ཟླ་འདིའི་ཕྱི་ཚེས་ ༡༥ ཉིན་སོག་པོའི་གསོ་རིག་ཆེད་ཉེར་བ་དང་། སོག་བོད་གསོ་རིག་སློབ་གླིང་གི་འགན་འཛིན་སྐུ་ཞབས་བྷ་ཊི་རྫཱང་གྷ་ལགས་སུ། རྒྱ་གཞུང་གིས་གཞུང་དངུལ་སྒེར་སྤྱོད་བྱས་པའི་ཉེས་འཛུགས་བྱས་ཏེ་ལོ་ ༣ གྱི་བཙོན་འཇུག་ཁྲིམས་ཐག་བཅད་འདུག
སྐུ་ཞབས་བྷ་ཊི་རྫཱིང་གྷ་(Batzangaa) ལགས་རྒྱ་ནག་གི་སུན་གཙེར་འོག་སྡོད་མ་ཐུབ་པར་ ༢༠༠༩ ཟླ་ ༥ ཚེས་ ༢༦ ཉིན། ཁོང་གི་བཟའ་ཟླ་བྷ་ཡཱན་ཧར་ (Bayanhuaar) ལོ་དགུ་ཅན་གྱི་བུ་མོ་ཆཱེལ་གྷན་ (Chilguun) བཅས་སོག་ཡུལ་ནང་སྐྱབས་བཅོལ་དུ་བྲོས་ཡོད་ཀྱང་། རྒྱ་ནག་གི་གནོན་ཤུགས་འོག་རྒྱལ་ས་ཨའོ་ལན་བྷ་ཋར་( Ulaanbaatar)རུ་རྟེན་གཞི་བྱས་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་སྐབས་བཅོལ་ཡན་ལག་ལས་ཁུངས་ཀྱིས་ཁོང་ལ་སྐྱབས་བཅོལ་ངོས་ལེན་བྱས་མེད་པ་མ་ཟད། ལོ་དེའི་ཟླ་ ༡༠ ཚེས་ ༣ ཉིན་རྒྱ་ནག་གི་ཉེན་རྟོག་པ་ ༤ དང་སོག་པོའི་ཉེན་རྟོག་པ་ ༡༠ ཙམ་མཉམ་འབྲེལ་ཐོག་མཉམ་འབྲེལ་རྒྱལ་ཚོགས་ཡན་ལག་ལས་ཁུངས་ཀྱི་སྒོ་འགྲམ་ནས་ཁོང་ནང་མི་དང་བཅས་འཛིན་བཟུང་གིས་ཕྱིར་རྒྱ་ནག་ལ་ཁྲིད་ཡོད། ཟླ་དེའི་ཚེས་ ༧ ཉིན་བྷ་ཐི་ཛྷིང་གྷ་ལགས་དངོས་སུ་འཛིན་བཟུང་བཀའ་བཏང་ཞིང་། ཁོང་གི་བཟའ་ཟླ་དང་བུ་མོ་གཉིས་རང་ཁྱིམ་དུ་ཉེན་རྟོག་པའི་ལྟ་རྟོགས་འོག་བཞག
རྒྱ་ནག་གི་ཉེན་རྟོག་པས་དུས་ཡུན་གང་འཚམ་རིང་ཁོང་ལ་འཇམ་རྩུབ་གཉིས་ཀྱི་འདྲི་གཅོད་བྱས་མཐར། ཕྱི་ཚེས་ ༡༥ ཉིན་དམག་མི་ ༢༠༠ ལྷག་གི་སྐོར་སྲུང་ནན་མོའི་འོག་ཁྲིམས་རྭ་ཚོགས་ཡོད་པ་དང་། ཁྲིམས་རའི་ནང་ཁོང་གི་ནང་མི་ ༡༠ ཙམ་མ་གཏོགས། རྐུབ་སྟེགས་གཞན་ཚང་མར་སྒྲིག་ཆས་གྱོན་མེད་པའི་ཉེན་རྟོག་པ་རྐྱང་སྡོད་དུ་བཅུག་ཡོད་འདུག་ལ། ཁྲིམས་བཤེར་སྐབས་ཁོང་གི་ཁྲིམས་རྩོད་པས་མ་དངུལ་སྒེར་སྤྱོད་ཀྱི་ཉེས་འཛུགས་དེར་བདེན་དཔང་མེད་སྟབས། བསྐྱར་དུ་ཁྲིམས་བཤེར་དགོས་པའི་རེ་འདུན་བཏོན་ཡང་། ས་གནས་ཁྲིམས་དཔོན་གྱིས་བཙན་པོ་དབང་ཡོད་ཀྱིས་ལོ་ ༣ གྱི་བཙོན་འཇུག་ཁྲིམས་ཐག་བཅད་ཡོད་འདུག
ད་ལྟ་རང་ལོ་ ༣༦ ལ་སོན་པའི་སྐུ་ཞབས་བྷ་ཐི་ཛྷིང་གྷ་ལགས་ནི། མཚོ་སྔོན་མི་རིགས་སློབ་ཆེན་ཐོན་རྗེས་སྒེར་ངོས་ནས་མ་དངུལ་སྐྱི་གཡར་དང་རོགས་དངུལ་འཚོལ་སྒྲུབ་བྱས་ཏེ། གྲོང་ཁྱེར་ཨོར་ཌོ་སི་(Ordos)རུ་རྒྱ་སྒོར་ཁྲི་ ༥༢༠ ཙམ་གྱི་ས་རྨི་ ༡༡༥༦༢ ཙམ་ཁྲིམས་མཐུན་ཐོག་ཉོས་ཡོད་པ་མ་ཟད། ༢༠༠༡ ལོར་༼སོག་བོད་གསོ་རིག་སློབ་གླིང་༽གསར་འཛུགས་བྱས་ཏེ། ༢༠༠༨ ལོའི་བར་གསོ་རིག་ཆེད་སྦྱོང་སློབ་མ་ ༡༠༠༠ ལྷག་སྐྱེད་སྲིང་བྱས་ཡོད་པ་དང་། སློབ་མ་དེ་དག་གིས་ཀྱང་ནང་སོག་གཞི་རིམ་ཁུལ་དུ་སྒེར་བཙུགས་སོག་བོད་གསོ་རིག་སྨན་ཁང་མང་པོ་བཙུགས་ཏེ། སྲོལ་རྒྱུན་གསོ་རིག་སླར་གསོ་དང་ས་གནས་མང་ཚོགས་ལ་སྨན་བཅོས། ནད་པ་དཀའ་ངལ་ཅན་དག་ལ་རིན་མེད་སྨན་སྦྱིན་སོགས་སྤྱི་ཚོགས་ཞབས་ཞུའི་ལས་དོན་རླབས་ཆེན་བསྒྲུབས་ཡོད།
གསོ་རིག་དགེ་རྒན་དང་སྨན་སྦྱོར་ལག་ལེན་ཟབ་སྦྱོང་སོགས་ཀྱི་ཐད། མཚོ་སྔོན་རྨ་ལྷོ་སོག་རྫོང་བོད་སྨན་ཁང་དང་མཉམ་འབྲེལ་བྱས་སྟེ། སློབ་གླིང་དེའི་ལས་དོན་ཡར་ངོའི་ཟླ་བཞིན་འཕེལ་བ་དང་། བོད་སོག་རིག་གནས་དང་བོད་སོག་སློབ་མའི་འགྲོ་འོང་བརྒྱུད་དེ། བོད་དང་སོག་པོ་མི་རིགས་གཉིས་བར་གྱི་མཛའ་འབྲེལ་ཡང་ཧ་ཅང་གཏིང་ཟབ་ཏུ་འགྲོ་བཞིན་པའི་སྒང་སྟེ། ཕྱི་ལོ་ ༢༠༠༨ ཟླ་ ༦ ཚེས་ ༢༠ ཉིན་ཨོར་ཌིར་སི་ས་གནས་སྲིད་གཞུང་གིས་སྐུ་ཞབས་བྷ་ཐི་ཛྷིང་གྷ་ལགས་ཀྱི་ཁྲིམས་མཐུན་ས་བདག་གི་ཡིག་ཆ་རྩིས་མེད་བཏང་བ་མ་ཟད། སློབ་ཕྲུག་ ༣༠༠ ཙམ་གྱི་ཕྱིའི་རོགས་དངུལ་གྱི་ཡོང་ཁུངས་བཀག་སྡོམ་བྱས་ཏེ་སློབ་གྲྭའི་དཔལ་འབྱོར་ཐད་གནོད་སྐྱོན་བཟོས་ཡོད་ལ། དེའི་རྗེས་སློབ་གྲྭའི་སྒོ་བྱང་སྟེང་གི་བོད་ཡིག་ཕྱིར་བསྡུ་བྱ་དགོས་སྐོར་སོགས་སློབ་གྲྭའི་འཛིན་སྐྱོང་ལ་ཐེ་ཇུས་དང་། སློབ་གྲྭར་ཆབ་སྲིད་ཀྱི་ནག་ཉེས་ཡོད་པའི་ཉེས་འགེལ་སོགས་བྱས་སྟབས། བྷ་ཐི་ཛྷིང་གྷ་ལགས་ནང་མི་དང་ལྷན་དུ་བྲོས་བྱོལ་ཏུ་འགྲོ་དགོས་བྱུང་ཡོད།
ཨོར་ཌོར་སི་སོག་བོད་གསོ་རིག་སློབ་གླིང་གི་སློབ་གཙོ་སྐུ་ཞབས་བྷ་ཐི་ཛྷིང་གྷ་ལགས་སུ་ཐེངས་འདིར་རྒྱ་གཞུང་གིས་ཉེས་འཛུགས་ཁྲིམས་བཅད་པའི་ཐད། ཨ་རི་དང་ཡུ་རོབ། འཇར་ཕན་བཅས་རྟེན་གཞི་བྱས་པའི་བཙན་བྱོལ་སོག་རིགས་ཀྱི་ཚོགས་པ་ཁག་གིས། རྒྱ་ནག་དང་སོག་པོ་རྒྱལ་ཁབ་གཉིས་ཀྱིས་མཉམ་འབྲེལ་རྒྱལ་ཚོགས་ཀྱི་སྐྱབས་བཅོལ་བའི་སྣེ་ལེན་ཆིངས་དོན་ལ་ངོས་ལེན་མཚན་རྟགས་བསྐྱོན་ཡོད་ཀྱང་། ཐེངས་འདིར་ཆིངས་དོན་དེར་རྩིས་མེད་རྡོག་རོལ་བཏང་བར་ངོ་རྒོལ་བྱས་འདུག་ལ། མཉམ་འབྲེལ་རྒྱལ་ཚོགས་སྐྱབས་བཅོལ་ལྷན་ཁང་གིས་སྐུ་ཞབས་བྷ་ཐི་ཛྷིང་གྷ་ལགས་གཙོས་པའི་ཁོང་གི་ནང་མི་ཡོངས་ལ་ལུགས་མཐུན་གྱི་ལྟ་རྟོགས་དང་སྲུང་སྐྱོབ་ཡོང་བའི་རེ་སྐུལ་ཞུས་ཡོད་པ་རེད།
གསར་འགོད་པ། ཚེ་རིང་རྒྱལ།
བོད་སོག་ཆིག་སྒྲིལ་ཡོང་ཕྱིར། རྒྱ་གཞུང་གིས་ས་བོན་གསར་པ་བཏབ་པ་རེད། ད་བེད་སྤྱོད་བྱེད་རན་པ་རེད། བོད་སོག་ཚོ།
ཐབས་སྐྱོ་བའི་གནས་ཚུལ་ཞིག་རེད། ཚང་མ་ལོས་དོ་སྣང་དང་རྒྱབ་བསྐྱོར་ཅིས་ཀྱང་བྱེད་དགོས་པར་མཐོང་། དྲིལ་བསྒྲགས་མང་ཙམ་གནང་བར་ཐུགས་སྣང་བཞེས་རོགས་ཞུ་རྒྱུ་ཡིན།