ཡང་སྙིང་པཎ་ཆེན་ཆུང་སྲིད་མཆོག་གང་དུ་ཡོད་དམ།

དེ་རིང་ངྷ་སའི་གཞུང་འབྲེལ་མིན་པའི་ཚོགས་པ་ལྔས་པཎ་ཆེན་ཆུང་སྲིད་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༢༢ ལ་སོན་པའི་དགའ་སྐྱོ་ཟུང་གི་འཁྲུངས་སྐར་སྲུང་གཙི་དང་འབྲེལ་རྒྱ་ནག་གཞུང་ལ། རིན་པོ་ཆེ་མཆོག་གང་དུ་བཞུགས་པ་དང་སྐུ་ཡི་གནས་སྟངས་གང་འདྲ་ཡོད་མེད་གསལ་འདེབས་དགོས་པའི་བསྒྲགས་གཏམ་སྤེལ་སོང་།

དེ་རིང་ཕྱི་ཚེས་ ༢༥ ཉིན་གྱི་སྔ་དྲོའི་ཆུ་ཚོད་ ༡༠ པའི་སྟེང་བཞུགས་སྒར་ངྷ་ས་ཐེག་ཆེན་ཆོས་གླིང་གཙུག་ལག་ཁང་དུ། བོད་ཀྱི་གཞུང་འབྲེལ་མིན་པའི་ཚོགས་པ་ཁག་ལྔའི་གོ་སྒྲིག་ཐོག ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་སྐུ་འཁྲུངས་ཏེ། མི་ལོ་ཧྲིལ་པོ་ ༢༢ འཁོར་བའི་དུས་དྲན་མཛད་སྒོ་ཞིག་ཚོགས་ཡོད་ཅིང་། མཛད་སྒོ་དབུ་འཛུགས་མ་བྱས་སྔོན་ལ་དགེ་འདུན་འདུས་མང་གིས་ཆུང་སྲིད་རིན་པོ་ཆེ་གང་མགྱོགས་ཀློད་གྲོལ་ཡོང་བར་གསོལ་སྨོན་རྒྱས་པ་ཞིག་ཚོགས་ཡོད་ལ། མཛད་སྒོའི་སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་ཕེབས་འདུག  

ཐོག་མར་ཚོགས་པ་ཁག་གི་སྐུ་ཚབ་ཀྱིས་བོད་དབྱིན་ཧིན་གསུམ་གྱི་ལམ་ནས་པཎ་ཆེན་ཆུང་སྲིད་ཀྱི་གནས་སྟངས་སྐོར་སྒྲོག་སྦྱང་བྱས་སོང་ལ། ཞུ་ཡིིག་དེའི་ནང་བཀོད་དོན། པཎ་ཆེན་རིན་པོ་ཆེའི་འཁྲུངས་སྐར་གྱི་ཉིན་འདིར། ང་ཚོས་རྒྱ་གཞུང་ལ་ཆུང་སྲིད་མཆོག་གང་དུ་བཞུགས་ཡོད་མེད་ཀྱི་དཔང་རྟགས་གསལ་པོ་སྟོན་དགོས་པའི་ནན་བརྗོད་བྱ་རྒྱུ་ཡིན། ༢༠༡༡ ལོའི་ཕྱི་ཟླ་ ༤ ཚེས་ ༢༥ ཉིན་ནི། དགེ་འདུན་ཆོས་ཀྱི་ཉི་མ་དགུང་ལོ་ ༢༢ སོན་པའི་འཁྲུངས་སྐར་ཉིན་མོ་ཡིན་ལ། འཛམ་གླིང་ཕྱོགས་མཐར་གནས་པའི་ནང་པའི་མི་རིགས་ཁག་གིས་ཆུང་སྲིད་རིན་པོ་ཆེའི་འཁྲུངས་སྐར་སྲུང་གཙི་བྱེད་བཞིན་ཡོད། ད་ལྟ་མི་རྣམས་ཀྱིས་སེམས་འཚབ་བྱེད་བཞིན་པ་ནི། ཆུང་སྲིད་མཆོག་གི་ད་ལྟའི་གནས་སྟངས་དངོས་ཇི་འདྲ་ཡིན་མིན་གྱི་སྐོིར་ཡིན་ཞིང་། ༡༩༩༥ ལོར་༧གོང་ས་མཆོག་གིས་དགེ་འདུན་ཆོས་ཀྱི་ཉི་མ་པཎ་ཆེན་སྐུ་ཕྲེང་བཅུ་བའི་ཡང་སྲིད་དུ་ངོས་འཛིན་གནང་སྟེ། ད་བར་མི་ལོ་ཧྲིལ་པོ་ ༡༦ ཙམ་ཕྱིན་ཡོད་ནའང་། མི་རྣམས་ཀྱིས་ཆུང་སྲིད་མཆོག་དང་ཁོང་གི་ཡབ་ཡུམ་སྐུ་འཁོར་འཚོ་བཞུགས་ཡོད་མེད་ཀྱི་གནས་སྟངས་ཤེས་རྟོགས་ཐུབ་ཀྱི་མེད། ཅེས་བཀོད་ཡོད།

