ཕྱི་ཚེས་ ༦ ཉིན་གྱི་དགོང་མོར་བོད་གཞུང་ཟློས་གར་ཚོགས་ཁང་དུ་ཕ་སྐད་གཙང་མའི་སྤྲོ་ཚོགས་ཞེས་པའི་རིག་རྩེད་འཁྲབ་སྟོན་གྱི་བྱ་འགུལ་ཞིག་སྤེལ་སོང་། སྤྲོ་ཚོགས་དེ་ནི་ཚོགས་པ་དང་སྒྲིག་འཛུགས་གང་གི་གོ་སྒྲིག་མ་ཡིན་པར། རྡེ་ར་རྡིན་བོད་ཁྱིམ་ལས་རིག་སློབ་གཉེར་ཁང་གི་སློབ་བུ་ཚེ་དཔལ་སྐྱབས་དང་། བསོད་ནམས་བཀྲ་ཤིས། ལྕགས་མོ་གསུམ་གྱིས་གཙོ་འགན་ཁུར་པའི་ཐོག་ནས། སུ་ཇ་སློབ་གྲྭ་དང་། ས་ར་མཐོ་སློབ། ནོར་གླིང་མཐོ་སློབ་བཅས་ཀྱི་གཞོན་སྐྱེས་སློབ་ཕྲུག་ཉི་ཤུ་ཙམ་གྱིས། འཁྲབ་སྟོན་ཚོགས་ཁང་དང་འཁྲབ་ཆས། རོལ་ཆ། དེ་བཞིན་འཁྲབ་སྟོན་བསྐྱར་སྦྱོང་སྐབས་ཀྱི་འགྲོ་སོང་མཐའ་དག་སློབ་ཕྲུག་མི་སྒེར་རང་ངོས་ནས་བཏང་སྟེ། བོད་རང་གི་ཕ་སྐད་མི་མཉམ་རྒྱུན་འཛིན་ཆེད་གཞན་གྱི་སྐུལ་སློང་མ་ཡིན་པར་དང་བླངས་ཐོག་རང་ནུས་འབྱོན་ཚོད་ཀྱིས་སྤེལ་བའི་རིག་རྩེད་འཁྲབ་སྟོན་གྱི་བྱ་འགུལ་ཞིག་ཡིན་པ་དང་། དེ་བཞིན་རིག་རྩེད་འཁྲབ་སྟོན་སྤྲོ་ཚོགས་དེའི་སྟེང་གླུ་དང་གར། ཁ་ཤག་སོགས་བོད་རང་གི་ཁྱད་ཆོས་མ་ཡལ་བའི་ཐོག་ནས་དེང་རབས་ཀྱི་རྣམ་པ་ལྡན་པའི་བོད་སྐད་གཙང་མའི་རིག་རྩེད་སྣ་ཚོགས་འཁྲབ་སྟོན་བྱས་པར་བརྟེན། རྒྱ་ཆེའི་གཟིགས་མོ་བ་མང་པོས་ཁོང་ཚོའི་འཁྲབ་སྟོན་ལ་དགའ་བསུ་དང་བསྔགས་བརྗོད་ཤུགས་ཆེན་པོ་ཐོབ་སོང་། 
སློབ་ཕྲུག་ལྕགས་མོ་ལགས་ཀྱིས་ཕ་སྐད་གཙང་མའི་སྤྲོ་ཚོགས་དེ་གྲ་སྒྲིག་གི་བརྒྱུད་རིམ་དང་དམིགས་ཡུལ་སྐོར་ནས་ངོ་སྤྲོད་གནང་དོན། སྤྱིར་བཙན་བྱོལ་སྤྱི་ཚོགས་ནང་རིག་རྩེད་སྤྲོ་ཚོགས་ཀྱི་བྱ་འགུལ་རིགས་མང་པོ་འདུག