ཕྱི་ཟླ་ ༤ ཚེས་ ༢༢ ཡས་མས་ཤིག་ལ་རྔ་པ་རང་སྐྱོང་ཁུལ་མི་རིགས་མཐོ་འབྲིང་སློབ་གྲྭའི་སློབ་མ་རྣམས་ཀྱི་སློབ་དེབ་དང་ཀློག་དེབ་ཁག་ལ་རྒྱ་གཞུང་གིས་བརྟག་དཔྱད་བྱས་ཏེ། གཞུང་གི་ཆོག་མཆན་མེད་པའི་དཔེ་དེབ་ཚང་མ་འཕྲོགས་ཏེ་མེར་བསྲེགས་བཏང་ཡོད་འདུག་ལ། དེང་ཕྱིན་ཆད་སློབ་གྲྭའི་ནང་སློབ་མ་ཚོས་དཔེ་རྟགས་མེད་པའི་དཔེ་དེབ་རྩ་བ་ནས་ཉར་མི་ཆོག་པའི་བཙན་བཀའ་བཏང་ཡོད་འདུག སློབ་གྲྭ་དེར་རྔ་པ་རྫོང་ཁོངས་ཀྱི་སློབ་མ་མང་པོ་ཡོད་པ་རྣམས་ཕྱིར་རྔ་པ་རྫོང་ལ་དུས་ཚོད་ངེས་མེད་རིང་འགྲོ་མི་ཆོག་པའི་བཙན་བཀའ་བཏང་ཡོད་པ་མ་ཟད། སློབ་མ་རྣམས་དབྱར་གནང་སྐབས་ཕ་ཡུལ་ལ་འགྲོ་རྒྱུ་ད་ལྟ་ནས་འགོག་རྒོལ་བྱེད་བཞིན་ཡོད་འདུག
ཕྱི་ཚེས་ ༨ ཉིན་གནས་ཚུལ་གོ་གསལ་ལ་ཕྱི་ཟླ་ ༤ ཚེས་ ༡༥ ཡས་མས་ཤིག་ནས་རྔ་པ་རྫོང་ཕྱུགས་ལས་གོང་མའི་ཆོས་རྒྱམ་ཚང་གི་རང་ལོ་ ༣༣ ཡས་མས་ཡིན་པའི་ཆོས་རྒྱམ་རྔ་པ་ནས་གར་སོང་ཆ་མེད་དུ་གྱུར་ཡོད་འདུག་མོད། ཟླ་ ༥ ཚེས་ ༣ ཡས་མས་སུ་སི་ཁྲན་ཞིང་ཆེན་གྱི་ལྟེ་གནས་ཁྲིན་ཏུའུ་ནས་གསང་བའི་ལས་ཁུངས་ཀྱི་མི་སྣ་དང་ཉེན་རྟོག་པ་མཉམ་འབྲེལ་བྱས་ཏེ་རྔ་པ་རྫོང་ཐོག་ཏུ་ཡོད་པའི་ཁོང་གི་ཨ་མ་མ་ནེའི་ནང་དང་། འབྲོག་ན་ཡོད་པའི་ཁོ་རང་གི་ནང་བཅས་སུ་སྔོག་བཤེར་བྱས་ཡོད་པ་དང་། སྐབས་དེར་ཁོང་ཁྲིན་ཏུའུ་ལ་བཀག་ཉར་བྱས་ཡོད་པ་གསལ་པོ་ཆགས་ཡོད་འདུག ཁོང་གི་ཤུལ་དུ་གཟའ་ཟླ་དང་ལོ་གཅིག་ཅན་གྱི་བྱིས་པ་ཞིག་ལྷག་ཡོད།
འདི་ལྟར་དུས་ཡུན་ཧ་ཅང་རིང་པོའི་ནང་གར་སོང་ཆ་མེད་དུ་གྱུར་འགྲོ་གི་ཡོད་པ་རྣམས་རྒྱ་གཞུང་གི་གསང་བའི་ལས་ཁུངས་དང་ཉེན་རྟོག་པས་བཀག་ཉར་བྱས་འགྲོ་བཞིན་ཡོད་པ་གསལ་པོ་ཡིན་འདུག་པར་མ་ཟད། ཀིརྟི་དགོན་པའི་གྲྭ་རྩོམ་པ་པོ་སྒོ་ཤེས་རབ་ལགས་ཀྱང་དེ་ལྟར་གར་སོང་ཆ་མེད་དུ་གྱུར་ཏེ་ཉིན་གྲངས་མང་པོ་སོང་མཚམས་གཞི་ནས་ཀློད་གྲོལ་གཏོང་སྐབས་མ་གཏོགས་གར་ཡོད་ཅི་བྱུང་གི་གནས་ཚུལ་གསལ་པོ་ཤེས་རྟོགས་བྱེད་ཐུབ་མེད།
