སྐྱབས་རྗེ་རྒྱལ་བ་སྨན་རི་ཁྲི་འཛིན་རིན་པོ་ཆེ་མཆོག་གིས་ཧི་མ་ཅཱལ་མངའ་སྡེའི་ཁྱབ་ཁོངས་བོན་གཞིས་ཉིན་སློབ་ཏུ་མཐོ་འབྲིང་ངམ་འཛིན་རིམ་བཅུ་གཉིས་ཀྱི་འཛིན་གྲྭ་ཞིག་གསར་དུ་དབུ་འབྱེད་གནང་ཡོད།
ཟླ་འདིའི་ཕྱི་ཚེས་ ༧ ཉིན་ཧི་མ་ཅཱལ་གྱི་མངའ་སྡེའི་ཁྱབ་ཁོངས་བོན་གཞིས་ཉིན་སློབ་ཏུ་མཐོ་འབྲིང་ངམ་འཛིན་རིམ་བཅུ་གཉིས་ཀྱི་འཛིན་གྲྭ་གསར་བ་དབུ་འབྱེད་ཀྱི་མཛད་སྒོ་ཞིག་བསྡུས་ཡོད་ཅིང་། མཛད་སྒོའི་སྐུ་མགྲོན་དུ་སྐྱབས་རྗེ་སྨན་རི་ཁྲི་འཛིན་ལུང་རྟོགས་བསྟན་པའི་ཉི་མ་མཆོག་གཙོས་པའི་བཙན་བྱོལ་བོད་གཞུང་གི་ཁྲིམས་ཞིབ་པ་ཆེ་བ་ཟུར་པ་སྐུ་ངོ་བྱ་དུར་བསོད་ནམས་བཟང་པོ་ལགས་དང་། དབུས་གཡུང་དྲུང་བོན་འཛིན་སྐྱོང་ལྷན་ཚོགས་ཀྱི་ཟུང་དྲུང་དགེ་བཤེས་ཤེ་ཙུ་རྒྱ་མཚོ་ལགས། བོན་གཞིས་ཉིན་སློབ་ཀྱི་སློབ་སྤྱི་ཆེན་མོ་རྒྱ་གར་བ་སྐུ་ཞབས་ཤར་མཱ་ (S.P. Sharma)ལགས། དེ་མིན་དཔལ་གཤེན་བསྟན་སྨན་རིའི་གླིང་གི་ལས་སྣེ་ཡོངས་དང་གྲྭ་ཚང་འདུས་མང་། བོན་གཞིས་མང་ཚོགས་བཅས་འདུ་འཛོམས་གནང་ཡོད་པ་རེད།
མཛད་སྒོའི་ཐོག་མར་དེར་ཡོད་སྐུ་མགྲོན་དང་མི་མང་། དགེ་སློབ་ཡོངས་ཀྱིས་སྐྱབས་རྗེ་རྒྱལ་བ་སྨན་རི་བའི་ཁྲི་འཛིན་རིན་པོ་ཆེ་མཆོག་གདན་འདྲེན་དང་ཕེབས་བསུ་གནང་ཞིང་། རིན་པོ་ཆེ་མཆོག་ནས་འཛིན་རིམ་བཅུ་གཉིས་( high School) དབུ་འབྱེད་རབ་གནས་དང་། འཛིན་རིམ་བཅུ་གཅིག་ཏུ་གསར་ཞུགས་གནང་བའི་སློབ་ཕྲུག་ ༤༠ ལྷག་ལ་སློབ་དེབ་གསར་པ་དང་རྟེན་འབྲེལ་བྱིན་དར་ཕུལ་ཡོད་ལ། སློབ་སྤྱི་དང་སློབ་དགེ་རྣམས་ལ་ཐུགས་རྗེ་ལེགས་གསོལ་གྱི་ཁ་བཏགས་བསྒྲོན་རྗེས། སློབ་དགེ་རྣམ་པས་རྟེན་འབྲེལ་གྱི་ཚུལ་དུ་སློབ་ཁྲིད་དབུ་འཛུགས་གནང་ཡོད་པར་མ་ཟད། སྐྱབས་རྗེས་རྒྱལ་བ་སྨན་རི་ཁྲི་འཛིན་རིན་པོ་ཆེ་གཙོས་ཆེད་དུ་ཕེབས་པའི་སྐུ་མགྲོན་དང་། དེ་བཞིན་བོན་གཞིས་ཉིན་སློབ་ཀྱི་སློབ་གཙོ་མཆོག་དང་བླ་ཁྲི་མཁན་པོ་དགེ་བཤེས་ཉི་མ་གྲགས་པ་རིན་པོ་ཆེ། ས་གནས་བོན་གཞིས་ཀྱི་གཞིས་མགོ་ཕུར་པ་དབང་ལྡན། གཞན་ཡང་འབྲེལ་ཡོད་ཚོགས་སྡེ་ཁག་གི་སྐུ་མགྲོན་རྣམ་པས་རིམ་པ་བཞིན་དུ་བཀའ་སློབ་གསུང་བཤད་གནང་ཡོད་འདུག་ལ། དེར་ཡོད་དགེ་སློབ་རྣམས་ཀྱིས་གཞས་དང་ཞབས་བྲོ་སོགས་འཁྲབ་སྟོན་གཟིགས་འབུལ་ཞུས་ཡོད་པ་རེད།