༢༠༡༠ ལོའི་ཟླ་ ༣ པའི་ནང་བོད་རང་སྐྱོང་ལྗོངས་ཀྱི་མགོ་ཁྲིད་པདྨ་འཕྲིན་ལས་ཀྱིས་གསར་ལམ་ཁག་ཏུ། ཆུང་སྲིད་དང་ཁོང་གི་ཡབ་ཡུམ་སོགས་མི་མང་གཞན་དང་འདྲ་བར་བདེ་འཇགས་ཀྱི་འཚོ་བར་ལོངས་སུ་སྤྱོད་བཞིན་ཡོད་སྐོར་བརྗོད་ཡོད་ཀྱང་། རྒྱ་གཞུང་ལ་ད་དུང་ཡང་དགེ་འདུན་ཆོས་ཀྱི་ཉི་མ་གང་དུ་བཞུགས་ཡོད་མེད་ཀྱི་བརྡ་ལན་ཁ་གསལ་མེད་ན། ཉིན་འདི་ནས་བཟུང་ང་ཚོས་པདྨ་འཕྲིན་ལས་ཀྱི་ཧམ་བཤད་ལ་ཡིད་ཆེས་བྱ་ཐབས་མེད། རྒྱལ་སྤྱིའི་ཉེས་ཡངས་ཚོགས་པའི་བུད་མེད་དང་བྱིས་པའི་ཐོབ་ཐང་དང་། ཆོས་ལུགས་ཚོགས་སྡེ་ཁག་གིས་ཀྱང་ཆུང་སྲིད་མཆོག་གི་ད་ལྟའི་གནས་སྟངས་ཐོག་བློ་འཚབ་བྱེད་ཀྱིོན་ཡོད། ཅེས་བཀོད་འདུག

ཞུ་ཡིག་དེར་མུ་མཐུད་བཀོད་དོན། རྒྱ་གཞུང་གིས་རྒྱལ་སྤྱིའི་འགྲོ་བ་མིའི་ཐོབ་ཐང་དང་བཟང་སྤྱོད་རྡོག་རོལ་དུ་བཏང་སྟེ། ཆུང་སྲིད་རིན་པོ་ཆེ་དགུང་ལོ་དྲུག་ཐོག་འཛིན་བཟུང་བཙོན་འཇུག་གིས་གར་སོང་ཆ་མེད་ཆགས་ཡོད་སྟབས། བོད་པ་གཙོས་པའི་འཛམ་གླིང་མི་མང་གིས་རིན་པོ་ཆེ་འཚོལ་བཞིན་ཡོད་པའི་སྐབས་འདིར། ང་ཚོས་རྒྱ་གཞུང་ལ་ནན་ཏན་གྱིས་ཆུང་སྲིད་མཆོག་གང་དུ་བཅུག་ཡོད་མེད་ཁ་གསལ་ལན་འདེབས་དགོས་པའི་འབོད་སྐུལ་ཞུ་རྒྱུ་ཡིན་ལ། ཆུང་སྲིད་མཆོག་དགུང་ལོ་ཉེར་གཉིས་སུ་ཕེབས་པའི་ཉིན་འདིར་ཡང་། རྒྱ་གཞུང་གིས་ཆུང་སྲིད་མཆོག་དང་ཡབ་ཡུམ་སྐུ་འཁོར་བཅས་བཙོན་འཇུག་བྱས་པར་ངོ་རྒོལ་ཤུགས་ཆེན་བྱ་རྒྱུ་ཡིན། ཞེས་ཅེས་བཀོད་ཡོད་འདུག

མཇུག་ཏུ་སྐུ་མགྲོན་གཙོ་བོ་རྒྱ་རི་སྒྲོལ་མ་མཆོག་གིས་གསུངས་དོན། དེ་རིང་གི་ཉིན་མོར་འདིར་བོད་མི་སུ་འདྲ་ཞིག་ཡིན་རུང་། ༧རྒྱལ་བ་པཎ་ཆེན་རྣམ་གཉིས་ཀྱིས་བོད་ཀྱི་བསྟན་སྲིད་ལ་བཀའ་དྲིན་བསྐྱངས་བར་རྗེས་དྲན་དང་། ལྷག་པར་དུ་རྒྱལ་བ་སྐུ་ཕྲེང་བཅུ་བཞི་པ་མཆོག་དང་། པཎ་ཆེན་སྐུ་ཕྲེང་བཅུ་བ་དང་བཅུ་གཅིག་པའི་ངོས་ནས་བོད་བསྟན་སྲིད་དང་མི་རིགས་ཀྱི་ཆེད། བོད་ཀྱི་ལོ་རྒྱུས་ནང་བྱུང་མ་མྱོང་བའི་ཛ་དྲག་གི་གནས་སྟངས་ཐོག་ཐུགས་འགན་བཞེས་ཡོད་སྟབས། རླབས་ཆེན་མཛད་འཕྲིན་དེ་ལྟ་བུ་ཞིག་བསྐྱངས་བར་ངས་བོད་མི་ཡོངས་ཀྱི་ཚབ་བྱས་ཏེ་བཀའ་དྲིན་རྗེས་དྲན་ཞུ་རྒྱུ་ཡིན། ཞེས་དང་།

