བར་ཁྱད་ལས་བྱུང་བའི་བར་ཁྱད་ཆེན་པོ།

༸གོང་ས་མཆོག་གི་ཆབ་སྲིད་ཀྱི་དབང་ལུང་མང་ཚོགས་ཀྱིས་འོས་འདེམས་བྱས་པའི་འགོ་ཁྲིད་ལ་གནང་རྒྱུའི་བཀའ་རྩ་གསུང་འཕྲིན་དང་འབྲེལ་བའི་གྲོས་ཚོགས་ཀྱི་བགྲོ་གླེང་གི་ཟུར་འགའ་ཞིག་གི་མཐོང་སྣང་བརྗོད་པ།

ཨ་འབྲུག་དཀོན་མཆོག  

ཉེ་ཆར་འཛམ་གླིང་གི་མང་གཙོའི་གསར་བརྗེ་བཞི་བར་གྲགས་པའི་ཨ་རབ་རྒྱལ་ཁབ་ཁག་ནས་མཆེད་པའི་མང་གཙོ་རྩོད་ལེན་གྱི་ལས་འགུལ་ཆེན་པོ་དེས། འཛམ་གླིང་གི་མི་རྣམས་ལ་མང་གཙོའི་གོ་དོན་དང་རིན་ཐང་ལ་བསྐྱར་དུ་གདེང་འཇོག་ཐོབ་པའི་ལོ་རྒྱུས་ཀྱི་དཔང་རིས་ཤིག་བཤམས་སྟོན་བྱས་ཤིང༌། མང་གཙོའི་རིང་ལུགས་ནི་དམངས་ཀྱི་སྙིང་སྟོབས་དང༌། གསར་བརྗེའི་ཆོད་སེམས། རང་དབང་གི་རེ་འདུན་བཅས་ལ་བརྟེན་ཡོད་པ་གསལ་སྟོན་བྱས།

འཛམ་གླིང་གི་མང་གཙོའི་ལོ་རྒྱུས་དང་མ་འདྲ་བའི་སྐྱབས་བཅོལ་བོད་མིའི་མང་གཙོ་ནི་དབུ་ཁྲིད་ཀྱི་སྙིང་སྟོབས་དང༌། གསར་བརྗེའི་ཆོད་སེམས།  རིགས་དང་ཤེས་རིག་གི་མདུན་ལམ་ལ་རྒྱང་གཟིགས་ཁོ་ན་ལས་བྱུང་བས། ཚིག་གཞན་ཞིག་གིས་བརྗོད་ན་བོད་ཀྱི་མང་གཙོ་ནི་དབུ་ཁྲིད་ཀྱིས་མང་ཚོགས་ལ་རྩོད་ལེན་བྱས་ནས་བྱུང༌། 

འཛམ་གླིང་གི་མང་གཙོ་རྩོད་ལེན་གྱི་གསར་བརྗེའི་ནང་དབང་འཛིན་པས་དམངས་ཀྱི་འདུན་པ་བཙན་གནོན་དང༌། དམངས་ཀྱི་བསམ་ཚུལ་ལོག་འགྲེལ། དམངས་ཀྱི་འགུལ་སྐྱོད་འགོག་སྡོམ་བྱས་པ་ལས་མང་ཚོགས་དང་མང་ཚོགས་ཀྱི་སྐུ་ཚབ་ཀྱིས་མང་གཙོ་རིང་ལུགས་སུ་འགྲོ་བའི་དབུ་ཁྲིད་ཀྱི་འདུན་པ་བཙན་འགོག་དང༌། དགོངས་དོན་ལོག་འགྲེལ། མདུན་བསྐྱོད་ཀྱི་ལས་དོན་ལ་འགོག་རྒོལ་བྱེད་སྲོལ་བྱུང་ཡོད་དམ། 

