མི་གསོད་ལག་དམར་གྱི་ཉེས་འཛུགས་བྱས་ཀྱང་སོང་ཟེར།

བཙན་བྱོལ་བོད་མིའི་འོས་བསྡུ་ཆེན་མོ་དང་བསྟུན་ཏེ་བོད་ནང་གི་ས་གནས་མང་པོ་ཞིག་ལ་རྒྱ་གཞུང་གིས་དམ་དྲག་བྱེད་མགོ་བཙུགས་ཡོད་པ་མ་ཟད། ཨ་མདོ་རྔ་པ་ཁུལ་གྱི་དགོན་གྲོང་གཉིས་ཀར་དམ་དྲག་ཤུགས་ཆེན་དང་། རྒྱལ་གཅེས་སློབ་གསོ་ཞིག་མགོ་འཛུགས་བྱས་ཏེ། ཀིརྟི་དགོན་པའི་དགེ་འདུན་པ་དང་ས་གནས་མང་ཚོགས་ཚོར་སྐྱོན་བརྗོད་དང་ཉེས་འཛུགས་སྣ་ཚོགས་བྱེད་བཞིན་ཡོད་འདུག

ཟླ་འདིའི་ཕྱི་ཚེས་ ༡༩ ཉིན་གྱི་དགོང་མོ་ནས་རྔ་པའི་སྟོད་སྨད་བར་གསུམ་དུ་རྒྱ་ནག་གཞུང་གི་དམག་མི་ཕོན་ཆེན་བཏང་སྟེ་དམ་དྲག་སྔར་ནས་ཆེ་བ་བྱེད་མགོ་བཙུགས་ཡོད་འདུག་ལ། ལྷག་པར་དུ་ཕྱི་ཚེས་ ༢༠ ཉིན་རྫོང་དང་ཐག་ཉེ་རིང་གི་དགོན་གྲོང་ཡོངས་ལ་བཀའ་རྒྱ་བཏང་སྟེ། དགོན་པའི་ལས་སྣེ་ཁག་དང་སྡེ་དཔོན་རྣམས་ཀྱིས་འགན་ཁུར་ཏེ། སོ་སོའི་དགོན་པ་དང་སྡེ་བའི་ནང་མི་སུ་གཅིག་ལའང་ཤོག་སྦག་སྒྲོན་པ་དང་བསང་གཏོང་བ། རླུར་རྟ་གཏོར་སོགས་བྱེད་མི་ཆོག་སྐོར་བརྗོད་ཡོད་འདུག

ས་གནས་མང་ཚོགས་ཚོས་བརྗོད་ན། ཉིན་འདི་འགར་རྒྱ་གཞུང་གིས་དམ་དྲག་སྔར་ལས་ཆེ་བ་བྱེད་དོན། ཕྱི་ཚེས་ ༢༠ ཉིན་བཙལ་བྱོལ་མི་རྣམས་ཀྱིས་བཀའ་བློན་ཁྲི་པ་དང་སྤྱི་འཐུས་འོས་འདེམས་བྱེད་ཀྱིན་ཡོད་པར་བོད་ནང་གི་བོད་མི་ཚོས་དགའ་བསུའི་རྣམ་འགྱུར་སྟོན་སྲིད་པའི་དོགས་གཞི་བྱས་པ་ཡིན་སྐོར་བཤད།   

ཕྱི་ཚེས་ ༢༠ ཉིན་ནས་རྔ་པ་ཀིརྟི་དགོན་དུ་སི་ཁྲན་ཞིང་ཆེན་དང་རྔ་པ་ཁུལ་གྱི་ལས་བྱེད་སྐོར་ཞིག་བསླེབས་ཡོད་པ་དང་། ཉིན་དེ་ནས་བཟུང་དགོན་པའི་དགེ་འདུན་པ་རྣམས་ཕྱི་ལ་འགྲོ་དགོས་ཚེ་འཛིན་གྲྭ་སོ་སོའི་སྐྱོར་དཔོན་གྱིས་འགན་ལེན་ཡིག་ཆ་དང་། དགེ་བསྐོས་གང་རུང་གི་འགན་ལེན་ཡིག་ཆ། དགོན་པའི་ནང་ལྟ་རྟོག་བྱེད་མཁན་རྒྱ་མིའི་ལས་བྱེད་ཀྱི་ཆོག་མཆན་བཅས་མེད་ན། གྲྭ་བ་སུ་གང་ཡང་ཕྱི་ལ་འགྲོ་སྐྱོད་བྱེད་མི་ཆོག་པའི་བཀའ་རྒྱ་བཏང་ཡོད་འདུག

