བཀའ་བཞིན་སྒྲུབ་པའི་སྐྱེས་མཆོག – ཆབ་བྲག་ཕོ་ཉ།

༄། །ནང་བ་སངས་རྒྱས་པ་གཞིར་བཞག་ན། རྣམ་མཁྱེན་མ་ཡོད་ཕྱིན་སུས་ཀྱང་མཐའ་གཅིག་ཏུ་ཐག་བཅད་ནས་སུ་ཞིག་གི་གཏན་གྱི་བསམ་བློའི་ཕུགས་འདུན་བཤད་མི་ནུས། འོན་ཏེ་ཟམ་གདོང་གི་ལས་སྟངས་དང་བཤད་སྟངས་ལ་རྒྱུན་དུ་བསམ་བློ་གཏོང་མཁན་ཚོར་ཁོང་ལ་དོགས་པ་ཆེན་པོ་ཡོད། ཕྲན་གྱིས་བསམ་ན། ཁོ་སྤྱིར་བཏང་བཞིན་གྲྭ་ས་ནས་དགེ་རྒན་མང་དུ་བརྟེན་ནས་བྱུང་པ་ཞིག་ཡིན་ཚོད་རེད། བླ་མ་སྐྱབས་རྗེ་ཁྲི་བྱང་རྡོ་རྗེ་འཆང་ཆེན་པོ་མཆོག་ཟེར་ནས་དམིགས་སུ་བཀར་དགོས་དོན་འདིས་དོལ་ཚོགས་དབུ་ཁྲིད་དགེ་བཤེས་སྐལ་བཟང་རྒྱ་མཚོའི་ལང་ཕྱོགས་དང་འདྲ་མཚུངས་ཡོད་སྲིད་པའི་ཚོར་བ་འབྱིན་ཐུབ། ཉེ་སྔོན་རྩོམ་ཡིག་ཁག་གི་ནང་ཁོ་བཀའ་བློན་ཚར་རྗེས་དོལ་ཚོགས་ལ་ཞུགས་སྲིད་པར་གཏན་ཚིགས་འགོད་མཁན་ཚོར་རྒྱབ་ལྗོངས་བྱས་འདུག་པ་འདྲ། བོད་པའི་ཤ་ཁྲག་གིས་འབྲེལ་ཚད་ལ་མི་རིགས་ཀྱི་རིགས་ཞེན་དང་ལ་རྒྱ་འཕེལ་དང་འཕེལ་བཞིན་ཡོད་པ་དང་། བོད་མི་དཔའ་བོ་དཔའ་མོ་ཆེས་མང་བོས་ཚེ་དང་སྲོག་གི་འགྲོ་སོང་བཏང་ཏེ་རྒྱལ་ཁབ་དང་མི་རིགས་ཀྱི་མདུན་ལམ་འཚོལ་བཞིན་པའི་སྐབས་སུ། ཆེས་ཐོག་མའི་བོད་ཀྱི་སྲིད་འཛིན་དེས་ངས་བླ་མ་གཅིག་གིས་བཀའ་བསྒྲུབ་པ་ལས། ངས་མི་རིགས་ལ་བསམ་བློ་གཏོང་གི་མེད་ལ་རྒྱལ་ཁབ་ལའང་བསམ་བློ་གཏོང་གི་མེད། ཆབ་སྲིད་ལའང་བསམ་བློ་གཏོང་གི་མེད། ཟེར་བའི་གཏམ་དེ་སྐྱུག་བྲོ་བ་ཞིག་ཏུ་སྣང་། ཁོ་ཆོས་པ་རྣམ་དག་ཞིག་ཡིན་དུ་ཆུགས་ཀྱང་། མི་རིགས་དང་རྒྱལ་ཁབ་ཀྱི་ལས་དོན་ཆོས་ལས་ལོགས་སུ་བགྲངས་བ་ནི་མཁས་པའི་གཏམ་དང་མཛངས་བོའི་གཏམ་དུ་རྩ་བ་ནས་མི་སྣང་། བསམ་བློའི་རྒྱབ་གཞུང་ཅི་ཡིན་ལ་མ་ལྟོས་པར། གཏམ་དེ་ཐོས་པ་ཙམ་གྱིས་གཞེས་ལུས་མི་དམངས་མང་དག་ཅིག་དང་གཟུར་གནས་ལྷག་བསམ་ཅན་མང་བོར་བློ་ཕམ་བྱུང་ངེས་རེད། མ་ཟད་ཁོས་དེ་འདྲ་ཆེད་དུ་སྨྲ་དགོས་དོན་ཞིག་ངེས་པར་དུ་ཡོད་ལ། སྲིད་འཛིན་གྱི་ལས་དོན་མ་འགྲུབ་པའི་ཆོས་པ་བརྣལ་མའི་གྲལ་དུ་འཚང་གི་ཡོད་པ་འདྲ། དོལ་ཚོགས་ཀྱི་གྲྭལ་དུ་འཚང་བའི་འཆར་གཞི་མིན་པར་སྨོན་ལམ་འདེབས། མདོར་བསྡུས་ན། ཁོའི་བྱེད་ལུགས་དེ་དག་སྲོལ་རྒྱུན་པའི་ཆོས་པ་རྣམ་དག་ཞིག་གི་བྱེད་ལུགས་མིན་པ་ཤེས་སླ་བས་ཁོ་ལ་གཡོ་རྒྱུ་ཆེན་པོ་ཞིག་སྣང་། ༸སྤྱི་ནོར་གོང་ས་སྐྱབས་མགོན་ཆེན་པོ་ནང་བཞིན་ཆོས་སྲིད་གཉིས་དང་། མི་རིགས་ཀྱི་ལ་རྒྱ་དང་རྒྱལ་ཁབ་ཀྱི་མདུན་ལམ་ཡོངས་རྫོགས་ཆོས་དང་མི་འགལ་བར་བྱེད་ཤེས་མཁན་ཞིག་མིན་པ་ཁོ་རང་ཉིད་ཀྱིས་གསལ་བོར་བསྟན་པ་རེད། དོན་འདི་གཅིག་པོ་མ་ཡིན་པར་ཕྱོགས་མང་དག་ཅིག་ལས་དཔག་ན། ང་ཚོས་ཁོ་ལ་ཡིད་ཆེས་མི་བྱེད་པར་བརྟག་དཔྱད་དང་དོགས་ཟོན་བྱས་ན་དགེ་མཚན་ལས་སྐྱོན་ཅི་ཡང་མེད་སྙམས། ཐ་ན་གཟེངས་རྟགས་ཕུལ་མཁན་གྱི་སློབ་ཕྲུག་དག་ལའང་ནོར་བ་རེད་ཟེར་བ་སོགས་ཀྱི་ཁྱད་གསོད་བརྙས་བཅོས་ཀྱིས་རང་ཉིད་དམིགས་བསལ་བ་ཞིག་ཡིན་མདོག་བྱེད་མི་རིགས་སྙམས། །
བོད་མི་དམངས་སྤྱི་འཐུས་ཆབ་བྲག་ལྷ་མོ་སྐྱབས་ཀྱིས།
བྱང་ཆུབ་སེམས་དཔའི་བཀའ་བཞིན་སྒྲུབ་མཁས་ལ། བྱང་སེམས་མི་འདུག་སྨྲ་བ་མཐོལ་ལོ་བཤགས། མངོན་པར་གསལ་བའི་མཛད་རྗེས་མཐོང་བཞིན་དུ། ལྐོག་གྱུར་སྐྱོན་མཚང་འབྱིན་པ་མཐོལ་ལོ་བཤགས། ཆོས་ཀྱི་བླ་མ་སྲིད་ཀྱི་རྒྱལ་པོ་གང། གང་གསུང་གང་སྒྲུབ་ལུགས་གཉིས་དོན་ཆེན་ཏེ།། བླ་མའི་ཞབས་ཞུ་སེམས་ཅན་འགྲོ་དོན་གཉིས། གཅིག་ལས་ལོགས་སུ་སྣང་ན་ལོག་ཤེས་ཡིན། ཟེར་བ་དང་།

