རྒྱལ་སྤྱིའི་ཉམས་ཞིབ་གྲུབ་འབྲས་ཁྱབ་བསྒྲགས་བྱས་ཡོད།

བོད་གཞུང་སྨན་རྩིས་ཁང་དབུ་བརྙེས་ཏེ་མི་ལོ་ ༥༠ འཁོར་བའི་དུས་དྲན་མཛད་སྒོའི་སྟེང་། སྨན་རྩིས་ཁང་གི་འདས་པའི་བྱུང་རིམ་དང་གྲུབ་འབྲས་དང་ད་ལྟའི་སྨན་བཅོས་ལག་རྩལ། མ་འོངས་པའི་ལས་འཆར་སོགས་གསལ་བསྒྲགས་བྱས་ཡོད་པ་ལྟར། འདི་གའི་གསར་འགོད་པས་དོན་གནད་ཁག་ཅིག་གི་ཐོག་དབུས་སྨན་རྩིས་ཁང་གི་དྲུང་ཆེ་ཚེ་རིང་ཕུན་ཚོགས་ལགས་སུ་བཅར་འདྲི་ཞུས་ཡོད།

དྲི་བ།  རྒྱ་གར་གཞུང་གིས་བོད་སྨན་ལ་ངོས་ལེན་གནང་སྟངས་ཇི་འདྲ་ཡིན་མིན་དང་། ཁྲིམས་མཐུན་ངོས་ལེན་ཐོབ་པ་དེས་མ་འོངས་པར་བོད་སྨན་རྒྱུན་འཛིན་དང་དར་སྤེལ་གཏོང་རྒྱུར་ནུས་པ་ཅི་ཙམ་འཐོན་རེ་གནང་གི་ཡོད་དམ། 

ལན།  བོད་སྨན་ངོས་ལེན་གནང་རྗེས་ཁྲིམས་ཐོག་ནས་ལག་ལེན་བསྟར་ཆོག་པའི་ཁོར་ཡུག་ཅིག་ཆགས་ཚར་བ་རེད། རྒྱ་གར་གཞུང་གིས་བཀའ་ཤག་ལ། བོད་སྨན་ཁྲིམས་ཐོག་ནས་ངོས་ལེན་མེད་པའི་སྐབས་ལ་ལག་ལེན་བྱེད་པ་དེ་ཁྲིམས་འགལ་རེད་ཅེས་ལབ་འདུག་ཀྱང་། ཁྲིམས་འགལ་རེད་ལབ་ནས་འགོག་ཐབས་ཡོད་པ་མ་རེད། དེའི་རྒྱུ་མཚན་ནི། བོད་སྨན་གྱིས་མི་གཞན་ལ་ཕན་ཐོགས་ཀྱི་ཡོད་པ་རེད། བོད་སྨན་ཟོས་ཏེ་མི་གཅིག་ཀྱང་བསད་མྱོང་མེད་ལ། བོད་སྨན་ཟོས་ཏེ་ན་ཚ་སྡུག་ཏུ་ཕྱིན་པའང་བྱུང་མེད། དེ་འདྲའི་གནས་སྟངས་བྱུང་ཡོད་ན། ད་ལྟའི་སྨན་རྩིས་ཁང་གི་ཚོགས་པ་འདི་ལྷག་ཡོད་པ་མ་རེད། མི་ལ་གནོད་མ་བསྐྱལ་ན་ཁྲིམས་ཡོད་མེད་ལ་མ་ལྟོས་པར་མི་མང་གི་ངོས་ལེན་ཡོད་པ་རེད། མང་ཚོགས་ལ་ན་ཚ་བྱུང་སྟེ། བཟོད་སྲན་མ་ཐུབ་པར་སྨན་པའི་སར་འགྲོ་དགོས་དུས། ཁྲིམས་ལུགས་ནི་མི་མང་གི་ཆེད་དུ་བཟོས་པ་ཞིག་ཡིན་སྟབས་མི་མང་གིས་ངོས་ལེན་བྱས་པ་རེད། གནས་སྟངས་དེའི་རྐྱེན་གྱིས་ད་བར་བོད་སྨན་ལག་ལེན་ཐོག་དཀའ་ངལ་ཅི་ཡང་འཕྲད་མེད། ཐེངས་འདིར་ཁྲིམས་ཐོག་ནས་ངོས་ལེན་བྱས་པ་དེས། སྨན་རྩིས་ཁང་ལ་ཁེ་ཕན་ག་རེ་ཡོད་ལབ་ན། ཕྱི་ལ་འབྲེལ་བ་བྱེད་སྐབས་རྒྱལ་ཁབ་ཕན་ཚུན་བར་དཀའ་ངལ་མེད་པ་བཟོ་རྒྱུ་དང་། ཕྱི་རྒྱལ་དུ་ཕྱག་ལས་གནང་བཞིན་པའི་སྨན་པ་ཚོར། ཕྱི་རྒྱལ་འཕྲོད་བསྟེན་རྩ་འཛིན་ཡིག་ཆའི་འོག་འགོག་རྐྱེན་འཕྲད་མི་དགོས་པ། བོད་སྨན་རྒྱལ་ནང་དང་རྒྱལ་སྤྱིར་ཁྲིམས་མཐུན་ཚོང་འགྲེམས་དང་། ཕྱིར་གཏོང་སྐབས་སྔོན་མ་ལས་རྒྱ་ཆེ་བ་ཆགས་ཐུབ་ཀྱི་ཡོད། ལྷག་པར་དུ། སྨན་རྒྱུ་དང་སྔོ་སྨན་དཀོན་པའི་རིགས་ཞིང་ཁར་འདེབས་རྒྱུ་དང་། སྨན་གྱི་ལག་རྩལ་མི་ཉམས་རྒྱུད་འཛིན་ཡོང་བར་ཕྱི་ལོགས་སུ་དཀའ་ངལ་འཕྲད་ཚེ། དབུས་གཞུང་གིས་རོགས་རམ་གནང་ཐུབ་རྒྱུའི་ཁྲིམས་མཐུན་ཁོར་ཡུག་ཅིག་ཆགས་ཡོད། སྨན་རྩིས་ཁང་གིས་རྒྱ་གར་ནང་ས་གནས་ཡན་ལག་སྨན་ཁང་ ༤༩ ཙམ་བཙུགས་ཡོད་ནའང་། ད་བར་ཁྱོད་ཚོའི་ལས་ཀར་དོགས་པ་འདུག་ཟེར་མཁན་སུ་གཅིག་བྱུང་མེད་ལ། དེ་ནི་གཙོ་བོ་མི་མང་གིས་བོད་སྨན་ལ་ངོས་ལེན་ཡོད་སྟབས་གཞུང་གིས་དགག་བྱ་མ་གནང་བ་ཞིག་རེད།

