༧གོང་ས་མཆོག་གི་ཡང་སྲིད་སྐོར་ཐག་གཅོད་ཡོང་སྲིད་པ་རེད།

ཐེངས་འདིར་སྐུ་མདུན་གྱི་ཡང་སྲིད་སྐོར་བཀའ་བསྡུར་གནང་སྟེ་ཐག་གཅོད་ཅིག་ཡོང་སྲིད་པ་རེད། ༧གོང་ས་མཆོག་སྐུ་འཚོ་བཞུགས་ཐོག་ཐག་གཅོད་གནང་བ་ཡིན་ན། ཆོས་སྲིད་གཉིས་ཐད་ནས་ཐག་གཅོད་མ་ཐུབ་པ་མེད་ལ། ཐག་གཅོད་ངེས་པར་གནང་དགོས་པ་ཞིག་ཀྱང་རེད། ད་ལྟ་ཐག་གིས་མ་བཅད་པར་བཞག་ན། ནམ་ཞིག་གློ་བུར་བའི་དཀའ་ངལ་འཕྲད་སྲིད་པ་རེད། ཅེས་ཆོས་རིག་བཀའ་བློན་མཆོག་གིས་གསུངས།

ཉེ་ཆར་༧གོང་ས་མཆོག་ཨ་རིར་ཆིབས་བསྒྱུར་སྐབས། ཕྱི་རྒྱལ་གསར་འགོད་པ་ཚོར་འདི་ལོར་བོད་ཀྱི་ཆོས་རྒྱུད་ཁག་གི་བླ་ཆེན་རྣམས་ལྷན་འཛོམས་ཐོག ཁོང་ཉིད་ཀྱི་ཡང་སྲིད་སྐོར་ལ་ཚོགས་འདུ་ཞིག་ཚོགས་འཆར་ཡོད་སྐོར་གསུངས་ཡོད་སྟབས། འདི་གའི་གསར་འགོད་པས་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་ལ་༧གོང་ས་མཆོག་གི་ཡང་སྲིད་གཙོས་པའི་བོད་ཀྱི་སྤྲུལ་སྐུའི་ཡང་སྲིད། གསར་དུ་བཙུགས་པའི་ཆོས་དོན་ལྷན་ཚོགས་ཀྱི་འགན་དབང་བཅས་ཀྱི་སྐོར་ལ་བཅར་འདྲི་ཞུས་ཡོད།

བཀའ་བློན་མཆོག་གིས་༧གོང་ས་མཆོག་གི་ཡང་སྲིད་ཐོག་གསུངས་དོན། ཁ་སྔོན་༧གོང་ས་མཆོག་གིས་ཨ་རིར་ཡང་སྲིད་སྐོར་བཀའ་གནང་བ་བཞིན། འདི་ལོའི་ཕྱི་ཟླ་ ༩ ཚེས་ ༢༢ ནས་ ༢༤ ཉིན་བར་བཞུགས་སྒར་དུ་ཉིན་གསུམ་རིང་ཆོས་ཕྱོགས་ཀྱི་ཚོགས་འདུ་ཞིག་ཚོགས་འཆར་ཡོད། དེ་སྔོན་ཆོས་ཚོགས་ཐེངས་བཅུ་བ་མ་ཚོགས་གོང་བོད་གཞུང་ཆོས་རིག་ལས་ཁུངས་ཀྱིས་དམིགས་བསལ་ཚོགས་ཆེན་ཞིག་བསྐངས་པ་རེད། ཚོགས་ཆེན་ཐོག་༧གོང་ས་མཆོག་གི་ཡང་སྲིད་སྐོར་གླེང་སློང་བྱུང་ཡོིད། སྤྱིར་ད་ལྟའི་ཆར་ཡང་སྲིད་སྐོར་གྲོས་བསྡུར་བྱ་དགོས་པའི་ཛ་དྲག་གི་གནས་སྟངས་འདྲ་མེད་མོད། ཨ་རིར་རྒྱལ་སྤྱིའི་གསར་འགོད་པས་ཡང་སྲིད་སྐོར་དྲི་བ་བཏོན་ཡོང་སྐབས་དེའི་ཐོག་བཀའ་ལན་གནང་བ་རེད། མ་འོངས་པར་འཚོགས་འཆར་ཡོད་པའི་ཆོས་ལུགས་ཚོགས་ཆེན་ཐོག་བོད་ཀྱི་ཆོས་རྒྱུད་ཁག་གི་བླ་ཆེན་རྣམས་ཕེབས་རྒྱུ་རེད། ཚོགས་འདུ་དེ་སྐུ་སྒེར་ཡིག་ཚང་གིས་གོ་སྒྲིག་ཞུས་པའི་སྟེང་ཆོས་རིག་གིས་མཐུན་འགྱུར་གནང་རྒྱུ་བྱས་ཡོད། ཅེས་དང་།

