ཟླ་འདིའི་ཚེས་ ༡༦ ཉིན་རྔ་པ་ཀིརྟི་དགོན་པའི་གྲྭ་ཕུན་ཚོགས་ལགས་ཀྱིས་རང་ལུས་མེར་བསྲེགས་བཏང་ཡོད་སྟབས། ཕྱི་ཚེས་ ༡༧ ཉིན་ནས་བཟུང་རྔ་པ་ཁུལ་མི་རིགས་མཐོ་འབྲིང་གི་སློབ་ཕྲུག་ཚོས་ཟས་བཅད་ངོ་རྒོལ་བྱས་ཡོད་འདུག
རྒྱ་གཞུང་གི་ཉེན་རྟོག་པས་ཉིན་དེ་ནས་བཟུང་སློབ་གྲྭ་དེར་དམ་དྲག་བྱེད་མགོ་བརྩམས་ཏེ། ཕྱི་ནང་འགྲོ་སྐྱོད་བཀག་སྡོམ་བྱས་ཡོད་པ་མ་ཟད། དགེ་སློབ་དག་གི་ལག་འཁྱེར་ཁ་པར་ཡང་འཕྲོག་ཡོད་པ་སྟབས། དེའི་རྗེས་ཀྱི་གནས་ཚུལ་གསལ་བོ་ཤེས་རྟོགས་ཐུབ་མེད་ཀྱང་། མི་རེ་ཟུང་གིས་བརྗོད་ན་ཕྱི་ཚེས་ ༢༣ ཉིན་སློབ་མ་ཚོས་མུ་མཐུད་ཟས་བཅད་ངོ་རྒོལ་བྱས་ཡོད་འདུག
གཞན། ཕྱི་ཚེས་ ༢༢ ཉིན་འདས་གྲོངས་སུ་སོང་བའི་གྲྭ་ཕུན་ཚོགས་ལགས་ཀྱི་སྤུན་ཆུང་བ་རྔ་པ་ཀིརྟི་དགོན་པའི་གྲྭ་བློ་བཟང་སྐལ་བཟང་ལགས་དང་། ཁོང་གི་ཨ་ཞང་བློ་བཟང་བརྩོན་འགྲུས། རྨེའུ་རུ་མའི་རུ་ཆེན་གཉིས་པའི་རྡོར་ཁོ་ཚང་གི་གྲྭ་བསམ་འགྲུབ་བཅས་ཀྱང་རྒྱ་གཞུང་གིས་འཛིན་བཟུང་བྱས་ཡོད་འདུག་ལ། དེ་དག་ཁྲོད་ཀྱི་གྲྭ་བསམ་འགྲུབ་ལགས་ནི་ ༢༠༠༨ ལོར་རྒྱ་གཞུང་ལ་ངོ་རྒོལ་སྐབས་ཀྱང་ཟླ་ཤས་རིང་བཀག་བསྐྱིལ་བྱས་མྱོང་ཡོད་འདུག ད་ཆར་ཉེན་རྟོག་པ་དང་དམག་མིས་ཀིརྟི་དགོན་ཉིན་མཚན་གཉིས་ཀར་སྐོར་སྲུང་བྱས་ཏེ་དགེ་འདུན་པ་རེ་ཟུང་ལ་གང་བྱུང་དུ་ཉེས་རྡུང་བཏང་ཡོད་འདུག
ཀིརྟིའི་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས་མཁོ་གཏོང་བྱས།
ཕ་ཡུལ་གྱི་དགེ་འདུན་པ་མང་ཚོགས་ཀྱིས་ལྷག་བསམ་རྣམ་དག་རེད། དེ་དག་གི་སེམས་ཤུགས་ལ་རྗེས་སུ་ཡི་རངས་དང་དཀའ་ངལ་གདུང་སེམས་མཉམ་བསྐྱེད་ཡོད། འོན་ཀྱང་གཟབ་གཟབ་བྱ་དགོས་ས་མང་པོ་ཞིག་འདུག