སྒྲོལ་མ་མེ་ཏོག་གིས།
བཀའ་བློན་ཁྲི་བ་ཟམ་མདོང་གིས་མི་རིགས་དང་རྒྱལ་ཁབ་ལ་བསམ་བློ་གཏོང་གི་མེད་ཟེར་ནས་དངོས་སུ་གསུངས་པ་ཡིན་ན། གསུངས་བཤད་དེ་དངོས་གནས་སྐྱོ་བོ་རེད། དེ་ལ་ཡག་བཤད་འདྲ་རྒྱག་རྒྱུ་ལྷག་མི་འདུག བཀའ་ཁྲི་མཆོག་གིས་གསུངས་བཤད་འདི་ཁོ་རང་བཀའ་བློན་གྱི་འོས་ཁོངས་སུ་མ་བཞུགས་པའི་སྔོན་ལ་ག་རེ་བྱས་ནས་གསུངས་མེད་པ་ཡིན་ནམ། བལྟས་ཡོང་ན་བཀའ་ཁྲི་མཆོག་གིས་བོད་པའི་གཉན་འཕྲེང་ཅན་གྱི་དུས་ཚོད་འདི་ལ་ལོ་ངོ་བཅུ་འཕྲོ་བརླག་ལ་བཏང་བ་ཡིན་ཟེར་བ་དང་འདྲ་བོ་འདུག ཞེས་ཟེར་བ་གནད་འགག་ཏུ་མཐོང་།
ཁོ་ལ་ལན་ཡོད་མེད་ལ་མ་ལྟོས་པར། ངས་ཟམ་གདོང་ལ་དྲི་བ་ཆེས་སླ་མོ་ཞིག་འདྲི། ཟམ་གདོང་ལགས། ཁྱོད་ཀྱིས་ཁྲི་བྱང་གི་བཀའ་བཞིན་༸གོང་ས་མཆོག་གི་ཞབས་འདེགས་ཁོ་ན་བྱེད་ཀྱི་ཡོད་ན། བོད་མི་རིགས་ཀྱི་ལ་རྒྱ་དང་རྒྱལ་ཁབ་ཀྱི་མདུན་ལམ་ཆབ་སྲིད་རྣམས་༸གོང་ས་མཆོག་ལ་ཞབས་འདེགས་ཀྱི་ནང་དུ་ཚུད་མེད་པར་དམ་བཅའ་འཇོག་གི་ཡིན་ནམ། ཡོད་ཀྱང་ཉིད་ཀྱིས་ལོགས་སུ་བཀར་ཏེ་དོར་བ་ཡིན།
བླ་མའི་བཀའ་བཞིན་བསྒྲུབ་པའི་བཀའ་བློན་ཞིག་གིས། །ཆོས་བཞིན་བྱས་ཏེ་ཆོས་སྲིད་ཟུང་འབྲེལ་སྤངས་སམ། །མི་རིགས་ལ་རྒྱ་མེད་པའི་མི་དཔོན་ཞིག་གིས། །རྒྱལ་ཁབ་གཅེས་སེམས་མེད་བཞིན་རྒྱལ་ས་བཟུང་ངམ། །
བྱ་མང་ཟང་ཟིང་ཁྲོད་དུ་མི་ཚེ་སྐྱལ་བས། །མི་ཆོས་མེད་པའི་ལྷ་ཆོས་རྣལ་མ་ཨེ་ཡིན། །ཆོས་སྲིད་ཟུང་འཇུག་མི་ཤེས་རང་མཚང་ངོ་མ། ། ལོ་དགུའི་སྔོན་དུ་སྨྲས་ན་ལོ་ཟླ་མ་བརླགས། །

