ཆབ་སྲིད་ཀྱི་ལས་དོན་ཆེ་ཕྲ་གང་ལ་ཡང་འགན་བཞེས་འཆར་ཡོད་པ་མ་རེད།

འདི་ལོའི་གསུམ་བཅུའི་དུས་དྲན་དང་བསྟུན་ཏེ་བཀའ་ཁྲི་ཟམ་གདོང་རིན་པོ་ཆེ་མཆོག་གིས་ཕྱི་ནང་གི་གསར་འགོད་པ་མང་པོ་ཞིག་གི་དྲི་བར་ལན་འདེབས་གནང་ཡོད། སྐབས་དེར་བཀའ་ཁྲི་མཆོག་གིས། ཟླ་འགའི་སྔོན་ནས་༧གོང་ས་མཆོག་གིས་བགྲེས་ཡོལ་ཆ་ཚང་གནང་རྒྱུའི་བཀའ་དེ་གནང་མ་ཐག རྒྱ་གར་གཙོས་པའི་རྒྱལ་ཁབ་འདྲ་མིན་གྱི་གསར་འགོད་པ་ཚོས་གནས་ཚུལ་མང་པོ་ཞིག་གི་ཐོག་བཀའ་འདྲི་ཞུ་རྒྱུའི་རེ་བ་བཏོན་སོང་། གསར་འགོད་པ་སྒེར་རེ་རེ་བཞིན་ཐུག་འཕྲད་ཀྱི་དུས་ཚོད་དཀོན་པས་ཉིན་གཅིག་ཚང་མ་མཉམ་འཛོམས་ཐོག དྲི་བ་དྲིས་ལན་གནང་རྒྱུའི་འཆར་གཞི་བསྒྲིགས་པ་ཡིན། དེ་རིང་གསར་འགོད་པ་དག་གི་དྲི་བར་ལན་འདེབས་གནང་རྒྱུ་ཡིན། ལོ་སྔ་ཕྱིའི་ལས་དོན་གལ་ཆེན་རིགས་གསུམ་བཅུའི་དུས་དྲན་སྟེང་གི་༧གོང་ས་མཆོག་གི་གསུང་འཕྲིན་དང་བཀའ་ཤག་གི་གསུང་འཕྲིན་ནང་གསལ་བོར་བསྟན་པ་དེ་ག་རང་རེད། ང་ལ་གསར་པ་ཞུ་རྒྱུ་གང་ཡང་མེད། ཅེས་གསུངས་རྗེས་དྲི་བ་དྲིས་ལན་དབུ་འཛུགས་གནང་སོང་།

དྲི་བ། ༧གོང་ས་མཆོག་བགྲེས་ཡོལ་དུ་ཕེབས་གཏན་ཁེལ་པ་དེར་བཀའ་བློན་ཁྲི་པ་མཆོག་གིས་རྣམ་འགྱུར་གང་འདྲ་འཛིན་གྱི་ཡོད་དམ།

