སྤྱི་ཁྱབ་གཙོ་འཛིན་ཞིག་གདམ་དགོས་ཆགས་སྲིད་པ་རེད།

སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་གཅིག་པའི་དངུལ་རྩིས་དང་། ༧གོང་ས་མཆོག་གི་སྐུ་དབང་བགོ་བཤའ་དང་འབྲེལ་བའི་བཀའ་སྤྱི་གཉིས་ལས་གྲུབ་པའི་བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་གི་ལས་དོན་ཐོག བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ལ་བཅར་འདྲི་ཞུས་ཡོད།

དྲི་བ། ཐེངས་འདིའི་གྲོས་ཚོགས་ནང་བཙན་བྱོལ་བོད་གཞུང་གི་ཕྱི་ལོ་ ༢༠༡༡ ནས་ ༢༠༡༢ ལོའི་བར་གྱི་སྔོན་རྩིས་གནས་སྟངས་གང་འདྲ་ཆགས་ཡོད་པ་དང་། ཐེངས་འདིའི་གྲོས་ཚོགས་ནང་སྔོན་རྩིས་ཐོག་ཉིན་གཉིས་ལས་བཏང་མེད་སྟབས། བཙན་བྱོལ་བོད་གཞུང་གི་མ་དངུལ་ཐོག་ཞིབ་འཇུག་དང་། སྔོན་རྩིས་གཏན་འབེབས་ཞིབ་ཚགས་བྱུང་ཡོད་དམ། 

ལན། སྔོན་རྩིས་གཏན་འབེབས་སྐོར་ལ་སྤྱི་ཡོངས་ནས་བལྟས་ན། ད་ལོ་བྱུང་སོང་ཁ་འཐབ་ཀྱི་ཐོག་ལ་གཏན་འཇགས་མ་དངུལ་འཕར་བྱུང་ཡག་པོ་འདུག དངུལ་ཁག་ཅིག་བཀའ་ཤག་གསར་པར་བེད་སྤྱོད་ཆེད་བགོ་བཤའ་མ་བརྒྱབ་པར་ཟུར་འཇོག་བྱས་ཡོད། བཙན་བྱོལ་བོད་གཞུང་གི་དངུལ་རྩིས་ཀྱི་འགྲོ་སྟངས་དེ་རྒྱལ་སྤྱིའི་འགྲོ་སྟངས་དང་མཐུན་པར་བྱས་ཡོད་སྟབས། ལྷན་ཁང་ཁག་གི་ཡན་ལག་ལས་ཁུངས་ནས་ལོ་སྔོན་མར་ག་ཚོད་སོང་ཚར་བ་དང་། ད་ལྟ་འགྲོ་བཞིན་པ་ག་ཚོད་ཡོད་པ། མ་འོངས་པའི་ལོའི་ནང་འགྲོ་འཆར་ག་ཚོད་ཡོད་པ་སོགས་ཞིབ་ཚགས་ཀྱིས་དབུས་ལས་ཁུངས་ལ་འབུལ་བཞིན་ཡོད། དབུས་ལས་ཁུངས་ཀྱི་བཀའ་བློན་དང་དྲུང་ཆེ་རྩིས་པ་སོགས་ཀྱིས་ཞིབ་འཇུག་ཡག་པོ་གནང་མཐར་དཔལ་འབྱོར་ལས་ཁུངས་ལ་འབུལ་དགོས། དཔལ་འབྱོར་ལས་ཁུངས་ཀྱིས་ཞིབ་འཇུག་ཐེངས་གཅིག་བྱས་རྗེས་བཀའ་ཤག་ལ་སྤྲོད་དགོས་པ་རེད། བཀའ་ཤག་གིས་ཡང་བསྐྱར་ཞིབ་འཇུག་ཅིག་བྱས་ཏེ་བོད་མི་མང་སྤྱི་འཐུས་སྔོན་དཔག་འཆར་རྩིས་ཚོགས་ཆུང་ལ་ཕུལ་ཏེ། ཉིན་ ༡༠ རིང་ལྷན་ཁང་མ་ལག་དང་བཅས་པར་བསྐྱར་དུ་ཞིབ་འཇུག་བྱེད་ཀྱི་ཡོད་པ་རེད། ལོ་གཅིག་ལ་གྲོས་ཚོགས་ཐེངས་གཉིས་འཚོགས་བཞིན་ཡོད། ཕྱི་ཟླ་དགུ་པའི་གྲོས་ཚོགས་ནང་བཀའ་ཤག་གི་ལས་བསྡོམས་ཐོག་ལ་ཞིབ་འཇུག་དང་། ཕྱི་ཟླ་གསུམ་པའི་གྲོས་ཚོགས་ནང་བཙན་བྱོལ་བོད་གཞུང་གི་སྔོན་རྩིས་གཏན་འབེབས་ཀྱིས་མ་འོངས་པའི་ལོ་གཅིག་གི་འགྲོ་སོང་དང་ལས་འཆར་གཏན་འབེབས་བྱེད་ཀྱི་ཡོད། ཐེངས་འདིའི་གྲོས་ཚོགས་ནང་རྩིས་ཀྱི་ཐོག་ལ་ཉིན་གཉིས་ལས་གཏོང་ཐུབ་མེད་ཀྱང་། དཔལ་འབྱོར་བཀའ་བློན་གྱིས་གྲོས་ཚོགས་ཉིན་དང་པོ་རང་ལ་སྔོན་རྩིས་གྲོས་ཚོགས་ནང་སྙན་སྒྲོན་ཞུས་ཡོད་སྟབས། གྲོས་ཚོགས་འཐུས་མི་སོ་སོས་སྔོན་རྩིས་ཐོག་ལ་གཟིགས་ཞིབ་ཀྱི་དུས་ཚོད་གང་འཚམ་རག་ཡོད། ཐེངས་འདིར་གསུང་འཕྲིན་གྱི་དབང་གིས་སྔོན་རྩིས་ཐོག་དེ་ཙམ་ཞིབ་ཚགས་མ་བྱུང་ཡང་། འཐུས་ཤོར་ལ་འགྲོ་རྒྱུའི་ཉེན་ཁ་ཡོད་པ་མ་རེད། 