འདི་དཔྱད་གཏམ་ལས་མཐར་གཏོང་གི་དགག་བཞག་མིན་པས་ཆགས་སྡང་མེད་པའི་རིགས་པ་རྣམ་དག་གིས་ཡོ་བཅོས་བྱེད་མཁན་ཡིན་ན་མ་གཏོགས་ལན་གཏོང་རྒྱུ་མིན་པས་ཐུགས་ལ་འཇགས་པར་འཚལ། །
མི་ཕམ་རྒྱ་མཚོ་ནས།

ཅི་ཞིག་བཤད་པ་མི་གཙོ། ཇི་ལྟར་བྱེད་པ་གཙོ་ཟེར་བ་འདི་ལེགས་བཤད་ཅིག་ཡིན་ན། བཀའ་ཁྲིས་གནང་སྟངས་ལ་སྐྱོན་ཅི་ཡང་མེད་པར་མ་ཟད། ད་དུང་དམ་པའི་ཁེངས་སྐྱུང་གི་ངང་ཚུལ་དང་ལྡན། ད་ལྟའི་བཙན་བྱོལ་གཞུང་དེ་ཆོས་སྲིད་ཟུ་ངའབྲེལ་གྱི་ལམ་ལུགས་ངོ་མ་ཞིག་མིན་ནམ། ཡིན་ན་བཀའ་ཁྲིས་ཀུན་སློང་འདི་འདྲ་ཞིག་ཁུར་བ་ཧ་ཅང་འོས། ལ་ལས་ཁ་ནས་བྱས་རབས་དང་བྱེད་དགོས་རབས་སྟོང་བཤད་ཀྱང་དོན་གྱི་ལག་ལེན་ནས་གྲུབ་འབྲས་གང་ཡང་མེད། ལ་ལས་ཁ་ནས་མི་ཤེས་མི་ཡོང་མི་འཇོན་སོགས་བཤད་ཀྱང་དོན་ལ་བྱས་རྗེས་ཧ་ཅང་ཆེ། བཀའ་དྲིན་རྗེས་དྲན་གྱི་གཟེངས་རྟགས་དེ་བཀའ་ཁྲིའི་བོད་དོན་ཐད་ཀྱི་མཛད་རྗེས་གཙོ་བོར་བྱས་པ་ཞིག་རེད་ལ། དེ་ནི་ཁོང་གིས་ཆེད་དུ་བོད་དོན་ལ་ཐུགས་འཁུར་གནང་ཚུལ་ཡང་བཤད་ཡོད་པས། བཀའ་ཁྲིས་འདི་ངོས་ལེན་མ་གནང་བ་རེད། རྒྱུ་མཚན་ཁོང་གིས་ཅེད་དུ་བོད་དོན་གཅིག་པུར་དགོངས་བཞེས་གནང་བ་མིན་པར་ཆེས་ཆེ་ས་བླ་མའམ་ཆོས་ཀྱི་རྒྱལ་པོ་གང་གི་དགོངས་དོན་བསམས་པ་རེད། དེ་ལྟར་རྒྱ་ཆེ་ས་ཞིག་ལ་དགོངས་དུས་ཆུང་ཆུང་མང་པོ་ཞིག་རང་བཞིན་གྱིས་སྒྲུབ་དགོས་པ་དང་འགྲུབ་འགྲོ་བ་ལོས་ཡོང། རྣམ་པ་ཚོས་ཟམ་གདོང་རིན་པོ་ཆེས་ད་བར་མི་ལོ་ཉི་ཤུར་བོད་གཞུང་གི་སྲིད་སྟེགས་མཐོ་ཤོས་ཐོག་ནས་ཕྱག་ལས་གནང་སྐབས་མི་རིགས་དང་བོད་དོན་དགོངས་ཀྱི་མེད་པ་དང་དེར་སྨན་པའི་ཕྱག་ལས་གནང་གིན་མེད་པ་ཞིག་གི་མཐོང་ཚུལ་ཡོད་དམ་མེད། གལ་ཏེ་མེད་ན་ཀ་སང་གི་གསུང་བཤད་གཅིག་ལ་དེ་ཙམ་ཧ་ལས་ཧང་སང་ནང་མགོ་གཡུག་དགོས་དོན་མི་འདུག ཚིག་ལ་མི་རྟོན་དོན་ལ་རྟོན་ཟེར་བ་འདི་གོ་ལྡོག་མི་ཉན་ནོ།

ཤར་ཕྱོགས་ཁུག་རྟ་ལགས་ཀྱིས་དགོངས་ཚུལ་གནང་བར་ཐུགས་རྗེ་ཆེ་ཞུ། སྐུ་ཉིད་ལ་གསལ་བཤད་གཅིག་དང་བསམ་ཚུལ་འགའ་ཞུ་འདོད་བྱུང་།

རྒྱབ་འགལ་ཞེས་པ་དེ་ངས་གང་ཉིད་ཀྱིས་གསུངས་པ་ལྟར་ཚིག་དང་ཚིག་གི་ཕུགས་འདེད་པའི་སྲིད་དོན་འགྲོ་ལུགས་ལ་བསྟུན་པ་མིན། སྲིད་དོན་འགྲོ་ལུགས་ནང་ཚིག་དང་ཚིག་གི་ཕུགས་དེད་ནས་འགྲོ་སྟངས་ཤིག་ཡོད་པ་ངས་ངོ་མས་མ་ཤེས། འདི་རྒན་ལགས་ཀྱི་རྩོམ་ཡིག་ནང་དངོས་སུ་འདུག་ལ་བདེ་བོ་མ་བྱུང་ཙང་ངས་དམིགས་སུ་བཀར་པ་ཡིན། གང་ཉིད་ཀྱི་མཆན་བུ་དེ་བཀླགས་རྗེས་ངས་ཡང་བསྐྱར་རྩོམ་ཡིག་ལ་རོབ་ལྟ་ཞིག་བྱས་པ་ཡིན། དེ་དུས་རྒྱབ་འགལ་ཞེས་པ་དེ་ངོ་རྒོལ་ལ་བཟོ་བཅོས་བྱས་འདུག མ་གཞི་འདིའི་ཐད་རྩོམ་པ་པོ་སྐུ་དངོས་སམ་རྩོམ་སྒྲིག་པས་གསལ་བཤད་ཅིག་གནང་ན་ཡག་པོ་འདུག་སྙམ། དེ་མ་གཏོགས་གོ་ལོག་ཐེབས་ས་རེད། འདི་གསལ་བཤད་ཡིན།

