ཁ་སང་ཕྱི་ཚེས་ ༨ ཉིན་རྒྱ་གར་ལྷོ་ཕྱོགས་མོན་གྷོ་གངས་ལྗོངས་རང་བདེན་རྩོད་ལེན་མཐུན་ཚོགས་དང་། མོན་གྷོ་དབུ་མའི་ལམ་ལས་འགུལ་ཁང་། མོན་གྷོ་རྒྱལ་ཡོངས་དམངས་གཙོ་ཚོགས་པ། མོན་གྷོ་ས་གནས་བོད་ཀྱི་གཞོན་ནུ་ལྷན་ཚོགས། མོན་གྷོ་ས་གནས་བོད་ཀྱི་བུད་མེད་ལྷན་ཚོགས་བཅས་ཚོགས་པ་ལྔ་ཐུན་མོང་གི་སྣེ་འཁྲིད་དེ། དགོས་འདུན་དོན་ཚན་གཉིས་དང་འབོད་སྐུལ་གཅིག་གི་འོག རྔ་པ་ཀིརྟི་དགོན་པ་གཙོས་རྔ་བའི་མི་མང་ལ་གདུང་སེམས་མཉམ་སྐྱེད་ཀྱི་ཆེད་དུ་མོན་གྷོ་ནས་པུ་ན་བར་གྱི་རྫོང་དང་། གྲོང་ཁྱེར་ཁག་ནང་ཡིག་ཆ་འགྲེམ་སྤེལ་ཆེད་རྐང་འཁོར་རྒྱང་སྐྱོད་ཀྱི་ལས་འགུལ་ཞིག་མགོ་འཛུགས་གནང་ཡོད་འདུག
ཐེངས་འདིའི་ལས་འགུལ་གྱི་བསྒྲགས་གཏམ་ནང་བཀོད་དོན། ཉེ་ཆར་ ༢༠༡༡ ཟླ་ ༣ ཚེས ༡༦ ཉིན་བོད་མདོ་སྨད་རྔ་པ་ཀིརྟི་དགོན་པའི་གྲྭ་བློ་བཟང་ཕུན་ཚོགས་ནས་རྒྱ་དམར་གཞུང་གིས་བོད་ནང་དུ་མི་སྤྱོད་ལས་བརྒལ་བའི་དྲག་གནོན་བྱེད་བཞིན་པར་རང་ལུས་མེ་རུ་བསྒྲོན་ཏེ་ཞི་བའི་ངོ་རྒོལ་བྱས་པ་ནས་བཟུང་། རྒྱ་ནག་གི་དྲག་ཆས་དམག་མི་བཀོལ་ཏེ་རྔ་བ་ཀིརྟི་དགོན་པ་དང་རྔ་བའི་མི་མང་ལ་དྲག་གནོན་ཚབས་ཆེན་བྱས་དང་བྱེད་བཞིན་པའི་གནས་སྟངས་ཛ་དྲག་མུ་མཐུད་གནས་མུས་ལ་སོང་། རྒྱལ་སྤྱིའི་བོད་དོན་རྒྱབ་སྐྱོར་ཚོགས་ཁག་དང་། སྲིད་གཞུང་། མི་མང་། གྲོས་ཚོགས། རྒྱལ་སྤྱིའི་ཚོགས་སྡེ་ཁག་དང་། ལྷག་པར་དུ་རྒྱ་གར་གཞུང་མང་གཉིས་ནས་རྒྱབ་སྐྱོར་དང་ལམ་སྟོན་ཡོང་བའི་འབོད་སྐུལ་ཞུ་བཞིན་ཡོད། ཅེས་བསྒྲགས་འདུག
ཐེངས་འདིའི་ལས་འགུལ་གྱི་དགོས་འདུན་དོན་ཚན་གཉིས་དང་འབོད་སྐུལ་གཅིག་བཅས་ནི། དང་པོ། རྒྱ་དམར་གཞུང་གིས་རྔ་པ་ཀིརྟི་དགོན་པ་གཙོས་རྔ་པའི་མི་མང་ལ་དྲག་གནོན་བྱེད་བཞིན་པ་མཚམས་འཇོག་དང་མྱུར་ཏུ་དྲག་ཆས་དམག་མི་ཕྱིར་འཐེན་བྱེད་དགོས་པ། གཉིས་པ། ཀུན་གཟིགས་པཎ་ཆེན་རིན་པོ་ཆེ་མཆོག་གཙོས་བོད་ནང་གི་ཆབ་སྲིད་བཙོན་པ་ཆ་ཚང་ཀློད་གྲོལ་གཏོང་དགོས་པ། འབོད་སྐུལ་གཅིག་ནི། རང་དབང་དང་དྲང་བདེན་ལ་དགའ་བའི་རྒྱལ་སྤྱིའི་རང་དབང་གི་གསར་འགོད་པ་དག་ངེས་པར་དུ་རྔ་པ་ས་ཁུལ་དུ་གཏོང་རོགས་གནང་། ཞེས་བཀོད་འདུག
