རྒྱལ་སྲུང་ཧོབ་འཁྱེར་སྐོར་ཚོང་།

བཱེ་ནྲཌི་ར་སཱ་ཧེ་ཡི་བརྩམས། བནྡེ་སྐྱབས་ཀྱིས་བསྒྱར།

ཕྱི་ལོ་ ༡༩༩༩ ལོའི་ཉིན་མཐའ་མ་དེར་འཛམ་གླིང་མི་མང་གིས་ཟང་ཟིང་ལང་ལོང་གིས་སྟོང་ལོ་གསར་བ་ཞིག་ཚུར་བསུ་རྒྱུར་སྟ་གོན་བྱེད་བཞིན་པའི་སྐབས་དེར། བོད་མི་ཁག་ཅིག་རྐང་ཐང་དུ་ཧི་མ་ལ་དང་རྒྱང་ཐག་རིང་བའི་གཡང་གཟར་དང་གྲོག་རོང་བརྒལ་ཏེ་རྒྱ་གར་ཕྱོགས་སུ་སྐྱོད་བཞིན་འདུག ༢༠༠༠ ལོའི་ཕྱི་ཟླ་ ༡ ཚེས་ ༥ ཉིན་དཔལ་རྒྱལ་བ་ཀརྨ་པ་ངྷ་རམ་ས་ལར་འབྱོར་བའི་གསར་འགྱུར་དེ་རྩྭ་ས་སྟུག་པོའི་རི་ལུང་ལ་མེ་ལྕེ་མཆེད་པ་བཞིན་གང་སར་ཁྱབ་ཡོད། ༧གོང་ས་ཏཱ་ལའི་བླ་མ་གཙོས་པའི་བཙན་བྱོལ་བོད་མི་རྣམས་ཧ་ཅང་དགའ་སྤྲོས་ཁེངས་ཡོད་ཅིང་། རྒྱལ་སྤྱིའི་གསར་འགྱུར་བརྒྱུད་ལམ་ཁག་ལ་མཚོན་ན་ཡང་། དགུང་ལོ་ ༡༥ ལ་སོན་མ་ཐག་པའི་གྲྭ་བ་ཆུང་ཆུང་ཞིག་རྒྱ་ནག་གི་སྟངས་འཛིན་ས་ཁུལ་ནས་བྲོས་ཏེ་རྒྱ་གར་རང་དབང་ལུང་པ་ཞིག་ལ་ཐར་ཙམ་བྱུང་བ་དེ་ནི། “དུས་རབས་ཤིག་གི་གཏམ་རྒྱུད” དུ་གྱུར་བ་རེད། འོན་ཀྱང་། རྒྱ་གར་གསང་བའི་ལས་ཁུངས་ལ་མཚོན་ན། གནས་ཚུལ་དེའི་ཐད་གྱ་གྱུ་འཁྲུལ་འཛིང་ཆེ་བའི་གནད་དོན་ཞིག་ཏུ་གྱུར་སོང་། དེ་ནི་བྱིས་པ་ཆུང་ཆུང་ཁོང་དང་ཁོང་གི་གཅུང་མོ། གཞན་སྐུ་འཁོར་གྲྭ་བ་བཞི་བཅས་བོད་ནས་བྲོས་བྱོལ་དུ་ཡོང་ཐུབ་པར་ཡིད་ཆེས་བྱ་མི་ཐུབ་པར་དོགས་པ་དང་ཐེ་ཚོམ་གྱི་ངང་དུ་ལུས་ཤིང་། རྒྱལ་སྲུང་འགན་ལེན་གྱི་དོགས་ཟོན་འོག རྒྱལ་བ་ཀརྨ་པ་འབྲས་ལྗོངས་སུ་ཡོད་པའི་ཁོང་གི་སྐུ་ཐོག་གོང་མའི་གདན་ས་རུམ་བཏེག་དགོན་དུ་ཕེབས་རྒྱུར་ཡང་ཆོག་མཆན་སྤྲད་མེད།