 ཞིང་ཆེན་དང་ཁུལ་རྫོང་རིམ་པའི་ལས་བྱེད་དེ་དག་གི་སྣེ་ཁྲིད་འོག ཕྱི་ཚེས་ ༢༡ ཉིན་ནས་བཟུང་དགོན་པའི་དགེ་འདུན་པ་ཡོངས་ལ་སློབ་གསོའི་ལས་འགུལ་སྤེལ་མགོ་བརྩམས་ཡོད་པ་དང་། ལས་འགུལ་དེ་ཕྱི་ཚེས་ ༢༡ ཉིན་གྱི་སྔ་དྲོའི་ཆུ་ཚོད་ ༨ སྟེང་དངོས་སུ་མགོ་འཛུགས་བྱ་རྒྱུ་ཁྱབ་བསྒྲགས་བྱས་ཡོད་ཀྱང་། དགེ་འདུན་པ་རྣམས་འཛོམས་མེད་སྟབས། རྒྱ་དཔོན་ཚོས་དགོན་པའི་ལས་སྣེ་ཚོར་བཙན་བཀའ་བཏང་སྟེ། གྲྭ་ཤག་རེ་རེ་བཞིན་ཉུལ་ཏེ་དགེ་འདུན་པ་རྣམས་འདུ་ཁང་རྡོ་ཅལ་དུ་འཛོམ་དགོས་པའི་རེ་འདུན་བཏོན་ཡོད་པ་མ་ཟད། རྒྱ་དཔོན་སྐོར་ཞིག་ཀྱང་གྲྭ་ཤག་ཁག་ཏུ་འཛུལ་ཏེ་གྲྭ་བ་རྣམས་བཙན་ཤེད་ཀྱིས་ཁྲིད་ཡོང་ཡོད་འདུག

མཐར་ཆུ་ཚོད་ ༡༠ ཙམ་ལ་གཞི་ནས་དགེ་འདུན་པ་ཉིས་བརྒྱ་ལྷག་འཛོམས་ཏེ། རྒྱ་དཔོན་ཚོས་གཏམ་བཤད་མགོ་འཛུགས་བྱ་ཐུབ་ཙམ་བྱུང་ཡོད་འདུག ཉིན་དང་པོར་རྔ་པ་རང་སྐྱོང་ཁུལ་གྱི་ཆོས་ལུགས་ལས་ཁུངས་ཀྱི་མགོ་གཙོས་ཚོགས་འདུ་གཙོ་སྐྱོང་དང་གཏམ་བཤད་མང་པོ་ཞིག་བྱས་ཡོད་འདུག་ལ། ནང་དོན་གཙོ་བོ་རྔ་པ་ཀིརྟི་དགོན་པ་གཞུང་སྒེར་གཉིས་ཀྱིས་རྒྱལ་ཁབ་ཀྱི་ཁྲིམས་ལུགས་དང་ཡུལ་མིའི་བདེ་འཇགས། མི་རིགས་མཐུན་སྒྲིལ་དང་བརྟན་བརླིང་ལ་གཏོར་བརླག་སྔ་ཕྱིར་བཏང་སྟེ། རྒྱལ་ཁབ་ཀྱི་ཁྲིམས་ལུགས་དང་ས་གནས་ཀྱི་ཡུལ་སྲོལ་ལ་བརྩི་འཇོག་མ་བྱས་ཚུལ་གྱི་ནག་ཉེས་མང་པོ་བགྲངས་ཏེ་སྐྱོན་བརྗོད་ཤུགས་ཆེན་བྱས་ཡོད་འདུག