ལན། ང་ཚོའི་རྣམ་འགྱུར་གང་ཡིན་པ་དེ་གསུམ་བཅུའི་དུས་དྲན་གྱི་བཀའ་ཤག་གི་གསུང་འཕྲིན་ནང་བཀོད་ཡོད། ང་ཚོས་༧གོང་ས་མཆོག་གི་དགོངས་ཚུལ་གང་ཞིག་ཡིན་རུང་བསམ་ཤེས་ཐུབ་ཀྱི་ཡོད། ༧གོང་ས་མཆོག་གིས་མང་ཚོགས་ལ་ཁོང་སྐུ་སྒེར་ལའང་རང་དབང་ཞིག་དགོས་ཀྱི་ཡོད་ཅེས་གསུང་གི་ཡོད་པ་རེད། སྤྱིར་བོད་ཀྱི་རྩ་དོན་དང་ཆབ་སྲིད་ཀྱི་འགན་མང་ཚོགས་ཀྱིས་འཁུར་དགོས་པའི་དགོངས་འཆར་དེ་ ༡༩༦༠ ཙམ་ནས་བྱུང་ཡོད། རིམ་བཞིན་མང་ཚོགས་ཀྱིས་ཐད་ཀར་སྤྱི་འཐུས་དང་བཀའ་བློན་ཁྲི་པ་འོས་འདེམས་བྱེད་པའི་དམངས་གཙོའི་ལམ་སྲོལ་ལག་བསྟར་བྱས་པ་རེད། ༧གོང་ས་མཆོག་གིས་སྲོལ་རྒྱུན་རང་བཞིན་གྱི་རྒྱལ་བ་རིན་པོ་ཆེའི་ཆབ་སྲིད་ཀྱི་དབང་ཚད་དང་ལས་འགན་ཡོངས་རྫོགས་མི་མང་གིས་བདམས་པའི་དབུ་ཁྲིད་ལ་རྩིས་སྤྲོད་བྱེད་ཀྱི་ཡོད། འོན་ཀྱང་། བོད་ཕྱི་ནང་གི་བོད་རིགས་མི་མང་གིས་༧གོང་ས་མཆོག་བགྲེས་ཡོལ་ཆ་ཚང་གནང་རྒྱུ་དེ་བློ་ཡུལ་དུ་ཤོང་གི་མེད་པ་དང་། གདེང་ཚོད་བརྙེད་ཐུབ་ཀྱི་མེད་པར་བརྟེན། བཀའ་ཤག་ཚུད་པའི་བོད་རྒྱ་ཆེའི་མི་མང་ཚོས་གཞུང་དམངས་མཛད་རིམ་ཁག་ལ་ཆིབས་སྒྱུར་གནང་རྒྱུ་ཉུང་དུ་བཏང་སྟེ། བོད་པའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་ཀྱི་ཐུགས་འགན་མུ་མཐུད་བཞེས་དགོས་པའི་གསོལ་འདེབས་ཞུ་བཞིན་ཡོད།

དྲི་བ། ༧གོང་ས་མཆོག་གིས་དབུ་མའི་ལམ་གྱི་སྲིད་བྱུས་ཐོག་བོད་རྒྱའི་དཀའ་རྙོག་སེལ་རྒྱུར་འབད་བརྩོན་གནང་གི་ཡོད། གལ་སྲིད་ཁོང་གིས་ཆབ་སྲིད་ཀྱི་ཐུགས་འགན་ལས་བགྲེས་ཡོལ་གནང་བ་ཡིན་ན། བོད་རྒྱའི་འབྲེལ་མོལ་སྲིད་བྱུས་གང་འདྲ་ཆགས་ཡོང་ངམ།

ལན། རྒྱ་ཕྱོགས་ནས་ད་ལྟའི་བོད་རྒྱའི་འབྲེལ་མོལ་འདི་༧གོང་ས་མཆོག་སྐུ་སྒེར་གྱི་ཆབ་སྲིད་གནད་དོན་ཞིག་ཏུ་རྩི་བཞིན་ཡོད་སྟབས། ༧གོང་ས་མཆོག་ཆབ་སྲིད་ཀྱི་འགན་དབང་ལས་བགྲེས་ཡོལ་དུ་ཕེབས་པ་ཡིན་ན། ད་ལྟའི་འབྲེལ་མོལ་འདིར་སྐད་ཆ་གང་ཡང་ལྷག་ཡོད་པ་མ་རེད། ཆབ་སྲིད་ཀྱི་འགན་དབང་ཆ་ཚང་མི་མང་གིས་འོས་འདེམས་བྱས་པའི་དབུ་ཁྲིད་ཀྱི་སྟེང་དུ་བབས་རྗེས། བོད་རྒྱའི་དཀའ་རྙོག་སེལ་རྒྱུར་འབྲེལ་ལམ་འཛུགས་སྟངས་ཐད། གྲུབ་འབྲས་དང་ཕན་ནུས་ལྡན་པའི་སྲིད་ཇུས་གང་འདྲ་ཞིག་གཏན་འབེབས་བྱ་དགོས་ཀྱང་། གྲོས་ཚོགས་ཀྱིས་ཐག་གཅོད་དང་ཐབས་ལམ་འཚོལ་དགོས་པ་རེད།