ཕྱི་ལོ་ ༢༠༠༨ ཟླ་ ༦ པའི་ནང་ཨ་རིར་ཡོད་པའི་ཁོང་གི་ཆོས་ཚོགས་ཁག་ཏུ་ཕེབས་པར་ཕྱི་སྐྱོད་ཆོག་མཆན་ཐོབ་ཡོད་ཀྱང་། ལོ་སྔོན་མའི་ནང་རྒྱ་གར་ནང་སྲིད་བློན་ཆེན་གྱིས་རྒྱལ་བ་ཀརྨ་པའི་ཕྱི་འབྲེལ་གཟིགས་སྐོར་གྱི་གནད་དོན་ལ་ཁས་ལེན་མ་བྱས་པར་བརྟེན། སྐབས་དེར་ཁོང་གི་ཕྱི་སྐྱོད་བྱེད་སྒོའི་རིགས་ཕྱིར་འཐེན་བྱ་དགོས་བྱུང་ཡོད། ད་ལྟ་ཁོང་གི་བླ་བྲང་ནས་རྒྱ་སྒོར་གང་འཚམ་སྔོག་འདོན་བྱུང་སྐབས་དོགས་གཞི་སྔར་ལས་ཧེ་ཆེར་སོང་སྟེ། ཀརྨ་པ་རྒྱ་གར་ལ་ཕེབས་པ་དེ་ནི་ལྐོག་ཇུས་ཀྱི་ལྟ་བ་རྙིང་པ་བསྐྱར་གསོ་བྱས་ཏེ། ཧ་ཅང་རྩ་ཆེན་དུ་རྩི་བའི་སྐུ་ཐོག་གོང་མའི་ཞྭ་ནག་དེ་རུམ་བཏེག་དགོན་ནས་བླངས་ཏེ། ཕྱིར་བོད་ནང་དུ་ཡོད་པའི་ཚུར་ཕུ་དགོན་དུ་ལོག་རྩིས་ཡིན་ལུགས་ཀྱི་དོགས་འདྲོག་དེ་རེད། ལྟ་ཚུལ་འདི་ཕྱོགས་ཡོངས་ནས་བོད་ནང་གི་འགོག་སྲུང་དམ་པོ་ཡིན་པའི་ས་ཁུལ་དུ་ཡོད་པའི་ཚུར་ཕུ་དགོན་ནས་རྒྱལ་བ་ཀརྨ་པ་བྲོས་བྱོལ་དུ་ཐར་བའི་གནད་དོན་ལ་གཞི་བརྟེན་བྱས་པ་ཞིག་ཡིན།

རྒྱ་གར་གསར་ལམ་ཁག་གིས་ཚུར་ཕུ་དགོན་ནས་བྲོས་བྱོལ་དུ་ཡོང་རྒྱུ་ནི་ལས་སླ་བོ་ཞིག་མིན་པར། དཀའ་ངལ་དང་འགག་ཕྲེང་ག་ཚོད་ཅིག་བརྒྱུད་དགོས་སམ་ཞེས་པའི་དྲི་རྟགས་ཤིག་ལ་མགོ་འཐོམ་སྟེ་གོང་གི་ལྟ་ཚུལ་དེ་ཁྱུར་མིད་གཏོང་རྐྱང་བྱས་པ་རེད། ང་ཡང་ ༢༠༠༤ ལོར་བོད་དུ་སྐྱོད་སྐབས་དྲི་བ་འདི་སེམས་ལ་འཁོར་མྱོང་། ང་ལྷ་སར་སྡོད་སྐབས། ང་དང་ཨོ་སི་ཊི་ལི་ཡའི་དགེ་རྒན་ཆེན་མོ་ཞིག་མཉམ་དུ། ལྷ་ས་ནས་རླངས་འཁོར་གྱིས་ཆུ་ཚོད་ ༤ སར་ཡོད་པའི་ཚུར་ཕུ་དགོན་དུ་ཕྱིན་པ་ཡིན། རྡོ་ཧྲུག་གི་གྲོང་ལམ་ཞིག་གི་ལམ་སྣེ་མ་ཟིན་བར་གྱི་ལྷ་སའི་བྱང་ངོས་ཀྱི་གཞུང་ལམ་ནི་ཧ་ཅང་ལེགས་པོ་ཞིག་འདུག གྲོང་ལམ་དེ་བརྒྱུད་ནས་བགྲོད་སྐབས་རླངས་འཁོར་གྱི་སྒེའུ་ཁུང་ལས་ཧ་ཅང་དབེན་པའི་གྲོང་ཚོ་འགའ་རེ་མཐོང་བྱུང་ལ། ས་གནས་དེ་ནི་སྐམ་ཐེར་དུ་གྱུར་ཏེ་རྨོ་འདེབས་སྟོན་ཐོག་གང་ཡང་མེད་པའི་ཡུལ་ལུང་ཞིག་རེད་འདུག

