ཆོས་དཔོན་ ༤ བཙན་འཁྲིད་བྱས་འདུག

ཉེ་ཆར་རྒྱ་གཞུང་གིས་ཡེ་ཤུ་ཆོས་དཔོན་ ༤ བཙན་འཁྲིད་བྱས་ཡོད་པ་མ་ཟད། ཆོས་ཁྲིམས་དང་འགལ་ཐོག་ཆོས་དཔོན་ ༤༠ ལྷག་ཁྲི་འདོན་བྱ་འཆར་ཡོད་པ་བསྒྲགས་འདུག

ཟླ་འདིའི་ཚེས་ ༡༠ ཉིན།  རྒྱ་ནག་ཀུང་ཏུང་ཞིང་ཆེན་ཅཱང་མིན་ས་ཁུལ་གྱི་ཆོས་དཔོན་ལཱང་ཅིན་ཧྲིན་དང་། མའེ་ཀྲིག་ས་ཁུལ་གྱི་ཆོས་དཔོན་ལེའོ་ཧུང་ཆིན། ཀྲན་ཅཱང་ས་ཁུལ་གྱི་ཆོས་དཔོན་སུའུ་ཡུང་ཏཱ་གསུམ་རྒྱ་གཞུང་ཉེན་རྟོག་པས་བཙན་ཁྲིད་བྱས་ཡོད་པ་དང་། དེ་བཞིན་ཀྲུང་ཀྲུག་ས་ཁུལ་གྱི་ཆོས་དཔོན་ཀཱན་ཅོན་ཆའོ་ཡང་ཉིན་འགའི་སྔོན་ནས་གར་སོང་ཆ་མེད་དུ་གྱུར་ཡོད་འདུག  ཆོས་དཔོན་དེ་དག་བཙན་ཁྲིད་མ་བྱས་པའི་ཉིན་འགའི་སྔོན་ལ་རྒྱ་གཞུང་གིས་ཁོང་ཚོར་བཀའ་རྒྱ་བཏང་སྟེ། ཕྱི་ཟླ་ ༧ ཚེས་ ༡༤ ཉིན་རྒྱ་གཞུང་གི་སྟངས་འཛིན་འོག་འཚོགས་འཆར་ཡོད་པའི་ཆོས་དཔོན་ཁྲི་འདོན་མཛད་སྒོར་ཞུགས་དགོས་པའི་བཙན་སྐུལ་བྱས་ཡོད་པ་རེད། ཡིན་ནའང་། ཝེ་ཐེ་ཁཱན་འཛམ་གླིང་ཡེ་ཤེས་ཆོས་ཚོགས་ཀྱི་ངོས་ནས།  རྒྱ་གཞུང་གིས་མཛད་སྒོ་དེའི་ཐོག་ཁྲི་འདོན་བྱ་འཆར་ཡོད་པའི་ཧུང་པེན་ཀྲང་ཆོས་དཔོན་དུ་ཁྲི་འདོན་བྱ་རྒྱུར་ངོས་ལེན་གནང་མེད་པ་རེད། འཛམ་གླིང་ཡེ་ཤུ་ཆོས་ཚོགས་ཀྱི་སྤྱི་སྲོལ་ལྟར་ན། འཛམ་གླིང་རྒྱལ་ཁབ་སོ་སོའི་ནང་གི་ཡེ་ཤུ་ཆོས་དཔོན་ཚང་མ་ཝེ་ཐེ་ཁཱན་འཛམ་གླིང་ཡེ་ཤུ་ཆོས་ཚོགས་ཀྱིས་ངོས་འཛིན་བརྒྱུད་ཁྲི་འདོན་བྱེད་དགོས་ཀྱིན་ཡོད་པ་རེད། ཡིན་ནའང་། རྒྱ་གཞུང་གིས་རྒྱ་ནག་ནང་ཡེ་ཤུ་ཆོས་དཔོན་ཁྲི་འདོན་གྱི་ལས་དོན་དེ་རྒྱ་གཞུང་གི་ནང་སྲིད་གནད་དོན་ཞིག་ལ་རྩིས་ཏེ།  ཝེ་ཐེ་ཁཱན་འཛམ་གླིང་ཡེ་ཤེ་ཆོས་ཚོགས་ཀྱིས་ཐེ་ཇུས་བྱེད་མི་ཆོག་པ་བརྗོད་ཡོད་པ་མ་ཟད།  རྒྱ་ནག་ནང་ཆོས་དཔོན་ ༤༠ ལྷག་གི་ས་མིག་སྟོང་བར་ལྷག་ཡོད་པས།  རྒྱ་ནག་རྒྱལ་གཅེས་ཡེ་ཤེ་ཆོས་ཚོགས་ཀྱིས་དེ་དག་གང་མགྱོགས་ཁྲི་འདོན་བྱ་དགོས་པ་དེ་ནི་སྤྱི་ཚོགས་བརྟན་ལྷིང་དང་འབྲེལ་བའི་ལས་དོན་ཞིག་ཆགས་ཡོད་སྐོར་བསྒྲགས་འདུག  

