ཉེ་ཆར་ྋགོང་ས་སྐྱབས་མགོན་ཆེན་པོ་མཆོག་གིས་རླབས་ཆེའི་ཐུགས་དགོངས་ལྟར་བོད་མི་རིགས་ཀྱི་འཕྲལ་ཡུན་ལེགས་ཚོགས་ཀྱི་རྩ་བར་དམིགས་ཏེ་ཆབ་སྲིད་ཀྱི་དབུ་ཁྲིད་ནས་བགྲེས་ཡོལ་ལ་ཕེབས་རྒྱུའི་གསུང་འཕྲིན་གནང་ཡོད་པ་ལྟར། གནས་ཚུལ་འདི་ད་ལྟའི་ཆར་རྒྱལ་སྤྱི་དང་བོད་མིའི་སྤྱི་ཚོགས་གཉིས་ཀའི་ནང་བོད་དོན་གྱི་གནས་ཚུལ་ཛ་དྲག་ཅན་དང་གལ་ཆེ་ཤོས་དེ་ཆགས་ཡོད། རང་རེའི་ད་ཡོད་གྲོས་ཚོགས་ཀྱི་ངོར་གསུང་འཕྲིན་དེ་བོད་ཀྱི་ཆབ་སྲིད་དང་འཛིན་སྐྱོང་ཐོག་གི་རྩ་ཆེའི་ལམ་སྟོན་ཞིག་ལས་ལྡོག་སྟེ། བོད་ཀྱི་ལོ་རྒྱུས་སྒང་གི་ཆེས་ཉེན་ཚབས་ཆེ་བའི་གནད་དོན་ཞིག་དང༌། དེ་ལྟ་བུའི་སྐྱོ་གར་ཅིག་བོད་ཀྱི་བྱུང་རབས་ནང་འབྱུང་རྒྱུར་ངོ་རྒོལ་མཐའ་གཅིག་ཏུ་ཡོད་ཚུལ་དང༌། བློ་ཕམ་ཆེན་པོ་ཡོད་ཅེས་རྣམ་འགྱུར་མཁྲེགས་པོའི་ཐོག་ཡང་དང་བསྐྱར་དུ་ནན་བརྗོད་ཐོག་རྒྱལ་བ་རིན་པོ་ཆེ་བགྲེས་ཡོལ་ལ་འགྲོ་རྒྱུར་ཡོང་ཐབས་མེད་པ་ཞིག་ཡིན་ཚུལ་གླེང་ཡོད་མོད། འོན་ཀྱང་ྋགོང་ས་ྋམཆོག་གིས་ ༼མདོ་དོན་མང་གཙོའི་ལམ་སྲོལ་གྱི་ངོ་བོའམ་སྙིང་དོན་མཐར་ཐུག་ཆབ་སྲིད་དང་འཛིན་སྐྱོང་གི་ལས་དོན་གང་ཡང་མི་བྱེ་བྲག་པ་གཅིག་ལ་བརྟེན་མི་དགོས་པར། མི་མང་གི་ཆེད་དུ་མི་མང་གིས་བདམས་པའི་མི་མང་གི་འགོ་ཁྲིད་རིམ་པས་མི་མང་གི་འགན་ཁུར་ཆ་ཚང་ཐུབ་པ་བྱེད་རྒྱུ་དེ་ཡིན་སྟབས། ད་ཆ་རང་རེའི་མང་གཙོའི་འཕེལ་རིམ་ཡོངས་སུ་རྫོགས་པའི་ཆེད་དུ་ྋརྒྱལ་བ་རིན་པོ་ཆེས་བོད་ཀྱི་ཆབ་སྲིད་ཀྱི་འགན་ཁུར་མ་དགོས་པར་མི་མང་གིས་འོས་འདེམས་བྱས་པའི་འགོ་ཁྲིད་སོ་སོས་ཆབ་སྲིད་ཀྱི་དབང་ལུང་ཡོངས་རྫོགས་འགན་ཁུར་བྱེད་དགོས་པའི་དུས་ལ་བབས་ཡོད༽ཅེས་དང༌། ཆབ་སྲིད་ཀྱི་དབུ་ཁྲིད་ནས་བགྲེས་ཡོལ་དུ་ཕེབས་རྒྱུའི་གསལ་བཤད་ཐད