དཔལ་འབྱོར་ལས་ཁུངས་ཀྱིས་ཨ་རིའི་རོགས་ཚོགས་ཁག་ལ་འཆར་གཞི་འབུལ་ཚུལ་དང་བཀོད་བྱུས་སྟངས་འཛིན་ཇི་ལྟར་བྱ་མིན་གྱི་ཟབ་སྦྱོང་ཞིག་གོ་སྒྲིག་གནང་འདུག
ཁ་སང་ཕྱི་དྲོ་བཞུགས་སྒར་གངས་སྐྱིད་སྤྱི་ཐབ་ཚོགས་ཁང་དུ་དཔལ་འབྱོར་ལས་ཁུངས་ཀྱིས་གོ་སྒྲིག་འོག འཆར་འགོད་ལས་གཞི་དང་འབྲེལ་བའི་ཟབ་སྦྱོང་གོ་སྒྲིག་གནང་ཡོད་ཅིང་། ཟབ་སྦྱོང་ཐོག་དཔལ་འབྱོར་ལས་ཁུངས་ཀྱི་དྲུང་ཚབ་ཟླ་བ་རྡོ་རྗེ་ལགས་ཀྱིས་ཨ་རི་བོད་ཀྱི་ཐེབས་རྩའི་གཙོ་འཛིན་ལྕམ་རོ་བྷིན་བྷི་རེ་ཊེ་ནོ་ལགས་དང་ལྕམ་རི་ཧཱ་ན་མར་ཧྤེ་ལགས་རྣམ་གཉིས་ལ་འཚམས་འདྲི་དང་ངོ་སྤྲོད་གསུང་བཤད་ཅིག་གནང་བར་མ་ཟད། སྒྲིག་འཛུགས་ཁག་གི་འཆར་འགོད་ལས་འཆར་གྱི་འབྲེལ་ཡོད་ལས་བྱེད་རྣམས་ཀྱིས་རང་ཉིད་ངོ་སྤྲོད་གནང་བ་དང་། མཐའ་མར་ཨ་རིའི་བོད་ཀྱི་ཐེབས་རྩ་ཁང་གི་ལྕམ་སྐུ་རོ་བྷིན་བྷི་རེ་ཊེ་ནོ་ལགས་ཀྱིས་རོགས་ཚོགས་ཁག་ལ་འཆར་གཞི་ཅི་ལྟར་འབུལ་ཕྱོགས་དང་མ་འོངས་པར་དེ་དག་ལ་བཀོད་བྱུས་དང་སྟངས་འཛིན་ཇི་ལྟར་བྱ་མིན་སོགས་ཀྱི་ཐད་ནས་གསུང་བཤད་གནང་ཡོད།
ཐེངས་འདིའི་ཕྱི་ཚེས་ ༡ ནས་ ༣ བར་གྱི་ཟབ་སྦྱོང་ཐོག་བོད་མིའི་སྒྲིག་འཛུགས་ཀྱི་འཆར་འགོད་དང་འབྲེལ་བའི་ལས་ཁུངས་ཁག་གི་ལས་བྱེད་ཡོངས་དང་། སམ་བྷོ་ཊ་སྤྱི་ཁྱབ་ཡིག་ཚང་གི་འགན་འཛིན་གཙོས་པའི་འབྲེལ་ཡོད་ལས་བྱེད། ངྷ་སའི་བོད་ཁྱིམ་སློབ་གྲྭ་ཁག་དང་མཱ་སུ་རི་བོད་ཁྱིམ་ཀྱི་ལས་བྱེད། བལ་ཡུལ་གངས་ཅན་བདེ་རྩའི་ལས་བྱེད་བཅས་མི་ ༢༦ ལྷག་མཉམ་ཞུགས་གནང་ཡོད་འདུག
གསར་འགོད་པ། དོན་གོ