བསམ་ཚུལ་རྣམས་དོགས་པ་དང་འབྲེལ་ནས་ཞུ་འདོད་བྱུང་།

གལ་སྲིད་པེ་ཅིན་ཨོ་ལིམ་པེཀི་དེ་དུས་བདེ་ཞོལ་འཇགས་ཀྱི་སྐབས་ཤིག་ལ་ཚུགས་ཡོད་ན། སྐུ་ཉིད་ཀྱིས་གསུངས་པ་ལྟར་ང་ཚོས་ཆབ་སྲིད་ཕལ་བར་བཞག་ནས་ཡ་རབས་ལུགས་བཟང་གིས་ལྟ་ཐུབ་ཀི་རེད་ལ། བོད་རྒྱ་ཞི་མཐུན་མཉམ་གནས་ཀྱི་རྨང་གཞི་དེ་ལག་ལེན་སྟེང་བསྐྱལ་ཐུབ་ཀི་རེད། ད་དུང་བོད་བརྒྱུད་ནང་བསྟན་གྱི་རྨང་གཞི་བྱས་པའི་རིག་གནས་སེམས་ཁམས་ཅན་གྱི་མི་རིགས་ཤིག་ཡིན་པའང་ལྷོད་ལྷོད་བྱས་ནས་སྟོན་ཆོག་གི་རེད། འོན་ཀྱང་། རྩེད་འགྲེན་དེ་མ་ཚུགས་པའི་ཟླ་གསུམ་བཞིའི་སྔོན་ལ་བོད་ཁམས་ཡོངས་སུ་དོན་རྐྱེན་ག་རེ་བྱུང་མིན་ང་ལས་སྐུ་ཉིད་ལ་གསལ་ཆ་ཆེ་བ་ཡོད་རྒྱུ་རེད། རྒྱ་རིགས་ཚོས་དང་པ་འདྲེན་པའི་རྩེད་མོའི་རིགས་ལོངས་སུ་སྤྱོད་སྐབས། བོད་ནང་གི་བོད་མི་ཚོས་ག་རེ་མྱོང་བཞིན་པའང་སྐུ་ཉིད་ལ་གསལ་བོ་ལོས་ཡོད། ཛ་དྲག་གི་གནས་སྟངས་དེ་འདྲ་ཞིག གཉན་ཕྲང་གི་དུས་ཚོད་དེ་འདྲ་ཞིག་གི་སྒང་ལ་ང་ཚོས་ད་དུང་ཡ་རབས་ལུགས་བཟང་དང་། བོད་རྒྱ་མཉམ་གནས། བྱང་སེམས་ཅན་གྱི་མི་རིགས་ཤིག་ཡིན་མདོག་སྟོན་ཆེད་ཁ་བཙུམ་ནས་བསྡད་ན། དེ་རླབས་ཆེན་གྱི་བྱ་བཞག་ཅིག་ཡིན། བྱབ་ཆུང་གི་བྱེད་སྟངས་ཤིག་ཡིན། ང་ལ་དོགས་པ་རེད།

