། མ་དངུལ་གཏོང་ཤུགས་ཆེ་རུ་བཏང་སྟེ་རིམ་པ་མཐོ་བའི་གཞུང་ལམ་དང་ཆུ་རགས། གནམ་ཐང་དང་མེ་འཁོར་ལྕགས་ལམ་སོགས་ཀྱི་འཛུགས་སྐྲུན་རྣམ་གྲངས་མང་པོ་འཆར་འགོད་བྱས།
ཕྱི་ཟླ་ ༣ ཚེས་ ༢༣ ཉིན་ནས་བཟུང་། ཉིན་ ༣༩ ནང་ལ་རྒྱ་ནག་གི་སློབ་ཆུང་ཁག་ཅིག་ནང་མི་གསོད་ཀྱི་དོན་རྐྱེན་བྱུང་ཡོད། དེ་ནི་ཧྥུའུ་ཅན་ནན་ཕེན་སློབ་ཆུང་དང་། ཀུང་ཞི་ཧི་ཕའོ་གྲོང་བརྡལ་སློབ་ཆུང་། ཀུང་ཏུང་ལོའུ་ཧྲིན་སློབ་ཆུང་དང་པོ། ཅང་སུའུ་ཐེ་ཞིན་གྲོང་བརྡལ་བྱིས་གཉོར་ཁང་། ཧྲན་ཏུང་ཧྲང་ཀྲུང་སློབ་ཆུང་བཅས་སུ་བསྟུད་མར་ཐེངས་ ༥ ལ་བྱིས་པ་དམར་གསོད་ཀྱི་དོན་རྐྱེན་བྱུང་སྟེ། ཁྱོན་བསྡོམས་བྱིས་པ་ ༨ དང་དགེ་རྒན་ ༡ བཅས་དམར་གསོད་དང་། བྱིས་པ་ ༧༣ ལ་རྨས་སྐྱོན་བཟོས་ཏེ། འཇིགས་སྐུལ་རིང་ལུགས་པའི་བྱེད་སྟངས་གསར་པ་ཞིག་སྲོལ་བཏོད།
ཕྱི་ཟླ་ ༥ ཚེས་ ༡ ཉིན་ནས་མགོ་འཛུགས་ཀྱིས། ཟླ་ངོ་ ༦ རིང་འཛམ་གླིང་དངོས་མང་ཚོང་འགྲེམས་ཐེངས་ ༤༡ པ་དེ་རྒྱ་ནག་ཧྲང་ཧེ་གྲོང་ཁྱེར་དུ་ཚོགས་ཤིང་། དེར་འཛམ་གླིང་ཡུལ་ཕྱོགས་སོ་སོའི་དངོས་ཚོང་འགྲེམས་སྟོན་བྱས་མཐར་ ༡༠ ཚེས་ ༣༡ ཉིན་མཇུག་བསྡུས་ཡོད། ཐེངས་འདིའི་ཚོང་འགྲེམས་ལ་གཟིགས་སྐོར་དུ་ཡོང་མཁན་མི་བྱེ་བ་བདུན་ ༧༠༠༠༠༠༠༠ ལས་བརྒལ་ཏེ་འཛམ་གླིང་དངོས་མང་ཚོང་འགྲེམས་ཀྱི་ཟིན་ཐོར་བཀོད་སྐོར་བསྒྲགས་ཀྱང་། དེ་ནི་རྒྱ་ནག་ནང་ཁུལ་གྱི་ལྟ་སྐོར་བ་ལས་ཕྱི་མི་བརྒྱ་ཆ་ ༥ ཙམ་ལས་ཟིན་མེད་ལ། ཚོང་འགྲེམས་དེ་དབུ་འབྱེད་མཛད་སྒོའི་ཐོག་འཛམ་གླིང་རྒྱལ་ཁབ་དག་གི་དབུ་ཁྲིད་བཅར་མིན་ཐད་རྒྱལ་སྤྱིའི་ནང་གླེང་སློང་ཤུགས་ཆེན་བྱུང་ཡོད།
ཕྱི་ཟླ་ ༥ ཚེས་ ༡༧ ནས་ ༢༠ ཉིན། རྒྱ་ནག་པེ་ཅིན་དུ་ཤིན་ཅང་ལས་དོན་བཞུགས་མོལ་ཚོགས་འདུ་ཚོགས་ཏེ། ཤིན་ཅང་ས་ཁུལ་ཏུ་ལས་དོན་བྱེད་ཕྱོགས་ཀྱི་སྲིད་ཇུས་གཏན་འབེབས་བྱས། འདི་ནི་རྒྱ་ནག་དབུས་གཞུང་གིས་ཤིན་ཅང་ས་ཁུལ་ལ་ཆེད་དུ་དམིགས་ཏེ་ཚོགས་འདུ་བསྐངས་བ་ཐོག་མ་དེ་ཡང་ཆགས་ཡོད།
