གསལ་བསྒྲགས་ཤིག -ཁང་གསར་རྡོ་རྗེ།

ཧ་ལས་པའི་བསམ་འཆར་རེད།
མང་གཙོའི་གཞུང་གི་མི་དམངས་ཀྱི་ཐོབ་ཐང་རེད་ལ།
བསམ་འཆར་རྒྱུ་མཚན་དང་བཅས་བྲིས་འདུག་པ་ཤིན་ཏུ་ནས་དགའ་ཚོར་སྐྱེད་བྱུང།
བོད་མི་བཙན་བྱོལ་དུ་རིག་གཞུང་དང་སྐད་ཡིག་བསྲུང་སྐྱོབ་ཆེད་ཡོང་ཡིན་ཡང་ད་ཆ་རྒྱའི་འོག་ཏུ་ཡོད་པའི་བོད་ནང་དུ་བོད་མི་ཚོའི་བོད་ཀྱི་སྐད་ཡིག་རིག་གཞུང་ཐ་ན་གཞས་གླུ་ཡང་བདག་བསྲུང་བྱེད་འདུག་ད།

གསལ་བསྒྲགས་འདི་གཞི་བྱས་ཏེ་བཤད་ན། གོང་མ་བར་གསུམ་ན་དབྱིན་ཇའི་ནང་འབྲི་བ་ནི་བཙན་བྱོལ་སྤྱི་ཚོགས་ནང་འགྲོ་
སྟངས་ལྟ་བུ་ཞིག་ཆགས་ཡོད། འགྲོ་སྟངས་འདིའི་སྒང་དུ་མ་སོང་བ་ཡིན་ན། ཁོ་ཚོས་བོད་ཡིག་བཀོལ་སྤྱོད་བྱས་ཤེས་ཀྱིན་མེད་པ་དེ་རེད།་ འོན་ཀྱང་ཡིད་འཕངས་བ་ཞིག་ལ་བོད་ཀྱི་དྲ་རྒྱ་དང་བོད་ཀྱི་དུས་དེབ་སོགས་ཀྱི་
སྟེང་དུ་དྲ་གྲོགས་ཚོས་སྡུག་སྐད་ཇི་ཙམ་རྒྱབ་རུང་མ་བརྒྱབ་རུང། བོད་ཡིག་ལ་ཡ་མེད་གཏོང་མཁན་གྱི་རིགས་ནི་བོད་ཀྱི་དྲ་ཚིགས་སྟེང་དང་བོད་ཀྱི་དུས་དེབ་གང་རུང་ཐོག་མི་ཐོན་ལ། ཁོ་ཚོ་ཐོན་པར་ཆ་གཞག་ཀྱང་ཁོ་ཚོས་བོད་ཡིག་མགོ་ཚོས་གི་མ་རེད།

