༧གོང་ས་མཆོག་དགུང་གྲངས་ ༡༡༣ ལ་བཞུགས་རྒྱུའི་བཀའ་ལུང་ཡོད།

དེ་ལྟར་གཞུང་ནས་མི་མང་གི་འཚོ་བརྟེན་གྱི་ཆེད་ནུས་ཤུགས་གང་ཡོད་ཀྱི་རོགས་རམ་བྱེད་པ་དེ་ཆེད་ཡིད་དགའ་བའི་བསམ་པ་ཞིག་ཡིན། ཐུགས་རྗེ་ཆེ།

སེམས་གཙང་མ་མཚོ་སྐྱེས་གེ་སར་ལས་བྱུང་བའི།། ངག་སྐུ་ཚེ་བརྟན་ཞེས་དྲི་བསུང་གི་ངད་པ།། འགྲོ་གྲངས་མེད་སྐྱོང་བའི་དེད་དཔོན་ལ་ཕུལ་ཏེ།། དུས་ཇི་སྲིད་བར་དུ་བཞུགས་གསོལ་ཞུ་ལགས་སོ།།

བཀུར་འོས་དྲ་གྲོགས་རྣམ་པ་ལགས།
ངས་དྲང་མོར་བཤད་ཀིན་ཡོད་ལགས། ང་ཚོའི་ཁ་གཡང་འདི་དོན་དངོས་དང་མཐུན་པའི་སྒོ་ནས་བརྗོད་ན། དོན་དངོས་དང་མཐུན་པའི་དོན་ཞིག་འགྲུབ་རྒྱུ་ཡོད་རྒྱུ་རེད་མ་གཏོགས་ཁ་གཡང་རྐྱང་རྐྱང་གིས་བཟི་ཁ་བཙན་དྲགས་ན། དོན་དངོས་ཀྱི་སྟོབས་ཤུགས་བོར་འགྲོ་གི་རེད་བསམ་སོང་ལགས། དེས་ན། བཀུར་འོས་དྲ་གྲོགས་རྣམ་པའི་དེ་ལུགས་བཞིན་ཡོང་བར་མཁྱེན་ནོ།། དགོངས་འགལ་མེད་པར་ཞུ། ངས་ཡང་བསྐྱར་གསལ་བཤད་ཅིག་བྱ་ཆོག་པར་ཞུ། དཔེར་ན། སྐུ་ཚེ་ཁྲི་ལོ་བརྟན་པར་ཤོག་ཅེས་པ་དང་སྐུ་ཚེ་མི་ཤིགས་རྡོ་རྗེའི་ཁམས་སུ་བརྟན་པར་ཤོག་ཅེས་པ་སོགས་ནི། དོན་དངོས་དང་ཁ་ཐག་ཤིན་ཏུ་རིང་བ་མ་ཟད། ཆོས་ཉིད་དང་ཡང་འགལ་བའི་ཕྱིར་ན། སྨོན་ཚིག་འདིའི་རིགས་ཀྱིས་དགའ་ཞེན་སླད་མེད་པ་ཞིག་དང་ཆེ་མཐོང་ཞིག་མཚོན་གི་ཡོད་རུང་། དོན་དངོས་ནི་དོན་དངོས་རང་ཡིན་པས་ན། སྨོན་ཚིག་སོགས་ཀྱིས་ཡོང་ཐུབ་པ་ཞིག་དང་བསྒྱུར་ཐུབ་པ་ཞིག་མ་ཡིན་པས་ན། དེ་ལྟར་བསྙད་དགོས་བྱུང་སོང་ལགས། ད་རུང་། ངས་བསམས་ན། ༸ཡིད་བཞིན་ནོར་བུའི་སྐུ་ཚེ་ཡུན་བརྟན་དགོས་ན། ཁོང་གིས་ད་ལྟའི་བར་དུ། གསུང་བཤད་གནང་ཟིན་པ་རྣམས་ཀྱི་ཐོག་ཏུ་ང་ཚོ་བོད་མི་རིགས་གང་འདྲ་བྱས་ནས་སོང་ཡོད་པ་དང་། ཇི་ལྟར་བྱས་ནས་ལག་ལེན་དུ་བསྟར་ཡོད་པ། ལྷག་པར་དུ། གྲུབ་འབྲས་སོགས་ཀྱི་ཕྱོགས་སུ་བསྐྱར་ཞིབ་ཅིག་བྱས་ནས། གཞི་ནས། ཁོང་གི་སྐུ་ཚེ་བརྟན་དགོས་ན། གང་ཞིག་བྱེད་དགོས་པ་དང་ཇི་ལྟར་བྱས་ནས་འགྲོ་དགོས་པ་སོགས་རང་ཤུགས་ཀྱིས་རྟོགས་ཐུབ་པ་རེད་ལགས།