ྋགོང་ས་སྐྱབས་མགོན་ཏཱ་ལའི་བླ་མས་བོད་ཀྱི་ཆོས་སྲིད་ཀྱི་འགན་བཞེས་པ་ནས་བཟུང་བོད་ཀྱི་ལམ་ལུགས་སྤྱི་དང༌། ཡང་སྒོས་ཆབ་སྲིད་ཀྱི་ལམ་ལུགས་དེང་རབས་མང་གཙོའི་རིང་ལུགས་ཚད་ལྡན་དུ་གསར་བརྗེ་དང་བཅོས་བསྒྱུར་བྱེད་པའི་ཆོད་སེམས་བཟུང་ཞིང༌། དེ་འབྲེལ་གྱི་ལམ་སྟོན་དང་ཐག་གཅོད་སྣ་ཚོགས་བྱས་ཏེ། ད་ཆ་ཡོངས་སུ་བགྲེས་ཡོལ་ཕེབས་པའི་ཐག་གཅོད་ཀྱི་བཀའ་རྩ་ནན་བསྒྲགས་བྱས།

ཁོང་གི་དགོངས་པ་འདི་ལོ་རྒྱུས་དང་སྤྱི་ཚོགས་ཀྱི་གནད་དོན་ལ་གཏིང་ཟབ་པའི་ངོས་འཛིན་ལས་བྱུང་བས། ལོ་རྒྱུས་ཀྱི་རྒྱབ་ལྗོངས་དང་སྦྲགས་ཏེ་བཀའ་རྩ་ནན་བསྒྲགས་བྱས་ཤིང་། མང་གཙོའི་རིང་ལུགས་ཀྱི་སྤྱི་ཚོགས་ནང་འགྱུར་ལྡོག་དེ་ཡང་ཁྲིམས་ལུགས་ཀྱི་རྒྱབ་རྟེན་འོག་འགྲོ་དགོས་སྟབས། བོད་ཀྱི་ཁྲིམས་བཟོ་ལྷན་ཚོགས་སམ་གྲོས་ཚོགས་ལ་ཁོང་གི་ཐག་གཅོད་འདི་དང་འབྲེལ་བའི་བྱེད་སྒོའི་བཀའ་ཡིག་བསྩལ། 

བཀའ་ཡིག་ནང་ྋགོང་ས་མཆོག་གིས་མཚན་གནས་རྗེས་འབྲེལ་གྱི་དབང་ལུང་ཡོངས་རྫོགས་མང་ཚོགས་ཀྱིས་འོས་འདེམས་བྱས་པའི་འགོ་ཁྲིད་ལ་སྤྲོད་རྒྱུ་དེ་ཁོང་གིས་དགོས་པ་དང་དགོངས་གཞི་ཆེན་པོས་ཐག་གཅོད་བྱས་ཟིན་པ་ཞིག་ཡིན་པ་ཞིབ་གསལ་འཁོད་ཡོད་པ་ལས། ཁོང་གི་ཐག་གཅོད་འདི་འགྲིག་མིན་ནི་སྤྱི་འཐུས་ཚོའི་བགྲོ་གླེང་གི་བརྗོད་གཞི་མིན། 

འོན་ཀྱང་གྲོས་ཚོགས་ར་བའི་ནང་གི་གནད་དོན་འདིའི་ཐོག་བགྲོ་གླེང་བྱེད་ཕྱོགས་མང་པོ་ཞིག་ྋགོང་ས་མཆོག་གིས་དགོངས་ཕྱོགས་དང༌། ཐག་གཅོད་བྱེད་ཕྱོགས་འདི་འགྲིག་མིན་ལ་ཆེས་ཆེར་ཕྱོགས། ལྷག་པར་དུ་ཁོང་ཚོས་བཤད་ཕྱོགས་འགའ་ཞིག་ནི་ྋགོང་ས་མཆོག་གི་བཀའ་རྩ་གནང་བའི་དགོས་དོན་རྒྱང་ཐག་ཧ་ཅང་རིང་དུ་སོང་བའི་ཚོར་སྣང་དང་ངོས་འཛིན་གྲོས་ཚོགས་ར་བའི་ནང་དུ་ཡོད་པའི་འཐུས་མི་བྱེ་བྲག་པ་རེ་ལའང་བྱུང་ནས་གླེང་སློང་བྱས།