ཡིན་ནའང་། བོད་སྐད་གཙང་མའི་རིག་རྩེད་སྤྲོ་འཚོགས་དེ་འདྲ་ཧ་ཅང་ཉུང་ཉུང་རེད། དེར་བརྟེན། ང་ཚོ་སློབ་གྲོགས་ཚོས་ངོས་ནས་ཁ་པར་བརྒྱུད་ཕན་ཚུན་ལ་འབྲེལ་བ་བྱས་ཏེ། གཞན་གྱིས་སྐུལ་སློང་དང་སྒྲིག་བཙུགས་མ་ཡིན་པར་གུང་གསེང་གི་དུས་ཚོད་འདི་བེད་སྤྱད་དེ། ང་ཚོ་སློབ་ཕྲུག་རང་ངོས་ནས་ཕ་སྐད་གཙང་མའི་རིག་རྩེད་བྱ་འགུལ་ཞིག་སྤེལ་ན་ཡག་པོ་འདུག་བསམ་ཏེ་སློབ་ཕྲུག་ཉི་ཤུ་ཙམ་མཉམ་རུབ་ཐོག་སྤེལ་བ་ཡིན། དེའི་ནང་སློབ་ཕྲུག་ ༡༥ ནི་རྡེ་ར་རྡིན་བོད་ཁྱིམ་ལས་རིགས་སློབ་གཉེར་ཁང་གི་སློབ་མ་ཡིན་ལ། དེ་མིན་གཞན་རྣམས་ནི་སུ་ཇ་དང་། ས་ར་མཐོ་སློབ། ནོར་གླིང་མཐོ་སློབ་བཅས་ཀྱི་སློབ་མ་རེད། ཡིན་ནའང་། སློབ་ཕྲུག་ཕལ་ཆེ་བ་ནི་དེ་སྔོན་སུ་ཇ་བོད་ཁྱིམ་ནས་སློབ་གྲྭ་ཁག་སོ་སོའིར་ཕྱིན་པའི་སློབ་གྲོགས་ཁོ་ན་ཆགས་འདུག རང་གི་སྐད་ཡིག་དང་མི་རིགས་ལ་ཤ་ཞེན་མཚོན་ཆེད། རིག་རྩེད་སྤྲོ་ཚོགས་འདིའི་མགོ་མཇུག་བར་གསུམ་གྱི་འགྲོ་སོང་ཚང་མ་ང་ཚོ་སློབ་ཕྲུག་རང་ངོས་བཏང་བ་ཡིན། ཅེས་བརྗོད་སོང་།
ཕ་སྐད་གཙང་མའི་སྤྲོ་ཚོགས་ལ་དང་བླངས་མཉམ་ཞུགས་ཐོག་འཁྲབ་སྟོན་གནང་མཁན། སློབ་ཕྲུག་ཀུན་བཟང་སྒྲོལ་མ་ལགས་ཀྱིས་རང་ཉིད་བྱ་འགུལ་འདིར་མཉམ་ཞུགས་བྱས་པའི་སེམས་ཚོར་དང་དམིགས་ཡུལ་བརྗོད་དོན། ག་དུས་ཡིན་ཡང་གཞན་གྱིས་སྐུལ་སློང་ཁོ་ནར་བརྟེན་མ་དགོས་པར། ང་ཚོ་སློབ་ཕྲུག་སོ་སོ་རང་ངོས་ནས་དང་བླངས་བྱས་ཏེ། རང་ཉིད་བོད་པ་ཡིན་པའི་འདུ་ཤེས་དང་རང་གི་སྐད་ཡིག་རིག་གནས་ལ་དགའ་ཞེན་ཡོང་ཆེད། བོད་པ་དང་འབྲེལ་བའི་རིག་རྩེད་འཁྲབ་སྟོན་བརྒྱུད་དེ་ཕན་ཚུན་སྐུལ་འདེད་དང་ཆིག་སྒྲིལ་ཡོང་ཆེད་སྤྲོ་ཚོགས་