བོད་སྐད་ཡིག་ལ་མི་རིགས་ཤིག་གི་སྐད་ཡིག་གི་ཁྱད་ཆོས་དང་ནུས་པ་ཡོད་སྲིད་དམ། ཕལ་ཆེར་ཡོད་རེ་ཟེར་མཁན་ཚོ་གྲྭ་པ་དང་བཙུན་མ། ཡང་ན་སྤྲུལ་སྐུ་ཚོ་ཡིན་ངེས། ཁོང་ཚོར་སྐད་ཡིག་དེས་ཁེ་ཕན་དང་གོ་སྐབས་ཀྱང་མང་པོར་སྤྲད་ཡོད་ངེས་རེད་ལ། དེ་བཞིན་ཁོང་ཚོའི་ཆོས་ལུགས་ཁེ་ཕན་ཆེད་སྐད་ཡིག་འདི་གཞན་དང་མ་འདྲ་བ་ཞིག་ཏུ་གླེང་སྲིད་པ་ཞིག་རེད། ཡིན་ནའང་ང་ཚོས་ཆོས་ལུགས་ཤིག་གམ་ཡང་ན་ཆོས་ལུགས་མི་སྣ་ཞིག་གི་ཆེད་མ་ཡིན་པར། མི་རིགས་ཤིག་དང་མི་རབས་གསར་པ་ཞིག་གི་ཁེ་ཕན་དང་ནུས་པ་འདོན་སྤྲོད་ཐུབ་པའི་སྐད་ཡིག་ཅིག་མིན་པ་རིག་གནས་ཀྱི་རྣམ་གྲངས་དང་ཁྱབ་ཁོངས་ཐད་ནས་ཐག་བཅད་ཡོད།
ཡང་གཅིག་བཤད་ན། སྐད་ཡིག་དེས་ད་བར་ང་ཚོའི་མི་རིགས་འདི་ལྷ་མཆོད་དང་འདྲེ་འདུལ་མི་རིགས་ཤིག་གམ། ཡང་ན། དད་པའི་མི་རིགས་ཤིག་བཟོས་ཡོད། སོང་ཙང་སྐད་ཡིག་དེས་ད་བར་ང་ཚོའི་རང་དབང་དང་ཤེས་རིག་སྣ་མང་ལོངས་སུ་སྤྱོད་རྒྱུར་འགོག་རྐྱེན་ཆེན་པོ་བཟོས་ཡོད་པ་མ་ཟད་། དེ་བཞིན་ང་ཚོ་རྒྱལ་སྤྱིའི་མི་སྣ་ཞིག་ལས་ས་ཆུང་ཆུང་གི་མི་ཆུང་ཆུང་ཞིག་བཟོས།
དེས་ན་ཞིག་ང་ཚོར་ཡར་ཐོན་གྱི་མི་རིགས་ཤིག་ཡོང་རྒྱུར་

བོད་ཀྱི་སྒྲིག་འཛུག་འདི་ཡོན་གནས་ཐུབ་པ་དགོས་ན་ཚོགས་པ་གང་ཡིན་ལ་ཁྲིམས་དང་སྒྲིག་གཞི་ཡོད་པ་དགོས་གལ་ཆེ་བ་མཐོང་། དེ་མིན་དེ་སྔོན་བོད་གཞུང་ལ་ཁེ་ཕན་ཆེ་བའི་ཚོགས་སྡེ་མང་ཆེ་བ་སྒེར་བདག་ཏུ་གྱུར་ཏེ་གཞུང་ལ་བུ་ལོན་ཆགས་པའི་གནས་ཚུལ་བྱུང་བ་རེད་། མ་འོངས་ཡིན་ན་ད་ལྟ་དྲ་གྲོགས་ཁ་གསར་ལགས་ཀྱི་ཞིབ་དཔྱད་གནང་བ་བཞིན་དོ་སྣང་མང་ཙམ་གནང་གལ་ཆེ་བ་མཐོང་།

ད་ང་ཚོས་རང་མི་རིགས་ཀྱི་སྐད་ཡིག་སྲུང་སྐྱོབ་ཆེད་ཁ་ཡོད་ལག་ཡོད་ཀྱི་ཤུགས་ཤིག་མ་བརྒྱབ་ན། བོད་ནང་གི་ཤེས་ལྡན་རྒྱལ་ཞེན་པ་ཚོར་ངོ་ཡང་ཚ།
ལས་ཀྱི་སྣེ་མོ་ཚོ། ང་ཚོ་མི་མང་ནས་ཁྱེད་རྣམས་པའི་བྱ་སྤྱོད་ལ་ལྡིར་ནས་བསྡད་ཡོད་དོ།།

ཁང་གསར་རྡོ་རྗེ་ལགས་།
ད་བར་དུ་ངས་གོས་གསལ་ལ། བོད་གཞུང་གིས་ཨ་རི་ལ་བཏང་དང་གཏོང་བཞིན་པའི་
སློབ་མ་ཚོ་ནི་ཐད་ཀར་བོད་གཞུང་ཤེས་རིག་ལྷན་ཁང་དང་མཉམ་དུ་གན་རྒྱ་ཞིག་གི་འོག་ཏུ་ཕེབས་ཀྱི་ཡོད་རེད།
ད་རེས་ཨ་རི་སློབ་མ་བསྐྱོད་ཕྱོགས་ཀྱི་སྐོར་དེ་་་ཨ་རི་བོད་ཀྱི་ཐེབ་རྩས་གསལ་བསྒྲགས་སྤེལ་བ་དེ་ནི་ཆེས་ཡ་མཚན་ཞིག་མ་རེད་དམ།