༧གངས་རི་རྭ་བས་བསྐོར་བའི་ཞིང་ཁམས་སུ། ། ཕན་དང་བདེ་བ་མ་ལུས་འབྱུང་བའི་གནས། །སྤྱན་རས་གཟིགས་དབང་བསྟན་འཛིན་རྒྱ་མཚོ་ཡི། །༧ཞབས་པད་སྲིད་མཐའི་བར་དུ་བརྟན་གྱུར་ཅིག །

གངས་རིའི་བསྐོར་བའི་ཆོས་ལྡན་ཁ་བའི་ཡུལ། གངས་ཅན་ལྷ་གཅིག་འཕགས་མཆོག་སྤྱན་རས་གཟིགས། གངས་ལྗོངས་འགྲོ་བའི་མགོན་སྐྱབས་ཉིད་གཅིག་པུ། གངས་ཅན་མགོན་པོ་བསྟན་འཛིན་རྒྱ་མཚོ་འདུད།།
མཆོག་ཉིད་ཐོག་མར་གཅིག་དགུ་སོ་ལྔའི་ལོར། ཁ་བའི་སྨད་ལྗོངས་མདོ་སྨད་སྟག་འཚེར་རུ། ཡབ་ཡུམ་བྱམས་བརྩེ་ལྡན་པའི་བུ་རྒྱུད་དུ། ངོ་མཚར་ལྟས་དང་བཅས་ཏེ་ཐོག་མར་འཁྲུངས།
ཐོག་མའི་མཚན་ལ་ལྷ་མོ་དོན་འགྲུབ་གསོལ། དེ་ནས་མི་རིང་ལྷ་བླའི་ལུང་སྟན་དང་། ལྷ་མོའི་བླ་མཚོའི་གཟིགས་སྣང་སོགས་ལ་བརྟེན། སྐྱབས་མགོན་གོང་མའི་ཡང་སྲིད་འཁྲུལ་བྲལ་ངེས།
དེ་ནས་ཁ་བའི་རྒྱལ་ས་ལྷ་སར་ཕེབས། གཅིག་དགུ་སོ་དགུའི་བཅུ་བའི་བཅུ་གསུམ་ཉིན། ཇོ་ཤཱཀྱ་སྐུ་འདུན་རྒྱལ་ཚབ་རྭ་སྒྲིངས་གིས། གཙུག་ཕུད་བཞེས་ཏེ་མཚན་ཡང་གསར་པ་གསོལ།
སྐྱེ་འཕྲེང་གོང་མ་ལྔ་བ་ཆེན་པོའི་སྐབས། གསར་ཞིང་གྲུ་འཛིན་གཉིས་པ་པོ་ཏ་ལར། གཅིག་དགུ་བཞི་བཅུའི་དང་པོའི་བཅུ་བཞིའི་ཉིན། གསེར་ཁྲིར་མངའ་གསོལ་བཀྲ་ཤིས་རྟེན་འབྲེལ་བྱུང་།
དགུང་གྲངས་དྲུག་ནས་བཅུ་ཕྲག་རིགས་གནས་དང་། ལྷག་པར་གཞུང་ཆེན་བཀའ་པོད་ལྔ་ལ་སོགས། གསན་བསམ་གནང་ནས་རིང་པོར་མ་སོངས་བར། སེར་འབྲས་སོགས་ལ་གྲྭ་སྐོར་དམ་འཇོག་མཛད།
ཉེར་ལྔ་ལོངས་ཚེ་ལྷ་ལྡན་སྨོན་ལམ་སྐབས། མཁས་དམངས་ཁྲི་ཕྲག་འདུས་པའི་ཚོགས་དབུས་སུ། ལྷ་རམ་དགེ་བཤེས་དམ་འཇོག་མཛད་པ་དང་། རྒྱལ་སྤྱིའི་གནས་ཚུལ་ཀུན་ལ་མཁྱེན་རྒྱ་ཡངས།
འོང་ཀྱང་སྐབས་དེར་བོད་ལ་ཉེན་འཕྲང་དུས། བོད་འབངས་ཡོངས་ཀྱིས་གསོལ་འདེབས་ཞུས་པ་བཞིན། གཅིག་དགུ་ལྔ་བཅུའི་བཅུ་གཅིག་བཅུ་བདུན་ཉིན། བོད་ལྗོངས་ཆོས་སྲིད་གཉིས་ཀྱི་དབུ་ཁྲིད་མཛད།
དེ་བཞིན་སྐབས་དེར་རྒྱ་དམར་ཀླ་ཀློའི་དཔུང་། དམག་མིས་བོད་ལ་བཙན་འཛུལ་བྱེད་པ་དང་། གྲོས་མཐུན་བཅུ་བདུན་བཙན་འོག་འཇོག་དགོས་སོགས། བོད་འབངས་ཕལ་ཆེར་འུ་ཐུག་ཐབས་ཟད་གྱུར།
ཡིན་ཡང་ཁོང་གིས་ཐབས་རྒྱ་སྣ་ཚོགས་ཀྱིས། རྒྱ་ནག་གཞུང་དང་གནས་ཚུལ་ཞི་འགྲིགས་ཆེད། གཅིག་དགུ་ལྔ་བཞིར་རྒྱ་ནག་པེ་ཅིང་དུ། ཕེབས་ཏེ་མཆམ་མཐུན་གྲོས་མོལ་སྣ་ཚོགས་གནང་།
མཐའ་མར་བོད་འབངས་སྤྱི་དང་ཁོང་ཉིད་ཀྱི། སྐུ་ཕྱར་ལ་ཡང་གནོད་འཚེ་ཡོང་ངེས་ཏེ། གཅིག་དགུ་ལྔ་དགུའི་གསུམ་པའི་བཅུ་པའི་ཉིན། རྔམ་སྟོན་རང་དབང་སྒེར་ལོངས་ཐོག་མར་བྱུང་།
རིམ་བཞིན་རྒྱ་མིས་དྲག་གནོན་མི་ཆོས་ལས། འདས་པའི་བྱ་ངན་རྒྱལ་ས་ལྷ་སར་སྤེལ། འོང་ཀྱང་བོད་མིའི་འཕྲལ་ཕུགས་བདེ་དོན་སླད། སྐུ་འཁོར་འགའ་དང་ལྷན་དུ་འཕགས་ཡུལ་ཕེབས།
འཕགས་ཡུལ་འབྱོར་ནས་བོད་གཞུང་གསར་འཛུགས་དང་། གཅིག་དགུ་དྲུག་བཅུའི་དགུ་པའི་གཉིས་ཉིན་ལ། ཆོལ་གསུམ་ཆོས་ལུགས་འདུས་པའི་བོད་མི་ཡིས། སྤྱི་མཐུན་ལྷན་ཚོགས་གསར་འཛུགས་དམངས་གཙོ་བརྙེས།
དེ་ནས་མ་འོངས་བོད་མིའི་རྩ་ཁྲིམས་དང་། དམངས་གཙོའི་རྩ་ཁྲིམས་ལ་སོགས་རིམ་བཞིན་སྤེལ། གོ་གཉིས་ལོ་ལ་ཆེས་མཐོའི་ཁྲིམས་ཞིབ་སོགས། དམངས་གཙོའི་ཀ་གསུམ་གྲགས་པ་གསར་འཛུགས་གནང་།
སློབ་གྲྭ་གསར་འཛུགས་རེས་མེད་དགོན་སྡེ་དང་། སྨན་རྩིས་ཟློས་གར་ལག་ཤེས་སྒྱུ་རྩལ་སོགས། ཆེད་སྦྱོང་བྱ་ཡུལ་རིག་གཞུང་ལྟེ་གནས་ཁང་། གཞིས་ཆག་གསར་འཛུགས་མཛད་རྗེས་རླབས་ཆེན་བསྐྱངས།
དགོངས་གཞི་རླབས་ཆེན་མཛམ་གླིང་ཞི་བདེ་དང་། ཆོས་ལུགས་མཆམ་མཐུན་གངས་ལྗོངས་བདེན་མཐའི་ཆེད། ཕྱི་རྒྱལ་ཡུལ་གྲུ་ཁག་གི་དབུ་འཁྲིད་དང་། ཆོས་ལུགས་ཁག་གི་དབུ་ཁྲིད་མཇལ་འཕྲད་གནང་།