དེ་བཞིན། ཕྱི་ཟླ་ ༦ ཚེས་ ༢༦ ཉིན་ཝེ་ཐེ་ཁཱན་འཛམ་གླིང་ཡེ་ཤུ་ཆོས་ཚོགས་ཀྱིས་ངོས་འཛིན་ཡོད་པའི་རྒྱ་ནག་ཧི་པའེ་ཞིང་ཆེན་ཧཱན་ཏན་ས་ཁུལ་གྱི་ཆོས་དཔོན་སུང་ཞིས་གཱན་རྒྱ་གཞུང་གིས་འཛིན་བཟུང་བྱས་པ་མ་ཟད།  ཟླ་ ༦ ཚེས་ ༢༩ ཉིན་རྒྱ་གཞུང་གིས་རང་འདོད་སྒེར་གཅོད་ལྟར། རྒྱ་ནག་ཆབ་སྲིད་ལྷན་ཁང་གི་འཐུས་མི་དང་རྒྱལ་གཅེས་ཡེ་ཤུ་ཆོས་ཚོགས་ཀྱི་མགོ་གཙོ་ལིས་ཧྲི་ཡཱན་ཟེར་བ།  ཟི་ཁྲོན་ཞིང་ཆེན་གླང་ཆེན་འགྱངས་རི་ས་ཁུལ་གྱི་ཡེ་ཤུ་ཆོས་དཔོན་ལ་ཁྲི་འདོན་བྱས་སྟབས།  ཟླ་འདིའི་ཚེས་ ༤ ཉིན་ཝེ་ཐེ་ཁཱན་འཛམ་གླིང་ཡེ་ཤུ་ཆོས་ཚོགས་ཀྱིས་འཛམ་གླིང་ལ་སྤྱི་བསྒྲགས་ཤིག་སྤེལ་ཏེ། རྒྱ་ནག་ཆབ་སྲིད་ལྷན་ཁང་གི་འཐུས་མི་ལིས་ཧྲི་ཡཱན་ཆོས་དཔོན་དུ་ཁྲི་འདོན་བྱས་པར་ངོ་རྒོལ་བྱས་ཡོད་པ་དང་།  ཡེ་ཤུ་ཆོས་དཔོན་བྷོབ་ཁྲི་ཐོག་ ༡༦ པ་མཆོག་གིས། “རྒྱ་གཞུང་གིས་སྒེར་གཅོད་ཀྱི་ཐོག་ནས་ས་གནས་ཡེ་ཤུ་ཆོས་དཔོན་ཁྲི་འདོན་བྱས་པར་ཧ་ཅང་བློ་ཕམ་ཡོད་ལ། བྱ་སྤྱོད་དེ་རིགས་ནི་རྒྱ་གཞུང་གིས་ཡེ་ཤུ་ཆོས་ལུགས་ཀྱི་སྤྱི་སྲོལ་ལ་གཏོར་བརླག་བཟོས་པ་ཞིག་རེད། འཛམ་གླིང་ཡེ་ཤུ་ཆོས་ཚོགས་ཀྱི་ངོས་ལེན་མེད་པར་ལིས་ཧྲི་ཡཱན་ཆོས་དཔོན་དུ་ཁྲི་འདོན་བྱས་པ་དེ་ནི་ཁྲིམས་འགལ་གྱི་བྱ་སྤྱོད་ཅིག་ཡིན་པས། ལིས་ཧྲི་ཡཱན་ལ་རྒྱ་ནང་གི་ཡེ་ཤུ་ཆོས་ལུགས་པའི་ཚོགས་སྡེ་ཁག་ལ་དོ་དམ་བྱེད་པའི་དབང་ཚད་མེད། ” ཅེས་གསུངས་ཡོད་འདུག 