རྒྱུ་མཚན་ནི། ཨ་རི་བོད་ཀྱི་ཐེབ་རྩ་ཁང་དེ་ནི་སྒེར་བདག་ཏུ་བྱས་ནས་ད་ལྟ་བོད་གཞུང་གིས་་དེའི་ཐོག་ཏུ་ཇུས་ཏོག་རྩ་བ་ནས་བྱེད་མི་ཐུབ་པའི་ཚོགས་ཤིག་ཡིན་པ་་་་་
བཀའ་ཁྲི་ཟམ་གདོང་པས་གྲོས་ཚོགས་སུ་ཧ་ཅང་གིས་གསལ་པོར་བྱས་འདུག།

དེས་ན། ཨ་རིའི་་ཐེབ་རྩས་ཅིའི་ཕྱིར་གསལ་བསྒྲགས་དེ་སྤེལ་བ་ཡིན་ནམ།
སྒེར་བདག་ཅན་གྱི་ཨ་རི་ཐེབ་རྩ་དེ་་་་འོས་མི་་བཀྲས་མཐོང་དང།
རིན་ཆེན་དར་ལོ་ཟུང་གིས་བདག་བཟུང་བྱས་ཡོད་པས་་་་་་དེ་བཀའ་ཁྲིའི་འོས་བསྡུ་དང་
འབྲེལ་བའི་སྲིད་ཇུས་ཤིག་མ་ཡིན་ནམ།

ཁང་གསར་རྡོ་རྗེ་ལགས།
ང་ཚོས་བོད་སྐད་ཡིག་ལ་འགན་ཁུར་དང་ལག་ལེན་གྱིས་མ་འདང་བ་ཚོར་གི་མེད། ཡིན་ནའང་བོད་སྐད་ཡིག་གིས་ང་ཚོར་སྐད་ཡིག་གཞན་ནང་བཞིན་མཁོ་འདོན་བྱེད་རྒྱུའི་ནུས་པ་མེད་པ་ཧ་ཅང་གསལ་བོ་རེད། དེང་ཕྱིན་བོད་སྐད་ཡིག་དགོན་པ་དང་བླ་སྤྲུལ་གྱི་སྐད་ཡིག་ཏུ་བཞག་ན་འོས་འཚམས་ཤིག་རེད། ད་ནས་ང་ཚོས་རང་ཉིད་ལ་མགོ་སྐོར་གཏོང་རྒྱུ་མཚམས་བཞག་ན་ལེགས།

དུས་ཚོད་དཀོན་པས་ཡ་ལན་བརྒྱ་གོ་གཅིག་ཆོད་མ་ཞིག་ཞུ་གི་ཡིན།
༡) དྲྭ་རོགས་གངས་ཅན་པས་བདེན་ནོ་གསུངས་པ་དང་། ཨ་རིག་དགེ་མཐོང་གིས་འཚམས་འདྲི་གནང་བ། འཇང་གཡུ་ལྷ་ཐོགས་འགྱུར་གྱིས་ཡག་པོ་བཤད་འདུག་གསུངས་པ། ནད་པས། ཐུགས་རྗེ་ཆེ་གསུངས་པ། ནགས་མེས་མངོན་པར་བསྟོད་པ་བཅས་ལ་ཡག་བྱུང་ཟེར་རྒྱུ་ཡིན།