སྐུ་ཉིད་ཀྱིས་ཨོ་ལིམ་པེཀི་ལ་ངོ་རྒོལ་བྱས་པ་དེས་ང་ཚོ་ལ་གྱོང་རེག་འདུག་གསུངས། ད་དུང་དེ་སྒང་ལ་གྱོང་རེག་སྟངས་འདི་མ་འོངས་པར་བསླབ་བྱར་ལེན་དགོས་གསུངས། བོད་པས་རྩེད་འགྲེན་དེར་ངོ་རྒོལ་བྱས། བརྟེན་ནས་རྩེད་འགྲེན་དེར་ཞུགས་མཁན་གྱི་ལུས་རྩལ་པ་གང་མང་ཞིག་གིས་ཀྱང་བོད་ནང་གི་གནས་སྟངས་ཇེ་ཡག་ཏུ་མ་བཏང་ན་རྩེད་འགྲེན་ནང་ཆ་ཤས་མི་ལེན་ཟེར་ནས་ངོ་རྒོལ་བྱས། བོད་ཀྱི་གནད་དོན་ཐད་གྲོས་མོལ་མ་བྱས་ཚེ་སྐུ་མགྲོན་དུ་ཡོང་གི་མིན་ཟེར་ནས་རྒྱལ་ཁབ་ཁག་གིས་དབུ་ཁྲིད་ཚོས་ངོ་རྒོལ་བྱས། དེ་ལ་བརྟེན་ནས་བོད་རྒྱ་ཞི་མོལ་ཀྱང་དུས་ཐུང་ཡུན་ཐུང་ཞིག་གི་ནང་ཐེངས་གཉིས་བསྟུན་མར་འགྲོ་ཐུབ་པ་བྱུང་། ད་དུང་ཞོར་ལ་མང་པོ་རེད། ད་བར་ལོ་གསུམ་འགོར་ནའང་། ངོ་རྒོལ་དེ་གྱོང་ཡིན་མིན་ང་ལ་ད་དུང་དོགས་པ་རེད།

ནམ་རྒྱུན་ནས་ང་ཚོས་སྐུ་མདུན་གྱི་དགོངས་གཞི་རླབས་ཆེན་ཡིན་ཚུལ་འགྲེལ་གི་ཡོད་རེད། ཁ་ཤས་ཤིག་གིས་རང་ཉིད་སྐུ་མདུན་གྱི་གཏིང་ཟབ་སར་འཛུལ་ཡོད་མདོག་མདོག་གིས་འགྲེལ་གི་རེད། ད་དུང་གཞན་ལ་ལས་འགུལ་ལྟ་བུ་ཞིག་ཡིན་ནའང་དགོངས་པ་ལོན་དང་མ་ལོན། རྨོངས་དང་མ་རྨོངས་སོགས་ཀྱི་ས་མཚམས་བཅད་ནས་འགྲེལ་གི་རེད། གནས་སྐབས་དེར། སྐུ་མདུན་གྱི་དགོངས་པ་ལས་ཁོང་རྣམ་པས་འགྲེལ་བཤད་རླབས་ཆེ་བ་མེད་འགྲོ། ང་ལ་དོགས་པ་རེད།

རྩོམ་སྒྲིག་པ་ལགས། ངའི་མཆན་དེ་བོར་སོང་བ་རེད་དམ།

སྐུ་ཞབས་ཟླ་ཚེ་རིང་ལགས་ཀྱིས་གསུང་པ་དེ་ཞིབ་ཚགས་པོ་དང་བདེན་པར་འདུག ཟམ་གདོང་རིན་པོ་ཆེས་དེ་འདྲ་གསུང་མི་འོས། ཁོང་མཉམ་ལེན་པ་ཞིག་ཡིན་དུ་ཆུགས་རུང་ཁོང་ལ་བོད་རྒྱལ་ཁབ་ཀྱི་བཀའ་ཁྲིའི་གོ་གནས་ཡོད་པས་རང་གི་མཉམ་ལེན་ལས་བོད་རྒྱལ་ཁབ་གལ་ཆེན་དུ་འཇོག་དགོས། ཆོས་ལུགས་པ་ཚོས་དེ་ནམ་ཡང་བྱེད་དཀའ་བས་ཁོ་བོས་ཆོས་ལུགས་པ་སྲིད་སྟེགས་སུ་འོང་མི་འོས་བཤད་དོན་དེ་ཡིན། ཁོང་གིས་ཆབ་སྲིད་ཀྱི་གནད་འགག་མཁྱེན་གྱི་མི་འདུག་ཞུ་མི་ཕོད་པས་ཁོང་གིས་ཆབ་སྲིད་ཀྱི་གནད་འགག་ལ་དགོངས་པ་བཞེས་ཀྱི་མི་འདུག་ཞུ་རྒྱུ་ཡིན། བཀའ་མོལ་འདི་འདྲ་ལན་གཅིག་མ་རེད། ལན་མང་རེད། བཀའ་མོལ་འདི་ཚོའི་ཐོག་ནས་ཟམ་གདོང་ཚང་ཟོལ་བརྫུ་བ་ཞིག་ཡིན་ནམ་མཉམ་ལེན་པ་ངོ་མ་ཞིག་ཡིན་པ་གང་ཡང་དཔོག་ཐུབ་ཀྱི་མི་འདུག