འོ་ཅག་ཁ་བའི་ལྗོངས་ཀྱི་སྣོད་བཅུད་ལ། མི་སྤྱོད་འདས་པའི་རྩ་གཏོར་བཏང་ཡོད་རུང་། གཉིས་ཕན་བྱམས་བརྩེའི་འོད་འདངས་ཆེར་འཕྲོས་ཏེ། བདེན་མཐའ་གསལ་ཆེད་ཞི་མོལ་ཐབས་ལམ་གནང་།
ནང་པ་སྤྱི་དང་མ་ཧ་གྷན་དྷི་ཡིའི། ལྟ་སྤྱོད་འཚེ་མེད་ཞི་བ་ཁོ་ན་ལས། ཐབས་ལམ་གཞན་ལ་མ་བརྟེན་རྒྱ་བོད་བར། ཕན་ཚུན་བསམ་ཤེས་ཡིད་ཆེས་ཡོད་དགོས་གསུངས།
རྒྱུ་མཚན་འདི་ལ་མཛམ་གླིང་སྐྱེ་བོ་ཀུན། ཡིད་དབང་འཕྲོག་ཏེ་དོན་དགུའི་བཅུ་པའི་ཉིན། ནོར་བེལ་ཞི་བདེའི་གཟིགས་རྟགས་འབུལ་བཞེས་དང་། གསེར་གྱི་རྟགས་མ་ལ་སོགས་གྲངས་མེད་ཐོབ།
ཆོས་ལུགས་ཕན་ཚུན་བརྩི་དཀུར་མཉམ་གནས་དང་། དམངས་ལ་ཕན་ཐབས་ཕྱི་ཡི་དངོས་པོ་དང་། ནང་གི་སེམས་གཉིས་ཡར་རྒྱས་མཉམ་འབྲེལ་ཆེད། བཀའ་སློབ་གྲངས་མེད་གཞན་ལ་ཕན་ཕྱིར་གསུངས།
སྐྱེ་འགྲོ་ཀུན་ལ་སྡིག་སྤོང་དགེ་སྒྲུབ་ཆེད། གསུང་ཆོས་བཀའ་དབང་ལ་སོགས་གྲངས་མེད་དང་། ལྷག་པར་དུས་འཁོར་དབང་ཆེན་སོ་གཅིག་པ། གནང་བཞིན་པ་སོགས་བསྟན་འགྲོའི་དོན་ཆེན་མཛད།
ལྷག་པར་ལོ་རྒྱུས་ཡུན་རིང་ལྡན་པ་ཡི། སྐུ་འཕྲེང་རིམ་བྱོན་སྲིད་ཀྱི་སྐུ་དབང་རྣམས། དམངས་ཀྱི་འོས་འདེམས་བྱེད་པའི་དབུ་ཁྲིད་ལ། དགོངས་བཞེད་བླབས་ཆེན་མཛད་ནས་དེ་ལ་གནང་།
དེ་ལྟར་ཁོང་གི་ཕྱི་ནང་གསང་གསུམ་གྱི། མཛད་འཕྲིན་རླབས་ཆེན་བློ་དམན་བདག་གིས་ནི། བརྗོད་པའི་སྤོབ་པ་བདག་ལ་མ་འཆིས་ཀྱང་། བསོད་ནམས་གསོག་ཕྱིར་ཆུ་ཐིག་ཙམ་ཞིག་སྤེལ།
དགེ་འདིས་སྐྱེ་འགྲོ་སྤྱི་དང་ཁ་བའི་ཡུལ། རང་དབང་བདེ་སྐྱིད་ཉི་མ་མྱུར་འཆར་དང་། ལྷག་པར་༧གོང་ས་བསྟན་འཛིན་རྒྱ་མཚོ་མཆོག། སྐུ་ཚེ་བསྐལ་རྒྱའི་བར་དུ་བརྟན་པར་སྨོན།
ཕྱི་ལོ་༢༠༡༡ལོར་ཕྱི་ཟླ་༧པའི་ཚེས་༦ཉིན་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དགུང་གྲངས་དོན་དྲུག་ལ་ཕེབས་པའི་འཁྲུངས་སྐར་རྗེས་དྲན་གྱི་ཚུལ་དུ་གུས་ནགས་མཚོ་་ནས་ཕུལ།།