ཉེ་ལམ་རྒྱ་གཞུང་གིས་འཛམ་གླིང་ཡེ་ཤུ་ཆོས་ཚོགས་ཀྱི་ངོས་འཛིན་མེད་པར། རང་འདོད་སྒེར་གཅོད་ཀྱི་སྒོ་ནས་རྒྱ་ནག་ནང་ས་གནས་ཡེ་ཤུ་ཆོས་དཔོན་ཁྲི་འདོན་བྱེད་བཞིན་པའི་གནས་སྟངས་ཐད།  འཇར་མན་རླུང་འཕྲིན་ཁང་གིས་རྒྱ་ནག་ཧོང་ཀོང་གི་ཆོས་དཔོན་ཁྲིན་ཀྲི་མེན་ལ་བཀའ་འདྲི་གནང་སྐབས།  ཁོང་གིས་ “ཡེ་ཤུ་ཆོས་དཔོན་ནི་འཛམ་གླིང་ཡེ་ཤུ་ཆོས་ལུགས་ཀྱི་སྤྱི་སྲོལ་ལྟར་རྒྱུན་འཛིན་བྱེད་དགོས་པ་རེད།  རྒྱ་གཞུང་གིས་ངེས་པར་དུ་ཆོས་ལུགས་ལ་རང་དབང་སྤྲོད་དགོས ” ཞེས་བརྗོད་དེ།  ཡེ་ཤུའི་ཆོས་དཔོན་བྷོབ་ཀྱི་གསུངས་པ་ལྟར། འཛམ་གླིང་ཡེ་ཤུ་ཆོས་ཚོགས་ཀྱིས་ངོས་ལེན་མེད་པར་ཆོས་དཔོན་ཁྲི་འདོན་བྱས་པ་ནི་ཁྲིམས་འགལ་ཡིན་ལ། ཆོས་དཔོན་དེའི་རིགས་ཀྱིས་ཡེ་ཤུ་ཆོས་ཚོགས་ལ་དོ་དམ་བྱེད་པའི་དབང་ཚད་མེད་པ་བསྐྱར་དུ་ནན་བརྗོད་བྱས་ཡོད་པ་རེད། ཡིན་ནའང་། ཨ་རིའི་རླུང་འཕྲིན་ཁང་གིས་རྒྱ་ནག་རྒྱལ་གཅེས་ཡེ་ཤུ་ཆོས་ཚོགས་ཀྱི་མགོ་གཙོ་གཞོན་པ་ལུག་པའོ་ཉཱན་ལ།  འཛམ་གླིང་ཡེ་ཤུ་ཆོས་ཚོགས་ཀྱིས་ངོས་འཛིན་ཡོད་པའི་ཆོས་དཔོན་ ༤ ཉེ་ཆར་རྒྱ་གཞུང་གིས་བཙན་ཁྲིད་བྱས་པའི་ཐད་བསམ་ཚུལ་དྲིས་སྐབས།  ལིག་པའོ་ཉཱན་གྱིས་གནས་ཚུལ་དེ་ཁོ་རང་གིས་གོ་ཐོས་བྱུང་མེད་ཚུལ་དང་།  གནས་ཚུལ་དེ་དཀྲོགས་གཏམ་ཡིན་སྲིད་པའི་སྐོར་བརྗོད་འདུག 

ཕྱི་ལོ་ ༡༩༥༡ ལོར་ཝེ་ཐེ་ཁཱན་འཛམ་གླིང་ཡེ་ཤུ་ཆོས་ཚོགས་ཀྱིས་གོ་མེན་ཏང་སྲིད་གཞུང་ནི་རྒྱ་ནག་གི་ཁྲིམས་མཐུན་གཞུང་ཡིན་པའི་ངོས་འཛིན་གནང་བར་བརྟེན། རྒྱ་གཞུང་དང་འཛམ་གླིང་ཡེ་ཤུ་ཆོས་ཚོགས་བར་འབྲེལ་བ་ཆད་ཡོད་པ་རེད།  ཡིན་ནའང་།  རྒྱ་ནག་ནང་རིམ་བཞིན་ཡེ་ཤུ་དད་ལྡན་པ་ཇེ་མང་དུ་སོང་བ་དང་བསྟུན་ནས།  ཕྱོགས་གཉིས་བར་འབྲེལ་བ་བསྐྱར་དུ་ཚུགས་མགོ་བརྩམས་ཡོད་མོད།  ཉེ་བའི་ལོ་གཅིག་གི་སྔོན་ནས་བཟུང་རྒྱ་གཞུང་གིས་རྒྱལ་གཅེས་ཡེ་ཤུ་ཆོས་ཚོགས་ཟེར་བའི་མིང་ཐོག་ནས། ས་གནས་ཡེ་ཤུ་ཆོས་དཔོན་རང་འདོད་ལྟར་ཁྲི་འདོན་བྱས་པར་བརྟེན། རྒྱ་གཞུང་དང་འཛམ་གླིང་ཡེ་ཤུ་ཆོས་ཚོགས་བར་གྱི་འགལ་ཟླ་སྔར་བས་ཛ་དྲག་ཏུ་ཕྱིན་ཡོད་པ་རེད། 

༢༠༠༦ ལོའི་རྒྱ་ནག་སྤྱི་ཚོགས་ཚན་རིག་ཁང་གི་སྙན་ཐོའི་ནང་བཀོད་པ་ལྟར་ན། དེང་སྐབས་རྒྱ་ནག་ནང་ཡེ་ཤུ་ཆོས་ལུགས་ལ་དད་མཁན་མི་གྲངས་ཁྲི་ ༡༣༠༠༠ ཡོད་པ་དང་། དེའི་ནང་གནམ་བདག་ཆོས་ལུགས་པ་ཁྲི་ ༢༠༠༠ ཡོད་འདུག

གསར་འགོད་པ། ཚེ་རིང་རྒྱལ།