༧གོང་ས་མཆོག་གི་ཡང་སྲིད་སྐོར་ལ། བོད་བརྒྱུད་ནང་བསྟན་སྤྲུལ་སྐུའི་ཡང་སྲིད་སྐོར་ལ་ཆོས་ཚོགས་ཁ་ཤས་ནང་གྲོས་བསྡུར་རིམ་པར་བྱུང་ཡོད་ཀྱང་། ད་བར་༧གོང་ས་མཆོག་གི་ཡང་སྲིད་གཅིག་པུའི་ཐོག་དམིགས་བསལ་ཚོགས་འདུ་འཚོགས་མྱོང་མེད་སྟབས། ཐེངས་འདིར་སྐུ་མདུན་གྱི་ཡང་སྲིད་སྐོར་བཀའ་བསྡུར་གནང་སྟེ་ཐག་གཅོད་ཅིག་ཡོང་སྲིད་པ་རེད། ༧གོང་ས་མཆོག་སྐུ་འཚོ་བཞུགས་ཐོག་ཐག་གཅོད་གནང་བ་ཡིན་ན། ཆོས་སྲིད་གཉིས་ཐད་ནས་ཐག་གཅོད་མ་ཐུབ་པ་མེད་ལ། ཐག་གཅོད་ངེས་པར་གནང་དགོས་པ་ཞིག་ཀྱང་རེད། ད་ལྟ་ཐག་གིས་མ་བཅད་པར་བཞག་ན། ནམ་ཞིག་གློ་བུར་བའི་དཀའ་ངལ་འཕྲད་སྲིད་པ་རེད། ཅེས་གསུངས་སོང་།  

བཙན་བྱོལ་བོད་གཞུང་གི་སྤྲུལ་སྐུ་ངོས་འཛིན་བྱེད་ཕྱོགས་ཀྱི་ཐག་གཅོད་ལ་ཕན་ནུས་ཅི་ཡོད་དང་། རྒྱ་གཞུང་གིས་བོད་པའི་བླ་སྤྲུལ་ངོས་འཛིན་བྱེད་སྟངས་དེར་བཙན་བྱོལ་བོད་གཞུང་གིས་གདོང་ལེན་ཇི་ལྟར་བྱེད་ཀྱི་ཡོད་མེད་དྲིས་པར། བོད་གངས་ཅན་གྱི་ཆོས་རྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་བླ་ཆེན་རྣམས་བཙན་བྱོལ་དུ་བཞུགས་ཡོད་པ་རེད། ཁོང་ཚོ་ཉེན་ཁར་མ་འཛེམ་པར་བཙན་བྱོལ་དུ་ཕེབས་དོན་ཡང་། བོད་ཀྱི་ཆོས་རིག་མི་ཉམས་གོང་འཕེལ་དང་ཉམས་པ་སོར་ཆད་ཡོང་ཆེད་རེད། བོད་པའི་བླ་སྤྲུལ་ཚོ་ངོས་འཛིན་བྱེད་པའི་དབང་ཆ་དང་ནུས་པ་ཡོངས་རྫོགས་༧གོང་ས་མཆོག་གི་དབུ་ཁྲིད་པའི་ཆོས་རྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་ཆོས་ཚོགས་ཁག་ལ་ཡོད། རྒྱ་གཞུང་གིས་བྱེད་ལས་ལ་བལྟ་རྒྱུ་ཡོད་པ་མ་རེད། བོད་ནང་དུ་སྤྲུལ་སྐུ་སོགས་འཁྲུངས་པ་ཡིན་ན། བཙན་བྱོལ་དང་བོད་ནང་དུ་ཡོད་པའི་བོད་པའི་བླ་ཆེན་ཚོས་ངོས་འཛིན་གནང་རྗེས། མཐའ་མའི་ཆོག་མཆན་དེ་༼ ཆོས་དོན་ལྷན་ཚོགས ༽ སུ་ཞུ་དགོས་པ་ལས་གཞན་ངོས་འཛིན་ཐོབ་ཐབས་ཡོད་པ་མ་རེད། ཅེས་གསུངས་བྱུང་།