དྲི་བ། ལོ་སྔོན་མ་དག་དང་བསྡུར་ན་བཙན་བྱོལ་བོད་མིའི་དཔལ་འབྱོར་གྱི་གནས་བབ་གང་འདྲ་ཆགས་ཡོད་པ་དང་། རང་མགོ་རང་ཐོན་གྱི་ཕྱོགས་ལ་འབད་བརྩོན་ཆེན་པོ་གནང་གི་ཡོད་པ་ལྟར། ད་ཆར་ཕྱིའི་རོགས་ཚོགས་ཁག་དང་། སྐུ་སྒེར་ཡིག་ཚང་ལ་བརྟེན་མ་དགོས་པར་རང་མགོ་རང་ཐོན་གྱི་ཕྱོགས་ལ་རེ་བ་གང་འདྲ་འདུག་གམ།

ལན། ང་རང་ཕྱི་ལོ་ ༡༩༩༦ ནས་སྤྱི་འཐུས་བྱས་པ་རེད། སྐབས་དེ་ལ་མཚོན་ན། བཙན་བྱོལ་བོད་གཞུང་ལ་དང་བླང་དཔྱ་དངུལ་ལག་དེབ་གཙོས་པའི་ཡོང་འབབ་ཧིན་སྒོར་བྱེ་བ་གཅིག་དང་ས་ཡ་དྲུག་འབུམ་བརྒྱད་ ༡༦༨༠༠༠༠༠ ཙམ་ལས་ཡོད་པ་མ་རེད། ད་ལོར་མཚོན་ན་དཔྱ་དངུལ་ལག་དེབ་ཀྱིས་མཚོན་པའི་ཡོང་འབབ་ཧིན་སྒོར་བྱེ་བ་བརྒྱད་ ༨༠༠༠༠༠༠༠ ཙམ་རེད། འདས་པའི་ལོ་ ༡༥ དེའི་རིང་དང་བླང་དཔྱ་དངུལ་ལག་དེབ་ཀྱི་དངུལ་འབོར་ལ་སྤར་ཆ་བྱས་མེད་ཀྱང་། སྤྲོད་མཁན་མང་དུ་ཕྱིན་ཏེ་ད་ལོར་མཚོན་ན། དཔྱ་དངུལ་ལག་དེབ་ཞུ་མཁན་ཆིག་འབུམ་སུམ་ཁྲི་དགུ་སྟོང་ ༡༣༩༥༢༣ ཙམ་བྱུང་ཡོད་པ་ལས། མི་ཆིག་འབུམ་སུམ་ཁྲི་ལྷག་གིས་དཔྱ་དངུལ་འབུལ་བཞིན་འདུག 