༡༽ ད་ལྟའི་ཆར་བོད་ནང་དང་ལྷག་པར་ས་ཁུལ་ལ་བདེ་འཇགས་མེད་པ་བཟོས་པ་དེ་རྒྱ་ནག་གཞུང་ལ་གྱོང་རེག་གི་ཡོད་དམ་ས་ཁུལ་གྱི་བོད་མི་མང་ཚོགས་ལ་གྱོང་རེག་གི་ཡོད་མེད་བཤད་དཀའ་བ་མ་ཟད། ས་གནས་ཀྱི་བརྟན་ལྷིང་དང་། སྤྱི་ཚོགས་ཀྱི་ཡར་རྒྱས། མང་ཚོགས་ཀྱི་འཚོ་བ་བཅས་ལ་གྱོང་གུད་ཚབས་ཆེན་ཡོང་བཞིན་པ་མངོན་གསལ་རེད། དེའི་ཕྱིར་ངོ་ལོག་རང་བཞིན་གྱི་ལས་འགུལ་གྱི་ཁེ་གྱོང་ལ་ངེས་པར་བསམ་གཞིགས་བྱ་དགོས་པར་འདོད།
༢༽ གཉིས་ནས་ཕྱི་ལོག་ནས་བོད་དུ་འབྲེལ་བ་བྱེད་སྟངས་དང་གནས་ཚུལ་ཕྱིར་བསྒྲགས་བྱེད་སྟངས་ལེགས་པོ་འབྱུང་གི་ཡོད་མེད་བཤད་དཀའ་བར་འདུག ཕྱི་ཕྱོགས་ནས་བོད་ནང་དང་ས་ཁུལ་གྱི་གནས་ཚུལ་འཚོལ་སྡུད་བྱེད་མཁན་ཚོས་འགན་ཁུར་གྱི་རྣམ་པ་ཞིག་ཡིན་པ་ཨ་ཅང་ཅང། འོན་ཀྱང་ཧ་ཅང་འབྲེལ་ལམ་ཟབ་མདོགས་དང་གནས་ཚུལ་རྒྱུས་ལོན་ཡོད་མདོག་གིས་ཕན་ཐོགས་མིན་གྱི་བརྒྱུད་ལམ་དང་སྡིངས་ཆ་སྣ་ཚོགས་ལ་གནས་ཚུལ་འདི་དག་བསྒྲགས་རྐྱང་བྱས་ན་ས་ཁུལ་ལ་འབྲེལ་ལམ་དང་འགྲིམ་འགྲུལ་སོགས་དམ་དྲག་ཇེ་ཆེར་གཏོང་བར་ཤུགས་རྐྱེན་ངན་པ་བྱུང་ན་ས་ཁུལ་ལ་གནོད་བསྐྱལ་བ་རེད། དེའི་ཕྱིར་གནས་ཚུལ་བརྒྱུད་སྤྲེལ་བྱ་ཕྱོགས་ལ་གཟབ་དགོས་པར་འདུག
༣༽ གསུམ་པ་ཕྱི་ཕྱོགས་ནས་བོད་ནང་དུ་རྒྱུད་སྐུལ་བྱེད་ཀྱི་མེད་རུང། བོད་ནང་ལ་ཤུགས་རྐྱེན་ཐེབས་པའི་སྐད་ཆ་སྣ་ཚོགས་བཤད་དེ་ས་གནས་ཀྱི་ཡུལ་མི་ཚོའི་དྲན་ལམ་དང་ཚོར་བའི་ནང་དུ་གཡོ་འགུལ་བཟོ་བའི་གནས་ཚུལ་མཁོ་གཏོང་དང་མཁོ་བསྒྲུབ་བརྒྱུད་སྤེལ་བཅས་བྱས་ན་ངོ་ལོག་རང་བཞིན་གྱི་དོན་རྐྱེན་འབྱུང་བའི་རྒྱུ་རུ་འགྱུར་བཞིན་ཡོད་སྟབས། རང་དབང་ཡུལ་གྲུར་གནས་འཁོད་ཀྱི་རང་རིགས་ཚོས་གནས་ཚུལ་འདིའི་ཐད་གཟབ་དགོས་པར་འདུག
བོད་ཡུལ་དུ་བོད་ཕྲུག་སློབ་མའི་ཟས་བཅད་ངོ་རྒོལ་ནི། ཤིན་ཏུ་འོས་ཤིང་འཚམས་པའི་དུས་རབ་ཉེར་གཅིག་པའི་གཟི་བརྗིད་རེད།
རྒྱ་མི་སྐོར་སྲུང་བས་བོད་ཀྱི་དགེ་འདུན་པ་རེ་ཟུང་ལ་གང་བྱུང་དུ་ཉེས་རྡུང་བཏང་བ་ནི། ཁྲིམས་མེད་ཀླ་ཀློའི་བྱ་སྤྱོད་རེད།