འདིར་མཉམ་ཞུགས་བྱས་པ་ཡིན། དེ་བཞིན་རིག་རྩེད་འཁྲབ་སྟོན་གྱི་རྣམ་པའི་ཐད་ནས་ཀྱང་སྲོལ་རྒྱུན་གྱི་རྣམ་པ་ཁོ་ན་མཁྲེགས་འཛིན་མ་ཡིན་པར་བོད་རང་གི་ཁྱད་ཆོས་མ་ཉམས་པའི་ཐོག་ནས། དེང་རབས་ཀྱི་རྣམ་པ་ལྡན་པའི་འཁྲབ་སྟོན་གྱི་རིགས་ལ་མི་མང་པོས་དགའ་མོས་གནང་གི་ཡོད་སྟབས། ང་ཚོས་ངོས་ནས་ཀྱང་རྣམ་པ་གསར་བ་འདོན་ཐབས་ལ་འབད་བརྩོན་བྱས་པ་ཡིན། ང་ཚོ་ཚང་མ་སློབ་ཕྲུག་ཡིན་པའི་ཆ་ནས་བར་གསེང་གི་དུས་ཚོད་སྤྱད་དེ་སོ་སོ་རང་ངོས་ནས་དཀའ་ལས་ཤུགས་ཆེན་པོ་བརྒྱབ་པ་ཡིན། ཡིན་ནའང་། ང་ཚོས་གར་སྟེགས་སྟེང་འཁྲབ་སྟོན་བྱེད་སྐབས་ལྟད་མོ་བ་ཚང་མས་ལག་པའི་ཐལ་མོའི་བརྡེབས་སྒྲ་ཐོས་ཡོང་སྐབས། སོ་སོའི་ཕ་སྐད་དང་འབྲེལ་བའི་བྱ་འགུལ་ཆུང་ངུ་འདི་ལ་ཚང་མས་དེ་འདྲའི་མཉམ་རུབ་གནང་བཞིན་པ་འདི་ནི། ང་ཚོ་ཚང་མའི་འདུན་པ་དང་རེ་བ་གཅིག་ཡིན་པའི་སེམས་ཚོར་ཤུགས་ཆེན་པོ་དང་། དེ་བཞིན་ང་ཚོས་དཀའ་ལས་བརྒྱབ་པར་འབྲས་བུའང་གང་ལ་གང་འཚམ་ཐོན་སོང་བསམ་བྱུང་། དེར་བརྟེན། མ་འོངས་པར་ཡང་བོད་མི་རིགས་ཀྱི་སྐད་ཡིག་རིག་གནས་དང་འབྲེལ་བའི་རིག་རྩེད་བྱ་འགུལ་མང་ཙམ་སྤེལ་ཏེ། བཙན་བྱོལ་སྤྱི་ཚོགས་ནང་འཚར་ལོངས་འབྱུང་བཞིན་པའི་ང་ཚོ་སློབ་ཕྲུག་རྣམས་ལ་སེམས་ཤུགས་དང་བོད་པའི་འདུ་ཤེས་སྤེལ་རྒྱུ་གལ་ཆེན་པོ་རེད། ཅེས་བརྗོད་སོང་།
གསར་འགོད་པ། ཚེ་རིང་རྒྱལ།
རང་གི་རྣམ་པ་ངོ་གདོང་ཁོ་ནར་མེད། བྱས་ཙང་། རང་གི་གདོང་ལ་འཁྱུག་ཙམ་ལྟོས་དང་།
གཟི་བརྗིད་ཡིན་ཡཱ།