ཕྱི་ཟླ་ ༤ ཚེས་ ༡༨ ཙམ་ནས་ཀིརྟི་དགོན་པའི་ནང་ལ་བུད་མེད་ལོ་ན་ ༥༠ ། ༦༠ ཡས་མས་ཐོབ་ཐང་ལག་ཁྱེར་ཡོད་ས་རྣམས་གཏོང་གི་ཡོད་ཀྱང་ཕྱི་ཟླ་ ༥ ཚེས་ ༦ ཉིན་ནས་བདུན་ཕྲག་གཅིག་གི་ནང་ཐེངས་གཅིག་མ་གཏོགས་ཕྱི་མི་ནང་ལ་ཡོང་མི་ཆོག་པའི་གཏན་འབེབས་གསར་པ་བྱས་པ་དང་། དགོན་པའི་གྲྭ་ཤག་རེ་རེའི་སྒོ་ལ་དམག་མི་དང་ཉེན་རྟོག་པ་བཞག་སྟེ་དམ་དྲག་ཆེ་རུ་བཏང་འདུག་ཟེར།
བཞུགས་སྒར་ཀིརྟི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས་བཏང་འབྱོར་བྱུང་།
རྔ་བ་མི་མང་རྒྱལ་གྱུར་ཅིག ལུས་པོ་མི་ཡུལ་དུ་གནས་ཀྱང་སེམས་པ་དང་ཁྱེད་ཅག་གི་བར་ཐག་ན་སྟོང་ཆ་གཏན་ནས་མེད། རེམ་བུ་རྒོད་ཚོ། ད་ལྟའི་སྡུག་བསྔལ་དག མ་འོང་བའི་བདེ་སྐྱིད་འདྲེན་བྱེད་ཡིན་པ་གོར་མ་ཆགས། རེམ་རེམ།
ཕ་ཡུལ་ལ་འགྲོ་རན་སོང་། ད་རན་སོང་། དངོས་གནས་རན་སང། རྒྱ་ནག་གི་སྡུག་ཚོད་མ་བཟུང་ན་ང་ཚོ་ཡང་ཁྲག་རྒྱུན་གཅིག་པའི་སྤུན་ཚོ་ཐུགས་འཕྲད་དང་སོ་སོའི་ཕ་ཡུལ་འགྲོ་བ་ལ་བྲེལ། ད་ང་ཚོ་ལོག་འགྲོ། སོ་སོའི་ནང་དུ་ལོག་འགྲོ། ཕ་ཁྱིམ་དྲོན་མོའི་ནང་དུ་ལོག་འགྲོ། སུ་ཞིག་གིས་ཆོག་ཆེན་མེད་ན་ཡང་། སུ་ཞིག་གིས་དཀའ་ཁྲོལ་མེད་ན་ཡང་། སུ་ཞིག་གིས་བཙན་བཀག་བྱས་ན་ཡང་། སུ་ཞིག་གིས་འགག་རྒོལ་བཀག་ན་ཡང་། ང་ཚོ་སྤུན་ཟླ་ཚང་མ་གཅིག་ཏུ་བསྒྲིལ་ནས་རང་ཁྱིམ་དུ་ལོག་འགྲོ། ང་ཚོའི་ཡང་བརྩོད་ལེན་བྱེད། ང་ཚོ་ལ་ཡང་སོ་སོའི་ཕ་ཡུལ་དགོས། ང་ཚོ་ཡང་གདོང་དམར་བོད་པ་ཡིན་པས། གདོང་དམར་བོད་ཀྱི་ཡུལ་དུ་ལོག། ང་ཚོ་གཅིག་ཏུ་བསྒྲིལ། ཅི་ནས་ཀྱང་ང་ཚོ་གཅིག་ཏུ་བསྒྲིལ་ནས་རང་ཁྱིམ་དུ་ལོག་འགྲོ། རང་ཁྱིམ་དུ་ལོག་འགྲོ་་་་་་་་་་་ང་ཚོ་ཕྱིར་ལོག།