༢) དེ་ནས་དྲྭ་རོགས་ལྷ་མོ་དོན་གྲུབ་ཀྱིས།
༼གཞིས་བྱེས་གཉིས་ཀྱི་སློབ་གསོའི་གནད། གཅིག་ཏུ་འཛིན་ལ་དགོས་པ་ཆུང།
ནང་ནས་མ་ཉམས་རྒྱུན་འཛིན་གལ། ཕྱི་ནས་གསར་བ་སྣོན་འདེབས་གལ།
གཞིས་སུ་བོད་རྒྱ་སྐད་གཉིས་གཙོ། བྱེས་སུ་བོད་དབྱིན་སྐད་གཉིས་གཙོ།
དོན་གྱི་ལར་ཞེན་འཛིན་ནུས་ན། རང་སྐད་ཙམ་ལ་ཞེན་དོན་མེད།༽ཞེས་གསུངས་འདུག་པར་ལན་དུ།
གཞིས་བྱེས་སློབ་གསོ་ཐ་དད་ཀྱང་།། རང་སྐད་ཉམས་པ་གཅིག་པ་རེད།།
གཞིས་ནས་རྒྱུན་འཛིན་ཐུབ་ན་ལས། །བྱེས་ནས་གསར་སྣོན་འཇོན་པ་མེད།།

གཞིས་སུ་རྒྱ་སྐད་གཙོ་བོའི་གཙོ།། བྱེས་སུ་དབྱིན་སྐད་ཨ་མའི་ཨ།།
རང་སྐད་ཙམ་ཡང་དོར་བའི་མིས།། དོན་གྱི་ལར་ཞེན་ཇི་ལྟར་འཛིན།། ཞེས་སྨྲའོ།།

༣) ཨ་རིག་དགེ་མཐོང་གིས་༼དངོས་གནས་ཕྱོགས་གཅིག་ནས་བོད་ཡིག་ལ་མཐོང་ཆེན་བྱེད་ཁུལ་དང་ལག་ལེན་ཁྲོད་བོད་ཡིག་རྡོག་རོལ་གཏོང་བཞིན་པ་ལྟ་བུར་ཚོར་གི་༽གསུངས་པ་བདེན། དངོས་གནས་བྱས་ན། བཙན་བྱོལ་ནང་བོད་ཡིག་བེད་སྤྱོད་ཀྱི་ཁོར་ཡུག་རྒྱ་ཆེན་པོ་བསྐྲུན་ས་མེད་པ་མ་རེད། བོད་གཞུང་ཟློས་གར་ནང་གློག་བརྙན་ཕབ་ལེན་གྱི་སྡེ་ཚན་ཆེན་པོ་ཞིག་བཙུགས་ན་ཟླ་བ་རེར་གཞིས་བྱེས་བོད་མིར་གློག་བརྙན་གསར་པ་རེ་སྟོན་ཐུབ་ངེས་རེད། བོད་གཞུང་གི་ནང་དུ་ཡིག་སྒྱུར་ལས་ཁུངས་ཚད་ལྡན་ཞིག་བཙུགས་ན་ཚན་རིག་ལ་སོགས་པའི་ཤེས་བྱ་གསར་པ་དེ་ཚོ་དུས་ཐོག་བོད་ཡིག་ནང་ཀློག་ཐུབ་པ་བཟོ་ཐུབ་རྒྱུ་རེད། ཕྱི་རྒྱལ་མཐོ་སློབ་ཙམ་མ་ཟད། རྒྱ་གར་ནང་གི་མཐོ་སློབ་ཏུ་འགྲོ་བའི་སློབ་ཡོན་གནང་སྐབས། བོད་ཡིག་གི་ཡིག་རྒྱུགས་རེ་བླངས་ན། སྤྱི་ཚོགས་ནང་བོད་ཡིག་མ་སྦྱངས་རང་སྦྱང་གི་གནོན་ཤུགས་སླེབས་ཀི་རེད། ད་དུང་ལྡི་ལི་དང་བྷེང་ལོར་སོགས་བོད་པའི་སློབ་ཆེན་པ་མང་ས་དེ་ཚོར་བོད་ཡིག་དགེ་རྒན་རེ་བསྐོས་ཏེ་སྔ་དགོང་བོད་ཡིག་འཁྲིད་ན་ནུས་པ་ཆེ་ཆུང་ལ་མ་ལྟོས་པ་ཞིག་ཐོན་རྒྱུ་རེད། ཡིན་ནའང་། ཚང་མས་ཁ་ནས་བོད་ཀྱི་རྩ་ཆེའི་རིག་གཞུང་ཞེས་བཤད་བསྡད་པ་མ་གཏོགས་ལག་ལེན་ནང་བྱེད་མཁན་ཡོད་མ་རེད། དཀའ་ངལ་དེ་ག་རང་རེད།