རང་མགོ་རང་ཐོན་ཟེར་བ་འདིའི་ཐད་སྔོན་མ་ནས་ང་རང་སྒེར་ལ་བསམ་ཚུལ་ཞིག་བཤད་བསྡད་ཡོད། དང་བླང་དཔྱ་དངུལ་ལག་དེབ་དང་། ཟས་བཅད་ཀྱི་དོད་སོགས་ཅུང་སྤར་དགོས་ཀྱི་འདུག ༡༩༧༢ ལོར་བོད་རང་དབང་ལྡན་པའི་ལས་འགུལ་ཚོགས་ཆུང་ཐོག་མར་བཙུགས་སྐབས། དང་བླང་དཔྱ་དངུལ་ཟླ་བ་རེ་ལ་སྒོར་ ༣ རེ་དང་། བོད་པའི་རྩ་དོན་ཆེད་ལོ་གཅིག་ནང་ཉིན་གཉིས་ལ་ཟས་བཅད་བྱ་རྒྱུ་ཡིན་ཟེར་ནས་ལོ་རེར་ཧིན་སྒོར་ ༡༠ བཅས་བོད་གཞུང་ལ་འབུལ་བཞིན་ཡོད་པ་རེད། དེ་གཉིས་བསྡོམས་ཏེ་དང་བླང་དཔྱ་དངུལ་ལག་དེབ་བརྒྱུད་དེ་ལོ་གཅིག་ལ་ཧིན་སྒོར་ ༤༦ ཙམ་ཡོང་གི་ཡོད། ད་ལྟའི་དངོས་ཡོད་གནས་སྟངས་ལ་མཚོན་ན། ཉིན་གཅིག་ལ་སྒོར་ ༥ ཡིས་ཟ་མ་རག་ཐབས་མེད་པ་དེ་གསལ་བོ་རེད། དེ་བས་ད་ལྟའི་ཡུལ་ཐང་གི་འགྲོ་སྟངས་ལྟར་ཉིན་གཅིག་ལ་ཧིན་སྒོར་ ༥༠ རེ་བྱས་ཏེ། ལོ་གཅིག་གི་ཉིན་གཉིས་དེ་ལ་ཧིན་སྒོར་ ༡༠༠ རེ་བོད་པའི་རྩ་དོན་ཐོག་འབུལ་ཐུབ་པ་ཡིན་ན། མ་འོངས་པར་བཙན་བྱོལ་བོད་གཞུང་གིས་རང་ཁ་རང་གསོ་ཐུབ་པ་མ་ཟད། བོད་པའི་རྩ་དོན་ལ་ཡང་ཕན་ཐོག་ཆེན་པོ་ཡོད་པ་བཤད་མ་དགོས་པ་རེད།

དྲི་བ། ཐེངས་འདིའི་གྲོས་ཚོགས་སྟེང་༧གོང་ས་མཆོག་གི་གསུང་འཕྲིན་ཐོག་བགྲོ་གླེང་གནང་སྐབས། མདོ་སྟོད་སྤྱི་འཐུས་སྤྲུལ་སྐུ་ཨོ་རྒྱན་སྟོབས་རྒྱལ་དང་དབུས་གཙང་སྤྱི་འཐུས་ཀརྨ་ཆོས་འཕེལ་གཉིས་གྲོས་ཚོགས་ལས་ཕྱིར་ཐོན་ཡོད་པ་དེའི་སྐོར་གྱི་གནས་སྟངས་གང་འདྲ་ཆགས་ཡོད་དམ།

ལན། ད་ཐེངས་༧གོང་ས་མཆོག་གིས་གྲོས་ཚོགས་ལ་གསུང་འཕྲིན་ཕེབས་པ་དེ་ལོ་རྒྱུས་དང་འབྲེལ་བ་ཆེན་པོ་ཡོད་པ་ཞིག་རེད། གྲོས་ཚོགས་ལ་དཀའ་ལས་ཁག་པོ་ཞིག་བྱུང་སོང་། གང་ཡིན་ཟེར་ན། ང་ཚོ་མི་མང་གི་སྐུ་ཚབ་ཡིན་དུས་མི་མང་གི་མངོན་འདོད་དེ་ལ་ཡང་ལྟ་དགོས་པ་ཞིག་དང་། ༧གོང་ས་མཆོག་གིས་བཀའ་ནན་དེ་འདྲ་ཞིག་ཕེབས་ཡོང་སྐབས་དེ་ཡང་ལྡོག་ཐབས་མེད་པ་ཞིག་རེད། ༧གོང་ས་མཆོག་གིས་བགྲེས་ཡོལ་ཆ་ཚང་གནང་གི་ཡིན་གསུངས་མ་ཐག བོད་ཕྱི་ནང་གཉིས་ཀྱི་སྤྱི་སྒེར་གཉིས་ཐོག་ནས་ཡི་གེ་མང་པོ་ཞིག་བཀའ་ཤག་དང་སྤྱི་འཐུས། སྐུ་སྒེར་ཡིག་ཚང་བཅས་ལ་བསླེབས་འདུག དེར་བརྟེན། བཀའ་སྤྱི་གཉིས་ཐོག་ནས་གསོལ་འདེབས་སྙན་ཞུ་ཕུལ་བ་རེད། ཐེངས་འདིའི་གྲོས་ཚོགས་ནང་སྤྱི་འཐུས་གཅིག་གཉིས་ཤིག་མ་གཏོགས་གསོལ་བ་ཕུར་ཚུགས་སུ་འདེབས་དགོས་ཟེར་ནས་དགོངས་ཚུལ་གཅིག་མཐུན་རེད། དེའི་ནང་ནས་སྤྲུལ་སྐུ་ཨོ་རྒྱན་སྟོབས་རྒྱལ་ལགས་ཀྱིས་ཁོང་སྒེར་གྱི་རྒྱུ་མཚན་ཞིག་དང་འབྲེལ་ཏེ། སྤྱི་འཐུས་ནས་རྩ་དགོངས་ཞུས་པ་རེད། དེ་ནི་ཁོང་སྔར་༧གོང་ས་མཆོག་ལ་སྐུ་དབང་འབུལ་མཁན་གྲས་སུ་ཚུད་ཡོད་པ་མ་རེད། ད་ཆར་སྐུ་དབང་མེད་པ་བཟོ་སྐབས་ཆ་ཤས་བླང་ན་འགྲིག་གི་མ་རེད་ལ། ད་དུང་གྲོས་ཚོགས་ནང་མུ་མཐུད་བསྡད་ན་དེ་བས་ཚབས་ཆེན་རེད་ཟེར་ནས་སྤྱི་འཐུས་ནས་རྩ་དགོངས་ཞུས་པ་རེད། སྤྱི་འཐུས་ཀརྨ་ཆོས་འཕེལ་ལགས་ལ་མཚོན་ན། ༧གོང་ས་མཆོག་གི་སྐུ་དབང་ལེན་པའི་སྐབས་སུ་གྲོས་ཚོགས་ནང་འདུག་ཐུབ་ས་མ་རེད་ཟེར་ནས་དགོངས་པ་ཞུས་པ་རེད།