ང་ཚོ་ཚུར་ཕུ་དགོན་དུ་འབྱོར་སྐབས་གཞི་ནས་ངས་ཧ་གོ་བ་ནི་དགོན་པ་དེ་ལྷ་སའི་ནང་གི་དགོན་པ་ཚོ་དང་བསྡུར་ན་གཞི་རྒྱ་ཆེ་ཆུང་འབྲིང་ཙམ་རེད་འདུག ཐེངས་དེའི་ང་ཚོའི་འགྲུལ་བཞུད་དེ་ཡོངས་ཁྱབ་ཐོག་མིན་པར་རླངས་འཁོར་ཁ་ལོ་བ་བོད་མི་ཞིག་དང་། གནས་ཤན་པ་རྒྱ་རིགས་ཤིག་གི་མཉམ་དུ་ཕྱིན་པ་ཡིན། ཁོ་ཚོས་ངེད་གཉིས་ཀརྨ་པའི་གཟིམ་གནས་སུ་ཁྲིད་བྱུང་། ང་ཚོ་ ༢༠༠༤ ལོར་ཕྱིན་པ་རེད། སྐབས་དེའི་གཟིམ་ཤག་ནི་ ༡༩༩༩ ལོར་ཁོང་བྲོས་བྱོལ་སྐབས་ཀྱི་གནས་སྟངས་རང་འཇགས་མིན་ནམ་སྙམ་པ་ཇི་བཞིན་ཉར་ཚགས་བྱས་འདུག དེར་བརྡ་སྟོན་པང་ལེབ་ཆེན་པོ་ཞིག་བཀལ་འདུག་ཅིང་། དེ་ནི་ཀརྨ་པ་བཞུགས་དུས་ཀྱི་ཡིན་པ་འདྲ། དེའི་སྟེང་མཇལ་ཞུ་བ་ཚོས་རྒྱལ་བ་ཀརྨ་པར་མཇལ་ཁ་ཞུ་རྒྱུར་ཆོག་མཆན་ཞུ་དགོས། ཞེས་བཀོད་འདུག

ང་ཚོས་དགོན་པའི་ཐོག་ཁང་དང་པོའི་སྟེང་གི་སྒེའུ་ཁུང་ཞིག་མཐོང་བྱུང་། རྒྱལ་བ་ཀརྨ་པ་བྲོས་བྱོལ་སྐབས་སྒེའུ་ཁུང་དེ་ལས་སྐས་རིམ་འབབ་སྟེགས་བརྒྱུད་དེ། ཁོང་ལ་སྒུག་ཡོད་པའི་རླངས་འཁོར་ཡོད་སའི་ལྷེ་རྭ་དེར་མར་བབས་པ་ཞིག་རེད་འདུག དགོན་པའི་སྒོ་ཆེན་དུ་སྲུང་དམག་གི་ཁང་ཆུང་གཅིག་ལས་གཞན་མི་འདུག་ལ། དགོན་པའི་ལྕགས་རི་དེ་ཙམ་མཐོ་རྒྱུ་མེད་ཅིང་། ཆུ་འགྲམ་དུ་ཆགས་པའི་དགོན་པ་དེ་ཡི་མཐའ་འཁོར་ཡོངས་རི་མཐོ་བོས་བསྐོར་བ་དང་། དགོན་པའི་ཆགས་སྟངས་དེས་ཀརྨ་པ་བྲོས་བྱོལ་དུ་འགྲོ་རྒྱུར་སྟབས་བདེ་བཟོས་འདུག