བགྲོ་གླེང་ནང་སྤྱི་འཐུས་མང་པོ་ཞིག་གིས་བོད་མང་གིས་ྋགོང་ས་མཆོག་གིས་ཆབ་སྲིད་ཀྱི་མཛད་འགན་བཞེས་པའི་རེ་འདུན་ཤུགས་ཆེན་པོ་བྱེད་ཀྱི་ཡོད་པ་དང༌། མི་མང་གི་འཐུས་མིས་མི་མང་གི་མངོན་འདོད་ལ་བསྟུན་དགོས་པས། ང་ཚོས་དམངས་ཀྱི་རེ་འདུན་དེ་གཞི་ལ་བཞག་ནས་ཐག་གཅོད་འདི་ལྟ་བུ་གནང་ན་མི་འགྲིག་པའི་གསོལ་འདེབས་བྱེད་དགོས་པ་ཤུགས་ཆེན་པོས་བཤད་པ་མ་ཟད། སྤྱི་འཐུས་སྐོར་ཁག་ཅིག་གིས་གནད་དོན་འདིར་བགྲོ་གླེང་མ་གནང་གོང་ནས་བཤད་ཕྱོགས་འདི་གཅིག་གྱུར་གྱིས་ཐག་གཅོད་བྱས་འདུག

ྋགོང་ས་མཆོག་གིས་འདས་པའི་མི་ལོ་ལྔ་བཅུའི་རིང་མི་མང་གིས་གནད་དོན་འདི་ངོས་ལེན་བྱེད་ཐུབ་པའི་འབད་བརྩོན་གནང་བ་དང༌། ལྷག་པར་ད་ཐེངས་མི་མང་གི་རེ་འདུན་དང་ལེན་བྱེད་ཐབས་མ་བྱུང་བར་གསུངས་པས་དགོངས་པ་དང་ཐག་གཅོད་འདིའི་ངོ་བོ་ལ་སྤྱི་འཐུས་ཀྱི་ལྟ་ཕྱོགས་དང་ཁོང་གི་གཟིགས་ཕྱོགས་གཉིས་ཐ་དད་དུ་གྱུར། 

བགྲོ་གླེང་སྐབས་སྤྱི་འཐུས་མང་པོ་ཞིག་གིས་གོང་ས་མཆོག་དང་བོད་མི་མང་གཉིས་ཁ་བྲལ་དུ་འགྲོ་ཐབས་མེད་པ་དང༌། ྋགོང་ས་མཆོག་གིས་འགན་ཁུར་དང་འགོ་འཛིན་མེད་པའི་གཞུང་དང་སྒྲིག་འཛུགས་ཤིག་གནས་ཐབས་མེད་པ་དང༌། གཞུང་དང་སྒྲིག་འཛུགས་ལ་མི་མང་དང་གནས་ཡུལ་རྒྱལ་ཁབ་ཀྱི་རྒྱབ་རྟེན་ཤོར་ངེས་ཡིན་པར་བཤད།

ྋགོང་ས་མཆོག་གིས་མི་གཅིག་ལ་བློས་འགེལ་གྱིས་མང་ཚོགས་འགན་ཁུར་མེད་པར་བསྡད་ན་རྒྱལ་ཁབ་དང་མི་རིགས་སྲ་བརྟན་གནས་མི་ཐུབ་པ་དང༌། ཡུལ་ལུང་ཡར་རྒྱས་ཚུལ་བཞིན་ཡོང་མི་ཐུབ་པ་དངོས་མཐོང་ཡིན་པར་གསུངས་པས་དགོངས་པ་དང་ཐག་གཅོད་འདིའི་མཇུག་འབྲས་ལ་སྤྱི་འཐུས་ཀྱི་ལྟ་ཕྱོགས་དང་ཁོང་གི་གཟིགས་ཕྱོགས་གཉིས་ཐ་དད་དུ་གྱུར།