སློབ་ཕྲུག་ཚོར་བཀའ་དྲིན་ཆེ་ཞུ། འདི་ག་རྒྱ་གར་ལྷོ་ཕྱོགས་སེར་བྱེས་འབྲིང་རིམ་སློབ་གྲྭའི་སློབ་ཕྲུག་འགས་ཀྱང་དང་ལང་ཐོག་ནས་ལྷག་དཀར་ལས་འགུལ་ཞེས་པ་དེ་སློབ་གྲྭའི་ནང་དུ་སྤེལ་བཞིན་ཡོད། དེ་ནི་ཕྱི་ཟླ་༠༥ཚེས་༠༣ནས་སྤེལ་འགོ་བརྩམས་པ་རེད། སྤེལ་སྟངས་ནི་རེས་གཟའ་ལྷག་པ་གང་ཡིན་ལ་སློབ་ཕྲུག་ཚོས་བོད་སྐད་གཙང་མ་བཤད་དགོས་ཡག སློབ་ཕྲུག་ཚོ་བོད་ཀྱི་སྐད་ཡིག་ལ་དོ་སྣང་དང་དབྱིངས་ཤུགས་ཆེ་ཙམ་བསླེབ་ཆེད་བྱེད་སྒོ་འདྲ་མིན་སྤེལ་ཡག སློབ་ཕྲུག་ཚོར་རྩོམ་དང་དག་ཆ། ཐ་སྙད་སོགས་ཀྱི་དྲི་འགོད་དང་ཐད་འབྲི་སོགས་ཀྱི་འགྲན་བསྡུར་བྱེད་ཡག་སོགས་ཀྱི་བྱེད་སྒོ་སྣ་མང་ཞིག་སྤེལ་དང་སྤེལ་མུས་ལགས།
སློབ་ཕྲུག་ཚོ་ལ་སྙིང་ཐག་པ་ནས་བཀའ་དྲིན་བླ་མེད་ཞུ།
ཕ་སྐད་གཙང་མའི་སྤྲོ་ཚོགས་ལོ་རེར་ཐང་གཉིས་དང་ཡང་ན་ཐང་གཅིག་ཚོགས་ཐུབ་པས་སྨོན་ལམ་དང་འབོད་སྐུལ་ཞུ།
འགྲོ་གྲོན་སོགས་བོད་པའི་སྤྱི་ཚོགས་ནང་ནས་ཞལ་འདེབས་སློང་ན་ལེགས།
བོད་ཀྱི་སྐད་ཡིག་རྒྱལ་གྱུར་ཅིག་་་་བོད་རྒྱལ་ལོ།
སྙིང་ཐག་པ་ནས་དགའ་བསྲུ་ཞུ། རྗེས་ནས་སློབ་ཕྲུག་ཚོས་འདི་ལྟ་བུའི་བྱ་འགུལ་རེ་སྤེལ་བ་ཧ་གོ་ན་རང་ངོས་ནས་གང་ཐུབ་ཀྱི་ཞལ་འདེབ་རེ་འབུལ་ངེས་ཡིན། བོད་པའི་ན་གཞོན་རྣམས་ལ་རེ་བ་ཆེན་པོ་ཡོད། སློབ་ཕྲུག་རྣམས་ནས་སོ་སོའི་སྐད་ཡིག་ལ་དགའ་ཞེན་འདི་ལྟར་བྱས་དུས། གཞུང་གི་དབང་འཛིན་པ་དང་། དགེ་རྒན་རྣམས་ནས་དབྱིན་སྐད་མ་སྦྱང་ན་འཚོ་བ་སྐྱལ་མི་ཐུབ་ཚུལ་སོགས་ཀྱི་སྐད་ངན་མི་འདོན་པར་བོད་རང་གི་སྐད་ཡིག་ལ་ཤུག་རྒྱབ་རྒྱུ་གལ་ཆེ།
ཚིག་འདི་གོ་ཙམ་གྱིས་སྙིང་ཁོང་ནས་སྤྲོ་བ་བརྟས། ཐུགས་རྗེ་ཆེ།