༤༽ ཇོ་རུ་ཚེ་རིང་གིས་བཤད་པར་ཡང་བདེན་ཆ་ཡོད། མི་ཆེན་མང་པོས་རང་གི་ཕྲུ་གུ་དབྱིན་ཇིའི་སློབ་གྲྭ་ལ་བཏང་། ཁ་ནས་བོད་ཀྱི་རིག་གཞུང་ཞེས་བཤད་ཀི་ཡོད་རེད། ད་ལྟ་ཨ་རིའི་མཐོ་སློབ་ལ་འགྲོ་དུས་བོད་ཀྱི་རིག་གཞུང་དང་ལོ་རྒྱུས་ཀྱི་ཡིག་ཚད་དབྱིན་ཡིག་ནང་བྲིས་ན་འགྲིག་པའི་ལམ་ཁ་བཟོ་བའི་དམིགས་ཡུལ་ཡང་། མཐར་གཏུགས་ན་མི་ཆེན་དེ་ཚོའི་ཁེ་ཕན་ཞིག་ལ་ཏན་ཏན་ཐུག་ཡོད་རེད། དོན་གནད་འདི་ཚོར་དངོས་གནས་བྱས་ན་སྤྱི་འཐུས་རྒྱུན་ལས་ཟེར་བ་དེ་ཚོས་དོ་སྣང་གིས་ལྟ་སྐུལ་བྱེད་དགོས་ཀི་ཡོད་རེད།

༥༽ དྲྭ་རོགས་ནད་པས་གནད་འགག་ཆེ་བའི་ཁུངས་སྣེ་ཁག་ཅིག་བྲིས་འདུག་པས་ཐུགས་རྗེ་ཆེ། ངས་ཀྱང་། གསལ་བསྒྲགས་འདི་བོད་གཞུང་གིས་མ་གནང་བར་ཨ་རི་བོད་ཀྱི་ཐེབས་རྩའི་མིང་ཐོག་ནས་གནང་བ་དང་། ཡང་མཇུག་ཏུ་སྙན་ཞུ་འབུལ་ཡུལ་གྱི་ཁ་བྱང་དུ་ཤེས་རིག་ལས་ཁུངས་བྲིས་པ་དེའི་ཐོག་ནས། འདི་ལ་གནད་དོན་ཆེན་པོ་ཞིག་བྱུང་ཡོད་པ་ཚོད་དཔག་ཐུབ་ཀྱི་འདུག ངོ་ཤེས་གཞུང་ཞབས་ཁ་ཤས་ལ་ཁ་པར་བཏང་བ་ཡིན་ཏེ་གསལ་པོ་བཤད་ཀི་མི་འདུག ཨ་རི་ཐེབས་རྩ་ལ་འབྲེལ་བ་བྱས་ཀྱང་འགྲེལ་བཤད་ཁ་གསལ་གང་ཡང་མི་འདུག ད་ཆ་གསར་འགོད་པ་ཚོས། བོད་གཞུང་ལ་བཅར་ནས་ཅིའི་ཕྱིར་འདི་འདྲའི་འགྱུར་ལྡོག་སོང་ཡོད་མེད་འདྲི་དགོས་པ་ཞིག་རེད། འདི་ལྟར་སློབ་ཡོན་ཚང་མར་རིམ་པས་བོད་གཞུང་གི་སྟངས་འཛིན་མེད་པར་གྱུར་ན་དྲང་བདེན་མ་ཡིན་པའི་གནས་ཚུལ་ཤུགས་ཆེ་ཐོན་རྒྱུ་དང་། གཞུང་གི་འགན་དབང་ཆུང་དུ་འགྲོ་ཉེན་ཡོད་རེད། འདི་གནས་ཚུལ་ཆུང་ཆུང་ཞིག་རྩ་བ་ནས་མ་རེད།
དེ་བཞིན་དྲྭ་རོགས་ནད་པས་གཙོས་གཞན་དག་ཚོས་འབྲེལ་ཡོད་ཤེས་རིག་ལས་ཁུངས་ཀྱི་ལས་བྱེད་ཚོས་སྔོན་མ་ལས་དོན་འཐུས་ཤོར་བཏང་བའི་དཔེ་མཚོན་གསལ་པོ་གསུངས་རྒྱུ་ཡོད་ན་འདིར་འབྲི་རོགས། དེ་ཙམ་ཡིན།

