བསྐྱར་དུ་གསོལ་བ་ཕུར་ཚུགས་སུ་འདེབ་དགོས།

ལྷོ་ཕྱོགས་ཉི་ཟླ།

ཁ་སྔོན༸གོང་ས་མཆོག་གིས་བགྲེས་ཡོལ་ཆ་ཚང་བཞེས་རྒྱུ་ཡིན་ཞེས་སྤྱི་འཐུས་གྲོས་ཚོགས་གཙོས་པའི་བོད་ཕྱི་ནང་གཉིས་ཀ་ལ་བཀའ་གསལ་བོར་གསུངས་ཟིན་ཀྱང་སྤྱི་འཐུས་གྲོས་ཚོགས་སྐབས་མང་མོས་ཀྱིས་བསྐྱར་དུ་གསོལ་བ་ཕུར་ཚུགས་སུ་བཏབ་པ་འདི་ཧ་ཅང་གི་གཟི་བརྗིད་ཆེ་བ་ཞིག་ཏུ་མཐོང་།

གང་ཡིན་ཞེ་ན། སྤྱིར་བོད་ཀྱི་ཁ་དཔེ་ལ། བླ་མའི་བཀའ་གསུངས་ཆོས་ཡིན་ཞེས་པའི་དཔེར་ཡོད་ཀྱང་ཐེངས་འདིར་དགོས་པ་དང་རྒྱུ་མཚན་ཆེ་བ་མཐོང་བ་མ་ཟད་ལོ་རྒྱུས་ཀྱི་ སྐྱོག་མཚམས་ཧ་ཅང་ཆེ་བ་ཞིག་ཡིན་སྟབས༸གོང་ས་མཆོག་གི་བཀའ་དབང་ཆ་ཚང་དགའ་དགའ་སྤྲོ་སྤྲོའི་ངང་ལེན་ཐབས་བྲལ་བས་བསྐྱར་དུ་ཞུ་གསོལ་རྒྱབ་པ་འདིས་རྒྱ་གུང་ཁྲན་ཏང་གིས་འཁྱོག་གཏམ་དེ་ཚོ་ཡང་བདེན་པ་མ་ཡིན་པའི་ར་སྤྲོད་གསལ་བོ་ཞིག་བྱུང་ཡོད།

བདག་གིས་སྤྱི་འཐུས་རེ་རེའི་གསུང་འཕྲིན་ཆ་ཚང་ཉན་པ་ཡིན། ཁ་ཞེ་གཉིས་མེད་ངང་མང་མོས་ཀྱིས་གསོལ་བ་ཕུར་ཚུགས་བསྐྱར་དུ་འདེབས་དགོས་ཞེས་གསུངས་བྱུང་བས་རང་ཉིད་ཡིན་ན་ཡང་འདི་ལ་རྒྱབ་སྐྱོར་མཐའ་གཅིག་ཏུ་བྱེད་དགོས་དྲན་སོང་།

ཚེས་ ༡༩ ཉིན་བསྐྱར་དུ་སྤྱི་འཐུས་གྲོས་ཚོགས་སུ་གསུང་ལན་གསལ་བོར་གནང་སོང་བས་ཤར་སྐྱོད་ཀྱིས་བཀའ་དགོངས་གཙུག་ཏུ་བཞག་ནས་དམིགས་འདུན་གསར་བ་ཞིག་དང་ལམ་ཁ་གསར་བ་ཞིག མདུན་ལམ་གསར་བ་ཞིག་དང་གོམ་ཁ་གསར་བ་ཞིག་སྤོས་ནས་བོད་མི་རིགས་ཀྱི་རྩ་དོན་ཁོ་ནས་ཆེད་དུ་མ་གྲོས་བསམ་པ་གཅིག་མཐུན་གྱི་ངང་གྲོས་ཚོགས་སུ་ བཅའ་ཁྲིམས་བསྒྱུར་བཅོས་ཀྱི་མཚོན་པའི་བོད་མི་རིགས་ཀྱི་འཕྲལ་དང་ཕུགས་ཀྱི་བདེ་སྡུག་སོགས་ལ་བསམ་ཞིབ་ནན་མོའི་ངང་སྤྱི་འཐུས་མི་རེ་ངོ་རེ་ནས་རྣམ་དཔྱོད་རྩལ་དུ་བཏོན་ཏེ་མ་འོངས་བའི་གྲོས་ཆོད་དང་ད་ལྟའི་འབྱུང་འགྱུར་གྱི་བྱ་བཞག་ཁུར་དུ་བླངས་ནས་ཉིན་མཚན་ལྟོས་མེད་ངང་བོད་སྤྱི་བའི་དོན་དུ་དཀའ་ངལ་དང་དུ་བླངས་ནས་བཀའ་དགོངས་སོགས་ཀྱི་མཚོན་པའི་བྱ་བཞག་གང་ཡོད་ཚང་མ་གང་ཡོང་ཅི་ཡོང་བསྒྲུབ་བཞིན་པ་འདི་ནི་བཀའ་ཤག་དང་ཚོགས་གཙོ སྤྱི་འཐུས་རྣམ་པ་ཚང་མ་ལ་ཐུགས་རྗེ་བླ་མེད་ཞུ་བཞིན་ཡོད།