དྲི་བ།  སྨན་རྩིས་ཁང་གི་ལོ་འཁོར་ལས་སྡོམ་ནང་། འདི་གའི་སྨན་ཁང་གིས་ཁྲག་རླུང་དང་གཅིན་སྙི་སོགས་ཛ་དྲག་གི་ན་ཚ་འགར་སྨན་བཅོས་ལེགས་གྲུབ་བྱུང་ཡོད་སྐོར་བཀོད་འདུག  དེའི་སྐོར་ངོ་སྤྲོད་ཅིག་གནང་རོགས།

ལན། བོད་གཞུང་སྨན་རྩིས་ཁང་གིས་གཅིན་སྙིའི་ནད་གཞིའི་ཐོག་ཉམས་ཞིབ་དང་པོ་བྱས་ཏེ་གྲུབ་འབྲས་ཐོན་ཡོད་ལ། དེ་ལ་རྒྱལ་སྤྱིའི་ཐོག་ནས་ཀྱང་ཉམས་ཞིབ་བྱས་ཏེ་གྲུབ་འབྲས་ཁྱབ་བསྒྲགས་བྱས་འདུག གཉིས་པ་དེ་ཐེངས་སྔོན་མ་གྲུབ་འབྲས་གང་འཚམ་ཞིག་ཐོན་ཡོད་སྟབས། དེའི་ཐོག་གྲུབ་འབྲས་ཡག་པོ་ཐོན་པ་རེད། གཅིན་སྙིའི་ཐོག་བོད་སྨན་གྱིས་ཕན་ཐོགས་ཡོད་པ་ཡོངས་གྲགས་ཆགས་ཡོད་ལ། ཡོངས་གྲགས་ཆགས་པ་ཙམ་དུ་མ་ཟད། སྨན་རྩིས་ཁང་གིས་ན་ཚ་དེའི་ཐོག་སྨན་མང་པོ་གསར་དུ་བཟོས་ཡོད།  ཁྲག་རླུང་སྟོད་འཚང་ཞེས་པ་དེར། དབྱིན་སྐད་དུ་ hypertension ཟེར་གྱི་ཡོད། དེར་ཉམས་ཞིབ་བྱ་རྒྱུའི་རིམ་པ་ཞིག་ཏུ་བསླེབས་ཡོད། བོད་ལུགས་ནང་ཤེས་ཀྱི་མེད་ཀྱང་། ཕྱི་ལུགས་ཐོག་ཁྲག་རླུང་སྟོད་འཚང་ལ་བཅོས་ཐབས་མེད་ལབ་ཀྱི་ཡོད། གཟུགས་གཞི་ཐང་པོ་ཡོད་བཞིན་དུ་གློ་བུར་དུ་ཁྲག་ཤེད་འཕར་གྱི་ཡོད། ཁྲག་ཤེད་དེའི་རྒྱུ་རྐྱེན་ག་རེ་ཡིན་མིན་དང་དེར་བཅོས་ཐབས་ག་རེ་ཡོད་མེད་ཐོག ཕྱི་ལུགས་སྨན་གཞུང་དུའང་གཏན་འབེབས་གང་ཡང་མེད། ན་ཚ་དེ་ནི་མི་ཞིག་ལ་མཚོན་ན་ཕོག་ཐུག་མི་འགྲོ་བར་འཇོག་དགོས་པའི་གནས་སྟངས་ཞིག་ཆགས་ཡོད། ཞག་རྩི་མང་པོ་ཟོས་ན་སྙིང་ཁྲག་བརྒྱུད་སའི་རྩ་རྒྱུད་ཡོད་པའི་འགྲོ་ལམ་འགག་སྟེ་ཁྲག་ཤེད་ཡོང་གི་ཡོད། བོད་སྨན་ཐོག་ལོ་ཚད་རིམ་བགོས་བྱས་ཏེ་ཁྲག་ཤེད་ན་ཚ་ཡོང་སྟངས་སྐོར་ཞིབ་འཇུག་ཚར་གཅིག་བྱས་ཡོད་ལ། དེའི་སྐོར་ལ་ང་ཚོས་མུ་མཐུད་ནས་ཉམས་ཞིབ་བྱེད་བཞིན་ཡོད།

དྲི་བ།  མཛད་སྒོའི་ཐོག་བཀའ་ཁྲི་མཆོག་གིས་སྔོ་སྨན་སྲུང་སྐྱོབ་ཆེད་ཧི་མ་ཅལ་གཞུང་དང་སྨན་རྩིས་ཁང་གཉིས་མཉམ་འབྲེལ་བྱ་དགོས་ཀྱི་འདུག་གསུངས་པ་དེར་དགོངས་ཚུལ་ཅི་ཞིག་ཡོད་དམ། 

ལན།  སྔོ་སྨན་སྲུང་སྐྱོབ་བྱ་རྒྱུ་ཧ་ཅང་གལ་ཆེར་མཐོང་གི་ཡོད་ལ་སྔོ་སྨན་འདེབས་རྒྱུའི་འཆར་གཞི་སྔོན་ནས་ཡོད་པ་ཞིག་རེད། དེའི་ཆེད་དུ་ང་ཚོས་སྡེ་ཚན་ཞིག་ཟུར་འཛུགས་གནང་ཡོད། བོད་གྱི་སྨན་གཞུང་དུ་སྔོ་སྨན་རིགས་སྐྱེས་ཡུལ་དང་གནམ་གཤིས་ཚ་དྲོད་སོགས་གསལ་པོར་གསུངས་ཡོད་ལ། ཚན་རིག་ཐོག་ནས་ཀྱང་སྨན་འདི་ས་བབ་མཐོ་ཚད་འདི་ཙམ་ནས་སྐྱེ་ཡི་རེད་ཟེར་བ་ལྟར། ཉམས་ཞིབ་ཡག་པོ་བྱས་ཏེ་སོན་ཇི་ལྟར་སྤེལ་དགོས་མིན་དང་། ཞིང་པས་བཏབ་ན་འགྲིག་མིན། ཞིང་པས་བཏབ་པའི་སྨན་དེར་སྨན་གཞུང་དུ་ནུས་པ་ཡོད་མེད་བཅས་ལ་ཉམས་ཞིབ་དགོས་པ་རེད།