རྒན་ལགས་ཀྱི་གཞི་རྩའི་དགོངས་པ་བཞེས་སྟངས་དང་མཁྱེན་ཡོན་ལ་ད་བར་དོགས་པ་རྣམ་རྟོག་སྤུ་ཙམ་ཡང་མེད། ག་དུས་ཡིན་ནའང་གུས་བརྩི་ཞུ་གི་ཡོད། གསུང་མོལ་སྐབས་བཟང་སྤྱོད་ཀྱི་ལམ་ནས་གནང་རྒྱུ་ལ་ཚིག་འགའ་ཞུ་འདུན་བྱུང་།

ཉིས་སྟོང་བརྒྱད་ལོའི་པེ་ཅིན་ཨོ་ལིམ་པེཀི་རྩེད་འགྲེན་ལ་ངོ་རྒོལ་བྱས་པ་དེ་སྐུ་མདུན་གྱི་དགོངས་པ་དང་རྒྱབ་འགལ་བྱས་པ་རེད་གསུང་འདུག གསུང་མོལ་འདི་རིགས་ཅུང་ཚབས་ཆེན་རེད། འདི་རིགས་སྐུ་མདུན་གྱི་དགོངས་པ་དང་རྒྱབ་འགལ་ཡིན་ཚེ། ལོ་དེའི་བོད་ནང་གི་ངོ་རྒོལ་ལས་འགུལ་ཕལ་ཆེ་བ་ཡང་རྒྱབ་འགལ་ཆགས་ཀྱི་འདུག དེ་ལྟར་ཡིན་ཚེ་སྐུ་མདུན་གྱི་དགོངས་པར་རྒྱབ་འགལ་བྱེད་མཁན་བཙན་བྱོལ་སྤྱི་ཚོགས་ནང་གི་མི་སྒེར་རེ་ཟུང་དང་ཚོགས་པ་རེ་ཟུང་ཙམ་མིན་པར། ལས་འགུལ་དེ་ནང་མཉམ་ཞུགས་གནང་མཁན་གྱི་གཞིས་ལུས་མི་དམངས་ཕལ་ཆེ་བ་ཡང་ཁོང་གི་དགོངས་པར་རྒྱབ་འགལ་བྱེད་མཁན་ཆགས་དགོས་ཀྱི་འདུག སྐུ་མདུན་སྐུ་ངོས་ནས་ལས་འགུལ་འདི་གཉིས་གང་ཡིན་ཡང་ཁོང་གི་དགོངས་པ་དང་རྒྱབ་འགལ་ཡིན་པའི་གསུང་མོལ་གང་ཡང་གནང་མི་འདུག དགོངས་པ་ལ་རྒྱབ་འགལ་ཞེས་པ་དང་། དགོངས་གཞི་དང་མཐུན་མི་མཐུན་ཞེས་པ་གཉིས་ལ་བར་ཁྱད་ཡོད་རྒྱུ་རེད་འདོད། ལས་འགུལ་གང་ཞིག་ཁོང་གི་དགོངས་གཞི་དང་མི་མཐུན་ནའང་། ཁོང་གི་དགོངས་གཞི་ལ་རྒྱབ་འགལ་བྱས་པ་མཚོན་གྱི་མེད་འདོད། ཕྱག་རྩོམ་ཕེབས་དུས་གསུང་ཚིག་ལ་ཐུགས་གཟབ་གནང་རོགས།