དྲི་བ། ད་ཆར་བཀའ་སྤྱི་གཉིས་ལས་གྲུབ་པའི་བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་ཞིག་བཙུགས་ཡོད་སྟབས། ཚོགས་ཆུང་དེའི་གྲུབ་སྟངས་དང་ལས་དོན་བྱེད་ཕྱོགས། བཅའ་ཁྲིམས་ནང་གི་༧གོང་ས་མཆོག་གི་སྐུ་དབང་བགོ་བཤའ་རྒྱག་ཕྱོགས་གང་འདྲ་ཡོད་དམ།

ལན། ཐེངས་འདིའི་གྲོས་ཚོགས་ནང་གསུང་འཕྲིན་ཐོག་ལས་འཆར་ཚོགས་ཚུང་བཙུགས་ཤིང་། ལས་འཆར་ཚོགས་ཆུང་གི་སྙན་ཐོའི་ཐོག་བགྲོ་གླེང་ཞིབ་ལྷུག་གནང་མཐར་བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་འཛུགས་གཏན་འཁེལ་བ་རེད། ཚོགས་ཆུང་དེའི་ནང་བོད་མི་མང་སྤྱི་འཐུས་ཚོགས་གཙོ་ཚོགས་གཞོན་གཉིས་དང་། བཀའ་ཁྲི་ཟམ་གདོང་རིན་པོ་ཆེ་མཆོག ཤེས་རིག་བཀའ་བློན་ཐུབ་བསྟན་ལུང་རིག སྤྱི་འཐུས་ཚོགས་ཟུར་པད་མ་འབྱུང་གནས་བཅས་མི་ ༥ ཡོད་པ་རེད། ཚོགས་ཆུང་དེའི་ལས་རིམ་ད་ལྟ་འགྲོ་མུས་རེད། ལས་འཆར་ཚོགས་ཆུང་གི་སྙན་ཐོ་དེ་གཞི་རྩར་བཟུང་སྟེ། བཅའ་ཁྲིམས་ནང་གི་༧གོང་ས་མཆོག་གི་སྐུ་དབང་དང་འབྲེལ་བའི་དོན་ཚན་ ༣༩ ཙམ་ཡོད་པ་ཚང་མ་བགོ་བཤའ་རྒྱག་བཞིན་ཡོད་པ་རེད།