ངའི་ཉམས་མྱོང་ལྟར་ན། ཞིང་པའི་ཚན་རིག་པས་ཞིང་ཁར་སྔོ་སྨན་བཏབ་ན་ནུས་པ་ཡག་པོ་འདུག སྔོ་སྨན་གཞན་དང་མི་འདྲ་བར་ཁེ་གཙང་གིས་ཆུ་ལུད་ཀྱི་མཐུན་རྐྱེན་ཡོད་ཐོག ཁོར་ཡུག་ཀྱང་ཡག་པོ་ཡོད་དུས་སྨན་གྱི་ནུས་པ་ཆེན་པོ་ཡོང་གི་རེད། ཅེས་བཤད་ཀྱིན་འདུག བོད་པའི་སྨན་པ་ཚོས་དེར་ཁས་ལེན་བྱེད་ཀྱི་མེད་པར། སྔོ་སྨན་ཁོ་རང་སྐྱེས་སར་སྔོ་སྨན་གཞན་དང་འཐབ་སྟེ། འཚར་སྐབས་སྔོ་སྨན་གྱི་ནུས་པ་བསྐྲུན་ཐུབ་གྱི་ཡོད་སྟབས། ཚན་རིག་པས་བཤད་སྟངས་དེ་ཏག་ཏག་བསྡད་ཡོད་པ་མ་རེད་ཟེར། དེའི་སྟབས་ཀྱིས། ཞིང་ཁར་སྔོ་བཏབ་ན་སྔོ་སྨན་དེར་ནུས་པ་ཡོད་མེད་ཉམས་ཞིབ་བྱས་ཏེ་གཏན་ལ་འབེབས་དགོས་ཀྱི་ཡོད། དེའི་ཐོག་ལས་ཀ་རྒྱུན་རིང་བྱ་དགོས་པ་ལས་ལས་སླ་མོ་ཞིག་ཆགས་ཀྱི་མེད། སྨན་གཞུང་དུ་བྲིས་པ་ལས་ལག་ལེན་དངོས་ཐོག་གཏན་ལ་ཕབ་ཐུབ་ན། གནས་སྟངས་གསལ་པོ་ཆགས་ཡོང་གི་རེད། སྔོ་སྨན་ཚད་ལས་བརྒལ་བ་བཀོག་པའི་སྟབས་ཀྱིས། སྐྱེ་བཞིན་པའི་སྔོ་སྨན་གྱིས་ཚབ་བྱེད་མ་ཐུབ་པར། ཁོར་ཡུག་གི་རྩ་སྨན་རིགས་རྩ་བ་ནས་རྫོགས་འགྲོ་ཡི་ཡོད། ཚན་རིག་གི་ལམ་ནས་སྔོ་སྨན་ཌེ་ཨིན་ཨིན་ཐོག་སོན་བརྒྱ་ཕྲག་མང་པོ་སྤེལ་ཐུབ་སྟབས། དེ་འདྲའི་ཐོག་སྨན་རྩིས་ཁང་གིས་ཟུང་འབྲེལ་གྱི་ལས་ཀ་བྱ་ཐུབ་པ་ཞིག་ཡོང་གི་རེད་བསམ་གྱི་ཡོད།

དེ་སྔོན་སོ་ནམ་ཚན་རིག་པ་ཞིག་སྨན་རྩིས་ཁང་དུ་ཡོང་སྟེ། ཁྱེད་ཚོས་སོན་ཉོ་རྒྱུ་ཡིན་ཞེས་ཁས་ལེན་གནང་དགོས་པ་རེད། སོན་ཉོས་ན་ས་ཆ་དང་སོན་འདེབས་རྒྱུའི་ཐད་ང་ཚོས་ཐབས་ཤེས་བྱ་རྒྱུ་ཡིན། ཁྱེད་ཚོར་ལོ་གཅིག་ལ་སོན་ག་ཚོད་དགོས་མིན་དང་རིན་གོང་ཅི་ཙམ་འགྲོ་མིན་ཐོག་གན་རྒྱ་བཞག་སྟེ། སྔོན་ཚུད་ནས་ཐག་གཅོད་བྱ་ཆོག་གི་རེད། ཅེས་ལབ་སོང་། ཡིན་ནའང་མཉམ་འབྲེལ་ལས་རིམ་དེའི་ཆེད་སྨན་རྩིས་ཁང་གིས་ས་གནས་ཡུལ་མིའི་ཞིང་པའི་ལག་ནས་ཞིང་ས་བག་མར་ལེན་རྒྱུ་བྱུང་མེད་ཀྱང་། མོན་རྟ་དབང་སོགས་གཞིས་ཆགས་ཁག་ཅིག་ལ་འབྲེལ་བ་བྱས་ཏེ། སོན་བཏབ་སྟེ་ཚོད་ལྟ་བྱས་ཡོད་ལ་གཞིས་ཆགས་ཁ་ཤས་ནས་སྨན་སྣ་ཁག་ཚུར་གཏོང་བྱས་ཐུབ་པའང་བྱུང་ཡོད།