དྲ་གྲོགས་ཁང་གསར་ལགས་ཐུགས་རྗེ་ཆེ། ངས་ཁ་སང་སྤྱི་ཚེས་ ༡༦ ཉིན་གུང་གསར་འགྱུར་དེ་བོད་གཞུང་གི་དྲྭ་རྒྱ་ལས་ཤེས་རྟོགས་བྱུང་ནས་ཆ་ཚང་ཐེངས་གཅིག་བཀླགས་མ་ཐག་ཏུ་བོད་ཡིག་གི་ནང་དུའང་གསར་འགྱུར་དེ་བཀོད་ཡོད་མེད་ནང་འཛུལ་བྱས་པས་གནས་ཚུལ་དེ་རྩ་བ་ནས་བཀོད་མི་འདུག

གསར་འགྱུར་དེ་ད་རེས་བོད་ཀྱི་ཐེབ་རྩས་སྤེལ་དགོས་པའི་རྒྱུ་མཚན་གང་ཡིན་ནམ་སྙམ་པའི་ཚོར་སྣང་ཞིག་བྱུང་སྟབས། ངས་དགོང་དྲོ་གྲོགས་པོ་གཅིག་ལ་དེའི་སྐོར་ཤེས་རྟོགས་ཡོད་མེད་དྲིས་པར་ཁོང་གིས་གསལ་བཤད་ལྟར་ན་ལོ་སྔོན་མར་བོད་གཞུང་གིས་ངོས་ནས་འགན་འཁུར་ལེན་གྱི་ཡོད་ཀྱང་།

གཞུང་གི་སློབ་ཡོན་ཚོགས་ཆུང་སོགས་ཀྱི་ལས་དོན་ཚགས་ཚུད་ཡག་པོ་མ་བྱུང་བར་འགས་ཞིག་ཡིག་རྒྱུགས་མ་ལོན་པ་དང་། ལས་དོན་ཚགས་ཚུད་སོགས་ཕྱོགས་སར་ཐུད་ཤོར་མང་པོ་བཏང་བའི་རྐྱེན་གྱིས་ས་མིག་གྲངས་ ༧ ཙམ་བཀང་མ་ཐུབ་ཀྱང་བོད་ཀྱི་ཐེབ་རྩ་ཁང་གིས་ངོས་ནས་སློབ་ཡོན་འགྲོ་གྲོན་སོགས་བཏང་དགོས་ཐུབ་པའི་དབང་ལས་བོད་གཞུང་དང་བོད་ཀྱི་ཐེབ་རྩ་ཁང་གཉིས་ཀྱི་དབར་གླེང་རྙོག་བྱུང་བའི་དབང་གིས་ཕྱིས་སུ་ཐེབ་རྩ་ཁང་རང་གིས་ངོས་ནས་འགན་འཁུར་བླངས་ཏེ་ས་མིག་གཅིག་ཀྱང་འཕྲོ་བརླག་མི་འགྲོ་བའི་ཆེད་དུ་རེད་ཟེར།

གནད་ལུགས་དེ་ཚོར་བསམས་ན་བོད་གཞུང་གིས་ངོས་ནས་ལས་དོན་གནད་འགག་ཆེ་ས་མང་པོར་མཐུད་ཤོར་དང་། སྣང་མེད། འགན་འཁུར་རྐང་ལེན་བྱེད་ཐུབ་ཀྱི་མེད་པའི་རྣམ་པའི་ཞིག་བསྟན་གྱི་ཡོད་པ་མ་ཟད་བོད་གཞུང་གིས་ངོས་ནས་བཤད་ན་གཞུང་གཅིག་གི་སོ་སོའི་ཁྱབ་ཁོངས་སུ་ཡོད་པའི་གཞུང་དང་། དོན་གཅོད། གཞུང་འབྲེལ་མིན་པའི་ཚོགས་པ། ཆོས་ཚོགས། དགོན་སྡེ། སློབ་གྲྭ་སོགས་མང་དག་གཅིག་ལ་བཏང་འཛིན་བྱེད་ཐུབ་ཀྱི་མེད་པ་དེ་རེད།