ལས་འཆར་ཚོགས་ཆུང་གི་སྒྲོམ་གཞིའི་ནང་མེད་པ་ཞིག་ལ། ༧གོང་ས་མཆོག་གིས་ཆབ་སྲིད་ཀྱི་ཐུགས་འགན་བཞེས་རྒྱུ་མིན་རུང་། བཅའ་ཁྲིམས་ཀྱི་དོན་ཚན་དང་པོའི་ནང་། རྒྱལ་བ་རིན་པོ་ཆེ་བོད་མིའི་མགོན་སྐྱབས་དང་། བླ་ན་མེད་པའི་དབུ་ཁྲིད་བཅས་སྐུ་དབང་རང་ཆས་སུ་ཡོད་པའི་དོན་ཚན་ ༥ ཞིག་གསལ་ཡོད་པ་རེད། དེ་མིན་བཅའ་ཁྲིམས་ནང་གི་སྐུ་དབང་ཡོངས་རྫོགས་བསྐྱར་བཅོས་འགྲོ་དགོས་སྟབས། གདམ་ཀ་གཉིས་པ་ཞིག་ནི། གསུང་འཕྲིན་ནང་ཡུལ་མིའི་རྒྱལ་ཁབ་ཅེས་བཀོད་ཡོད། ཡུལ་མིའི་རྒྱལ་ཁབ་ཟེར་བ་དེ་དབྱིན་ཡིག་ནང་ Republic ཟེར་བ་དེ་རེད། དེ་ནི་འཛིན་སྐྱོང་བཀའ་ཤག་དང་། ཁྲིམས་བཟོའི་སྤྱི་འཐུས་ལྷན་ཚོགས། ཁྲིམས་ལུགས་དབང་འཛིན་ཆེས་མཐོའི་ཁྲིམས་ཁང་གསུམ་ལ་དབང་ཆ་བགོ་བཤའ་རྒྱག་རྒྱུ་ཙམ་མ་ཡིན་པར། དེའི་སྒང་ལ་མི་གཅིག་བསྐོ་བཞག་བྱ་དགོས་པ་རེད། དེ་འདེམས་སྟངས་དང་མཚན་གང་འདྲ་ཞིག་འདོག་མིན་བསམ་ཞིབ་བྱ་དགོས་པ་ཞིག་རེད། སྤྱི་ཁྱབ་གཙོ་འཛིན་དེས་ཁྲིམས་དང་སྒྲིག་གཞི་བསྐྱར་བཅོས་རིགས་ལ་མཚན་རྟགས་བསྐྱོན་རྒྱུ་དང་། མིང་རྟགས་གཟེངས་རྟགས་རིགས་གནང་རྒྱུ། བཀའ་རྩ་ཁྱབ་བསྒྲགས་གཏོང་རྒྱུ། བཀའ་ཤག་དང་སྤྱི་འཐུས་འཕོ་འགྱུར་གཏོང་རྒྱུ་སོགས་ད་ལྟའི་༧གོང་ས་མཆོག་གི་མཚན་གནས་རྗེས་འབྲེལ་གྱི་སྐུ་དབང་རྣམས་འཁྱེར་ཆོག་དང་མི་ཆོག དེ་བཞིན། མི་དེ་གཅིག་པུས་ཐག་གཅོད་ཆོག་པ་ཞིག་ཀྱང་མིན་པར་གྲོས་བསྡུར་གནང་དགོས་པ་བཅས་ལ་ང་ཚོས་ད་ལྟ་གོ་བསྡུར་བྱེད་མུས་ཡིན། ང་ཚོའི་བཅའ་ཁྲིམས་བསྐྱར་བཅོས་ཀྱི་ཟིན་བྲིས་དེ་ཕྱི་ཟླ་ ༤ ཚེས་ ༡༡ ནང་ཚུན་ལ་ཚོགས་དྲུང་ལས་ཁུངས་ལ་འབུལ་ཐུབ་དགོས་པ་རེད། དེ་དག་གང་མགྱོགས་བརྒྱུད་ལམ་ཁག་ལ་འགྲེམས་རྒྱུ་དང་། དུས་ཚོད་བྱུང་བ་ཡིན་ན་ང་ཚོའི་ཚོགས་ཆུང་གི་ཚོགས་མི་ས་གནས་སུ་བསྐྱོད་དེ་མང་ཚོགས་ལ་འགྲེལ་བཤད་རྒྱག་རྒྱུ་བཅས་ཀྱི་ལས་རིམ་བསྒྲིགས་ཡོད།

དྲི་བ། བཙན་བྱོལ་བོད་གཞུང་འདི་གྲོས་ཚོགས་ལམ་ལུགས་ཀྱི་དམངས་གཙོའི་གཞུང་ཞིག་ཡིན་ཟེར་གྱི་ཡོད་པ་རེད། སྐུ་ཉིད་ཀྱིས་གོང་དུ་གསུངས་པའི་སྤྱི་ཁྱབ་གཙོ་འཛིན་ཟེར་བ་ཞིག་བདམས་པ་ཡིན་ན། སྲིད་འཛིན་ལམ་ལུགས་ཀྱི་གཞུང་ཞིག་གི་ངོ་བོར་འགྱུར་སོང་བ་མ་རེད་དམ།