་གསུང་འཕྲིན་ནང་ྋ༼སྐབས་འདིར་ནན་བརྗོད་བྱ་རྒྱུ་ཞིག་ལ། བར་སྐབས་དེར་བཙན་བྱོལ་བོད་མིའི་སྡོད་སྒར་ཁག་གིས་མཚོན་བོད་ཕྱི་ནང་གི་མང་ཚོགས་དང༌། མི་སྒེར་མང་པོས་ལྷག་བསམ་ཟོལ་མེད་ཀྱིས་ངོས་ལ་སྔར་བཞིན་ཆབ་སྲིད་ཀྱི་འགན་ཁུར་མུ་མཐུད་བྱ་དགོས་རེ་བསྐུལ་བྱུང་ཡང༌། ངོས་ཀྱི་སྲིད་དབང་རྩིས་སྤྲོད་བྱ་རྒྱུའི་བསམ་ཚུལ་འདི་འགན་ཁུར་བྱེད་འདོད་མེད་པའམ། སེམས་ཤུགས་ཆག་པ། བོད་མིའི་བདེན་དོན་འཐབ་རྩོད་བློས་བཏང་བ་ཞིག་གཏན་ནས་མ་ཡིན་པར་བོད་མིའི་འཕྲལ་ཕུགས་ཀྱི་ཁེ་ཕན་ཁོ་ནའི་ཆེད་དུ་དམིགས་པ་ཞིག་ཡིན།༽ཞེས་བཀའ་གནང་བ་ལྟར་ྋགོང་ས་ྋམཆོག་གིས་བོད་མི་དམངས་དང་བོད་དོན་བློས་བཏང་བའམ། ཁོང་སེམས་ཤུགས་ཆག་པ་མ་ཡིན་པར་མ་ཟད། རང་རེའི་ཀླད་མེད་འགས་ཁོང་ལ་མི་འདོད་པའི་ཀུ་ཅོ་རེ་གཉིས་ཐོན་པ་དེས་ཀྱང་རྩ་བ་ནས་ཡིན་མི་སྲིད།
ྋགོང་ས་ྋམཆོག་གི་གསུང་འཕྲིན་ནང་གསལ་བོར་གསུངས་བ་ལྟར་༼བོད་དོན་བདེན་མཐའ་མ་གསལ་བར་བཙན་བྱོལ་བོད་མིའི་སྒྲིག་འཛུགས་འདི་རྒྱུན་གནས་ཐུབ་པ་དང༌། བོད་མིའི་དྲང་བདེན་གྱི་འཐབ་རྩོད་རྒྱུན་སྐྱོང་ཐུབ་པ་ཞིག་དགོས་གལ་ཤིན་ཏུ་ཆེ་ཞིང༌། ཅི་སྟེ་ད་དུང་ལོ་བཅུ་ཕྲག་འགའ་ཤས་མུ་མཐུད་གནས་དགོས་པ་བྱུང་ན་ངོས་ནས་འགོ་ཁྲིད་བྱེད་མ་ཐུབ་པའི་དུས་ཤིག་ངེས་པར་ཡོང་རྒྱུ་ཡིན་པ་ནི་ཚང་མས་ཤེས་གསལ་དང༌། ད་ལྟ་ངོས་རང་བདེ་ཐང་ཡོད་སྐབས་ནས་བཙན་བྱོལ་བོད་མིའི་སྒྲིག་འཛུགས་ཀྱི་འགན་ཁུར་ཆ་ཚང་ྋརྒྱལ་བ་རིན་པོ་ཆེར་བརྟེན་མི་དགོས་པར་རང་ཚུགས་ཐུབ་པ་ཡོང་རྒྱུའི་གོམས་གཤིས་འཇགས་ཐབས་སུ། ལམ་སྲོལ་འདི་ད་ལྟ་ནས་ལག་བསྟར་བྱེད་རྒྱུ་བྱུང་ན་དཀའ་ངལ་འཕྲད་ཚེ་སེལ་ཐབས་སུ་ངོས་ཀྱིས་མཐུན་འགྱུར་བྱེད་ཐུབ། དེ་མིན་འདི་མུར་ལུས་ཏེ་ནམ་ཞིག་གློ་བུར་ངོས་