སྐུ་མི་ཤིགས་རྡོ་རྗེའི་ཁམས་སུ་བརྟན།།
གསུང་མི་འཇིགས་བདེན་དོན་ང་རོ་སྒྲོག།
ཐུགས་མི་གཡོ་བྱམས་བརྩེའི་རྒྱ་མཚོ་སྟེ།།
ངེད་བླ་མ་བསྟན་འཛིན་རྒྱ་མཚོ་རྒྱལ།།

རིགས་མཐོ་དམན་དཀར་ནག་མི་རིགས་སོགས།།
རྒྱུ་དབུལ་ཕྱུག་གནམ་ས་ཆོད་པ་དང་།།
དབང་ཆེ་ཆུང་དྲག་ཞན་དབྱེར་མེད་གཟིགས།།
ངེད་བླ་མ་རིས་མེད་མགོན་པོ་རྒྱལ།།

ས་ཆེན་པོས་མ་ཐེག་གང་ཞིག་མཆིས།།
གནམ་མཐོ་པོར་མ་བསྙེགས་སུ་ཞིག་ཡོད།།
མཚོ་ཟབ་སར་མ་བརྒལ་ཅི་ཞིག་བདོག།
ངེད་བླ་མའི་མཛད་པ་ཀུན་ལས་རྒྱལ།།

༄༅།།འགྲོ་བ་ལྷ་དང་བཅས་པའི་གཙུག་རྒྱན་རྒྱལ་བསྟན་ཡོངས་ཀྱི་མངའ་བདག ༸གོང་ས་རྒྱལ་མཆོག་སྐུ་ཕྲེང་བཅུ་བཞི་པ་ཆེན་པོ། བདག་གི་བཀའ་དྲིན་གསུམ་ལྡན་གྱི་རྩ་བའི་བླ་མ་གསུམ་ལྡན་རྡོ་རྗེ་འཆང་གི་གསང་གསུམ་མཛད་འཕྲིན་ལ་བསྟོད་པ།
སྙན་འགྱུར་དུང་གི་སྒྲ་དབྱངས།
ཐུབ་དབང་སྨྲ་བ་གང་གིས་གང་བསྟན་པ།།
ཁྱོད་ཐུགས་ཟླ་བ་རྒྱས་པའི་དཀྱིལ་འཁོར་དུ།།
ཇི་བཞིན་གསལ་བའི་བརྩེ་ཆེན་ཆོས་དབྱིངས་ནས།།
ལེགས་པར་གདོམས་མཛད་ཁྱོད་ལ་སྤྱི་བོས་མཆོད།།

བྱང་ཆུབ་རྒྱལ་ས་རིང་ནས་ཟིན་གྱུར་ཀྱང་།།
བདག་འཛིན་དྲ་བར་ཚུད་པའི་འགྲོ་བ་རྣམས།།
ཐུགས་བསྐྱེད་སྙིང་རྗེ་དྲག་པོས་མ་བཟོད་པར།།
མི་ཡི་ཟློས་གར་འཛིན་ལ་གུས་ཕྱག་འཚལ།།