དྲི་བ།  ༧གོང་ས་མཆོག་གིས་རྒྱ་གར་སྨན་ཁང་ཆེ་ཁག་ཏུ་བོད་སྨན་སྡེ་ཚན་འཛུགས་དགོས་རྒྱུའི་དགོངས་ཚུལ་གསུངས་པ་དེ་ལ་རེ་བ་གང་འདྲ་རྒྱག་གི་ཡོད་དམ། 

ལན།  ང་ཚོས་དེའི་ཐོག་འབྲེལ་བ་བྱེད་སྐབས་སྒང་ཏོག་གཞུང་གིས་སྔ་ས་ནས་སྨན་གྱི་ཡན་ལག་བཙུགས་ཚར་འདུག སྒང་ཏོག་གཞུང་སྨན་གྱི་སྡེ་ཚན་དུ་བོད་སྨན་སྡེ་ཚན་ཞིག་བཙུགས་ཏེ། སྨན་སྣ་རིགས་སྨན་རྩིས་ཁང་ནས་མངགས་ཉོ་བྱེད་ཀྱིན་ཡོད། སྟབས་མ་ལེགས་པ་ཞིག་ལ། དེར་ཡོད་སྨན་རྩིས་ཁང་གི་སྨན་པ་དེས་ལོ་བཅུ་གྲངས་རིང་སྒང་ཏོག་ཏུ་ཕྱག་ལས་གནང་ཡོད་སྟབས། མ་འོངས་པར་རྒན་ཡོལ་དུ་ཕེབས་ན་སྨན་རྩིས་ཁང་གིས་འགན་ལེན་བྱ་དགོས་མིན་གྱི་ཐོག་ནས་དཀའ་ངལ་ཞིག་འཕྲད་པ་རེད། ང་ཚོས་སྒང་ཏོག་གཞུང་ལ་ཁྱོད་ཚོའི་ཆེད་དུ་ང་ཚོའི་སྨན་པ་བློས་གཏོང་བྱ་རྒྱུ་ཡིན་ལབ་ན་ཏག་ཏག་ཅིག་བསྡད་མེད། ཅེས་བཤད་པ་ཡིན། རྗེས་སུ་ཁོང་ཚོས་སྨན་རྩིས་ཁང་གི་སྒྲིག་ཁོངས་སུ་མེད་པའི་བོད་རིགས་སྨན་པ་གཞན་ཞིག་སྐད་བཏང་འདུག གཞན་རྒྱ་གར་གྲོང་ཁྱེར་ཆེ་ཁག་ཏུ་བོད་སྨན་ཡན་ལག་འཛུགས་རྒྱུ་དེ་༧གོང་ས་མཆོག་གི་རླབས་ཆེན་གྱི་དགོངས་གཞི་ཆགས་ཡོད་དུས། ང་ཚོས་ཕྱི་ལུགས་སྨན་ཁང་དེ་ཚོའི་འགྲོ་སྟངས་དང་སྒྲིག་གཞིར་བསྟུན་ཏེ། ལས་གཞིའི་དེའི་ཐོག་འབད་བརྩོན་བྱ་འཆར་ཡོད།

དྲི་བ། ཉེ་ལམ་༧གོང་ས་མཆོག་གིས་ཐུགས་རེ་བཏོན་ཡོད་པ་ལྟར། འདི་ག་སྨན་རྩིས་ཁང་གིས་བོད་ནང་དང་ཕྱི་རྒྱལ་གྱི་སྨན་པ་ཚོ་དང་ཉམས་མྱོང་བརྗེ་རེས་བྱ་རྒྱུར་ལས་འཆར་འདྲ་འདིང་གི་ཡོད་དམ།

