ཨ་རི་དང་ཉི་ཧོང་། རྒྱ་གར་གསུམ་གྱིས་ད་ལྟའི་རྒྱ་ནག་གི་སྨྱོ་ཧམ་ལ་གདོང་ལེན་བྱས་ཏེ། ཨེ་ཤ་ཡའི་མངའ་ཁུལ་གྱི་བདེ་འཇགས་ཐད་མཉམ་འབྲེལ་ནུས་ཤུགས་ཆེ་རུ་གཏོང་རྒྱུ་ཡིན་འདུག
ཟླ་འདིའི་ཕྱི་ཚེས་ ༨ ཉིན་ཉི་ཧོང་ཕྱི་སྲིད་བློན་ཆེན་གཞོན་པ་ཁེ་ནེ་ཆོ་རའོ་ས་སའེ(Kenichiro Sasae)དང་། རྒྱ་གར་ཕྱི་སྲིད་བློན་ཆེན་གཞོན་པ་(Nirupama Rao) བཅས་ཀྱིས་ཕྱི་འབྲེལ་བློན་ཆེན་རིམ་པའི་གྲོས་མོལ་སྐབས། ཉི་ཧོང་དང་ཨ་རི། རྒྱ་གར་གསུམ་གྱི་མཉམ་འབྲེལ་ཐད་གྲོས་ཆོད་ཅིག་བཞག་ཡོད་ཅིང་། ཕྱི་ཚེས་ ༡༠ ཉིན་ཉི་ཧོང་སྤྱི་འབྲེལ་གསར་ཁང་གིས་གཞུང་ཕྱོགས་ཀྱི་མི་སྣའི་སྐད་ཆ་ལུང་འདྲེན་བྱས་ཡོད་པའི་ནང་། ཉི་ཧོང་དང་ཨ་རི། རྒྱ་གར་གསུམ་གྱི་མཉམ་འབྲེལ་གྲོས་ཆོད་ཀྱི་ནང་དོན་གཙོ་བོ་དམག་དོན་དང་དཔལ་འབྱོར་སོགས་མགྱོགས་མྱུར་ཡང་འཕེལ་རྒྱས་འགྲོ་བཞིན་པའི་རྒྱ་ནག་གི་དམག་དོན་ཆབ་སྲིད་ཀྱི་ཁ་ཕྱོགས་ལ་དབྱེ་ཞིབ་དང་གདོང་ལེན་བྱ་ཆེད། མ་འོངས་པར་རྒྱ་ཁབ་གསུམ་གྱིས་གྲོས་ཆོད་དེའི་རྨང་གཞིའི་ཐོག ཨེ་ཤ་ཡའི་མངའ་ཁུལ་གྱི་བདེ་འཇགས་ལས་དོན་ཐད་མཉམ་འབྲེལ་ནུས་ཤུགས་ཆེ་རུ་གཏོང་རྒྱུའི་སྐོར་ཡིན་ཚུལ་བརྗོད་འདུག
མ་གཞི་ཨེ་ཤ་ཡའི་མངའ་ཁུལ་གྱི་བདེ་འཇགས་ཐད་ཨ་རི་དང་ཉི་ཧོང་། རྒྱ་གར་གསུམ་མཉམ་འབྲེལ་གྱི་འཐབ་ཇུས་ལངས་ཕྱོགས་འཛིན་རྒྱུ་དེར་རྒྱ་གར་གྱི་ངོས་ནས་དེ་ཙམ་འདོད་མོས་བྱེད་ཀྱི་མེད་ཀྱང་། ཉེ་བའི་ལོ་འགའི་ནང་རྒྱ་ནག་གིས་མ་དངུལ་འབོར་ཆེན་བཏང་སྟེ། མངོན་གསལ་དོད་པོ་མིན་པའི་ཐོག་དམག་དོན་རྒྱ་བསྐྱེད་དང་། ཨེ་ཤ་ཡ་ཞི་བདེ་རྒྱ་མཚོའི་མངའ་ཁུལ་དང་མཐའ་འཁོར་རྒྱལ་མཚམས་ཁག་གི་བདག་དབང་ཐད་རང་སྣང་གང་དྲན་གྱིས་ཧམ་བཤད་དང་རྒྱལ་ཁབ་མང་པོར་སུན་གཙེར་ཡང་ཡང་བཟོས་ཏེ། ཨེ་ཤ་ཡའི་མངའ་ཁུལ་གཙོས་པའི་འཛམ་གླིང་གི་རྒྱལ་ཁབ་མང་པོར་བློ་འཚབ་དང་རྒྱལ་སྤྱིའི་ཆབ་སྲིད་ཀྱི་གནས་བབ་ལ་གཡོ་འགུལ་སློང་བསླངས་ཡོད་པར་བརྟེན། ཐེངས་འདིར་རྒྱ་གར་གྱིས་གྲོས་གཞི་བཏོན་ཏེ་ཨ་རི་དང་ཉི་ཧོང་། རྒྱ་གར་གསུམ་མཉམ་འབྲེལ་ཐད་གྲོས་ཆོད་བཞག་པ་ཞིག་ཡིན་འདུག