ཧི་མ་ཅཱལ་མངའ་ཁོངས་སུ་ཡོད་པའི་བོན་གཞིས་ཉིན་སློབ་དེ་ནི། ཕྱི་ལོ་ ༡༩༧༥ ལོར་༸སྐྱབས་རྗེ་རྒྱལ་བ་སྨན་རི་བ་མཆོག་གིས་འབྲེལ་ཡོད་སྡེ་ཁག་ལ་སྙན་སེང་དང་གནད་ཡོད་མི་སྣར་བཀའ་མངགས་གནང་སྟེ། འཛིན་རིམ་ལྔ་བ་ནས་གསར་འཛུགས་གནང་བ་ཞིག་ཡིན་ཞིང་། ཕྱིས་སུ་ ༡༩༨༠ ལོར་བླ་ཁྲི་མཁན་པོ་དགེ་བཤེས་ཉི་མ་གྲགས་པ་ལགས་ཊོ་ལན་ཇིའི་ས་གནས་ཀྱི་སློབ་སྟོན་ཚོགས་གཞོན་དུ་བསྐོ་བཞག་གནང་བ་ནས་བཟུང་འཛིན་རིམ་བརྒྱད་པར་གནས་སྤར་ཏེ་སློབ་ཕྲུག་ ༡༣༢ བསྡུ་རུབ་བྱས་ཡོད་ཅིང་། ༢༠༠༣ ལོར་སྐྱབས་རྗེ་སྨན་རི་བ་མཆོག་གི་བཀའ་དགོངས་བཞིན་གོང་རིམ་སྡེ་ཁག་ལ་སྙན་སེང་ཞུས་ཏེ་འཛིན་རིམ་བཅུ་བ་གསར་འཛུགས་གནང་སྟེ་སློབ་མ་ ༢༨༨ ལྷག་བསྡུ་རུབ་བྱས་ཡོད།
སྔར་ལོར་སྐྱབས་རྗེ་སྨན་རི་བ་མཆོག་གི་བཀའ་མངགས་ལྟར། ཊོ་ལན་ཇིའི་ས་གནས་ཉིན་སློབ་ཀྱི་སློབ་སྟོན་ཚོགས་གཞོན་དང་བོན་བུ་ཁྱིམ་ཁང་གི་དབུ་འཛིན་དགེ་བཤེས་ཉི་མ་གྲགས་པ་རྣམ་གཉིས་ཀྱིས་འབྲེལ་ཡོད་སྡེ་ཁག་ལ་རེ་འདུན་ཞུས་པ་ལྟར། ཁྲིམས་མཐུན་བཀའ་འཁྲོལ་ཐོབ་སྟེ། འདི་ལོའི་ཕྱི་ཟླ་ ༤ ཚེས་ ༧ ཉིན་འཛིན་རིམ་བཅུ་གཉིས་ཀྱི་མཐོ་འབྲིང་གསར་དུ་དབུ་འབྱེད་གནང་ཡོད་ཅིང་། ད་ལྟའི་ཆར་སློབ་གྲྭའི་ནང་བོད་དང་ཧི་མ་ལ་ཡའི་རི་རྒྱུད་ཀྱི་སློབ་ཕྲུག་གྲངས་ ༥༦༧ ཙམ་གྱིས་སློབ་སྦྱོང་གནང་མུས་ཡིན་འདུག
གསར་འགོད་པ། དོན་གོ
ངོ་མ་དགའ་འོས་པའི་གཏམ་བཟང་རེད།
དེང་སྐབས་བོད་པའི་སློབ་གྲྭ་མང་པོ་ཞིག་ལ་སློབ་ཕྲུག་བཞུགས་མི་མེད་ནས་སློབ་གྲྭ་མང་པོ་ཞིག་གི་འཛིན་རིམ་ཉུང་འཕྲི་བྱས་པ་མ་ཟད་ཐ་ན་སློབ་གྲྭ་སསྒོ་རྒྱབ་དགོས་པའི་གནས་ཚུལ་ཀྱང་བྱུང་ཡོད།
ངོ་མ་དགེ་སློབ་འཛིན་ཡོངས་འ་ཐུགས་རྗེ་ཆེ་ཞུ་འདོད་བྱུང།
རླབས་ཆེན་གྱི་མཛད་འཕྲིན་ལ་བསྟོད་བསྔགས་བྱེད།