ལན། སྤྱིར་བཏང་ད་ལྟའི་ཆར་ལས་རིམ་འགྲོ་བཞིན་པ་ཡིན་སྟབས། ངས་ཆ་ཚང་པ་ཞིག་ཞུ་ཐུབ་ཀྱི་མི་འདུག་མོད། འོན་ཀྱང་མང་ཚོགས་ཀྱིས་ཤེས་དགོས་པ་དེའང་གལ་ཆེན་པོ་རེད། དཔེར་ན། ཁྲིམས་ལུགས་གཏན་འབེབས་བྱས་པ་ཁག་ལ་ད་བར་༧གོང་ས་མཆོག་གིས་མཚན་རྟགས་སྐྱོན་གྱི་ཡོད་པ་རེད། གྲོས་ཚོགས་ཀྱིས་ཁྲིམས་ལུགས་གཏན་འབེབས་བྱས་ཏེ། བཀའ་བློན་ཁྲི་པས་མཚན་རྟགས་བསྐྱོན་པ་ཡིན་ན། དེ་ཏག་ཏག་ཅིག་བསྡད་ཡོད་པ་མ་རེད། བཀའ་བློན་ཁྲི་པ་དེ་ལ་འོས་བླུག་རྒྱུའི་ཐོབ་ཐང་མེད་ཀྱང་། གྲོས་ཚོགས་ཀྱི་ཆ་ཤས་ཤིག་ཆགས་ཀྱི་ཡོད་སྟབས། གྲོས་ཚོགས་ཀྱིས་གཏན་འབེབས་ཟིན་པའི་ཁྲིམས་ལུགས་ཤིག་ལ་འདི་འགྲིག་གི་མི་འདུག་བསྐྱར་དུ་ཐུགས་ཞིབ་གནང་དགོས་ཀྱི་འདུག་ཟེར་བ་དེ་འདྲ་བྱུང་བ་ཡིན་ན། བཀའ་སྤྱི་གཉིས་བར་ཡག་པོ་ཡོང་གི་མ་རེད། ཡང་ཁྲིམས་ཞིབ་པ་ཆེ་བའི་ལག་ཏུ་བཞག་པ་ཡིན་ན། ང་ཚོའི་ཁྲིམས་ཞིབ་ཁང་དེ་མི་མང་གནད་དོན་ཐག་གིས་གཅོད་མཁན་ཙམ་དུ་མ་ཟད་བཅའ་ཁྲིམས་དང་སྒྲིག་གཞི་ཁག་ལ་འགྲེལ་བཤད་རྒྱག་མཁན་ཞིག་ཀྱང་ཆགས་ཀྱི་ཡོད་སྟབས། མཚན་རྟགས་རྒྱག་མཁན་ཁྲིམས་ཞིབ་པ་དང་། དེ་ལ་འགྲེལ་བཤད་རྒྱག་མཁན་ཡང་ཁྲིམས་ཞིབ་པ་ཆགས་ན། དྲང་པོ་ཆགས་ཐུབ་མིན་ལ་དཀའ་ངལ་ཞིག་ཡོང་གི་རེད། དེ་བཞིན། བཀའ་བློན་ཁྲི་པའི་གཙོས་པའི་བཀའ་བློན་རྣམ་པས་ཁྲིམས་ཞིབ་པ་ཆེ་བར་དམ་བཅའ་འབུལ་ཆོག་ཀྱང་། ཁྲིམས་ཞིབ་པ་ཆེ་བ་བསྐོ་བཞག་སྐབས་སུ་ལ་དམ་བཅའ་འབུལ་དགོས་པ་རེད། བཀའ་ཤག་ལ་འཕོ་འགྱུར་གཏོང་སྐབས་སྤྱི་འཐུས་ཀྱིས་གཏོང་ཆོག་ཀྱང་། སྤྱི་འཐུས་ལ་འཕོ་འགྱུར་གཏོང་སྐབས་སུ་ཞིག་གིས་གཏོང་དགོས་པ་རེད། ད་ཆར་ང་ཚོས་༧གོང་ས་མཆོག་གི་སྐུ་དབང་ནང་ལོགས་ནས་ཁྲིམས་ཀྱི་ནུས་པ་ཡོད་པ་ཁག་དམངས་གཙོའི་ཀ་བ་གསུམ་ཀའི་སྟེང་ལ་བགོ་བཤའ་རྒྱག་གི་ཡོད་ཀྱང་། སྲིད་འཛིན་གྱི་ངོ་བོ་དང་སྤྱི་ཁྱབ་གཙོ་འཛིན་གྱི་ངོ་བོ་ཞིག་མེད་པ་ཡིན་ན། བཀའ་རྩ་ཁྱབ་བསྒྲགས་སུ་ཞིག་གིས་གཏོང་དགོས་པ་རེད། བཀའ་བློན་ཁྲི་པ་དེ་མི་མང་ཁྱོན་ཡོངས་ནས་ཐད་ཀར་བདམས་ཐོན་བྱུང་ཡོང་བ་ཞིག་རེད། བཀའ་བློན་ཁྲི་པ་ལས་དབང་ཚད་ཆེ་བ་བཟོས་ན་འགྲིག་གི་མེད་ཀྱང་། གོ་གནས་ཀྱི་དབང་གིས་དེ་འདྲ་ཞིག་གི་ལམ་ཁ་བཟོས་ཤིང་། སྤྱི་ཁྱབ་གཙོ་འཛིན་དེ་ཁྲིམས་དཔོན་རྣམ་པ་དང་བཀའ་བློན་རྣམ་པ། དེ་བཞིན་སྤྱི་འཐུས་རྣམ་པ། དེའི་སྒང་ལ་ས་གནས་གྲོས་ཚོགས་བཅས་ནས་འོས་བསྡུའི་ལམ་ནས་འདེམས་རྒྱུའི་ལམ་ཁ་ཞིག་བཟོས་ཏེ། དེ་ལ་མི་མང་གི་བསམ་ཚུལ་བསྡུ་བ་དང་། རྒྱལ་ཡོངས་ཚོགས་ཆེན་སྐབས་གོ་བསྡུར་གནང་བ་ཡིན་ན་ལམ་ཁ་ཞིག་བརྙེད་ཡོང་གི་རེད་བསམ་ཡོད།