དྲི་བ། དེ་སྔ་༧གོང་ས་མཆོག་ལ་ཆབ་སྲིད་ཀྱི་དབང་ཚད་ག་ཚད་ཅིག་ཡོད་དམ།

ལན། བཙན་བྱོལ་བོད་མིའི་བཅའ་ཁྲིམས་ནང་༧གོང་ས་མཆོག་ནི་བོད་ཀྱི་དབུ་ཁྲིད་དང་བཙན་བྱོལ་སྒྲིག་འཛུགས་ཀྱི་ཆེས་མཐོའི་དབང་འཛིན་པ་ཡིན་ཞིང་། བཙན་བྱོལ་གཞུང་གི་སྲིད་ཇུས་གང་འདྲ་ཞིག་གཏན་འབེབ་དང་ལག་བསྟར་བྱ་དགོས་ཀྱང་། ༧གོང་ས་མཆོག་གི་མཚན་ཐོག་ནས་ཐག་གཅོད་ལག་བསྟར་བྱེད་ཀྱི་ཡོད། དེ་བཞིན་གྲོས་ཚོགས་ནས་གྲོས་གཞི་གང་འདྲ་ཞིག་བྱུང་ཡང་། བཀའ་ཤག་བརྒྱུད་༧གོང་ས་མཆོག་གི་དགོངས་ཚུལ་འོག་འགྲོ་དགོས་པ་དང་། སྤྱི་འཐུས་ཚོགས་གཙོ་དང་ལྷན་ཁང་ཁག་གི་བཀའ་བློན། བཀའ་ཁྲི་སོགས་ཀྱི་གནས་རིམ་བསྐོ་བཞག་ཐད་ཀྱང་༧གོང་ས་མཆོག་གི་ལམ་སྟོན་གནང་དགོས། མདོར་ན། སྤྱི་འཐུས་ལྷན་ཚོགས་དང་བཀའ་ཤག་འཛིན་སྐྱོང་གི་ལས་དོན་ཆེ་ཕྲ་གང་ཡིན་ཡང་། ༧གོང་ས་མཆོག་གི་དགོངས་དོན་འོག་འགྲོ་དགོས་པ་བཅས་བཅའ་ཁྲིམས་ནང་བསྟན་ཡོད།  

དྲི་བ། བཀའ་ཤག་ཚུད་པའི་བོད་རྒྱ་ཆེ་མི་མང་གིས་༧གོང་ས་མཆོག་བགྲེས་ཡོལ་དུ་མི་ཕེབས་རྒྱུར་སྐྱབས་འཇུག་ཞུ་བཞིན་པ་དེར་དོན་འབྲས་ཡོད་མེད་དང་། གལ་སྲིད་ཁོང་བགྲེས་ཡོལ་དུ་ཕེབས་ཟིན་པ་ཡིན་ན། བཙན་བྱོལ་སྒྲིག་འཛུགས་ཀྱི་ལས་དོན་གལ་ཆེན་རིགས་ལ་འགན་བཞེས་སྲིད་དམ།

ལན། ཞལ་བཞེས་གནང་ཡོད་པ་མ་རེད། དེ་རིང་ཁོང་གི་གསུང་འཕྲིན་ནང་གསལ་བོར་གསུངས་འདུག ད་བར་ང་ལ་རྒན་ཡོལ་ཆ་ཚང་མི་གནང་རྒྱུའི་རེ་བ་ཞུ་མཁན་མང་པོ་འབྱོར་སོང་། ཡིན་ནའང་ངས་དེ་དག་ལ་ཁས་ལེན་ཞུ་ཐུབ་ཀྱི་མི་འདུག མང་ཚོགས་ཀྱིས་ང་རྒན་ཡོལ་དུ་ཕེབས་དགོས་པའི་གལ་ཆེའི་རང་བཞིན་ལ་བསམ་ཤེས་གནང་རྒྱུའི་རེ་བ་ཡོད་གསུངས་སོང་པ་ལྟར་རེད། འདས་པའི་ཟླ་འགའི་རིང་བཀའ་ཤག་ཚུད་པའི་མང་ཚོགས་དང་ཚོགས་སྡེ་ཁག་མང་པོས་ཁོང་ལ་བགྲེས་ཡོལ་མི་གནང་རྒྱུར་སྐྱབས་འཇུག་ཞུས་ཡོད། འོན་ཀྱང་ད་ལྟའི་བར་ཁོང་གིས་ཞལ་བཞེས་གནང་ཡོད་པ་མ་རེད། ཁོང་བགྲེས་ཡོལ་ཆ་ཚང་གནང་ཟིན་པ་ཡིན་ན། བཙན་བྱོལ་སྒྲིག་འཛུགས་ནང་གི་ཆབ་སྲིད་ཀྱི་ལས་དོན་ཆེ་འབྲིང་ཆུང་གསུམ་གང་འདྲ་ཞིག་ཡིན་རུང་ཐུགས་འགན་བཞེས་འཆར་ཡོད་པ་མ་རེད།