གསར་འགོད་པས་ཁོང་ལ་༼ ཆོས་དོན་ལྷན་ཚོགས ༽སྐོར་ལ་བཀའ་འདྲི་ཞུས་པར་ཁོང་གིས། རང་དབང་ཅན་གྱི་རྒྱལ་ཁབ་ཚང་མའི་ཆོས་དོན་ལྷན་ཚོགས་བཙུཊ་ཡོད་ལ། ཆོས་དོན་ལྷན་ཚོགས་དེར་རྒྱལ་ཁབ་དང་སྲིད་གཞུང་གི་ཆོས་ཕྱོགས་ཀྱི་ཐག་གཅོད་དབང་ཆ་ཡོད། ད་ཆར་ཆོས་ལུགས་དང་འབྲེལ་བའི་གནད་དོན་རྣམས་ཆོས་རིག་ལས་ཁུངས་ཀྱིས་བསྒྲུབ་བཞིན་ཡོད་ཀྱང་། དེ་ལ་ཁྲིམས་ཀྱི་ནུས་པ་ཡོད་པ་མ་རེད། ཆོས་དོན་ལྷན་ཚོགས་བཙུགས་པ་ཡིན་ན། ལྷན་ཚོགས་དེའི་ལས་དོན་ཁག་ལ་ཁྲིམས་ཀྱི་ནུས་པ་ཡོད་པ་རེད། བོད་གཞུང་ཁྱབ་ཁོངས་སུ་ཡོད་པའི་ཆོས་རྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་བླ་ཆེན་ཚོས་ཆོས་ཚོགས་ཐེངས་ ༨ པ་ནས་ ༡༠ བར་གྲོས་བསྡུར་བྱུང་སྟེ། མཐར་ཆོས་ཚོགས་བཅུ་བའི་ཐོག་ལྷན་ཚོགས་ཀྱི་སྒྲིག་གཞི་གཏན་འབེབས་བྱས་པ་རེད། ཅེས་གསུངས་སོང་།  

ཁོང་གིས་མུ་མཐུད་དུ་གསུངས་དོན། ན་ནིང་ང་ཚོས་སྒྲིག་གཞིའི་དོན་ཚན་ཁག་གྲོས་ཚོགས་སུ་ཕུལ་སྐབས། གྲོས་ཚོགས་ཐོག་བགྲོ་གླེང་མང་པོ་བྱུང་སྟེ་མང་མོས་ཐོག་ཁྲིམས་གཞི་གཏན་འབེབས་བྱས་ཡོད། གསར་དུ་བཙུགས་པའི་ཆོས་དོན་ལྷན་ཚོགས་ཀྱི་འགན་འཛིན་དག་ནི། ཆོས་རྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་བླ་ཆེན་ཁག་དང་། སྐུ་སྒེར་ཡིག་ཚང་ནས་༧གོང་ས་མཆོག་གི་སྐུ་ཚབ་གཅིག  གཞན་ངོ་ཡོད་ཆོས་དོན་བཀའ་བློན་བཅས་རེད། ཆོས་དོན་ལྷན་ཚོགས་དེ་ཆོས་རིག་ལས་ཁུངས་ཀྱི་གོང་དུ་ཡོད་པ་ཞིག་ཆགས་ཡོད། ཆོས་ལུགས་ཆོས་རྒྱུད་ཀྱི་དཀའ་ངལ་གང་འདྲ་ཞིག་བྱུང་ཡང་། ཆོས་དོན་ལྷན་ཚོགས་ཀྱིས་ཐག་བཅད་རྗེས། ཆོས་རིག་ལས་ཁུངས་བརྒྱུད་ཆོས་སྡེ་ཁག་ཏུ་ལག་ལེན་བསྟར་དགོས་ལ། སྒྲིག་གཞི་ལྟར་རྒྱུན་ལས་ཤིག་ཀྱང་འཛུགས་དགོས། རྒྱུན་ལས་དེ་བླ་ཆེན་ཚོས་མོས་མཐུན་ཐོག་འཛུགས་དགོས་པ་དང་། ལས་ཁུངས་དམིགས་འཛུགས་མེད་པར་སྐབས་བསྟུན་གྱིས་ལས་དོན་བསྒྲུབ་དགོས་ཀྱི་ཡོད། ཅེས་གསུངས་བྱུང་།    