བཀའ་ཁྲིའི་གསུང་མོལ་དེ་ཐུང་ཐུང་བྱས་ན་སྐད་ཆ་ཚིག་གཉིས་རེད། བླ་མའི་བཀའ་སྒྲུབ་པ་ཡིན། མི་རིགས་དང་རྒྱལ་ཁབ ཆབ་སྲིད་ལ་བསམ་བློ་བཏང་མྱོང་མེད་ཟེར་བ་འདི་གཉིས་རེད། བླ་མའི་བཀའ་སྒྲུབ་པ་ཡིན་ཞེས་པ་འདི་ལ་ཡི་མ་རིང་བའི་བསམ་ཚུལ་འདོན་མཁན་བྱུང་མེད། གཙོ་བོ་མི་རིགས་དང་རྒྱལ་ཁབ། ཆབ་སྲིད་ལ་བསམ་བློ་བཏང་མྱོང་མེད་ཟེར་བ་འདི་ལ་བསམ་ཚུལ་སླེབས་པ་རེད། བསམ་ཚུལ་འདོན་མཁན་ཚོས་རང་གི་བསམ་ཚུལ་དེ་དག་བཀའ་ཁྲི་ཟམ་གདོང་རིན་པོ་ཆེ་སྐུ་སྒེར་ངོས་ལ་བཏོན་མི་འདུག དེ་བཞིན་ཁོང་ཤྰཀྱའི་དགེ་སྦྱོང་བའམ་དགེ་འདུན་པ་ཞིག་ཡིན་པའི་ངོས་ནས་བཏོན་མི་འདུག ཁོང་བཀའ་བློན་ཁྲི་བ་ཡིན་པའི་ངོས་ནས་བཏོན་པ་རེད། ཁོང་བོད་མིི་རིགས་དང་། བོད་རྒྱལ་ཁབ་ཀྱི་ཆེས་མཐོའི་དབུ་ཁྲིད་ཅིག་གམ། བོད་ཀྱི་ཆབ་སྲིད་འཐབ་རྩོད་ལས་རིམ་ནང་གལ་གནད་ཆེ་བའི་བཀའ་བློན་ཁྲི་བ་ཡིན་པའི་ངོས་ནས་བཏོན་པ་རེད། བཀའ་ཁྲིས་རང་གི་ལས་གནས་ལ་འགན་མ་ཁུར་བའི་གསུང་མོལ་གནང་བ་རེད། མི་དམངས་ཀྱིས་འགན་འཁུར་བའི་བསམ་ཚུལ་བཏོན་པ་རེད། འདི་གཉིས་ཀྱི་གང་ལུགས་མཐུན་ཡིན་མིན་ཁ་གསལ་གོ་བདེ་རེད་འདོད། བར་འདི་ནས་ཕྱག་རྩོམ་ཕེབས་པ་དེ་ལ་བཟང་སྤྱོད་ཅིག་མཐོང་མ་སོང་།

ད་ལས་ཀ་ལ་འགྲོ་རན་སོང་། དགོང་མོ་ལས་ཀ་གྲོལ་ན་མུ་མཐུད་ནས་རེ་འདུན་ཞུ་གི་ཡིན།

བཀའ་བློན་ཁྲི་བ་ཟམ་མདོང་གིས་མི་རིགས་དང་རྒྱལ་ཁབ་ལ་བསམ་བློ་གཏོང་གི་མེད་ཟེར་ནས་དངོས་སུ་གསུངས་པ་ཡིན་ན། གསུངས་བཤད་དེ་དངོས་གནས་སྐྱོ་བོ་རེད། དེ་ལ་ཡག་བཤད་འདྲ་རྒྱག་རྒྱུ་ལྷག་མི་འདུག བཀའ་ཁྲི་མཆོག་གིས་གསུངས་བཤད་འདི་ཁོ་རང་བཀའ་བློན་གྱི་འོས་ཁོངས་སུ་མ་བཞུགས་པའི་སྔོན་ལ་ག་རེ་བྱས་ནས་གསུངས་མེད་པ་ཡིན་ནམ། བལྟས་ཡོང་ན་བཀའ་ཁྲི་མཆོག་གིས་བོད་པའི་གཉན་འཕྲང་ཅན་གྱི་དུས་ཚོད་འདི་ལ་ལོ་ངོ་བཅུ་འཕྲོ་བརླག་ལ་བཏང་བ་ཡིན་ཟེར་བ་དང་འདྲ་བོ་འདུག

མཁས་པའི་གཏམ་གྱིས་སེམས་ཀྱི་མདུད་པ་གྲོལ།།
མགོ་བོ་གཉིས་ཅན་སྐྱེངས་པའི་གནས་སུ་བཀོད།།
གནད་ཀྱི་འགག་སར་ཐུགས་ཐག་ཆོད་པོའི་མདངས།།
མཁས་པ་ཆབ་བྲག་ལྷ་མོའི་མཛེས་སྡུག་ཡིན།།