འཐུས་མི་འགའ་ཞིག་གིས་ྋགོང་ས་མཆོག་ཆབ་སྲིད་དང་འཛིན་སྐྱོང་གི་དབུ་ཁྲིད་ནས་བགྲེས་ཡོལ་དུ་ཕེབས་པའི་གསུང་འཕྲིན་འདི་ལས་འཕྲོས་པའི་བགྲོ་གླེང་གི་སྐབས་སུ། གནད་དོན་འདི་ནི་བོད་སེར་སྐྱ་མཆོག་དམན་ཚང་མར་ཕན་པ་སྤུ་ཙམ་མེད་པ་མ་ཟད། རྒྱ་ནག་གི་རྒྱལ་ཁ་ཞིག་ཡི་པར་བརྗོད། 

གསུང་འཕྲིན་དུ་མང་གཙོའི་ལམ་ལུགས་ལག་བསྟར་དང་དེ་འབྲེལ་གྱི་ཐག་གཅོད་དག་ནི་གཞན་གྱི་ལད་མོ་དང་མཛེས་ཆོས་ཙམ་མ་ཡིན་པར་བོད་མི་ས་ཡ་དྲུག་གི་ཕྲལ་ཕུགས་ཀྱི་བདེ་དོན་ལ་དམིགས་པར་གསུངས་པས། དགོངས་པ་དང་ཐག་གཅོད་འདིའི་ཁ་གཏོད་ས་ལ་སྤྱི་འཐུས་ཚོས་ལྟ་ཕྱོགས་དང་ཁོང་གི་གཟིགས་ཕྱོགས་གཉིས་ཐ་དད་དུ་གྱུར། 

འཐུས་མི་འགའ་ཞིག་གིས་ྋགོང་ས་མཆོག་གིས་བོད་མི་རིགས་དང་རྒྱལ་ཁབ་ཀྱི་གཙོ་འཛིན་དབུ་ཁྲིད་དུ་དུས་གཏན་དུ་བཞུགས་དགོས་པ་དང༌། ྋགོང་ས་མཆོག་ཆབ་སྲིད་ཀྱི་ཐུགས་འགན་མི་བཞེས་པའི་དགོངས་པ་བཞེས་དགོས་པའི་རྒྱུ་རྐྱེན་དག་གདོང་ལེན་བྱེད་པའི་ཁ་ཞེ་གཉིས་མེད་ཀྱི་དམ་བཅའ་བརྟན་པོ་ཡོད་པར་བརྗོད་པ་དང། ཁོང་གི་དགོངས་པ་ལྟར་བཞེས་པའི་རྒྱུ་རྐྱེན་ངོས་འཛིན་ཐད་བོད་མི་རྩོམ་པ་པོ་དང་ཆབ་སྲིད་པ་རེ་གཉིས་ཀྱི་བསམ་ཕྱོགས་དང་བཤད་ཕྱོགས་ཙམ་ཡིན་པར་ངོས་འཛིན་བྱས།

༸གོང་ས་མཆོག་གིས་ངོས་ཀྱི་སྲིད་དབང་རྩིས་སྤྲོད་བྱ་རྒྱུའི་བསམ་ཚུལ་འདི་འགན་ཁུར་བྱ་འདོད་མེད་པའམ། སེམས་ཤུགས་ཆག་པ། བོད་མིའི་བདེན་དོན་འཐབ་རྩོད་བློས་བཏང་བ་ཞིག་གཏན་ནས་མ་ཡིན་པར་བོད་མིའི་འཕྲལ་ཕུགས་ཀྱི་ཁེ་ཕན་ཁོ་ནའི་ཆེད་དུ་དམིགས་པ་ཞིག་ཡིན་པར་གསུངས་པས། དགོངས་པ་དང་ཐག་གཅོད་འདིའི་རྒྱུ་རྐྱེན་ཐད་སྤྱི་འཐུས་ཚོས་ལྟ་ཕྱོགས་དང་ཁོང་གི་གཟིགས་ཕྱོགས་གཉིས་ཐ་དད་དུ་གྱུར།