ཀྱི་འགོ་ཁྲིད་མེད་པའི་དུས་སྐབས་ཤར་ཚེ་ཅི་བྱ་གཏོལ་མེད་ཀྱི་གནས་ཚུལ་ཞིག་ཡོང་སྲིད་པས་དེ་འདྲ་མི་ཡོང་ཆེད་ད་ལྟ་ནས་ངེས་པར་ལག་ལེན་བྱེད་དགོས་པ་དེ་བོད་མི་ཡོངས་ཀྱི་གལ་ཆེའི་ལས་འགན་ཞིག་ཏུ་གྱུར་ཡོད༽་ཅེས་མང་གཙོའི་འཕེལ་རིམ་ཡོངས་སུ་རྫོགས་པའི་ཆེད་དུ་མི་ལོ་བཅུ་ཕྲག་ལྔའི་གོང་དུ་འཆར་གཞི་བཏིང་ཟིན་པ་ཞིག་དང༌། བོད་གཞིས་བྱེས་གཉིས་ཀྱི་མ་འོངས་པའི་བརྟན་བརླིང་དང༌། གང་ལྟར་ཡང་ནམ་ཞིག་ཁོང་མ་བཞུགས་པའི་དུས་སྐབས་ཤིག་ཤར་ངེས་པ་དང༌། དེ་དུས་བོད་མི་རྣམས་ཅི་བྱ་གཏོལ་མེད་དུ་མ་གྱར་བའི་ཆེད་དུ། ཐུགས་བརྩེ་བ་ཆེན་པོས་གྲ་སྒྲིག་སྡུག་ས་ནས་བྱེད་དགོས་པའི་ལམ་སྟོན་གནད་ལ་ཁེལ་བ་ཞིག་ཡིན་པ་ཧ་ཅང་གསལ་བས་གཞན་དུ་གོ་དོན་ཕར་དཀྱོགས་ཚུར་དཀྱོགས་མང་པོ་དེར་དགོས་པ་ཅི་ཡང་མི་འདུག
ྋགོང་ས་ཐམས་ཅད་མཁྱེན་པས་བོད་མི་རྣམས་མི་ལོ་ལྔ་བཅུའི་རིང་མང་གཙོའི་ལམ་ལ་ཁྲིད་ནས་ད་ཆ་བཙན་ཐབས་ཀྱིས་རང་གི་རྐང་པའི་ཐོག་ཏུ་ལངས་འཇུག་རྒྱུའི་མང་གཙོའི་གསར་བརྗེ་ཐེངས་ཤིག་ཀྱང་ཡིན། སྤྱིར་བཏང་ནས་ྋགོང་ས་ྋམཆོག་གི་ཐུགས་དགོངས་ནམ་མཁའ་ལྟར་ཡངས་པའི་རྣམ་དག་ལམ་སྟོན་གྱི་གསུང་འཕྲིན་གལ་ཆེན་འདི་ལྟ་བུ་ཞིག་མི་རེ་ཟུང་གི་སྐྱོན་བརྗོད་ཙམ་ཞིག་ལས་བྱུང་བར་འདོད་མཁན་རྣམས་ནི་ྋགོང་ས་ྋམཆོག་ལ་རྩ་བ་ཉིད་ནས་རྒྱུས་མེད་ཀྱི་གཏམ་ཡིན་ལ། གལ་ཏེ་ྋགོང་ས་མཆོག་ལ་རྒྱུས་མངའ་ཆུང་ཆུང་ཞིག་ཡོད་དབང་དུ་བཏང་ན་དེ་ལྟ་བུའི་བསམ་ཚུལ་ཡོང་མི་སྲིད།
ཕྱོགས་གཞན་ནས་རྒྱ་ནག་གཞུང་གིས་ྋགོང་ས་མཆོག་སྐུ་གཤེགས་ན་བོད་དོན་ཡང་རང་བཞིན་གྱིས་ཡལ་ངེས་ཡིན་པའི་རེ་བ་བྱེད་བཞིན་པ་དེར་ལག་ལེན་ངོ་མའི་ཐོག་ནས་ལན་བཏབ་པ་ཞིག་ཡིན་པས། རྒྱ་ནག་གཞུང་གིས་ཏཱ་ལའི་བླ་མའི་བགྲེས་ཡོལ་ནི་སྲིད་དོན་གྱི་གཡོ་ཇུས་རེད་ཅེས་སྐད་ངན་ཤོར་ཡོད། ང་ཚོའི་གྲོས་ཚོགས་ཀྱིས་གསུང་འཕྲིན་དེའི་རིན་ཐང་རྟོག་ཞིབ་གང་ཡང་མེད་པར་དེའི་ཉེན་ཁའི་རང་བཞིན་ངོས་འཛིན་ཐད། བོད་དང་འཕགས་པ་སྤྱན་རས་གཟིགས་བར་གྱི་འབྲེལ་བ་ཁ་བྲལ་དུ་གཏོང་རྒྱུ་དང༌། རྒྱལ་སྤྱི་དང་བོད་བར་གྱི་འབྲེལ་ལམ་དང་བོད་ཀྱི་ཆེས་མཐོའི་གཟུགས་བརྙན་རྨང་མེད་དུ་གཏོང་རྒྱུ། བོད་གཞེས་བྱེས་གཉིས་བར་གྱི་ཆིག་སྒྲིལ་དང་མཛའ་མཐུན་མེད་པར་བཟོ་རྒྱུ། བཙན་བྱོལ་སྒྲིག་འཛུགས་དང་དེའི་བཅའ་ཁྲིམས་ལ་ནུས་པ་དང་རྒྱབ་རྟེན་མེད་པར་ཆགས་རྒྱུ། བོད་རྒྱ་གཉིས་བར་གྱི་ཞི་མོལ་མཇུག་སྐྱོང་ལ་འགོག་རྐྱེན་དུ་འགྲོ་རྒྱུ་བཅས་ཀྱི་ངོས་འཛིན་བྱས་ཡོད་མོད། གནས་ཚུལ་འདི་དག་ནི་ཆེད་དུ་བཟོས་པ་ཞིག་མ་ཡིན་པར་ནམ་ཞིག་རང་བཞིན་གྱིས་ཡོང་ངེས་ཡིན་སྟབས་ྋགོ་ས་ྋམཆོག་སྐུ་འཚོ་བཞུགས་སྐབས་ཁོང་གི་ཡང་དག་པའི་ལམ་སྟོན་ལྟར་འགྲོ་མ་ཐུབ་ཚེ་དེ་ལས་ཀྱང་ཉེན་ཆེ་བའི་གནས་ཚུལ་གཞན་དང་གཞན་དག་ཡོང་རྒྱུ་གདོན་མི་ཟ།
དེས་ན་ྋགོང་ས་ྋམཆོག་གི་གསུང་འཕྲིན་འདིའི་ནང་བོད་མི་ཕལ་མོ་ཆེས་མུ་མཐུད་ྋགོང་ས་ྋ་མཆོག་གི་དབུ་ཁྲིད་གནང་རྒྱུར་འདོད་མོས་ཡོད་མེད་དང་དེའི་དགེ་མཚན་གླེང་རྒྱུའི་གོ་སྐབས་མེད་པར། གྲ་སྒྲིག་སྡུག་ས་ནས་ངེས་པར་བྱེད་དགོས་པའི་ལམ་སྟོན་གནང་བར་བརྟེན། ད་ལྟ་ང་ཚོ་ལོ་རྒྱུས་ཀྱི་དཀྱོགས་མཚམས་འདི་ལས་བདེ་བར་འགྲོ་ཐབས་སུ་སྤྱི་འཐུས་ཚོས་མང་ཚོགས་ཀྱིས་ཉན་འདོད་བྱེད་པའི་སྐད་ཆ་ཁོ་ན་བཤད་པའི་དུས་ཚོད་མིན་པར། མང་ཚོགས་ཀྱིས་མཐོང་མི་འདོད་ཅིང་ཉན་རྒྱུར་མི་དགའ་བའི་གནས་ལུགས་བཤད་དེ་མི་ལོ་ལྔ་བཅུའི་མང་གཙོའི་འཕེལ་རིམ་མདུན་སྐྱོད་དང་ྋགོང་ས་ྋམཆོག་གི་ཐུགས་རེ་འགྲུབ་ཆེད་གཞུང་མང་གཉིས་ཀས་གྲ་སྒྲིག་སྡུག