 དྲི་བ། ༧གོང་ས་མཆོག་ཆབ་སྲིད་ཀྱི་དབུ་ཁྲིད་ལས་བགྲེས་ཡོལ་དུ་ཕེབས་རྗེས། ཁོང་གིས་བོད་མིའི་ཆོས་ལུགས་དབུ་ཁྲིད་ཀྱི་འགན་དེ་མུ་མཐུད་གནང་གི་རེད་དམ། 

ལན། ཆོས་ལུགས་ཀྱི་དབུ་ཁྲིད་ཟེར་བ་དེ་མང་ཚོགས་དང་སྲིད་གཞུང་ཞིག་གིས་བདམས་པའམ་བསྐོ་བཞག་བྱས་པ་དེ་འདྲ་མ་རེད། ཆོས་ཕྱོགས་ཀྱི་ལམ་སྲོལ་ཞིག་གི་ཆ་ནས་ཁོང་རང་བཞིན་གྱིས་དབུ་ཁྲིད་ཅིག་ཏུ་གྱུར་བ་ཡིན་སྟབས། ཆོས་ལུགས་དབུ་ཁྲིད་ཀྱི་འགན་འདི་ལ་དུས་ནམ་ཡང་བསྒྱུར་བཅོས་འགྲོ་བ་ཞིག་མ་རེད། ༧གོང་ས་ཏཱ་ལའི་བླ་མ་མཆོག་ནི་བོད་གཅིག་པོ་མ་ཡིན་པར་ཧི་མ་ལ་ཡའི་རི་རྒྱུད་དང་རྒྱ་རིགས། སོག་རིགས་སོགས་འཛམ་གླིང་གི་བོད་བརྒྱུད་ནང་བསྟན་ཆོས་ལུགས་ཀྱི་རྗེས་འཇུག་པ་ཚང་མའི་དབུ་ཁྲིད་དུ་བཀུར་གྱི་ཡོད། གནས་བབ་འདི་ལ་བསྒྱུར་བཅོས་དང་དགོངས་པ་ཞུ་དགོས་པའི་གནད་དོན་ཆགས་སྲིད་པ་མ་རེད། ཆབ་སྲིད་ཀྱི་ཐད་ནས་ཁོང་གི་དབང་ཆ་དུས་ལྟར་འགྱུར་བ་འགྲོ་དགོས་པ་ཞིག་ཡིན་སྟབས། དམངས་གཙོའི་ལམ་སྲོལ་ནང་། མང་ཚོགས་ཀྱི་འདོད་མོས་ཡོད་པའི་ཆབ་སྲིད་ཀྱི་དབུ་ཁྲིད་དུས་དང་བསྟུན་ཏེ་འོས་འདེམ་བྱ་དགོས་པ་མ་ཟད། འདོད་བློ་མ་ཁེངས་ཚེ་གནས་དབྱུང་གཏོང་རྒྱུའི་ཐོབ་ཐང་ཡང་མང་ཚོགས་ལ་ཡོད་དགོས་པ་ཞིག་རེད།

དྲི་བ། ད་ལྟའི་བར་བཙན་བྱོལ་གཞུང་གིས་དབུ་མའི་ལམ་ཀྱི་སྲིད་བྱུས་དང་བོད་རྒྱ་འབྲེལ་མོལ་གྱི་ལམ་རྒྱུན་འཁྱོངས་བྱས་པ་རེད། མ་འོང་པའི་བཀའ་བློན་ཁྲི་བས་སྲིད་བྱུས་འདི་རྒྱུན་འཁྱོངས་བྱ་དགོས་སམ།

ལན། མ་འོང་པའི་བཀའ་བློན་ཁྲི་པའི་ལངས་ཕྱོགས་དང་སྲིད་བྱུས་འཛིན་སྟངས་ཐད། ཤུགས་རྐྱེན་ཐེབས་པའི་བསམ་ཚུལ་འདི་དང་དེ་ཞེས་བཤད་རྒྱུ་གང་ཡང་མེད། མང་ཚོགས་ལ་སོ་སོའི་དབུ་ཁྲིད་འོས་འདེམ་བྱ་རྒྱུའི་དབང་ཚད་ཡོད་པ་དང་། བདམས་ཐོན་བྱུང་བའི་ཆབ་སྲིད་ཀྱི་དབུ་ཁྲིད་དེས་སྲིད་བྱུས་གསར་བ་གང་འདྲ་ཞིག་འཛིན་རྒྱུའི་ཐད། བསམ་བློའི་རང་དབང་དང་ཐག་གཅོད་ཀྱི་རང་དབང་ཆ་ཚང་བ་ཞིག་དགོས་པ་ལས། དེ་ལ་ང་རང་གི་ངོས་ནས་བཤད་རྒྱུ་གང་ཡང་མེད། འོན་ཀྱང་སྤྱི་ཡོངས་ནས་བཤད་ན། བོད་ཕྱི་ནང་གི་རྒྱ་ཆེའི་མང་ཚོགས་ཀྱིས་ལས་དོན་གང་བརྩམས་ཀྱང་། འཚེ་མེད་ཞི་བའི་སྟེང་འགྲོ་རྒྱུའི་ཆོད་སེམས་བརྟན་པོ་ཡོད་པ་དེ་མུ་མཐུད་གནང་གི་རེད་བསམ་གྱི་ཡོད།  

དྲི་བ། ༧གོང་ས་མཆོག་བགྲེས་ཡོལ་དུ་ཕེབས་པ་དང་བཀའ་ཤག་གི་སྣེ་ཁྲིད་པར་འཕོ་འགྱུར་ཕྱིན་པ་ཡིན་ན། བོད་པའི་རྩ་དོན་འཐབ་རྩོད་བྱེད་ཕྱོགས་ཐད། བོད་རིགས་གཞོན་སྐྱེས་ཚོས་མུ་མཐུད་འཚེ་མེད་ཞི་བའི་ལྟ་གྲུབ་ཐོག་བསྐྱོད་ཐུབ་བམ།

ལན། རྒན་རབས་པ་ལས་གཞོན་སྐྱེས་ཚོ་འཚེ་མེད་ཞི་བའི་ལྟ་གྲུབ་ལ་ཡིད་ཆེས་ཆེ་བ་ཡོད། གཞོན་སྐྱེས་ཚོས་ལས་དོན་སྒྲུབ་སྐབས་ངར་ཤུགས་ཅུང་ཆེན་པོ་ཡོད་ཀྱང་། དེ་འཚེ་བ་རེད་ཟེར་ན་འགྲིག་གི་མ་རེད། ལྷག་པར་དུ་མཚམས་རེར་གཞོན་སྐྱེས་ཉུང་ཤས་ཀྱིས་རྒྱ་ནག་གཞུང་ཚབ་ཁང་ལ་རྒོལ་མཆོངས་བྱས་པ་སོགས་ཀྱིས་བོད་རིགས་གཞོན་སྐྱེས་ཀྱི་ཚབ་མཚོན་ཐུབ་ཀྱི་ཡོད་པ་མ་རེད།

དྲི་བ། བོད་མི་གྲངས་འབོར་ཉུང་ཤས་ཤིག་གིས་༧གོང་ས་མཆོག་བགྲེས་ཡོལ་དུ་མི་ཕེབས་རྒྱུར་སྐྱབས་འཇུག་ཞུས་པ་དེར་བཀའ་ཤག་གིས་བོད་རྒྱ་ཆེ་མི་མང་གི་རེ་འདུན་ལ་༧གོང་ས་མཆོག་གིས་ཕལ་ཆེར་ཞལ་བཞེས་གནང་གི་མ་རེད་ཅེས་གསུང་ན་འཚམ་པོ་ཡོད་དམ།

ལན། ཞལ་བཞེས་གནང་གི་མ་རེད་ཟེར་གྱི་མེད། ཕལ་ཆེར་ཞལ་བཞེས་གནང་མདོག་ཁ་བོ་མ་རེད་ཞུ་བཞིན་ཡོད། གང་ལྟར་འཛིན་སྐྱོང་གི་ངོས་ནས་མང་ཚོགས་ཀྱི་རེ་འདུན་དང་༧གོང་ས་མཆོག་གི་དགོངས་བཞེད་གཉིས་ཀར་འཚམ་པའི་ལམ་ཁ་ཞིག་ཐབས་འཚོལ་བྱ་རྒྱུར་འབད་བརྩོན་གནང་དགོས་པ་ཆགས་ཡོད།

དྲི་བ། ༧གོང་ས་མཆོག་བཙན་བྱོལ་གཞུང་གི་ཆབ་སྲིད་ཀྱི་དབུ་ཁྲིད་ནས་བགྲེས་ཡོལ་དུ་ཕེབས་ཚེ། ད་ལྟའི་བཙན་བྱོལ་གཞུང་འདི་ལུགས་མཐུན་གྱི་གཞུང་ཞིག་ཏུ་གནས་ཐུབ་ངེས་རེད་དམ།

ལན། འདི་གནད་དོན་གལ་ཆེ་ཤོས་རེད། བཙན་བྱོལ་སྒྲིག་འཛུགས་འདི་ལ་གཞུང་འབྲེལ་ཐོག་སྲིད་གཞུང་ཞེས་འབོད་ཀྱི་ཡོད་པ་མ་རེད། གང་ལྟར་བོད་གཞིས་བྱེས་གཉིས་ཀྱིས་རེ་བ་བྱེད་ས་དང་། བོད་མི་ས་ཡ་དྲུག་གི་ཚབ་མཚོན་གྱི་སྒྲིག་འཛུགས་ཤིག་རེད། ཡིད་ཆེས་དང་དད་སེམས་ཀྱི་དམ་ཚིག་འདི་༧གོང་ས་མཆོག་གི་བླ་ན་མེད་པའི་དབུ་ཁྲིད་ཉག་གཅིག་ལ་བརྟེན་ཏེ་བྱུང་བ་ཞིག་རེད། ༧གོང་ས་མཆོག་འགན་འཁྲི་འདི་ནས་ཕྱིར་ཕེབས་པ་ཡིན་ན། བོད་མི་མང་གི་མིག་ནང་དུ་བཙན་བྱོལ་སྒྲིག་འཛུགས་འདི་ལུགས་མཐུན་གྱི་གཞུང་ཞིག་ཏུ་མཐོང་གི་མ་རེད། དེ་དངོས་ཡོད་རེད།

དྲི་བ། ༧གོང་ས་མཆོག་བགྲེས་ཡོལ་དུ་ཕེབས་པ་ཡིན་ན། བཙན་བྱོལ་གཞུང་གི་གནས་བབ་དང་བོད་རྒྱའི་འབྲེལ་མོལ་འདི་གང་འདྲ་ཞིག་ཆགས་སྲིད་དམ།

ལན། གནས་སྟངས་འདི་འདྲ་ཞིག་ཆགས་ཀྱི་རེད་ཅེས་ངས་བཤད་ཐུབ་ཀྱི་མི་འདུག གལ་སྲིད་གནས་སྟངས་འདི་འདྲ་ཞིག་ཆགས་རྒྱུ་རེད་ཅེས་བཤད་ཚོད་ཐུབ་པ་ཡིན་ན། ང་ཚོས་ཡང་ནས་ཡང་དུ་༧གོང་ས་མཆོག་ལ་བགྲེས་ཡོལ་ཆ་ཚང་མ་ཕེབས་རོགས་ཞེས་སྐྱབས་འཇུག་ཞུ་མི་དགོས་པའི་བཟོ་འདྲ་བོ་ཞིག་རེད། ད་ལྟ་ཚང་མས་ཁོང་གིས་མུ་མཐུད་ཐུགས་འགན་ཆ་ཚང་བཞེས་རྒྱུར་གསོལ་བ་འདེབས་བཞིན་ཡོད་པ་དེ་ཡང་། ཕྱོགས་གཅིག་ནས་དད་པ་དམ་ཚིག་གི་སྐད་ཆ་ཡིན་མོད། གཙོ་བོ་༧གོང་ས་མཆོག་བགྲེས་ཡོལ་དུ་ཕེབས་པ་ཡིན་ན། ང་ཚོར་གདམ་ཀ་མེད་པའི་གནས་སྟངས་ཐབས་སྐྱོ་བོ་ཞིག་ཆགས་མི་ཡོང་ངམ་སྙམ་པའི་དོགས་འཚབ་དེ་རེད།

གསར་འགོད་པ། བནྡེ་སྐྱབས།