འཐུས་མི་འགའ་ཞིག་གིས་བོད་གཞུང་དགའ་ལྡན་ཕོ་ཕྲང་གི་ལོ་སུམ་བརྒྱ་ལྷག་གི་ལོ་རྒྱུས་དེ་བོད་དུ་བྱུང་བ་ཞིག་ཡིན་པས། གཞུང་འདིའི་མིང་ཚིག་ལ་སོགས་པར་འགྱུར་བ་བོད་ནང་དུ་གཏོང་དགོས་པ་ལས། རྒྱ་གར་སོགས་ཕྱི་ཡུལ་ནས་གཏོང་རྒྱུའི་དབང་ཆ་དང་འོས་བབ་མེད་པས། འཐུས་མི་ཞེ་གྲངས་ཤིག་གིས་དུས་ཡུན་ཐུང་ངུའི་ནང་བོད་ཀྱི་ལོ་རྒྱུས་ལ་འགྱུར་བ་གཏོང་མི་ཐུབ་པར་བརྗོད་ཅིང་། 

དེ་དང་འགྲོས་གཅིག་པ་ཞིག་ལ་འཐུས་མི་འགས་རྒྱལ་བ་རིན་པོ་ཆེའི་དབུ་ཁྲིད་པའི་བོད་ཆོས་སྲིད་གཉིས་ལྡན་གྱི་དགའ་ལྡན་ཕོ་བྲང་བའི་གཞུང་མཚན་བྱང་དང་བཅས་པ་མེད་པར་བཟོ་བའི་དབང་ཚད་ཀྱིས་མི་འདང་བ་མ་ཟད། བཅའ་ཁྲིམས་སུ་འཁོད་པའི་རྒྱལ་བ་རིན་པོ་ཆེའི་དབང་ལུང་མེད་པར་བཟོ་བ་དེ་མང་ཚོགས་ཀྱི་བསམ་ཡུལ་ལས་འདས་པས། བཀའ་འདི་བཀའ་བརྩི་དང་ལེན་བྱེད་མི་ཐུབ་པར་ཚིག་ཐག་ཆོད་པོས་བཤད་རྒྱུ་མ་ཟད། གལ་ཏེ་ལས་དོན་འདི་ལྟ་བུ་བསྒྲུབ་པའི་འགོ་འཛུགས་བྱས་ན་སྤྱི་འཐུས་ཀྱི་ལས་གནས་ནས་དགོངས་ཞུ་བྱ་རྒྱུ་ཡིན་པར་བཤད།

གསུང་འཕྲིན་དུ་ད་ལམ་བཅའ་ཁྲིམས་བསྐྱར་བཅོས་སྐབས་བཅའ་ཁྲིམས་ཀྱི་སྒྲོམ་གཞི་ལ་འགྱུར་བ་བཏང་ནས་ཆབ་སྲིད་དང་འཛིན་སྐྱོང་གཉིས་ཀའི་འགོ་ཁྲིད་མང་ཚོགས་ཀྱིས་འོས་འདེམས་བྱས་པའི་མི་སྣས་དུས་ཡུན་ངེས་ཅན་དུ་བྱ་རྒྱུའི་ཆ་རྐྱེན་བསྐྲུན་ཏེ་བཅའ་ཁྲིམས་ཡུལ་མིའི་རྒྱལ་ཁབ་ཀྱི་སྒྲོམ་གཞི་དང་མཐུན་པ་ཞིག་ངེས་པར་བཟོ་དགོས་པར་གསུངས་འདུག་པས། དགོངས་པ་དང་ཐག་གཅོད་འདི་ལྟར་བྱེད་པའི་ལོ་རྒྱུས་ཀྱི་འགན་དབང་ཐད་སྤྱི་འཐུས་ཚོའི་ལྟ་ཕྱོགས་དང་ཁོང་གི་གཟིགས་ཕྱོགས་གཉིས་ཐ་དད་དུ་གྱུར། 