ལེགས་པོ་བྱུང་འདུག དེང་སྐབས་སུ་དགོས་མཁོ་ཡང་རེད། འགན་འཁུར། དྭང་བླངས། ཟེར་བའི་བྱ་འགུལ་དེཚོ་ནི་ང་ཚོ་ཡར་རྒྱས་དང་མཁྲེགས་པོར་འགྱུར་བའི་སྐས་འཛེགས་ལྟ་བུ་ཞིག་ཡིན། ཧ་ཅང་ལེགས། གོང་དུ་བྲིས་པ་བཞིན་བསྟོད་ལ་མི་དགའ་ཞིང་། སྨད་པའི་སྒྲ་དག་དྭང་དུ་ལེན་དགོས་པ་དེ་ཡང་གནད་འགག་ཡིན་པས་ཡིད་ལ་འབོར་ཞིག ཐུགས་རྗེ་ཆེ།
བསྟོད་པ་ལ་དགའ་ཞིང་དོན་དངོས་ལ་མི་དཔྱོད་པའི་བཙན་བྱོལ་བ་རྣམས་པ་ལགས། ཁྱེད་ཚོས་བསྟོད་པ་ཐེངས་བརྒྱ་འཐེན་པ་ལས་ཐེར་འདོན་དང་སྐྱོན་ཆ་ཐེངས་གཅིག་གླེང་ཐུབ་པ་ཡིན་ན་ཡར་རྒྱས་ལ་ཐོར་འདེགས་ཡོང་ངེས་མོད། དེ་ལྟར་མི་འདོད་པ་ནི་རང་ཉིད་ཀྱི་སྤྱི་ཚོགས་ལ་རང་ཉིད་ནས་འགན་ཁུར་མ་འདོད་པ་དེ་རེད། གང་ལྟར་སློབ་ཕྲུག་རྣམ་པ་ཚོར་སྙིང་ཐག་པ་ནས་ཐུགས་རྗེ་ཆེ་ཞུ་འདོད་བྱུང་།
དངོས་གནས་སེམས་ཤུགས་ཆེ་པོའི་ཐོགས་ནས་དང་བླངས་ལས་འགུལ་སྤེལ་བར་སྙིང་ཐག་པ་ནས་རྗེས་སུ་ཡི་རང་དང་བསྔགས་བརྗོད་ཡོད།
གཞན་གྱིས་བསྐུལ་སློང་ལ་མ་བལྟོས་པར་སློབ་ཕྲུག་རང་ངོས་ནས་ལས་འགུལ་སྤེལ་བ་འདི་ཧ་ཅང་གི་དགའ་འོས་པ་དང་མ་འོངས་པའི་སོན་རྩ་ཚོར་རེ་བའི་མིག་འབིར་གཏོད་ཆོག་པའི་དན་རྟགས་ཡིན་པས་སྙིང་ནས་དགའ་བསུ་དང་གོ་སྒྲིག་མཁན་ཚོར་ཐུགས་རྗེ་ཆེ་ཞུ།
འདི་དོན་བཟང་ཞིག་རེད། སློབ་ཕྲུག་ཚོར་བཀའ་དྲིན་དང་བཀྲ་ཤིས་བདེ་ལེགས་ཞུས་པ་ཡི། སེམས་གཏིང་ནས་ཡིན། བོད་ཀྱི་སྐད་ཡིག་རྒྱལ་གྱུར་ཅིག
འདི་ནི་ཧ་ཅང་གི་དགའ་འོས་པའི་གཏམ་བཟང་ཞིག་རེད་ལ་སློབ་ཕྲུག་ཚོར་དཔལ་འབྱོར་གྱི་མཐུན་རྐྱེན་ཧ་ཅང་ཞན་པོ་ཡོད་ནའང་སེམས་ཤུགས་འདི་ལྟར་བསྐྱེད་པ་བསྟོད་སྔགས་ཀྱི་ཡུལ་ཡིན་པས་དགའ་ཡོད། མི་མང་སྐྱུས་མ་ཚོས་ངོས་ནས་ཀྱང་ཐད་ནས་མི་ལྟ་ཞལ་འདེབས་གནང་རྒྱུ་གལ་ཆེན་པོ་རད།