་ས་ནས་བྱེད་དགོས་པའི་དུས་ཚོད་རེད། ྋགོང་ས་ྋམཆོག་གིས༼བཅའ་ཁྲིམས་ཀྱིས་གཙོས་ཁྲིམས་སྒྲིག་ཁག་ལ་གཞི་རྩའི་བསྐྱར་བཅོས་བྱ་དགོས་རྣམས་བྱེད་དགོས་པའི་ལམ་སྟོན་བྱས་ཏེ་ཆབ་སྲིད་ཀྱི་དབང་ལུང་ཡོངས་རྫོགས༽མི་མང་གིས་ཐད་ཀར་འོས་བླུགས་པའི་མི་སྣ་ལ་རྩིས་སྤྲོད་བྱེད་རྒྱུ་དང་ྋགོང་ས་ྋམཆོག་གི་མིང་གནས་རྗེས་འབྲེལ་གྱི་ཁྲིམས་དང༌། འཛིན་སྐྱོང༌། ཆབ་སྲིད་ཀྱི་ལས་དོན་བཅས་པ་རྩིས་སྤྲོད་དང༌། རང་བཞིན་ནུས་མེད་དུ་འགྲོ་བའི་རིགས་ཡང་ཁ་ཤས་ཡོད་ཚུལ་གསུང་འཕྲིན་ནང་གསལ་བ་འདི་དྭང་ལེན་ཞུ་རྒྱུ་ཧ་ཅང་བློས་དཔག་དཀའ་བ་ཞིག་ཡིན་ཡང༌། ྋགོང་ས་ྋམཆོག་མི་ལོ་བཞི་བརྒྱར་ཉེ་བའི་རིང་བོད་གང་ཅན་ལྗོངས་ལ་བཀའ་དྲིན་གྱིས་ཁྱབ་ཡོད་ཚུལ་གླེང་རྒྱུ་ཕར་ཞོག མི་ལོ་ལྔ་བཅུའི་རིང་ྋགོང་ས་ྋསྐུ་ཕྲེང་བཅུ་བཞི་བ་ཆེན་པོ་མཆོག་གིས་འཛམ་གླིང་ཐོག་འགྲོ་བ་མིའི་བདེ་རྩའི་ཕྱག་ལས་ཅི་གནང་སོགས་ཀྱང་མི་གླེང་བར་བོད་མི་བཙན་བྱོལ་བ་མི་གྲངས་གཅིག་འབུམ་ལྷག་ལ་ས་མཐའ་འདིར་བྱམས་བརྩེས་བསྐྱངས་པ་གཅིག་པུར་བསམ་ན་ཡང་ང་ཚོས་བློས་གཏོང་ཐུབ་པ་ཞིག་མིན། འོན་ཀྱང་ང་ཚོ་ཚང་མས་གནད་དོན་འདི་ཧ་ཅང་དཀའ་ངལ་ཅན་ཞིག་པ་ངོས་འཛིན་གཅིག་མཚུངས་སུ་ཡོད་མོད། བློ་སྟོབས་བསྐྱེད་དེ་ཅེས་ཀྱང་དང་ལེན་ཞུ་དགོས་པ་ལས་ཞུ་བ་ཕུལ་ནས་གཡོལ་ཐུབ་བྱས་ཚེ་ཉེན་ཁའི་གཡང་ལ་གོམ་གང་སྔོན་ལ་སྤོས་པ་ཞིག་ཡིན།
ཡང་གསུང་འཕྲིན་ལས་༼ཁྲིམས་སྒྲིག་གཞན་ཁག་བསྐྱར་བཅོས་བྱ་རྒྱུའི་ཆེད་ཚོགས་ཆུང་ཟུར་འཛུགས་སམ་ལས་རིམ་ཇི་དགོས་ཚོགས་དུས་འདི་རང་དུ་གཏན་འབེབས་ལག་བསྟར་ངེས་པར་དུ་ཐུབ་པ་དགོས་རྒྱུ༽ཞེས་གནད་འགག་ཆེས་ཆེ་ས་ཞིག་ལ་དགོངས་ནས་གྲོས་ཚོགས་དང་བོད་མི་དམངས་ལ་ལམ་སྟོན་ཧ་ཅང་རྩ་ཆེན་ཞིག་གནང་དང་གནང་བཞིན་པ་