དེ་རིང་གི་གོ་སྐབས་དང་སྟབས་བསྟུན་ནས། རྒྱ་དམར་གུང་ཁྲན་གྱིས་བཙན་གནོན་འོག་ཡོད་པའི་གཙང་བཀྲ་ཤིས་ལྷུན་པོའི་དགེ་འདུན་པ་རྣམས་དང་། བཙན་བྱོལ་དུ་ཡོད་པའི་བཀྲ་ཤིས་ལྷུན་པོའི་བླ་སྤྲུལ་དགེ་འདུན་པ་ཡོངས་ལ། མང་གཙོའི་འགྲོ་ལུགས་ཐོག་འོས་འདེམས་བྱས་པའི་བོད་རིགས་མང་ཚོགས་ཀྱིས་ཚབ་མཚོན་ཐུབ་པའི་སྒྲིག་འཛུགས་འདིའི་ངོས་ནས་གདུང་སེམས་མཉམ་སྐྱེད་ཞུ་རྒྱུ་ཡིན། ཞེས་གསུངས་བྱུང་།

ཡང་ཁོང་གིས་པཎ་ཆེན་གྱི་གནས་སྟངས་དང་འབྲེལ་ནས་འབོད་སྐུལ་ཞུས་དོན། ང་ཚོ་ཚང་མས་པཎ་ཆེན་སྐུ་ཕྲེང་བཅུ་གཅིག་ད་ལྟ་གང་དུ་ཡོད་པ་དང་། གནས་སྟངས་ཇི་འདྲ་ཞིག་གི་འོག་ཡོད་མེད་ཤེས་རྟོགས་ཐུབ་ཀྱི་ཡོད་པ་མ་རེད། ལོ་གཉིས་ཀྱི་སྔོན་ལ་གསར་འགྱུར་བརྒྱུད་ལམ་ཞིག་གིས། པཎ་ཆེན་རིན་པོ་ཆེ་འཚོ་བཞུགས་མེད་པའི་གནས་ཚུལ་སོགས་བཀོད་མྱོང་ཡོད་པ་རེད། ༢༠༡༠ ལོའི་ཕྱི་ཟླ་ ༣ པའི་ནང་པདྨ་འཕྲིན་ལས་ཀྱིས་པཎ་ཆེན་རིན་པོ་ཆེ་སྐུ་གཟུགས་བདེ་ཐང་ཡིན་པའི་སྐད་ཆ་ཞིག་བཤད་པ་རེད། སྤྱིར་སྐད་ཆ་དེར་ཡིད་ཆེས་བྱ་ཐུབ་པ་ཞིག་མིན་ནའང་། ང་ཚོས་སྐད་ཆ་དེར་རེ་བ་རྒྱག་དགོས་བྱུང་ཡོད། ཅེས་དང་།

ཡང་ཁོང་མོས་མུ་མཐུད་དོན། དེ་རིང་འཁྲུངས་སྐར་ཉིན་མོ་འདིར་བཙན་བྱོལ་དུ་ཡོད་པའི་བཀྲ་ཤིས་ལྷུན་པོའི་ངོས་ནས། དོན་ཚན་བཞི་ཅན་གྱི་འབོད་སྐུལ་གསལ་བསྒྲགས་ཤིག་སྤེལ་འདུག་ལ། དེའི་དང་པོ་ནི། པཎ་ཆེན་རིན་པོ་ཆེ་སྐུ་འཚོ་བཞུགས་ཡོད་མེད་ཀྱི་གནས་ཚུལ་ཁ་གསལ་བཟོ་དགོས། གཉིས་པ། རང་དབང་ཅན་གྱི་སྒྲིག་འཛུགས་ཤིག་གིས་རིན་པོ་ཆེར་མཇལ་འཕྲད་ཀྱི་གོ་སྐབས་སྤྲོད་དགོས་རྒྱུ།  གསུམ་པ།  བྱ་བྲལ་རིན་པོ་ཆེ་གཙོས་པའི་བོད་ནང་གི་ཆབ་སྲིད་བཙོན་པ་རྣམས་འཕྲལ་དུ་ཀློད་གྲོལ་དགོས་པ། བཞི་བ། ༧གོང་ས་མཆོག་ལ་གཞི་མེད་ཀྱི་བསྙོན་འཛུགས་སོགས་རྩ་བ་ནས་བྱེད་ཆོག་གི་མེད་ཅེས་བཀོད་འདུག དོན་ཚན་བཞི་དེར་སྤྱི་འཐུས་ལྷན་ཚོགས་ཀྱི་ངོས་ནས་རྒྱབ་སྐྱོར་གཙང་མ་བྱ་རྒྱུ་ཡིན་པ་མ་ཟད། ང་ཚོའི་འབོད་སྐུལ་ཡང་ཁོང་ཚོ་དང་གཅིག་མཚུངས་ཡིན། ཞེས་གསུངས་སོང་།  

                                                                                                                                            གསར་འགོད་པ། དཔལ་ལྡན།