གཉའ . འབྲོང་ཐུ་བུ།
༧ གོང་ས་སྐྱབས་མགོན་རིན་པོ་ཆེས་ཐུགས་ཐག་ཆོད་པའི་ཐོག་ཆབ་སྲིད་ཀྱི་གོ་གནས་མུ་མཐུད་བཞེས་རྒྱུ་མིན་པའི་ལམ་སྟོན་གནང་བ་ནས། གཞིས་བྱེས་བོད་རིགས་མང་པོ་ཞིག་གི་སེམས་ལ་གློ་བུར་ན་ཟུག་ལྡང་བ་ལྟ་བུའི་སེམས་འཚབ་བྱུང་ཡོད་ནའང་། དེ་ནི་ཁོང་གི་རླབས་ཆེན་གྱི་དགོངས་གཞི་འཁྲུལ་མེད་ཡིན་པ་ཁོང་གི་སྐུ་ཚེའི་ལོ་རྒྱུས་ལ་ཕྱི་མིག་ཐེངས་གཅིག་བལྟས་ན་རྟོགས་མི་ཐུབ་པ་ཞིག་མིན། ང་ཚོར་སེམས་འཚབ་དང་བློ་ཕམ་སྐྱེ་འོས་པ་ནི་གཙོ་བོར་ཁོང་གི་དགུང་ནའི་གནས་བབ་ཡིན་ས་ཁོང་གིས་སྐུ་ངལ་ཅུང་ཙམ་གསོ་ཐུབ་པ་བྱུང་ན། དེ་ནི་རང་ཅག་གི་བསོད་ནམས་དང་ བདེ་སྐྱིད་ཅིག་ཏུ་ངོས་བཟུང་ན་ཆོག་ལ་གཙོ་བོར་ཁོང་གི་ཐུགས་དགོངས་ལྟར་ད་ནས་བཟུང་མི་རེ་རེས་རང་རང་ལ་བབ་འོས་ཀྱི་འགན་ཁུར་ཏེ། སྔར་ལས་ལྷག་པའི་ནུས་ཤུགས་འདོན་རྒྱུ་ནི་ཁོང་གི་རེ་བ་དང་ཕུགས་བསམ་ཡིན་ཞིང་། ལྷག་པར་གྲྭ་བས་སྲིད་དབང་འཛིན་རྒྱུའི་ལམ་ལུགས་རྨེག་མེད་བྱ་རྒྱུའི་འགོ་ཚུགས་ཡོད་སྙམ།
སྔོན་ནས་བཟུང་བོད་ཀྱི་བདེན་མཐའ་ནམ་གསལ་ན་ཁོང་བགྲེས་ཡོལ་དུ་བཞུགས་རྐྱང་བྱ་རྒྱུ་ཡིན་གསུངས་པ་དང་། འདི་ལོའི་ཕྱི་ཚེས་ ༡༩ ཉིན་མང་ཚོགས་ལ་དམིགས་བསལ་བཀའ་སློབ་གསུང་བཤད་གནང་བའི་ནང་། ཁོང་གིས༼རྒྱལ་ པོ་དང་བླ་ཆེན་གྱིས་སྲིད་དབང་འཛིན་རྒྱུ་དེ་དུས་ཚོད་རྙིང་པའི་སྐད་ཆ་ཞིག་ཆགས་ཡོད། ད་ལྟ་ང་ཚོ་འཛམ་གླིང་འགྲོ་སའི་ལམ་ཁ་དེར་འགྲོ་དགོས་ལ། མང་གཙོའི་ཐོག་འོས་བླུགས་ཏེ་འགྲོ་རྒྱུ་དེ་ལམ་ཁ་ཡག་ཤོས་རེད། ༽ཅེས་དང་། ཡང་ཁོང་གིས། རྒྱལ་དབང་ལྔ་བ་ནས་བོད་ཀྱི་ཆོས་སྲིད་དབུ་ཁྲིད་གནང་ཡོད་པ་ལྟར། ངོས་རང་སྐྱེ་ཕྲེང་བཅུ་བཞི་པ་ཆགས་ཡོད་དུས། རྒྱལ་དབང་སྐུ་ཕྲེང་གཅིག་གིས་ཆོས་སྲིད་དབུ་ཁྲིད་ཕྱིར་བསྡུ་བྱས་ན་ཤིན་ཏུ་འོས་ པ་རེད། དེ་ནི་མི་སུ་ཞིག་གིས་བྱ་ཐུབ་པ་ཞིག་མིན་པར་ངོས་ནས་ཐག་གཅོད་ཐུབ་པ་ཞིག་ཡིན་པས་ཐག་བཅད་པ་ཡིན། དེ་ངེས་པར་དུ་བསྒྱུར་བཅོས་གཏོང་དགོས་ཀྱི་འདུག་ལ། ད་ལྟ་བསྒྱུར་བཅོས་གཏོང་རྒྱུའི་དུས་ལ་སླེབས་པ་རེད། ༽ཅེས་དང་། ༼འདིར་ཅུང་ཧམ་བཤད་བྱས་ན། ད་བར་༧རྒྱལ་བ་རིན་པོ་ཆེས་བྱས་རྗེས་གང་ཙམ་བཞག་ཡོད། གཙོ་ཆེ་ཤོས་གཞིས་ལུས་མི་མང་གིས་ངོས་ལ་ཡིད་ཆེས་བྱེད་ཀྱི་ཡོད། བཙན་བྱོལ་བོད་པ་ཚོས་ཀྱང་ཡིད་ཆེས་བྱེད་ཀྱི་ཡོད། དེ་བཞིན་འཛམ་གླིང་སྟེང་ཏཱ་ལའི་བླ་མ་ཞེས་བརྗོད་དུས་ཡིད་ཆེས་དང་ཆ་འཇོག་བྱེད་ མཁན་ཧ་ཅང་མང་པོ་ཡོད། ༧རྒྱལ་དབང་ལྔ་བ་ནས་ཆོས་སྲིད་ཀྱི་དབུ་ཁྲིད་བྱས་ཏེ་ལོ་ ༤༠༠ ལྷག་ཕྱིན་པ་དེ་རྒྱལ་ཁའི་ངང་ནས་མཚམས་འཇོག་བྱ་རྒྱུ་བྱུང་ན་གཟི་བརྗིད་རེད། ༽ཅེས་པའི་གསུང་བཤད་ཁག་ལ་བསམ་གཞིག་བྱེད་དགོས་པའི་དུས་ལ་སླེབས་ཡོད།
ཁོང་གིས་ཆབ་སྲིད་ཀྱི་ཐུགས་འགན་བཞེས་རྒྱུ་མིན་པའི་ལམ་སྟོན་གནང་ནས་བཟུང་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག དེ་བཞིན་གདན་ས་ཁག མི་མང་རྣམ་པ། དེ་བཞིན་གཞིས་བྱེས་གཉིས་ཀྱི་སྤྱི་སྒེར་མང་པོ་ཞིག་གིས་བསྐྱར་དུ་གསོལ་འདེབས་ཞུས་ཡོད་ཀྱང་། ཁོང་གིས་མི་མང་གི་རེ་སྐུལ་དང་ལེན་བྱས་མེད། དེ་ནི་༧ གོང་ས་མཆོག་གིས་ང་ཚོ་བློས་བཏང་བ་གཏན་ནས་མིན་ཞིང་དེ་བཞིན་མི་མང་གི་ངོས་ནས་ཀྱང་སྐྱབས་འཇུག་ཞུས་པ་དེ་ནོར་འཁྲུལ་ཞིག་ཏུ་འགྱུར་མི་སྲིད་ལ། འདི་ནི་༧གོང་ས་མཆོག་ལ་ཁ་གཏོང་མཁན་རྒྱ་ནག་དང་། དེའི་ཕྱོགས་གཏོགས་ཀྱི་ཅོལ་ཆུང་མང་པོ་ཞིག་ལ་བརྡ་ལན་ཡང་དག་པ་ཞིག་ཡིན་ཞིང་། ཁོང་གི་ལོ་རྒྱུས་ཀྱི་དཀྱོག་མཚམས་གལ་ཆེན་ཞིག་ཀྱང་ཡིན་པར་འདོད། ༢༠༠༩ ལོའི་༼དུས་འགྱུར༽འདོན་ཐེངས་དགུ་པའི་སྟེང་བདག་གིས་༼གྲྭ་བས་ཆབ་སྲིད་ཀྱི་འགན་འཁྱེར་མི་རུང་།༽ཞེས་པའི་རྩོམ་ཡིག་ཅིག་སྤེལ་ཡོད། དེའི་ནང་༼མ་འོངས་པའི་བཀའ་ཁྲི་ནི་ཆབ་སྲིད་ཆེད་ལས་པ་ཞིག་ཡིན་དགོས་པ་ལས་ཆབ་སྲིད་ཟུར་སྦྱོང་བ་ཞིག་གཏན་ནས་ཡིན་མི་རུང་༽ཞེས་བཤད་ཡོད། སྐབས་བཅོ་ལྔ་པའི་བོད་མི་མང་སྤྱི་འཐུས་དང་། སྐབས་གསུམ་པའི་བཀའ་བློན་ཁྲི་པའི་སྔོན་འགྲོའི་འོས་འདེམས་དང་། དངོས་གཞིའི་འོས་འདེམས་གང་གི་སྐབས་སུའང་མི་མང་ལ་དོ་སྣང་སླེབས་པ་སྔར་ལས་བཟང་བའི་རྣམ་པ་ཡོད་པ་དང་། བཀའ་ཁྲིའི་འོས་མིར་གྲྭ་བ་གཅིག་ཀྱང་བྱུང་མེད་པ་དང་། སྤྱི་ འཐུས་འོས་མིར་གྲྭ་བ་མིང་ཙམ་མ་གཏོགས་མེད་པའི་གནས་སྟངས་འདི་ནི་མི་མང་ལ་མང་གཙོའི་གོ་རྟོགས་དོག་ཙམ་ཡོད་པའི་མངོན་རྟགས་ཤིག་ཏུ་འཁུམས་ཤིང་ཁོང་གི་ཕུགས་རེའི་ཉི་ཟེར་འཕྲོ་བའི་དུས་ཀྱི་སྔོན་བརྡ་ཡིན་པར་ཁོ་བོས་འདོད་དོ། །
(གྲྭ་བ་ཆབ་སྲིད་ཆེད་ལས་བ་ཞིག་མི་དགོས་ལབ་པ་དང་གྲྭ་བའི་ཆབ་སྲིད་ལ་དོ་སྣང་ཆེ་རུ་བྱེད་དགོས་ལབ་པ་གཉིས་འགལ་ཟླ་འདྲ་བོ་ཆགས་ཀྱི་འདུག)
ལྷོ་ཕྱོགས་ཉི་ཟླ་ལགས། གོང་གི་སྐད་ཆ་འདི་འདྲ་ཞིག་བདག་གིས་བཤད་མེད། གྲྭ་བ་དང་སྐྱ་བོའི་ཐོབ་ཐང་གཅིག་པར་འདོད་མཁན་ཚོས་ངོས་ལེན་མེད་ན་ཐང་། འོན་ཀྱང་གནས་ལུགས་ནི་ནམ་ཡང་གནས་ལུགས་ཡིན་པ་ལས་རྫུན་པར་འགྲོ་མི་སྲིད།
གཉའ་འབྲོང་ཐུ་བུ་ལགས་ཁྱེད་ཀྱིས་གསུངས་བ་འདི་ལ་རྒྱབ་སྐྱོར་མཐའ་གཅིག་ཏུ་བྱེད་རྒྱུ་ཧ་ཅང་ཁག་པོ་འདུག
གྲྭ་བ་ཆབ་སྲིད་ཆེད་ལས་བ་ཞིག་མི་དགོས་ལབ་པ་དང་གྲྭ་བའི་ཆབ་སྲིད་ལ་དོ་སྣང་ཆེ་རུ་བྱེད་དགོས་ལབ་པ་གཉིས་འགལ་ཟླ་འདྲ་བོ་ཆགས་ཀྱི་འདུག
གྲྭ་བ་དང་བུ་མོ་ཆ་ཚང་ལ་སྤྱི་འཐུས་སུ་འགྲོ་བ་ལ་ཐོབ་ཐང་གཅིག་པ་ཡིན་པས་དེ་ལ་གནད་འགག་ཞིག་རྩ་བ་ཉིད་ནས་མཐོང་མ་སོང་།