སྣ་ཚོགས་ཁམས་དང་མོས་པའི་རྗེས་འགྲོ་བའི།།
དམ་ཆོས་འཆི་མེད་ལྷ་ཡི་རོལ་མོའི་སྒྲ།།
ཟབ་ཞིའི་དབྱངས་སུ་བསྒྲགས་པས་ལུས་ཅན་ཀུན།།
ལས་ཉོན་སྨག་ཆེན་གཉིད་ལས་དཀྲོག་པར་མཛད།།

བསྐལ་བཟང་རྣམ་འདྲེན་སྟོང་གི་མཛད་པ་ཀུན།།
ས་ཆེན་འཁོར་ལོ་མཛེས་པའི་གཙུག་རྒྱན་དུ།།
བརྩེ་ཆེན་ཟླ་ཤེལ་གཞོན་ནུའི་གཟི་འོད་ལས།།
འདེགས་པར་མཛད་པོ་སྐྱེ་དགུའི་སྙིང་དུ་ཐིམ།།

ཐ་མལ་ཚུལ་དུ་བཤེས་གཉེན་གཙུག་བཀུར་ཏེ།།
རབ་འབྱམས་གཞུང་ལུགས་ཐོས་བསམ་སྒོམ་པ་དང།།
དཔྱད་གསུམ་དག་པས་སྒྲོ་འདོགས་ལེགས་བཅད་པས།།
ཕྱི་ལྟར་ལྔ་རིག་སྨྲ་བའི་དབང་པོ་སྟེ།།

དུག་གསུམ་མུན་པའི་ཀློང་དུ་འཁྱམས་གྱུར་བའི།།
འགྲོ་བའི་འཇིག་ཚོགས་རྩ་བ་གཅོད་པ་ལ།།
སྙིང་རྗེ་མཆོག་གིས་གཞན་དོན་ཁུར་འཁྱེར་བས།།
ནང་ལྟར་རྒྱལ་ཀུན་སྙིང་རྗེའི་རང་གཟིགས་ཉིད།།

གང་ཞིག་རྟེན་འབྱུང་སྟོང་བ་དོན་གཅིག་ཏུ།།
ཇི་བཞིན་གཟིགས་ཤིང་ཇི་སྙེད་འགྲོ་བ་ཀུན།།
ཐར་བ་མཆོག་གི་ལམ་བཟང་སྟོན་མཛད་པས།།
གསང་བ་མཚམས་སྤྲིན་མདངས་འཛིན་འཇམ་པའི་དབྱངས།།

ཆུ་སྤྲིན་མེ་ཏོག་འཐུང་བའི་ལྗོན་བཟང་ལ།
གསེར་ཞུན་ལོ་འབྲས་ཁུར་གྱིས་ལྕི་བ་བཞིན།།
མཁས་བཙུན་བཟང་པོའི་རྒྱན་གྱིས་རབ་དུད་པས།།
སྐྱེས་མཆོག་ཀུན་གྱི་གཙུག་གི་ཏོག་ཏུ་བཞེངས།།

འགྲོ་ཕན་སྙིང་པོ་བྱམས་བརྩེས་ཉེར་འཁྱུད་པའི།།
རབ་དཀར་མཛད་འཕྲིན་འོ་མཚོའི་རླབས་ཕྲེང་འབུམ།།
འཛམ་གླིང་བསོད་ནམས་སྐལ་བར་སྨིན་པ་ལས།།
ལེགས་བཤད་བདུད་རྩིའི་ཟེར་བརྒྱ་ཅི་ཡང་སྤྲོ།།

ལྷག་བསམ་གངས་རི་འབར་བའི་ལྡིང་ཁང་ནས།།
རིས་མེད་ཆོས་ཚུལ་སྟག་སེང་ཁྱུ་མཆོག་ལ།།
དག་སྣང་འོད་ཀྱིས་མཛའ་བརྩེ་གཅིག་སྒྲིལ་པའི།།
རྨད་བྱུང་མཛད་བཟང་སྲིད་ན་མངོན་པར་མཐོ།།