དཔེར་ན། སྔ་ཕྱིར་བཀའ་ཁྲི་ཟམ་དོང་རིན་པོ་ཆེས་བཙན་བྱོལ་བོད་གཞུང་གི་ཤེས་ཡོན་སྲིད་ཇུས་གཅིག་གཏན་འབེབ་གནང་ན་ཡང་བོད་ཕྲུག་ཁྱིམ་སྡེའི་རྗེ་བཙུན་པདྨས་དབུ་འཁྲིད་པའི་འོག་ནས་གཞུང་གིས་ཤེས་ཡོན་སྲིད་ཇུས་དེའི་ལམ་སྟོན་འོག་ཤར་བསྐྱོད་བྱས་མེད་ལ་བོད་གཞུང་གིས་ངོས་ནས་ཀྱང་བཏང་འཛིན་བྱེད་ཐུབ་ཀྱི་མེད།

དེ་ནི་ཧ་ལས་དགོས་པའི་གནད་དོན་གལ་འགངས་ཆེན་པོ་གཅིག་ཡིན་པ་བརྗོད་མི་དགོས་པ་རེད། རྒྱ་ནག་ལྟ་བུར་མཚོན་ན་དབུས་ཆབ་སྲིད་ཅུས་ནས། ཞིང་ཆེན་སྲིད་གཞུང་། གྲོང་ཁྱེར་ཁག རྫོང་རིམ་པ། ས་ཁུལ་རིམ་པ། ཐ་ན་གྲོང་གསེབ་ལུང་ལུང་གཅིག་གི་ཤང་ཚུན་ཆད་ལ་གཞུང་དང་། གཞུང་འབྲེལ་མིན་པའི་ཚོགས་པ། བཟོ་གྲྭ། སློབ་གྲྭ། ཁེ་ལས་སོགས་ཚང་མར་དབུས་གཞུང་གི་ཁྲིམས་དང་སྒྲིག་གཞིའི་ལམ་སྟོན་གཅིག་གི་འོག་བཏང་འཛིན་བྱེད་ཐུབ་ཀྱི་ཡོད་སྟབས།

རྒྱ་ནག་འདི་ད་ལྟ་འཛམ་གླིང་རྒྱལ་སྤྱིའི་ཁྲོད་ཆབ་སྲིད་དང་། དཔལ་འབྱོར། དམག་དོན། ཚན་རྩལ། སྒྱུ་རྩལ། རིག་གཞུང་། སྐད་ཡིག མི་འབོར་སོགས་ཕྱོགས་གང་ས་སྤྱི་ཐད་ནས་འཕུར་མཆོང་ལྟ་བུའི་ཡར་རྒྱས་དང་འཕེལ་རྒྱས་འགྲོ་བཞིན་ཡོད་པ་དེ་གཞུང་གིས་ལས་དོན་ཚགས་ཚུད་ཡག་པོ་ཡོད་པའི་རྣམ་པ་དེ་འཛམ་གླིང་རྒྱལ་སྤྱིའི་སྟེང་དུ་ར་འཕྲོད་བྱུང་བ་དེ་རེད།

དེ་ནི་ངས་ཆེད་དུ་བོད་གཞུང་ལ་སྐྱོན་འཛུགས་བྱས་པ་ཞིག་མིན་པར་དེ་ནི་རང་གི་གཞུང་དང་། མི་དམངས། རིག་གཞུང་། སྐད་ཡིག་བཅས་ལ་ཤ་ཚ་བའི་སྙིང་གཏམ་ཞིག་ཡིན།