དྲི་བ། ཐེངས་འདིའི་སྤྱི་འཐུས་གྲོས་ཚོགས་ནང་༧གོང་ས་མཆོག་གི་གསུང་འཕྲིན་དགོངས་དོན་ལ་ངོས་བཞེས་གནང་ཟིན་པ་མ་ཟད། བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་བསྐོ་བཞག་དང་། ༧གོང་ས་མཆོག་ལ་སྐྱབས་འཇུག་ཞུ་རྒྱུའི་དོན་གནད་འགའ་ཡང་གྲ་སྒྲིག་ཟིན་ཡོད་པ་རེད། དེས་ན་བོད་རྒྱལ་ཡོངས་གཞུང་མང་རྒྱལ་ཡོངས་ཚོགས་ཆེན་གྱི་དགོས་དམིགས་གང་ཡིན་ནམ།

ལན། བོད་རྒྱལ་ཡོངས་གཞུང་མང་ཚོགས་ཆེན་ཐེངས་གཉིས་པ་འཚོགས་རྒྱུ་གཏན་ཁེལ་ཚར་བ་རེད། ཚོགས་ཆེན་དེའི་ལས་འགན་གང་རེད་ཟེར་ན། ༧གོང་ས་མཆོག་གི་གསུང་འཕྲིན་ནང་། བཅའ་ཁྲིམས་ནང་གི་མཚན་གནས་རྗེས་འབྲེལ་ཡོངས་སུ་རྫོགས་པ་བསྐྱར་བཅོས་བྱ་དགོས་པའི་བཀའ་གནང་ཡོད། དེ་བཞིན་ཆབ་སྲིད་དང་སྤྱི་ཚོགས་ཀྱི་འགན་དེ་མི་མང་གིས་འོས་འདེམས་བྱས་པའི་མགོ་ཁྲིད་དེས་འཁུར་དགོས་ཞེས་བསྟན་ཡོད། འོན་ཀྱང་༧གོང་ས་མཆོག་དང་བོད་མི་མང་བར་གྱི་འབྲེལ་བ་དེ་མུ་མཐུད་གནས་དགོས་པ་དང་། ༧གོང་ས་མཆོག་གི་སྤྱིར་བཏང་སྐུ་ཚབ་ཕྱི་རྒྱལ་དོན་གཅོད་ཁག་དང་། བོད་རྒྱ་འབྲེལ་མོལ་ཐད་ཀྱི་དམིགས་བསལ་སྐུ་ཚབ་རྣམ་གཉིས་སོགས་མུ་མཐུད་༧གོང་ས་མཆོག་གིས་གནང་ཆོག་པ། བོད་པའི་རྩ་དོན་དང་གནད་དོན་གལ་ཆེན་རིགས་ལ་༧གོང་ས་མཆོག་གིས་བཀའ་ཤག་དང་སྤྱི་འཐུས་ལ་ལམ་སྟོན་ཕེབས་དགོས་པ། དེ་བཞིན། ཆེས་མཐོའི་མི་སྣ་ཁག་དང་མཇལ་འཕྲད་སོགས་ཀྱི་ལམ་ཁ་ཞིག་བཟོ་བཞིན་ཡོད་པ་རེད། དེ་དག་ཐོག་རྒྱལ་ཡོངས་ཚོགས་ཆེན་སྟེང་བགྲོ་གླེང་བསམ་ཚུལ་བསྡུས་དེ། བཅའ་ཁྲིམས་ནང་འགོད་ཆོག་རྒྱུར་སྐྱབས་འཇུག་ཞུ་དགོས་པ་རེད། ཕྱི་ཚེས་ ༢༡ ནས་ ༢༣ བར་ཚོགས་ཆེན་ཚོགས་ཏེ། ཚེས་ ༢༤ ཉིན་༧གོང་ས་མཆོག་ལ་སྙན་སྒྲོན་ཞུ་དགོས་པ་རེད། གོང་གི་གནད་དོན་དེ་དག་ལ་༧གོང་ས་མཆོག་གིས་ཞལ་བཞེས་ཐོབ་སོང་བ་ཡིན་ན། ཚེས་ ༢༥ ཉིན་ནས་སྐབས་བཅུ་བཞི་བའི་གྲོས་ཚོགས་ཚོགས་དུས་འཕར་མ་ཞིག་ཚོགས་ཏེ་ཉིན་གསུམ་རིང་ད་ལྟ་ང་ཚོས་བཅའ་ཁྲིམས་བསྐྱར་བཅོས་ཀྱི་ཟིན་བྲིས་འདེབ་བཞིན་པ་དེ་དག་གཏན་འབེབས་བྱ་དགོས་པ་རེད། དེ་དག་ལེགས་པར་འགྲུབ་པའི་རྗེས་ལ་ཚེས་ ༣༠ ཉིན་སྤྱི་འཐུས་གསར་པ་ཚོས་དམ་འབུལ་ཞུ་རྒྱུ་དང་། ཕྱི་ཟླ་ ༦ ཚེས་ ༡ ཉིན་ནས་མུ་མཐུད་གྲོས་ཚོགས་ཚོགས་ཏེ་བཅའ་ཁྲིམས་བསྐྱར་བཅོས་བྱས་ཡོད་པ་ལྟར་སྒྲིག་གཞི་ཁག་བསྐྱར་བཅོས་གནང་དགོས་པ་རེད།

དྲི་བ། ༧གོང་ས་མཆོག་ལ་བོད་པའི་ཆབ་སྲིད་ཀྱི་སྐུ་དབང་མེད་པར་བཟོས་པ་ཡིན་ན། ༧གོང་ས་མཆོག་གི་དམིགས་བསལ་སྐུ་ཚབ་རྣམ་གཉིས་བརྒྱུད་བོད་རྒྱའི་འབྲེལ་མོལ་མུ་མཐུད་གནང་ཐབས་ཡོད་མེད་དང་། ༧གོང་ས་མཆོག་གི་མཚན་ཐོག་ན་ཡོད་པའི་ཕྱི་རྒྱལ་སྐུ་ཚབ་དོན་གཅོད་ཁག་དང་། ལྷག་པར་དུ་རྒྱ་གར་གཞུང་གིས་བཙན་བྱོལ་བོད་གཞུང་ལ་ལྟ་སྟངས་ཐད་དོ་ཕོག་འདྲ་འགྲོ་སྲིད་དམ། 

ལན། ད་ལྟ་ང་ཚོའི་བཅའ་ཁྲིམས་བསྐྱར་བཅོས་ཀྱི་ཟིན་བྲིས་ནང་། ༧གོང་ས་མཆོག་གི་སྤྱིར་བཏང་སྐུ་ཚབ་དང་དམིག་བསལ་སྐུ་ཚབ་སྐོར་ལ། ཉེ་སྔོན་ལས་འཆར་ཚོགས་ཆུང་གི་སྙན་ཐོའི་ནང་བཀོད་ཡོད་པ་དེ་ལྟ་བུ་ཞིག་གནས་བསྡད་ཡོད་པ་རེད། འོན་ཀྱང་། ༧གོང་ས་མཆོག་གི་དམིགས་བསལ་སྐུ་ཚབ་བརྒྱུད་དེ་བོད་རྒྱ་འབྲེལ་མོལ་གྱི་གནས་སྟངས་གང་འདྲ་ཆགས་མིན་དེ་བཅའ་ཁྲིམས་བསྐྱར་བཅོས་གཏན་འབེབས་ཚར་ན་མ་གཏོག་བཤད་ཐུབ་ས་མ་རེད། ལྷག་པར་དུ་ང་གྲོས་ཚོགས་ཀྱི་ཚོགས་གཙོའི་ངོས་ནས་འདིའི་སྐོར་གསལ་བོར་བཤད་ཐུབ་པ་ཞིག་ཀྱང་མ་རེད། ཕྱི་རྒྱལ་སྐུ་ཚབ་དོན་གཅོད་ཁག་ལ་དམིགས་བསལ་འགྱུར་བ་འགྲོ་ཡི་མ་རེད་བསམ་ཡོད། བཙན་བྱོལ་བོད་གཞུང་ཟེར་བ་དེ་ལ་འཛམ་གླིང་གི་རྒྱལ་ཁབ་སུ་གང་གིས་ཀྱང་ངོས་ལེན་ཡོད་པ་མ་རེད་ལ། རྒྱ་གར་གཞུང་གིས་ཀྱང་ད་བར་ ( Center Tibet Administertion)  ཞེས་༼ དབུས་བོད་མིའི་འཛིན་སྐྱོང་ལྷན་ཚོགས ༽ཞེས་འབྲེལ་བ་བྱེད་ཀྱི་ཡོད་པ་རེད། ཐེངས་འདིར་བཅའ་ཁྲིམས་ནང་དུ་ཡང་དེ་དང་འདྲ་བོ་ཞིག་བཟོས་ཡོད་པ་རེད། དེ་བཞིན། ༧གོང་ས་མཆོག་སྐུ་འཚོ་བཞུགས་རིང་། བོད་གཞིས་བྱེས་བར་གྱི་འབྲེལ་ལམ་དང་། ཕྱིའི་རྒྱལ་ཁབ་ཁག་གིས་བཙན་བྱོལ་བོད་གཞུང་ལ་ལྟ་སྟངས་ལ་འགྱུར་བ་འགྲོ་ཡི་མ་རེད་བསམ་ཡོད། དེའི་རྗེས་ཀྱི་གནས་སྟངས་ད་ལྟ་བཤད་ཁག་པོ་རེད།

གསར་འགོད་པ། དོན་འགྲུབ་བཀྲ་ཤིས།