མཇུག་ཏུ་བཀའ་བློན་ཆོག་གིས་ཆོས་དོན་ལྷན་ཚོགས་ཀྱི་ལས་དོན་ཐོག་གི་དཀའ་ངལ་སྐོར་གསུངས་དོན། ང་ཚོས་ཆོས་དོན་ལྷན་ཚོགས་ཀྱི་སྒྲིག་གཞི་ཁག་ཚང་མ་གཏན་འབེབས་བྱས་ཚར་ཡོད་ནའང་། ད་དུང་ཡང་ལག་ལེན་ཏག་ཏག་ཅིག་བསྟར་ཐུབ་ཀྱི་མེད། ཐོག་མའི་ཆ་རྐྱེན་ནང་ཆོས་རྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་བླ་ཆེན་རྣམས་ངེས་པར་ཚང་དགོས་ཀྱི་ཡོད་དུས། བཀའ་བརྒྱུད་ནང་བླ་ཆེན་ཞིག་ད་དུང་གཏན་འཁེལ་ཐུབ་མེད། བཀའ་བརྒྱུད་པའི་ནང་བླ་ཆེན་གཅིག་ཕེབས་དགོས་ཀྱི་ཡོད་ཀྱང་། ཀརྨ་སྐུ་ཕྲེང་ ༡༦ པ་འབྲས་ལྗོངས་སུ་སྐུ་གཤེགས་རྗེས། བཀའ་བརྒྱུད་སྤྱི་ལ་ཁྱབ་པའི་བླ་ཆེན་ཞིག་མེད་པ་རེད། ད་ཆར། ཀརྨ་ལ་ཀམ་ཚང་དང་འབྲི་གུང་། འབྲུག་པ། སྟག་ལུང་བཅས་བཞི་ཕེབས་ཡོད་ཀྱང་སྒྲིག་གཞིའི་ནང་མི་བཞི་ཕེབས་རྒྱུའི་ལམ་སྲོལ་མེད་སྟབས། དེའི་ཐད་ཆོས་རིག་གིས་སྤྱི་འཐུས་ལྷན་ཚོགས་སུ་སྙན་སེང་ཞུས་ཡོད་ལ། རྗེས་སུ་ནོར་གླིང་དུ་བཀའ་བརྒྱུད་པའི་ཚོགས་འདུ་ཞིག་ཚོགས་པ་རེད། སྐབས་དེར། ཀམ་ཚང་དང་འབྲི་གུང་སོགས་ཆོས་རྒྱུད་རེས་མོས་བྱས་ཏེ་འགན་འཁུར་རྩིས་བྱས་ཡོད་པ་ལྟར། ཀམ་ཚང་གིས་འགན་དང་པོ་འཁུར་རྒྱུའི་ཐག་གཅོད་བྱས་ཡོད་ཀྱང་། འགན་འཁུར་མཁན་ཀརྨ་པ་དང་ཞྭ་དམར་པ། ཡང་ན་སི་ཏུ་གང་ཡིན་གང་ཡང་བཤད་ཡོད་པ་མ་རེད། ད་བར་བཀའ་བརྒྱུད་པའི་ནང་དུ་ཆ་རྐྱེན་ཚང་གི་མེད་སྟབས། སྒྲིག་གཞི་གཏན་འབེབས་བྱས་ཀྱང་ལྷན་ཚོགས་ངོས་ནས་ལག་བསྟར་བྱ་ཐུབ་ཀྱི་མེད།

གསར་འགོད་པ། དཔལ་ལྡན།