བདག་འཛིན་དྲ་བར་ཚུད་ཅིང་ཆགས་སྡང་གི།
བྲན་ལས་སྐྱེས་པའི་དུས་ཀྱི་རྒུད་ཚོགས་ཀུན།།
བྱམས་བརྩེ་མཚོན་གྱིས་གཞོམ་ཞིང་ཞི་བདེའི་གདུགས།།
རྟག་ཏུ་སྒྲེང་བའི་གྲགས་སྙན་བླ་ན་འབར།།

གངས་ལྗོངས་སྣོད་བཅུད་ཤར་ཕྱོགས་གཏུམ་སྤྱོད་ཀྱིས།།
སྲེག་ལ་ཉེ་བའི་དུས་ཀྱི་མཐའ་མ་དེར།།
མཚན་དཔེའི་མེ་ཏོག་ཕྲ་ཡང་ལུགས་ཟུང་འཁུར།།
ཞུམ་མེད་བཞེས་ཏེ་ལེགས་བཅོས་སྒོ་བརྒྱ་འབྱེད།།

ལྷ་ལྡན་གྲུ་འཛིན་ནོར་བུའི་ཕོ་བྲང་ནས།།
འཕགས་པའི་ཡུལ་ལ་གསེར་ཞལ་ཟླ་བའི་འཛུམ།།
སྤྲིན་དཀར་ཡོལ་བའི་གསེབ་ནས་བཞད་པ་ནས།།
གངས་ལྗོངས་མང་གཙོའི་སྐྱེད་ཚལ་གསར་དུ་སྐྱིལ།།

དུས་འགྱུར་ཉམ་ངའི་འཐབ་འོག་ཚུད་པའི་ཚེ།།
དམ་པའི་རང་རྟགས་མ་ཤོར་བོད་ཁམས་སྤྱིའི།།
ངེས་དོན་རྡོ་རིང་ཡངས་པའི་འཛམ་གླིང་གི།།
གར་གྱི་སྟེགས་བུར་ལན་མང་ཁྱོད་ཀྱིས་བཙུགས།།

གང་གི་རྨད་བྱུང་ཐུགས་རྗེའི་ལྕགས་ཀྱུ་ཡིས།།
ལྔ་རིག་རྒྱུ་སྐར་འཕྲོ་བའི་ཟླ་གྲོགས་སུ།།
རིག་གསར་ཟླ་གཞོན་བསུས་པའི་འབྲས་བཟང་ལ།།
ཅི་དགར་ལོངས་སུ་སྤྱོད་པའི་བསྐལ་བཟང་ཐོབ།།

རྒྱལ་བསྟན་ནོར་བུའི་ཆུ་གཏེར་རབ་རྒྱས་ཏེ།།
ཕུན་ཚོགས་སྡེ་བཞིས་སྐྱེ་དགུ་འཚོ་ཕྱིར་དུ།
གཉིས་སྐྱེས་གུར་གུམ་བརྡལ་བའི་ཐང་ཆེན་ནས།།
ལུང་རྟོགས་བསྟན་པའི་མེ་རོ་སླར་ཡང་གསོས།།
བགྲང་བྱ་ཉིས་སྟོང་ལྷག་གི་ལེགས་ཉེས་ཀུན།།
རྣམ་པར་དཔྱོད་ལ་ཐུགས་ཀྱི་ཟླ་དཀྱིལ་རྫོགས།།
མ་འོངས་མངོན་པར་གཟིགས་པའི་མཁྱེན་དཔྱོད་ཀྱིས།།
སྲིད་དབང་དམངས་ལ་སྦྱིན་ཕོད་ཁྱེད་མིན་སུ།།

ཆོས་པའི་གཟུགས་ཀྱིས་ཆོས་ལོག་བྱེད་པ་དང་།།
ཆོས་ཀྱི་ཚུལ་གྱིས་ཆོས་མིན་བྱེད་པ་སོགས།།
དབུ་ཚད་རིགས་བརྒྱ་རྒོད་པའི་སོ་ཁ་ནས།།
ཕྱེ་མར་འཐག་པ་ཁྱེད་མིན་སུ་ཞིག་མཆིས།།
 
འགྲོ་ཀུན་ཕན་བདེའི་འབྱུང་རྩ་ཐུབ་བསྟན་གྱི།།
ངེས་དོན་སྙིང་པོ་གཟུར་གནས་རིག་གསར་དང་།།
དཔུང་པ་གཤིབས་ནས་འགྲམ་ཆུ་ལྡང་མཛད་དེ།།
ཐུབ་བསྟན་བྱི་དོར་མཛད་མཁས་ཁྱེད་མིན་སུ།།

ངེས་དོན་གནས་ལུགས་སྟོན་པའི་སྒྲ་དབྱངས་ཀྱིས།།
ཁམས་གསུམ་ཕོས་རྒོལ་གླང་པོ་འཁུམ་མཛད་ཅིང་།།
བློ་ལྡན་བུང་པའི་ཚོགས་ལ་བདུད་རྩིའི་ཟས།།
སེམས་ཀྱི་ངལ་བ་གསོ་བའི་དཔལ་དུ་སྦྱིན།།

ཡོན་ཏན་དྲི་གཞོན་འཐུལ་བའི་ཁང་བཟང་ནས།།
བྱམས་བརྩེའི་ཕྱག་ཟུང་བརྐྱངས་པའི་ལེགས་བཤད་ཀྱི།།
ག་བུར་དོག་པ་རིས་མེད་སྐྱེ་འགྲོ་ཡི།།
རྣ་བའི་དཔྱིད་དུ་སིམ་པའི་དགའ་སྟོན་རྒྱས།།

གང་གི་རྨད་བྱུང་ཡོན་ཏན་ཚོགས་རྣམས་ལ།།
འཛམ་གླིང་མཁས་པར་གྲགས་པ་མ་ལུས་པའི།།
གཙུག་གི་ནོར་བུར་བཀུར་བའི་ངང་ཚུལ་འདི།།
གངས་ཅན་བོད་མིའི་སྤོབས་པའི་གཞི་རྟེན་ཉིད།།

འོན་ཀྱང་ཁ་བཤད་ཝུ་བའི་བོངས་ཆེ་ཞིང་།།
ལག་ལེན་རྒྱ་ཁབ་ཙམ་གྱིས་སྟོང་གྱུར་བའི།།
ཕྱི་ནང་སྐལ་དམན་འགའ་ཡི་ལོག་ཤེས་ངོར།།
ཡོན་ཏན་སྐྱོན་དུ་ལྟ་བ་སྙིང་རྗེའི་ཡུལ།།

གང་གི་ཞབས་རྡུལ་སྤྱི་བོའི་མཛེས་རྒྱན་དུ།།
ལན་མང་འཐུང་པའི་སྐལ་བཟང་ཐོབ་ན་ཡང་།།
བདག་འཛིན་དྲ་བར་འཛིང་བའི་དུག་གསུམ་དཔུང་།།
གཉེན་པོས་མ་བཟློག་སྙིང་དུ་ཉལ་བས་སྐྱོ།།

དུས་མཐའི་ལུས་ཅན་འགྲོ་བའི་ཚོགས་རྣམས་ལ།།
བྱམས་བརྩེ་ཉི་འོད་རྟག་ཏུ་སྙོམས་མཛད་པའི།།
སྙིང་རྗེའི་རང་གཟུགས་ཕྱག་ན་པདྨོ་ཡི།།
ཞབས་ཟུང་ཨེ་ཝཾ་རྡོ་རྗེའི་ཁམས་བརྟན་ཤོག།

གང་གི་གསང་གསུམ་རྒྱ་མཚོའི་ཀློང་ཡངས་ལས།།
བདག་བློ་ཀུ་ཤའི་རྩེ་ལས་ཆུ་ཐིག་ཙམ།།
གུས་པས་མཆོད་པའི་དགེ་རྩ་ཅི་མཆིས་པས།།
ཚེ་རབས་འབྲལ་མེད་རྗེས་འཛིན་ས་ཐོབ་ཤོག།།

དགེ་བཤེས་བསྟན་པ་བཀྲ་ཤིས་ཀྱིས། ཕྱི་ལོ་ ༢༠༡༡ ལོའི་༸སྐུའི་འཁྲུངས་སྐར་གྱི་མཛད་སྒོ་དང་སྐབས་བསྟུན་སྤེལ།