དུང་ཞེན་གྱི་སྐད་ཆའི་ཕྱི་ཤིན་ཕུད་ནས་དམར་རྗེན་དུ་བཤད་ན། བཙན་བྱོལ་གཞུང་གི་མི་ཆེན་དཔོན་ཆེན་དང་། རྒྱུ་ཆེན། མིང་ཆེན། དབང་ཆེན་ཡོད་ཚད་ཀྱི་ནང་ན་བོད་ཀྱི་སྐད་ཡིག་རིག་གནས་ཁ་ཞེ་གཉིས་མེད་ཀྱི་ཤ་ཚ་སྙིང་ཉེ་གནང་མཁན་ཧ་ལམ་དཀོན་པོ་རེད་ཅེས་ལབ་ན་ཐལ་ཆ་ཆེན་པོ་འཆོར་མི་སྲིད། ཁཽ་ཚོའི་བུ་ཕྲུག་དག་གི་བོད་པའི་སྨྲ་ལྕེ་ལྐུགས་ནས་ཡོད་ལ། ཐ་ན། ཁོ་ཚོའི་བུ་བུ་མོའི་ཁྲོད་ན་བོད་ཀྱི་བཙན་པོ་རིམ་བྱུང་གི་མཚན་ཙམ་ཡང་བགྲང་ཐུབ་མཁན་ནི་ཉིན་མོའི་སྐར་ཡིན། འདི་ཚོའི་མི་ཚང་ཡོད་ཚད་བོད་དོན་རྣ་བའི་མི་གོ་སའི་བདེ་ས་སྐྱིད་ས་ཁོ་ནར་གནས་བཅོས་དེ་བསྡད་ཡོད། ཁོ་ཚོས་དུས་རྒྱུན་དུ་མི་མང་གི་མདུན་དུ་ཕྱི་ནང་ངོ་གཉིས་གཡོ་རྫུ་འཁྲབ་ཏེ་བོད་ཀྱི་སྐད་ཡིག་རིག་གནས་ལ་ཤ་ཚ་མདོགས་ཀྱི་མུ་ཅོར་སྒྲོག་བཞིན་པ་ཙམ་ལས། དོན་གྱིས་འདི་དག་གིས་ཁ་འོ་མ་དང་ཁོག་རྩུད་པ་བྱས་ཏེ་འདས་ནས་ད་ལྟའི་བར་དུ་ལར་ཞེན་དམ་ཚིག་གཡོ་བ་མེད་པའི་རང་རེའི་མི་རིགས་འདིར་མགོ་སྐོར་སླུ་བྲིད་བཏང་བ་དེ་གནམ་འོག་ཏུ་ཤོངས་ཐབས་བྲལ། གོང་བཀོད་རྩོམ་ཡིག་འབྲི་མཁན་ལྟར། དུས་རྒྱུན་དུ་མི་མང་གིས་མི་ཆེན་དབང་ཆེན་འདི་དག་གི་བྱ་སྤྱོད་མཐའ་དག་ལ་མིག་ཟུང་གཅེར་ནས་མ་བསྡད་ན། འདི་ཚོས་ཡང་བསྐྱར་བོད་མི་ས་ཡ་དྲུག་ལ་བསླུ་བྲིད་གནམ་ལ་མི་ཤོངས་པ་ཞིག་མི་གཏོང་བས་ངེས་བ་སྤུ་རྩེ་ཙམ་ཡང་མེད་དོ།།

གཞིས་བྱེས་གཉིས་ཀྱི་སློབ་གསོའི་གནད། གཅིག་ཏུ་འཛིན་ལ་དགོས་པ་ཆུང།
ནང་ནས་མ་ཉམས་རྒྱུན་འཛིན་གལ། ཕྱི་ནས་གསར་བ་སྣོན་འདེབས་གལ།

གཞིས་སུ་བོད་རྒྱ་སྐད་གཉིས་གཙོ། བྱེས་སུ་བོད་དབྱིན་སྐད་གཉིས་གཙོ།
དོན་གྱི་ལར་ཞེན་འཛིན་ནུས་ན། རང་སྐད་ཙམ་ལ་ཞེན་དོན་མེད།