ཁ་ཤས་ཀྱིས་སྤྱི་འཐུས་གྲོས་ཚོགས་ནས་བསྐྱར་དུ་གསོལ་བ་ཕུར་ཚུགས་སུ་བཏབ་པ་འདི་དད་པ་ཤུགས་དྲག་དང་སྒེར་དོན་སྦྲེལ་ལད་རེད་ཅེས་བའི་མ་འོས་པ་དང་སྐྱོན་འཛུགས་ཀྱི་བྱ་ངན་རིགས་བརྗོད་མཁན་དེ་ཚོ་ཧ་ཅང་བློ་ཕམ་དགོས་བའི་གནས་ཚུལ་ཞིག་རེད།

རྒྱལ་དབང་སྐུ་འཕྲེང་ལྔ་བ་ནས་བཟུང་རྒྱལ་དབང་སྐུ་འཕྲེང་བཅུ་བཞི་བར་དུ་བོད་ཀྱི་ཆོས་སྲིད་གཉིས་ཀྱི་དབུ་ཁྲིད་ཡང་དག་པ་ཞིག་བྱས་ནས་བོད་མི་རིགས་ཀྱི་རྩ་དོན་ཁོ་ནར་དམིགས་ཏེ་བོད་ཀྱི་འགན་དབང་ཡོངས་རྫོགས་བཞེས་ཏེ། ད་བར་དུ་མི་མང་གི་མངོན་འདོད་ནང་བཞིན་འོས་འགན་ཆ་ཚང་བླངས་ཏེ་སྐུ་ངལ་དང་ལེན་བྱས་ནས། དེ་རིང་ཁ་སང་བཙན བྱོལ་བ་ནང་ནས་འདྲ་འདྲའི་ནང་གི་མི་འདྲ་བ་ཞིག་ཆགས་ཡོད་པ་འདི་ལྷག་པར་དུ༸གོང་ས་སྐྱབས་མགོན་ཆེན་པོ་མཆོག་གིས་བཀའ་དྲིན་ཉག་གཅིག་ལས་མ་འདས་སོ།

ཁ་སང༸གོང་ས་མཆོག་གི་གསུང་འཕྲིན་ནང་དུ་གསལ་བོར་གསུང་བ་ནི་བགྲེལ་ཡོལ་ཆ་ཚང་བཞེས་པ་འདི་ཁོང་བོད་དོན་ལ་སེམས་ཤུགས་ཆག་པ་དང་རེ་བ་ཆད་པ་སོགས་རྩ་བ་ཉིད་ནས་མིན་ཞེས་གསུངས་ཡོད་པ་མ་ཟད། དགའ་ལྡན་ཕོ་བྲང་གི་སྟེང་ནས་ཆབ་སྲིད་བདག་དབང་ཕྱིར་བསྡུ་བྱས་ནས་མང་མོས་འོས་འདེམས་བྱས་པའི་བཀའ་བློན་ཁྲི་བའི་ལག་ཏུ་སྐུ་དབང་ཆ་ཚང་འབུལ་རྒྱུ་འདི་བོད་མི་རིགས་ཀྱི་རྩ་དོན་སོགས་ལ་ཕུགས་རྒྱང་རིང་བོའི་ལས་ཀ་ཞིག་ཡིན་པས་ཏན་ཏན་ཕན་ཐོགས་ཆེ་བ་མ་ཟད། མང་གཙོ་དང་བོད་དོན་ལ་ཕན་ཐོགས་ཆེ་ནས་ཆེ་རུ་འགྲོ་བས་བོད་གཞིས་བྱེས་གཉིས་ཀྱི་བསམ་ཤེས་ཡག་པོ་རེ བྱོས་དང་། ཁྱེད་ཚོ་བློས་བཏང་བ་ཞིག་གཏན་ནས་མ་ཡིན་གཏོང་ཡང་མི་ཤེས་པ་ཞིག་ཡིན་པས་ཚང་མའི་སེམས་འཚབ་ཁྱོན་ནས་བྱེད་མི་དགོས་སོ་ཞེས་བཀའ་ནན་གྱི་གསུངས་འདུག་པ་ཚང་མའི་མཁྱེན་གསལ་རེད། ༸གོང་ས་མཆོག་གིས་རྟག་པར་རེ་བ་བཟང་ས་ནས་རྒྱོབས། གྲ་སྒྲིག་སྡུག་ས་ནས་བྱོས་གསུངས་པ་ནང་བཞིན་རེད།

མཐའ་དོན་གཞུང་ཞབས་པ་ཚང་མས་བཀའ་དགོངས་ཤར་བསྐྱོད་ཀྱི་ཐོག༸གོང་ས་མཆོག་སྐུ་འཚོ་བཞུགས་སྐབས་འདིར་དུས་ཚོད་དམ་འཛིན་ངང་གཞུང་གི་རྩ་ཁྲིམས་སོགས་ཚང་མ་དུས་རབས་ཉེར་གཅིག་གི་ཁ་ཕྱོགས་གསལ་བོར་མཚོན་པའི་ཐོག་འགྱུར་བ་གསར་བ་ཞིག་ཐོག་མདུན་ནས་མདུན་དུ་བསྐྱོད་ཐུབ་པའི་དགོངས་བཞེས་རྒྱ་ཆེ་ས་ནས་གནང་རོགས་ཞུ་རྒྱུ་ཡིན།