ཕྱི་ཟླ་ ༥ པ་ནས་བཟུང་། རྒྱ་ནག་གི་ཧྭོ་ནན་དང་ཀུང་ཏུང་། ཅང་ཞི། ཀྲེ་ཅང་གཙོས་པའི་ཞིང་ཆེན་ཁག་ ༢༨ ནང་བསྟུན་མར་ཆུ་ལོག་གི་གནོད་པ་བྱུང་སྟེ། ཁྱོན་བསྡོམས་མི་ ༡༤༥༤ རྐྱེན་འདས་སོང་བ་དང་། མི་ ༦༦༩ གར་སོང་ཆ་མེད་དུ་གྱུར་བ། ས་ཞིང་མུའུ་ཁྲི་ ༡༣༤༧༡༠ ལྷག་ཆུ་ལོག་གིས་བསྣུབས་ཏེ། མི་མང་དུང་ཕྱུར་ ༢ ལྷག་གི་འཚོ་བར་གནོད་འཚེ་ཐེབས་པ་དང་། གྱོང་གུད་རྒྱ་སྒོར་དུང་ཕྱིར་ ༢༧༥༡་༦ ལ་སླེབས་ཡོད།
ཕྱི་ཟླ་ ༡༠ ཚེས་ ༡༨ ཉིན། རྒྱ་ནག་དམར་ཤོག་ཚོགས་པའི་སྐབས་བཅུ་བདུན་པའི་རྒྱུན་ལས་ཚོགས་འདུ་ཐེངས་ལྔ་པའི་སྟེང་། རྒྱ་ནག་གི་སྲིད་བློན་གཞོན་པ་ཞི་ཅིན་ཕེན་རྒྱ་ནག་དམག་ཁུལ་གྱི་དམག་སྤྱི་གཞོན་པར་དམིགས་འཛུགས་བྱས་ཤིང་། སྐབས་བདུན་པའི་མི་མང་འཐུས་མིའི་རྒྱུན་ལས་ཚོགས་འདུ་ཐེངས་ ༡༧ པའི་སྟེང་དངོས་སུ་བསྐོ་བཞག་བྱས་ཏེ། ཕྱི་ལོ་ ༢༠༡༢ ལོའི་རྒྱ་ནག་གི་སྲིད་འཛིན་གསར་འདེམས་ཀྱི་གོམ་པ་དང་པོ་སྤོས་ཟིན་པར་བཤད།
ཕྱི་ཟླ་ ༡༡ ཚེས་ ༡༢ ནས་ ༡༦ རིང་། རྒྱ་ནག་ཀུང་ཀྲིག་གྲོང་ཁྱེར་དུ། ཨེ་ཤ་ཡའི་ལུས་རྩལ་འགྲན་ཚོགས་ཐེངས་ ༡༦ པ་དེ་འཛོམས་ཤིང་། འགྲན་ཚོགས་དེའི་སྟེང་ཨེ་ཤ་ཡའི་རྒྱལ་ཁབ་ ༤༥ ཙམ་མཉམ་ཞུགས་བྱས་ཡོད་ཅིང་། ཐེངས་འདིའི་འགྲན་རྩེད་ཁྲོད་རྒྱ་ནག་ལ་ཨང་དང་པོ་དང་། ལྷོ་ཀོ་རི་ཡར་ཨང་གཉིས་པ། ཉི་ཧོང་ལ་ཨང་གསུམ་པ་བཅས་ཐོབ་ཡོད།
ཕྱི་ཟླ་ ༡༠ ཚེས་ ༨ ཉིན། ༢༠༡༠ ལོའི་ནོ་བྷེལ་ཞི་བདེ་གཟེངས་རྟགས་དེ་རྒྱ་ནག་གི་བཙོན་འོག་ཏུ་ཡོད་པའི་སྐུ་ཞབས་ལིག་ཞོ་པོ་ལ་འབུལ་རྒྱུའི་ཐག་གཅོད་བྱུང་མ་ཐག རྒྱ་ནག་ནང་ལོགས་གཙོས་པའི་འཛམ་གླིང་ཡུལ་གྲུ་གང་ས་ནས་ཁོང་ཉིད་ཀློད་གྲོལ་དགོས་པའི་འབོད་སྐུལ་དང་ངོ་རྒོལ་གྱི་ལས་འགུལ་བསྟུད་མར་སྤེལ་ཡོད། ཕྱི་ཟླ་ ༡༢ ཚེས་ ༡༠ ཉིན་ཨོ་སི་ལཱོ་རུ་གཟེངས་རྟགས་འབུལ་བཞེས་ཀྱི་མཛད་སྒོ་དངོས་གཞིའི་སྟེང་། སྐུ་ཞབས་ལིག་ཞོ་པོ་ཕེབས་མ་ཐུབ་པར་བཙོན་འོག་ཏུ་ཡོད་པའི་གནས་ཚུལ་དེས་རྒྱལ་སྤྱིའི་སྟེང་རྒྱ་ནག་ལ་ངོས་འཛིན་གསར་པ་ཞིག་བྱུང་ཡོད།
གསར་འགོད་པ། ཚེ་རིང་རྒྱལ།
