ཁྲིམས་ཐོག་ནས་ངོས་ལེན།

སི་ཕན་བོད་དོན་རྒྱབ་སྐྱོར་ཚོགས་པ་དང་སི་ཕན་བོད་ཁང་གཉིས་ཀྱིས། སི་ཕན་འཛམ་གླིང་ནག་ཉེས་ཁྲིམས་གཏུགས་ཁང་དུ། རྒྱ་གཞུང་གིས་བོད་ནང་གི་བོད་མི་དམར་གསོད་དང་སྡུག་སྦྱོང་ཚད་མེད་གཏོང་བཞིན་པའི་གྱོད་དོན་ཁག་གཉིས་ཞུ་གཏུག་བྱས་འདུག་ཀྱང་། རྒྱ་གཞུང་གིས་དངོས་ཤུགས་བརྒྱུད་གསུམ་ནས་སི་པན་ཁྲིམས་ཁང་ལ་གནོན་ཤུགས་སྤྲད་སྟབས། གྱོད་དོན་དེ་གཉིས་ལས་གཅིག་མ་གཏོག་ཁྲིམས་ཁང་དུ་བསྐྱལ་ཐུབ་བྱུང་མེད། ཞུ་གཏུག་གཉིས་པ་སྟེ། ༢༠༠༦ ལོ་ནས་ ༢༠༠༨ བར་རྒྱ་གཞུང་གིས་བོད་མིར་སྡུག་སྦྱོང་དང་དམར་གསོད་བཏང་བའི་ཁྲིམས་གཏུག་དེ་གནས་སྐབས་རིང་ཕྱིར་འཐེན་བྱས་ཡོད་ནའང་། ཞུ་གཏུག་དང་པོ་དེར། ཕྱི་ཟླ་ ༣ ཚེས་ ༣༠ ཉིན་སི་ཕན་རྒྱལ་ཡོངས་ཁྲིམས་ཁང་ཨང་གཉིས་པའི་ངོས་ནས། ༡༩༤༩ ལོའི་ཟླ་ ༨ ཚེས་ ༡༢ ནང་ཚུད་དུ། ཇི་ནི་ཝའི་གྲོས་དོན་དང་སི་པན་ནག་ཉེས་གྲོས་དོན་ཨང་  ༦༠༨ དང་ ༦༡༡.༥ ནང་། གནད་དོན་དེར་ཚབས་ཆེའི་རྡོག་རོལ་བཏང་ཡོད་པ་ར་འཕྲོད་བྱུང་སྟབས། བོད་ནི་གཞན་གྱིས་བཙན་བཟུང་བྱས་པའི་རྒྱལ་ཁབ་ཅིག་ཡིན་པར་ཁྲིམས་མཐུན་ངོས་ལེན་བྱས་ཡོད་འདུག

 དེའི་ཐད་སི་ཕན་བོད་ཁང་འགན་འཛིན་སྐུ་ཞབས་ཐུབ་བསྟན་དབང་ཆེན་ལགས་ཀྱིས་བརྗོད་ན། ང་ཚོས་གནད་དོན་དེའི་ཐད་ལས་འགུལ་སྤེལ་ཏེ་ལོ་ཤས་ཤིག་ཕྱིན་ཡོད་ཀྱང་། སི་པན་ལ་རྒྱ་གཞུང་གིས་གནོན་ཤུགས་རིམ་པར་སྤྲད་སྟབས། ཁྲིམས་དཔོན་ཚོས་གྱོད་དོན་ཕྱིར་འཐེན་བྱས་ཏེ་ད་བར་ལྷག་ལུས་བྱུང་བ་རེད། ཡིན་ནའང་། བོད་དོན་རྒྱབ་སྐྱོར་གནང་མཁན་ཁྲིམས་དཔོན་ཁག་ཅིག་གིས་མུ་མཐུད་ཕྱག་ལས་གནང་བའི་དབང་གིས། ༢༠༡༡ ལོའི་ཟླ་ ༣ ཚེས་ ༣༠ ཉིན། ཁྲིམས་དཔོན་ཚོས་བོད་རྒྱལ་ཁབ་ནི་རྒྱ་གཞུང་གིས་བཙན་བཟུང་བྱས་པ་ཞིག་ཡིན་དུས། ཁྲིམས་གཞི་རྩིས་མེད་དུ་བཏང་ན་རྩ་བ་ནས་འགྲིག་གི་མི་འདུག་ལབ་ནས་བསྐྱར་ཞིབ་དགོས་པའི་དགོངས་ཚུལ་བཏོན་པ་རེད། མ་གཞི་ལས་གཞི་དེ་ཕྱི་ལོ་ ༢༠༠༦ ནས་མགོ་བཙུགས་ཏེ་ད་ཆར་ཁྲིམས་གཏུག་དང་པོ་འགྲོ་བཞིན་ཡོད། ཅེས་བརྗོད་འདུག  

དཔལ་ལྡན་གྱིས་བསྡུ་སྒྲིག་བྱས།