ང་ཚོ་ལམ་བར་ནས་བདེ་སྲུང་ཞིབ་བཤེར་ས་ཚིགས་གཅིག་ལའང་འཕྲད་མ་བྱུང་ལ། ངེད་གཉིས་ཕྱི་མི་ཡིན་རུང་མི་སུ་གང་གིས་ཀྱང་བཀག་འགོག་འདྲི་རྩད་བྱས་མ་སོང་། དམག་དོན་གསང་བའི་ལས་ཁུངས་ནས་ལས་ཀ་བྱས་མྱོང་མཁན་ཞིག་ཡིན་ན། བློ་ཐག་ཆོད་པའི་ན་གཞོན་ཞིག་ལ་མཚོན་ན་དབེན་གནས་ཀྱི་དགོན་པ་འདི་ནས་བྲོས་ཐར་བྱ་རྒྱུ་ནི་དེ་འདྲའི་དཀའ་ལས་ཁག་པོ་ཞིག་མིན་པ་ངས་གསལ་བོར་རྟོགས་ཐུབ་ཀྱི་འདུག འདི་ནི་ ༡༩༥༩ ལོར་༧གོང་ས་ཏཱ་ལའི་བླ་མ་མཆོག་བྲོས་བྱོལ་དུ་ཕེབས་པ་ལས་རྦད་དེ་ལས་སླ་ཞིང་། སྐབས་དེར་རྒྱ་ནག་དམག་དཔུང་གིས་པོ་ཏ་ལ་ཡོངས་སུ་བསྐོར་ཡོད་ཀྱང་། ཏཱ་ལའི་བླ་མ་འགག་ཕྲེང་དེ་ནས་བྲོས་ཐར་བྱུང་བ་རེད།

རྒྱལ་བ་ཀརྨ་པ་བྲོས་བྱོལ་དུ་ཐར་བའི་གནས་སྟངས་དེའི་ཐད་ནས་དོགས་གཞི་བྱེད་མཁན་ཚོས་དངོས་ཡོད་ལ་རྒྱུས་ལོན་མ་བྱས་པར་རྒྱ་ནག་གི་བདེ་སྲུང་ལ་ཡིད་ཆེས་བྱེད་རྒྱུ་མང་དྲགས་པ་རེད། ཀརྨ་པ་རྒྱ་གར་ནང་འབྱོར་ཏེ་ལྟ་བར་མི་ལོ་ ༡༠ ཕྱིན་པའི་རིང་ལ། ང་ཚོས་རྒྱ་ནག་གིས་“ཀརྨ་པ་རྒྱ་གར་དུ་ཁོང་གི་ཞྭ་ནག་ལེན་པར་ཕྱིན་པ་རེད” ཅེས་པའི་སྐད་ཆ་དེར་ཡིད་ཆེས་བྱས་བསྡད་པ་རེད། རྟོག་སྒྲུང་འདི་བསྒྲུབ་ཕྱིར་རྒྱ་ནག་གིས་ད་དུང་ཚུར་ཕུ་དགོན་པའི་བརྡ་སྟོན་པང་ལེབ་སྟེང་གི་གསལ་བསྒྲགས་དེ་ཡང་མུ་མཐུད་བཞག་པ་ལོས་ཡིན།

རྒྱ་ནག་གཞུང་གནས་ཚུལ་མགོ་རྙོག་བཟོ་རྒྱུར་དགའ་མོས་ཡོད་ནའང་། ང་ཚོས་ཅིའི་ཕྱིར་བོད་ཀྱི་བླ་སྤྲུལ་ཁོང་རྒྱ་གཞུང་ལ་འབྲེལ་བ་ཡོད་ཚུལ་གྱི་ཉེས་འཛུགས་དེར་ལས་སླ་བོས་ཡིད་ཆེས་བྱས་བསྡད་པ་མགོ་འཚོས་མ་སོང་། རྒྱལ་བ་ཀརྨ་པ་རྒྱ་གར་དུ་ཕེབས་ནས་ད་བར་རྒྱ་ནག་གཞུང་ལ་རྒོལ་བའི་གསུང་བཤད་གང་ཡང་གནང་མེད་པ་དེར་བསྙོན་འཛུགས་བྱས་པ་ཞིག་རེད། རྒྱལ་བ་ཀརྨ་པས་༧གོང་ས་མཆོག་གི་དགོངས་པ་སྟེ། བོད་པའི་རང་སྲིད་རང་སྐྱོང་དང་བོད་ནང་གི་ཆོས་ལུགས་དད་རང་མོས་རང་དབང་ཐོག ཐེངས་བཅུ་གྲངས་ཤིག་ལ་བསྐྱར་ཟློས་ཡང་ཟློས་ཀྱིས་གསུང་བཤད་གནང་ཡོད།