འཐུས་མི་མང་པོ་ཞིག་གིས་༸གོང་ས་མཆོག་གིས་དགོངས་བཞེས་དང་ཐག་གཅོད་དེ་ལྟ་བུ་མི་གནང་བའི་སྐྱབས་འཇུག་གསོལ་འདེབས་བྱ་རྒྱུ་དང།  གསོལ་འདེབས་ཞུ་རྟེན་དུ་མང་མོས་འོས་བསྡུ་བྱ་རྒྱུའམ་ཡང་ན་དེ་ལྟར་དགོངས་བཞེས་དང་། ཐག་གཅོད་མི་གནང་བའི་དམངས་ཀྱི་འདུན་པ་གསལ་སྟོན་གྱི་ཆེད་དུ་མང་མོས་འོས་བསྡུ་བྱ་དགོས་པར་བཤད་པས། ཁོང་ཚོས་བསམ་ཕྱོགས་དང་ཐབས་ལམ་འདི་ཁོང་གི་དགོངས་བཞེས་དང་ཐག་དེ་ལྟར་མི་གནང་བའི་ཆེད་དུ་དམིགས་འདུག་པ་དང་།

གསུང་འཕྲིན་དུ་གལ་ཆེའི་གནད་དོན་འདི་ཉིན་འགྱངས་ཞག་འཕུལ་དུ་མ་བཞག་པར་ད་རེས་གྲོས་ཚོགས་ཀྱི་ཚོགས་དུས་འདིའི་ཐོག་བཅའ་ཁྲིམས་གཙོ་བོར་གྱུར་པའི་ཁྲིམས་སྒྲིག་ཁག་ལ་བསྐྱར་བཅོས་དགོས་ངེས་རྣམས་བསྐྱར་བཅོས་ཀྱིས་ངོས་ནས་ཏཱ་ལའི་བླ་མའི་མཚན་གནས་རྗེས་འབྲེལ་གྱི་ཆབ་སྲིད་དང་འཛིན་སྐྱོང་གི་བྱེད་སྒོ་གང་ཡང་མ་དགོས་པ་ཞིག་ངེས་པར་བྱེད་དགོས་ཞེས་གསལ་བས། དགོངས་པ་དང་ཐག་གཅོད་འདི་དང་འབྲེལ་བའི་འཐུས་མི་ཚོའི་རེ་བ་དང་ཁོང་གི་ཐུགས་རེ་གཉིས་འདི་ལྟར་ཐ་དད་དུ་གྱུར།

ད་ཐེངས་གོང་ས་མཆོག་གི་བཀའ་ཡིག་དགོངས་དོན་དང་གྲོས་ཚོགས་ར་བའི་ནང་གི་བགྲོ་གླེང་གཉིས་ཕྱོགས་སྣེ་མང་པོ་ཞིག་ནས་ཐ་དད་དུ་གྱུར་ཞིང་། ༸གོང་མཆོག་གིས་ཐག་གཅོད་དེ་འདྲ་གནང་ན་མི་འགྲིག་པ་མ་ཟད། དགོངས་པ་དེ་འདྲ་ཡང་མི་བཞེས་པའི་གསོལ་འདེབས་བྱེད་ངེས་པའི་གྲོས་འཆར་བཏོན་པ་ནི་བསམ་བློ་གཏོང་ཕྱོགས་གང་འདྲ་ཡིན་མིན་ལ་མ་ལྟོས་པར། བྱེད་སྟངས་ཀྱི་ཆ་ནས་༸གོང་ས་མཆོག་ལ་ཁ་གཏད་བཅག་པ་ལྟ་བུ་ཞིག་ཏུ་གྱུར་ཡོད།