རྒྱལ་གཅེས་དཔའ་བོ་ཕུན་ཚོགས་མཆོག་གིས་སྐུ་ལུས་མེར་བསྲེག་གཏོང་སྐབས་རྒྱ་ལག་ནས་འཕྲོག་མཁན་ཚོར་མི་གསོད་ལག་དམར་གྱི་ཉེས་འཛུགས་ཀྱང་བྱས་ཡོད་འདུག་ལ། ད་དུང་ཀིརྟི་དགོན་པའི་ནང་གཟུགས་པོ་མེར་སྲེག་གཏོང་མཁན་གྱི་ཚོགས་པ་ཞིག་ཡོད་སྐོར་དང་། ཐེངས་འདིར་སྲིད་གཞུང་དང་དགོན་པ་མཉམ་འབྲེལ་ཐོག་ཚོགས་པ་དེ་རྩ་མེད་བཟོ་དགོས་ལུགས་ཀྱང་བརྗོད་ཡོད་འདུག  

ད་ཐེངས་ཀྱི་སློབ་གསོ་ཟེར་བའི་ལས་འགུལ་དེ་སྤེལ་མཁན་གྲས་སུ་གྲྭ་པ་ཚོས་ཤེས་ཚོད་ལྟར་ན། སི་ཁྲན་ཞིང་ཆེན་གྱི་སྲིད་ཁྲིམས་ཁང་གི་ལས་བྱེད་ཁག་ཅིག་དང་། རྔ་པ་རང་སྐྱོང་ཁུལ་འཐབ་ཕྱོགས་གཅིག་གྱུར་ཁང་གི་མགོ་གཙོ་དང་ལས་བྱེད། དེ་བཞིན་རྔ་པ་རང་སྐྱོང་ཁུལ་གྱི་ཆོས་ལུགས་ལས་ཁུངས་ཀྱི་མགོ་གཙོ་དང་ལས་བྱེད། རྔ་པ་རྫོང་གི་རྫོང་དཔོན་དང་འབྲེལ་ཡོད་ལས་བྱེད་བཅས་གྲུབ་པའི་ལས་དོན་རུ་ཁག་ཅིག་ཡིན་འདུག

སྤྱིར་ཐེངས་འདིའི་རྒྱལ་གཅེས་སློབ་གསོའི་བྱ་འགུལ་དེ་བོད་ནང་གི་ཞོགས་པའི་དུས་ཚོད་ ༨ ནས་ ༡༢ བར་དང་། ཉིན་རྒྱབ་ཆུ་ཚོད་ ༢ ནས་ ༦ བར་འཚོགས་རྒྱུའི་ལས་འཆར་བསྒྲིགས་ཡོད་ཀྱང་། ཉིན་དང་པོར་ཕེབས་མཁན་མ་བྱུང་སྟབས། ཕྱི་ཚེས་ ༢༢ ཉིན་གྲྭ་བ་གཅིག་ཀྱང་ཕྱི་ལ་འགྲོ་སྐྱོད་མི་ཆོག་པར་ནང་ནས་འདུག་དགོས་པ་དང་། ཉིན་དེར་རྒྱ་དཔོན་ཚོ་གྲྭ་ཤག་རེ་རེ་བཞིན་ཉུལ་ཏེ་གྲྭ་པ་ག་ཚོད་ཡོད་མེད་དང་། མིང་དང་ལོ་ཚོད་བཅས་ཐོ་འགོད་བྱས་ཏེ། ཉིན་རྒྱབ་ཆུ་ཚོད་ ༡ སྟེང་གྲྭ་བ་རྣམས་འདུ་ཁང་རྡོ་ཅལ་དུ་འཛོམ་དགོས་པའི་བཀའ་ཡང་བཏང་ཡོད་འདུག  

གནས་ཚུལ་མཁོ་གཏོང་བ། ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཡིན།