ཕྱི་ཚེས་ ༢༤ ཉིན་རྒྱ་ནག་གི་སྲིད་བློན་ཝུན་ཅ་པའོ་པེ་ཅིན་དབུས་སྤྱི་དམངས་ཞུ་གཏུག་ཁང་དུ་སོང་སྟེ། ཞུ་གཏུག་མང་ཚོགས་ཚོར་དངོས་སུ་ཐུག་འཕྲད་ཀྱིས་ཧ་ཅང་ཤ་ཚ་སྙིང་ཉེ་བའི་རྣམ་པའི་ཐོག་ནས་གླེང་མོལ་བྱས་ཡོད་པ་རེད། དེ་ནི་རྒྱ་ནག་གི་སྲིད་བློན་ཞིག་གིས་ཞུ་གཏུག་མང་ཚོགས་ལ་ལྟ་རྟོག་དང་། གཞི་རིམ་མང་ཚོགས་ཚོས་སྲིད་བློན་ལ་ཐད་ཀར་རང་ཉིད་ཀྱི་དཀའ་སྡུག་ཞུ་གཏུག་བྱས་པ་ཐོག་མ་དེ་ཆགས་ཡོད་སྟབས། གསར་ལམ་ཁག་དང་རྒྱལ་སྤྱིའི་ཚོགས་སྡེ་ཁག་མང་པོ་ཞིག་གིས་དོ་སྣང་དང་གླེང་སློང་ཤུགས་ཆེན་བྱས་འདུག
འོན་ཀྱང་ཕྱི་ཚེས་ ༢༦ ཉིན། ཧོང་ཀོང་༼ མཱེན་པའོ ༽གསར་ཤོག་གི་གསར་འགོད་པ་རྒྱ་ནག་དབུས་སྤྱི་དམངས་ཞུ་གཏུག་ལས་ཁུངས་ཀྱི་སྒོ་འགྲམ་ཏུ་བསྐྱོད་དེ། གཞི་རིམ་ནས་ཆེད་དུ་དབུས་གཞུང་ལ་དཀའ་ངལ་ཞུ་བྱེད་དུ་ཡོང་མཁན་འགར་གནས་ཚུལ་བཅར་འདྲི་བྱས་སྐབས། རྒྱ་ནག་གི་ཉེན་རྟོག་པ་ཡོང་སྟེ་གསར་འགོད་པའི་བརྙན་ལེན་འཕྲུལ་ཆས་དང་པར་ཆས་སོགས་བཙན་འཕྲོག་བྱས་ཡོད་པ་མ་ཟད། པར་ཆས་ནང་གི་བརྙན་རིས་ཡོད་ཚད་ནག་སུབ་བཏང་ཡོད་འདུག གསར་འགོད་དེས་རྒྱུས་ལོན་བྱུང་བ་ལྟར་ན། ཝུན་ཅ་པའོ་གཏུག་བཤེར་ལུས་ཁུངས་སུ་མ་བསླེབས་སྔོན་དགོང་མོ་དེར། གཏུག་བཤེར་ལུས་ཁུངས་དང་ཐག་ཉེ་བའི་པེ་ཅིན་ལྷོ་ཕྱོགས་མེ་འཁོར་ས་ཚིགས་སུ་ཉེན་རྟོག་པ་མང་པོ་བསླེབས་ཏེ། ཞིང་ཆེན་དང་ས་ཁུལ་འདྲ་མིན་ནས་འོང་བའི་ཞུ་གཏུག་མང་ཚོགས་ཚང་མ་པེ་ཅིན་གྲོང་ཁྱེར་ནས་བཙན་ཤུགས་ཀྱིས་ཕྱིར་འཕུད་བཏང་ཡོད་འདུག
ཕྱི་ཚེས་ ༢༤ ཉིན་ཝུན་ཅ་པའོ་དངོས་སུ་གཏུག་བཤེར་ལས་ཁུངས་སུ་ཡོང་སྟེ་ཁོ་ཚོས་གོ་སྒྲིག་བྱས་ཡོད་པའི་ཞུ་གཏུག་པ་འགར་ཐུག་སྐབས། ཉེ་འཁོར་གྱི་སྲང་ལམ་དག་ཏུ་དམག་མིའི་རླངས་འཁོར་ཆེ་ཆུང་ ༢༨ ཙམ་གྱིས་སྐོར་སྲུང་བྱས་ཏེ་མང་ཚོགས་ས་གནས་དེར་འགྲོ་སྐྱོད་བཀག་སྡོམ་བྱས་ཡོད་པ་དང་། ཝུན་ཅ་པའོ་ཕྱིར་སོང་ཤུལ་ཏུ་སྔར་བཞིན་ཞུ་གཏུག་མང་ཚོགས་ཚོར་ཡ་ལན་སྤྲོད་མཁན་མེད་པར་གྱུར་ཡོད་འདུག དོན་གྱིས་ཐེངས་འདིའི་ཝུན་གྱི་ལྟ་སྐོར་དེ་ནི་མང་ཚོགས་ཀྱི་དཀའ་སྡུག་ལ་སེམས་ཁུར་བྱས་པ་ཞིག་མ་ཡིན་པར་མགོ་སྐོར་གཏོང་ཐབས་ཀྱི་འཁྲབ་སྟོན་ཐེངས་གཅིག་ཡིན་འདུག
རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པས་ཀྱང་། རྒྱ་ནག་དམར་ཤོག་ཚོགས་པ་ནི་མི་མང་ལ་ཤ་ཚ་ཅན་ཞིག་ཡིན་མདོག་གི་བསླུ་བྲིད་གཏོང་སླད། ཐེངས་འདིར་རྒྱ་གཞུང་གི་དཔོན་རིགས་ཚོས་ཆེད་དུ་མང་ཚོགས་ལ་འཁྲབ་སྟོན་བྱས་པ་ཞིག་རེད། དོན་གྱིས་དེང་སྐབས་པེ་ཅིན་གཙོས་པའི་རྒྱ་ནག་གི་གྲོང་ཁྱེར་ཁག་ཏུ་ཁྲིམས་འགལ་གྱི་མུན་བཙོན་མང་པོ་བཙུགས་ཡོད་པར་མ་ཟད། ཉེས་མེད་ཀྱི་མང་ཚོགས་མང་པོ་བཀག་ཉར་མནར་གཅོད་གཏོང་བཞིན་ཡོད། ཅེས་ཝུན་ཅ་པའོ་ཡི་འཁྲབ་སྟོན་དེར་སྐྱོན་བརྗོད་བྱས་ཡོད།
རྒྱ་ནག་གི་སྤྱི་ཚོགས་གནད་དོན་ཆེད་མཁས་པ་ཧའོ་ཞིན་དིག་ལགས་ཀྱིས་ཀྱང་༼མེན་པའོ༽གསར་ཁང་ལ་བརྗོད་རྒྱུར། རྒྱ་གཞུང་གི་གཏུག་བཤེར་ལམ་ལུགས་ཀྱི་མགོ་མཇུག་ཚང་མ་རུལ་སུངས་སུ་གྱུར་ཡོད་སྟབས། གནད་དོན་དེ་གཙང་སེལ་ཡོང་བར་ངེས་པར་དུ་སྲིད་གཞུང་དང་ཁྲིམས་འཛིན་གཉིས་ཁ་ཁ་བཟོས་ཏེ། རང་དབང་ཅན་གྱི་ཁྲིམས་འཛིན་སྡེ་ཁག་བཙུགས་ཏེ་སྤྱི་དམངས་ཀྱི་ཁེ་དབང་ལ་སྲུང་སྐྱོབ་དང་ལྟ་རྟོག་བྱ་དགོས་པ་རེད། འོན་ཀྱང་དུས་ཡུན་གང་འཚམ་རིང་ལས་དོན་དེ་རྒྱ་ནག་ནང་མངོན་འགྱུར་ཡོང་རྒྱུ་ཧ་ཅང་ཁག་པོ་རེད། ཅེས་བརྗོད་འདུག
གསར་འགོད་པ། ཚེ་རིང་རྒྱལ།
རེད་རེད་་མཁས་བཙུན་གི་དེ་བདེན་པ་རེད་་་མི་འཁྲབ་དགུ་འཁྲབ་རྒྱ་མིས་འཁྲབ། མི་ཟ་དགུ་ཟ་བོད་པས་ཟ།།།།།
བཀུར་འོས་རྩོམ་སྒྲིག་པ་ལགས། གུས་མོས་དེ་སྔ་ནས་འདིར་ཟིན་བྲིས་ཆེད་ཐོ་འགོད་ཟིན་ཡང་། ད་བར་ཁྱེད་ཅག་ལ་འབྲེལ་བ་གནང་ཐུབ་མ་སོང་བས་ཟིན་བྲིས་བཟོ་རྒྱུ་ལུས།
གུས་མོར་ཐོ་འདིའི་སྟེང་དུ་ཟིན་བྲིས་ཤིག་བཟོ་གནང་ཡོང་བ་ཞུ།
མི་འཁྲབ་དགུ་འཁྲབ་རྒྱ་མིས་འཁྲབ། མི་ཟ་དགུ་ཟ་བོད་པས་ཟ། མི་དྲན་དགུ་དྲན་རྒྱ་མིས་དྲན། མི་ཤེས་དགུ་ཤེས་བོད་པས་ཤེས། མི་ལས་དགུ་ལས་རྒྱ་མིས་ལས།