ལན།  ཕྱི་ལོ་ ༢༠༠༥ ལོར་༧གོང་ས་མཆོག་གིས་བཀའ་སློབ་དེ་འདྲ་ཞིག་གནང་ཡོད། བཀའ་སློབ་དེ་གནང་རྗེས་སྐབས་དེའི་སྨན་རྩིས་ཁང་གི་འགན་འཛིན་ཟླ་བ་ལགས་ཀྱིས། རང་ཉིད་ལ་བོད་ནང་དུ་དགའ་ཉེ་གྲོགས་པོ་མང་སྟབས་ཁོང་ཚོ་བརྒྱུད་དེ་དུས་ཡུན་ལོ་ ༣ རིང་བོད་ནང་གི་གནད་ཡོད་སྨན་པ་དང་འབྲེལ་ཡོད་ཚོར་གང་ཐུབ་ཀྱི་འབྲེལ་བ་གནང་ཡོད་ཀྱང་། སྐབས་དེའི་ཆབ་སྲིད་ཀྱི་གནད་དོན་གྱིས་རྐྱེན་པས་འགོག་རྐྱེན་འཕྲད་དེ་འཆར་གཞི་ལམ་ལྷོང་བྱུང་ཡོད་པ་མ་རེད། དེ་མིན་ཕྱི་ལུགས་སྨན་པ་ཚོར་འབྲེལ་བ་བྱ་རྒྱུའི་ལས་རིམ་དེ་ད་ལྟ་མུ་མཐུད་ནས་འགྲོ་བཞིན་ཡོད།

དྲི་བ།  ཉེ་ཆར་སྨན་རྩིས་ཁང་གིས་ཅོང་ཏ་རའི་ཉེ་འཁོར་དུ་འཛུགས་སྐྲུན་ལས་གཞི་ཆེན་པོ་ཞིག་འགྲོ་བཞིན་ཡོད་སྐོར་གོ་སོང་། དེ་ནི་སྨན་རྩིས་ཁང་གི་ཡན་ལག་ལྟ་བུ་ཡིན་ནམ། ལས་གཞི་དེའི་དགོས་དམིགས་ངོ་སྤྲོད་ཅིག་གནང་རོགས།  

ལན།  ཅོང་ཏ་རར་བརྒྱབ་པའི་ཁང་པ་དེ་སྨན་རྩིས་ཁང་གི་ལས་བྱེད་ཚོའི་བགྲེས་ཤག་ཆགས་ཡོད། ང་ཚོའི་འཆར་གཞི་ལྟར་ན། མ་འོངས་པའི་ལོ་བཅུ་ནས་ཉི་ཤུ་བར་རྒན་ཡོལ་རིམ་པའི་ཐོན་ཡོང་དུས། མི་རེ་ཡོང་ན་ཁང་པ་རེ་རྒྱག་མི་དགོས་པར་ཁང་པ་ ༣༠ ལྷག་གསར་རྒྱག་བྱས་ཡོད་པ་རེད། ད་ཆར་ལས་བྱེད་ ༡༥ ཙམ་བགྲེས་ཡོལ་དུ་ཕེབས་ཡོད་ལ།  ད་དུང་ཁང་སྟོང་མང་པོ་ལྷག་ཡོད་སྟབས་དེར་ཡན་ལག་སྨན་ཁང་ཞིག་ཀྱང་བཙུགས་པ་རེད། བགྲེས་ཡོལ་དུ་ཕེབས་མཁན་ཚོས་སྨན་པར་བསྟེན་དགོས་ན། སྤིར་ཐོག་ཁ་རུ་འགྲོ་དགོས་ལ་གླ་འཁོར་དུ་བསྡད་ན་འགྲོ་སོང་ཡང་ཆེན་པོ་སྤྲོད་དགོས་དུས། རྒས་གསོ་ཁང་རང་དུ་སྨན་ཁང་ཞིག་འཛུགས་ཐུབ་ན་ཕན་གྱི་རེད་བསམས་ཏེ་བཙུགས་པ་རེད། རྒས་གསོ་ཁང་འདིའི་ཆེད་ཧིན་སྒོར་འབུམ་ ༢༠༠ ལྷག་གི་འགྲོ་སོང་བཏང་ཡོད་པས། མི་སུམ་བཅུ་ཤོང་བའི་ཁང་པ་དང་། ཆུ་དང་གློག མེ་ཏོག་ལྡུམ་ར་སོགས་མཐུན་རྐྱེན་ཧ་ཅང་འཛོམས་པོ་ཡོད་ལ། སྨན་ཁང་དེའི་སྨན་པ་དང་ལས་བྱེད་ཚོའང་དབུས་སྨན་རྩིས་ཁང་ནས་ནར་གཏོང་བྱེད་བཞིན་ཡོད། 

གསར་འགོད་པ། དཔལ་ལྡན།