འདི་ཉམས་སུ་མ་བླངས་པར། ད་དུང་མུ་མཐུད་བགྲེས་ཡོལ་ཆ་ཚང་ལྟ་ཅི་ཕྱེད་བགྲེས་ཡོལ་ཞེས་པ་ཡང་རྩ་བ་ནས་མ་གསུང་རོགས་ཞེས་ཨུ་ཚུགས་ཀྱིས་འགན་ཡོངས་རྫོགས་ྋགོང་ས་མཆོག་གི་མདུན་དུ་སྤུངས་ཏེ་བསྡད་ན། བཙན་བྱོལ་གཞུང་དང་མི་མང་གིས་འཐུས་ཤོར་ལོ་རྒྱུས་ཐོག་བསུབ་ཐབ་མེད་པ་ཞིག་ཡོང་རྒྱུ་ཡིན་པས། ད་ཆ་ང་ཚོས་བློས་གཏོང་དང་ཆོད་སེམས་བརྟན་པོ་ལ་བརྟེན་ནས་ྋགོང་ས་ཐམས་ཅད་མཁྱེན་པའི་བཀའ་དགོངས་མཐའ་གཅིག་ཏུ་བརྩི་བཀུར་དང་འབྲེལ། འབྱུང་འགྱུར་ལ་སྔོན་དཔག་བྱས་ཏེ་གནས་སྐབས་ཀྱི་དཀའ་ངལ་ཁྱད་བསད་ཐོག་མ་འོངས་པའི་སྲ་བརྟན་གྱི་ཕྱོགས་ལ་གོམ་སྟབས་སྤོ་དགོས་སོ།།
སྤྱི་འཐུས་བསྟན་འཛིན་མགོན་པོ་ལགས་ཀྱིས་གྲོས་ཚོགས་ར་བ་ནས་འཐུས་མི་རྣམས་ལ་ཁང་ར་བཤད་ཞོར་ཏུ། སྐབས་འདིས་གསུང་འཕྲིན་གྱི་དགོངས་ཚུལ་ནི་བགྲེས་ཡོལ་མ་རེད། ༧རྒྱལ་དབང་སྐུ་ཕྲེང་ལྔ་བ་ནས་རྒྱུད་པའི་སྲིད་དབང་རྩིས་སྤྲོད་གནང་བཞེད་རེད་གསུངས་སོང་།
བློ་བཟང་དཔལྡན་ལགས་ནས་ཐོད་བརྒལ་གྱི་དགོངས་ཚུལ་འདི་བཞིན་རང་རེའི་སྤྱི་འཐུས་ཚོ་ལ་ཡོད་ན་༸གོང་ས་མཆོག་ཐུགས་བློ་བདེ་པོ་ག་ཚོད་ཡོངས་ཀྱི་རེད།
༸གོང་ས་མཆོག་ནས་རྟག་ཏུ་རེ་བ་བཟང་ས་ནས་རྒྱག་དགོས་པ་དང་། གྲ་སྒྲིག་སྡུག་ས་ནས་བྱ་དགོས་ཞེས་གསུངས་པ་ལྟར་ང་ཚོས་གྲ་སྒྲིག་ཞིག་བྱས་པ་ཡིན་ན་ཡག་པོ་རེད། དེ་ཡང་བཀའ་བློན་གསར་པ་དང་སྤྱི་འཐུས་གསར་པ་རྣམས་ནས་འགན་བཞེས་དང་པོ་ནི་བཙན་བྱོལ་གཞུང་དེ་རྒྱལ་སྤྱིའི་ཐོག་ངོས་འཛིན་ཐོབ་ཐབས་ལ་འབད་པ་ཞིག་གནང་དགོས་པ་མ་ཟད་དེ་ནི་ཁ་ཚ་དགོས་གཏུགས་ལྟ་བུ་མཐོང་བས་དེའི་འཐད་དྲྭ་གྲོགས་ཚོས་དགོངས་ཚུལ་དང་བགྲོ་གླེང་ཞིག་གནང་རོགས་བཞེས་རེ་བསྐུལ་ཞུ་རྒྱུ་དང་། དེའི་འཐད་མཁས་དབང་རྣམ་པས་ཆེད་རྩོམ་རེ་སྤེལ་རོགས།