དེ་བཞིན་ཕྱི་ཚེས་ ༧ ཉིན་ཨ་རིའི་མཚོ་ཐོག་དམག་སྤྱི་ཝེ་ལེར་ཌི་(Robert Willard) ལགས་ཀྱིས་ནེའུ་ཡོག་བཟོ་སྐྲུན་སློབ་ཆེན་ནང་། རྒྱ་ནག་གི་དམག་དོན་རྒྱ་བསྐྱེད་སྐོར་ལ་གསལ་བཤད་ཅིག་བྱས་སྐབས། རྒྱ་ནག་གིས་གསང་བའི་ཐོག་མས་མི་རྣམས་ཀྱི་བློ་ཡུད་ལས་འདས་པའི་དམག་དོན་རྒྱ་བསྐྱེད་བྱས་ཡོད་པ་མ་ཟད། འདས་པའི་ལོ་འགའི་རིང་རྒྱལ་སྤྱིའི་སྒང་སྟོན་བཞིན་པའི་རྣམ་འགྱུར་ངན་པ་དེས། མཐའ་འབྲེལ་རྒྱལ་ཁབ་ཚང་མར་བློ་འཚབ་བསླངས་ཡོད་ལ། ཨེ་ཤ་ཡའི་མངའ་ཁུལ་གྱི་བདེ་འཇགས་ལ་གནོད་གཞི་གཙོ་བོ་བྱང་ཀོ་རི་ཡའི་རྡུལ་ཕྲན་མཚོན་ཆ་ཡིན་ལ། རྒྱ་ནག་ནི་བྱང་ཀོ་རི་ཡའི་མཛའ་འབྲེལ་རྒྱལ་ཁབ་གཙོ་བོ་དེ་ཡིན་སྟབས། བྱང་ཀོ་རི་ཡའི་བྱ་སྤྱོད་མཐའ་དག་ཐག་གཅོད་ཐུབ་མིན་གྱི་གཞི་རྩ་དེའང་རྒྱ་ནག་ཆགས་ཡོད། ཉེ་སྔོན་ཨ་རིའི་རྒྱལ་སྲུང་བློན་ཆེན་གྷེ་ཚི་ ( Robert Gates) ལགས་ཀྱིས་འཛམ་གླིང་གི་རྡུལ་མཚོན་འཐབ་ཇུས་དང་། དྲ་བའི་ལག་རྩལ། མཁའ་ཐོག་གི་ལག་རྩལ་སོགས་ཀྱི་ཐད་རྒྱ་ནག་གི་མཐོ་རིམ་དཔོན་རིགས་དང་གླེང་མོལ་བྱ་འདུན་ཡོད་སྐོར་སྔ་རྗེས་ཐེངས་གཉིས་ལ་བརྗོད་ཀྱང་། རྒྱ་ནག་གིས་བསམ་བློ་གཏོང་དགོས་ཚུལ་གྱིས་ནར་འགྱངས་བྱས་ཏེ་མཉམ་འབྲེལ་བྱས་མེད། དེར་བརྟེན། ཨ་རིའི་ཕྱོགས་ནས་རྒྱ་ནག་གིས་དྲ་རྒྱ་དང་མཁའ་ཐོག་གི་ལག་རྩལ་སོགས་འཛམ་གླིང་བདེ་འཇགས་ཁྱབ་ཁོངས་ཀྱི་འབྲེལ་ལམ་ཐད། སྔར་གྱི་རྣམ་འགྱུར་ལ་བཅོས་བསྒྱུར་བྱས་ཏེ་འགན་ལེན་ཡོད་པའི་རྒྱལ་ཁབ་ཅིག་གི་རྣམ་པ་གསལ་བོ་སྟོན་རྒྱུར་རེ་བ་ཡོད་ཅེས་བརྗོད་ཡོད།
གཞན་ཡང་། དམག་སྤྱི་ཝེ་ལེར་ཌི་ལགས་ཀྱིས་རྒྱ་གར་ནི་མི་གྲངས་ཆེས་མང་བའི་དམངས་གཙོའི་རྒྱལ་ཁབ་ཅིག་དང་། དཔལ་འབྱོར་ཡར་རྒྱས་དང་ལྷོ་ཤར་ཨེ་ཤ་ཡའི་ནང་ཤུགས་རྐྱེན་ཆེན་པོ་ཡོད་མཁན་ཞིག་ཡིན་ལ། ཨ་རི་དང་རྒྱ་གར་བར་སྔར་ནས་མཛའ་འབྲེལ་ཞིག་གནས་ཡོད་པས། མ་འོངས་པར་འཐབ་ཇུས་རང་བཞིན་གྱི་མཉམ་འབྲེལ་ཤུགས་ཆེ་རུ་གཏོང་དགོས་པ་དང་། ཨ་རིའི་ངོས་ནས་སྔར་ལས་ལྷག་པར་ཨོ་སི་ཊོ་ལི་ཡ་དང་ཉི་ཧོང་། ལྷོ་ཀོ་རི་ཡ། ཧྥེ་ལི་པེན། ཐེ་ལན་ཌི་སོགས་དང་མཉམ་འབྲེལ་གྱིས་ཨེ་ཤ་ཡའི་མངའ་ཁུལ་གྱི་ཞི་བདེ་ལས་དོན་ཐད། སྔར་ལས་ལྷག་པར་མཉམ་ཞུགས་བྱས་ཏེ་ཉེན་ཚབས་ལ་གདོང་ལེན་དང་། ཐུན་མོང་གི་ཁེ་ཕན་རྒྱ་བསྐྱེད་ཆེད་ནུས་པ་གང་ཡོད་འདོན་རྒྱུ་ཡིན་སྐོར་བརྗོད་འདུག
གསར་འགོད་པ། ཚེ་རིང་རྒྱལ།