ཁ་བ་གངས་ཅན་པ་ཚོ། གཅིག་རྒྱབ་གཅིག་ལངས་ཀྱིས་ངར་ཤུགས་གཅིག་ཏུ་སྤུངས་ན། མ་འོངས་པ་རང་བཞིན་གྱིས་བསུ་ཡོང་ལ། གྲུབ་འབྲས་ལ་ཕྱོགས་པའི་རེ་བའི་ལམ་ཆེན་མདུན་དུ་སླེབ་ངེས་ཡིན། ཉེ་ཆར་ཨ་མདོ་རྔ་བ་པ་དག་གིས་མི་རིགས་གཅིག་དང་། སྐད་ཡིག་གཅིག་གི་ཆེད་ཙམ་མིན་པར་འཛམ་གླིང་འདིར་ཆེས་མེད་དུ་མི་རུང་བའི་ཞི་བདེའི་སྲོག་སྙིང་ལྟ་བུའི་རིག་གཞུང་ཞིག་གིས་མྱོང་བཞིན་པའི་མནར་གཅོད་རྣམས་རང་སྟེང་དུ་བླངས་ཏེ། འདས་ཟིན་པའི་བཙན་པོ་དག་གི་སྟོབས་ཤུགས་དང་དཔའ་ངར་དང་དུ་བླངས་པར་རྒྱབ་སྐྱོར་དང་གདུང་སེམས་མཉམ་སྐྱེད་ཀྱི་ཆེད་དུ། ངའི་མདུན་ནས་ལམ་དུ་ཆས་སོང་བའི་རྐང་འཁོར་ལས་འགུལ་བ་གྲོགས་གངས་རིས་གཙོས་ཐམས་ཅད་ལ་སྙིང་ཐག་པ་ནས་རྒྱབ་སྐྱོར་དང་ཐུགས་རྗེ་ཆེ་བརྒྱ་ཕྲག་ཞུ་བཞིན། ཨ་མཆོག་ཚངས་ཐིག་པས།
ཐུགས་རྗེ་ཆེ། རྒྱབ་སྐྱོར་ཡོད།
བཙན་བྱོལ་སྤྱི་ཚོགས་ནང་གི་ཚོགས་པ་ལྔ་འདི་ནམ་ཡང་མི་དམངས་གི་རེ་བ་བྱེད་ས་ཞིག་རེད། ད་དུང་ཡང་ལས་འགུལ་ཞིག་སྤེལ་འདུག རྒྱབ་སྐྱོར་ཡོད་་་་་་་མུ་མཐུད་དུ ་་་་་་་་་་་
ངོ་མ་སྙིང་སྟོབས་དང་ལྷག་བསམ་གཉིས་ལྡན་རེད། ཁ་བཤད་ཙམ་མ་ཡིན་པར་ལག་ལེན་ཁྲོད་ན་འབར་བའི་རྒྱལ་གཅེས་པ་ཚོ་ལོངས་ཤོག
བོད་མི་རིགས་ཀྱི་བདེན་དོན་དང་རང་དབང་ཆེད་དཀའ་སྤྱད་དང་ལེན་བྱེད་བཞིན་པའི་རྒྱལ་གཅེས་དཔའ་བོ་གངས་རི་གཙོས་པའི་རྐང་འཁོར་འགྲུལ་བཞུད་པ་རྣམས་ཀྱི་ལས་འགུལ་དོན་འཁྱོལ་ཡོང་བ་དང་།ལྷན་རྒྱས་ཚོའི་ཐུགས་ཀྱི་དགོངས་བཞེད་རྣམས་ལེགས་འགྲུབ་ཡོང་བའི་རེ་བ་དང་སྨོན་ལམ་ཡོད།
ཁ་དྲོ།བོད་རྒྱལ་ལོ།དབུ་མའི་ལམ་རྒྱལ་ལོ།
ཚོགས་པ་ལྔའི་ལས་འགན་ཐོག་བབས་ཡོད་པས་རྒྱབ་སྐྱོར་དང་། ཐུགས་རྗེ་ཆེ་ཡོད།གཙོ་བོ་སྐད་བརྡ་འཕྲོད་པོའི་ཐོག་ནས་གསར་འགོད་གསལ་བསྒྲགས་བྱེད་རྒྱུ་གལ་ཆེན་རེད།