ཧི་མ་ཅལ་ཉེན་རྟོག་པས་ཀརྨ་པའི་བླ་བྲང་ནས་རྒྱ་སྒོར་འབུམ་ ༡༡ ལྷག་སྔོག་འདོན་བྱུང་ཡོད་སྟབས། ཁོང་རྒྱ་གཞུང་གི་གསང་ཉུལ་བ་རེད་ཅེས་སྐྱོན་འཛུགས་བྱས་པ་རེད། དོན་དངོས་ཐོག་སྔོག་བཤེར་སྐབས། རྒྱལ་ཁབ་གཞན་མང་པོ་ཞིག་གི་དངུལ་སྒོར་ཡང་རྙེད་སོན་བྱུང་ཡོད་པ་རེད། དེ་དག་རྒྱལ་བ་ཀརྨ་པར་ཉིན་ལྟར་ཕྱིའི་རྒྱལ་ཁབ་འདྲ་མིན་ནས་མཇལ་ཞུ་བ་བརྒྱ་ཕྲག་མང་པོ་ཡོང་གི་ཡོད་པ་དེ་ཚོས་ཕུལ་བའི་འབུལ་བ་ཡིན་པའི་བདེན་དཔང་དེ་སྣང་མེད་དུ་བཞག་པ་རེད།

དགུང་ལོ་ ༧༥ ལ་བསླེབས་ཟིན་པའི་༧གོང་ས་ཏཱ་ལའི་བླ་མ་མཆོག་དགུང་ལོ་མཐོན་པོར་ཕེབས་འགྲོ་བཞིན་པ་དང་། རྒྱལ་བ་ཀརྨ་པ་ནི་འབྱུང་འགྱུར་བཙན་བྱོལ་བོད་མིའི་གོང་བཀུར་གུས་བརྩི་འཐོབ་པའི་དབུ་ཁྲིད་ཅིག་ཡིན་ངེས་པ་དེར་འདི་འདྲའི་དཀྲོག་གཏམ་བཟོས་ན་སུ་ལ་ཁེ་ཕན་རག་རྒྱུ་ཡིན་མིན་ལ་ཚོད་དཔག་བྱ་རྒྱུ་གང་ཡང་ལྷག་མི་འདུག བོད་པའི་ཆོས་བརྒྱུད་ནང་ཁུལ་གྱི་དབང་ཆའི་འཐབ་རྩོད་དང་། ང་ཚོའི་ཉེན་རྟོག་པའི་གླེན་རྟགས་ཀྱིས་རྒྱ་གར་ཕྱི་འབྲེལ་སྲིད་ཇུས་དང་རྒྱལ་སྲུང་ལ་ཚབས་ཆེ་བའི་གནོད་སྐྱོན་བཏང་ཡོད། རྒྱ་ནག་གིས་འཁྲབ་ཚན་འདི་ཇེ་ལེགས་སུ་འགྲོ་རྒྱུར་སྐད་ཆ་བཤད་ཐུབ་པ་ཞིག་མིན་མོད། དོན་དངོས་ཐོག་ཐེངས་འདིར་ཁོ་ཚོར་ཧ་ཅང་དགའ་སྣང་སྐྱེས་ཡོད་ལ། གཅིག་བྱས་ན་དགའ་བའི་དགོད་སྒྲ་ཡང་ཤོར་ཡོད་སྲིད།