༸གོང་ས་མཆོག་གིས་ཨ་རིའི་རྒྱལ་ས་ཝ་ཞིན་ཊོན་དུ་དུས་འཁོར་དབང་ཆེན་དང་། ཨོ་བྷ་མ་དང་མཇལ་འཕྲད་གནང་བ་སོགས་ཟླ་ཕྱེད་རིང་གི་མཛད་འཕྲིན་ཁག་གྲུབ་སྟེ། དེ་རིང་ཞོགས་པ་ཕྱིར་བཞུགས་སྒར་དུ་ཆིབས་བསྒྱུར་བསྐྱངས་སོང་།
ཟླ་འདིའི་ཕྱི་ཚེས་ ༦ ཉིན་ནས་བཟུང་ཝ་ཤིན་ཊོན་བོད་རིགས་སྤྱི་མཐུན་ཚོགས་པ་དང་དེར་ཡོད་དད་ལྡན་མང་ཚོགས་ཀྱིས་ཇི་ལྟར་གསོལ་འདེབས་ཞུས་པ་བཞིན། ༸གོང་ས་མཆོག་གིས་ཨ་རིའི་རྒྱལ་ས་ཝ་ཤིན་ཊོན་དུ་བོད་རིགས་དང་ཕྱི་རྒྱལ་གྱི་དད་ལྡན་པ་ཁྲི་ ༢ ལྷག་ལ་དཔལ་དུས་ཀྱི་འཁོར་ལོའི་བཀའ་དབང་ཆེན་ཐེངས་སོ་གཅིག་པ་གནང་བ་དང་། དེར་ཡོད་ཨ་རི་དང་ཁེ་ན་ཌ། ཧོང་ཀོང་། ཐེ་ཝན། སིངྒ་པུར། རྒྱ་ནག་སྐམ་ས་ཆེན་མོ་བཅས་ནས་ཡོང་བའི་རྒྱ་རིགས་མཁས་དབང་དང་རྩོམ་པ་པོ། སློབ་མ་བཅས་མི་གྲངས་ ༡༤༤ ལྷག་དང་མཉམ་དུ་༼དམངས་གཙོའི་རྒྱ་ནག་དང་མང་འོངས་པའི་བོད།༽ ཅེས་པའི་བགྲོ་གླེང་སྟེང་ཕེབས་པ། དེ་བཞིན། ཨ་རིའི་སྲིད་འཛིན་ཨོ་བྷ་མ་དང་གྲོས་ཚོགས་འཐུས་མིར་ཐུག་འཕྲད་གནང་བ་བཅས་མཛད་འཕྲིན་ཁག་ཡོསང་སུ་གྲུབ་སྟེ། དེ་རིང་ཕྱི་ཚེས་ ༢༠ ཉིན་ཞོགས་པའི་ཆུ་ཚོད་ ༡༠ བའི་སྟེང་དབུས་བོད་མིའི་སྒྲིག་འཛུགས་ཀྱི་བཀའ་བློན་རྣམ་པ་དང་སྤྱི་འཐུས་རྒྱུན་ལས། གཞུང་ཞབས་ལས་བྱེད། གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ། བཞུགས་སྒར་ཉེ་འཁོར་གྱི་སློབ་གྲྭ་དང་དགོན་སྡེ་ཁག་གི་སྐུ་ཚབ་མི་སྣ། ངྷ་ས་ཁུལ་གྱི་སེར་སྐྱ་མི་མང་བཅས་ཀྱི་ཕེབས་བསུའི་ཁྲོད་ཕྱིར་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཞབས་སོར་བཀོད་སོང་།
ཐེངས་འདི་ནི་༧གོང་ས་མཆོག་གིས་བོད་པའི་ཆབ་སྲིད་དང་འཛིན་སྐྱོང་གི་ཐུགས་འགན་ཡོངས་སུ་མཚམས་འཇོག་གནང་རྗེས། ཨ་རིའི་སྲིད་འཛིན་ཨོ་བྷ་མ་དང་མཇལ་འཕྲད་གནང་ཐེངས་དང་པོ་དེ་ཆགས་ཡོད།
གསར་འགོད་པ། དོན་གོ
ལྷད་མེད་ཅེས། ལྷད་མེད་ཅིག
ཐུགས་ཟབ། ཐུགས་གཟབ།
དེ་མོར། དེ་མུར།
རྣམ་མེད། སྣང་མེད།
༸གོང་ས་རྒྱལ་བ་ཐམས་ཅན་མཁྱེན་པ་མཆོག་སྐུ་ཚེ་སྐལ་རྒྱར་བརྟན་པའི་སྨོན་འདུན་ཡང་ཡང་ཞུ། རྒྱ་ཆེ་མཆན་འགོད་པ་དང་གསར་འགོད་པ་བཅས་ལ་ཞུ་རྒྱུར། ཁྱེད་ཅག་ནི་ཉག་ཕྲ་བའི་དུས་སྐབས་འདིར་བོད་མི་རིགས་ཀྱི་བླ་སྲོག་སྐད་ཡིག་གི་རྒྱུད་འཛིན་པ་ཁྱེད་ཅག་ཡིན་པར་སྨྲོས་མེད་ཁར། མ་འོངས་རང་མི་རིགས་ཀྱི་སྐད་ཡིག་དེ་དྭངས་གཙང་ལྷད་མེད་ཅེས་དགོས་ཚེ་ད་ལྟ་ནས་ཡིག་ནོར་ལ་ཐུགས་ཟབ་ངེས་པར་དུ་གནང་གལ་ཆེ་བར་མངོན། དཔེར་ན་གོང་གི་གསར་འགྱུར་འདི་དང་འོག་གི་མཆན་གཉིས་ལ་ལྟོས་དང་ཡིག་ནོར་ཇི་ཙམ་འདུག དེ་མོར་རྣམ་མེད་འཇོག་ཚེ་དྭངས་གཙང་ལྷད་མེད་ཀྱི་སྐད་ཡིག་ཅེས་ཉར་རྒྱུར་རེ་བ་དེ་ནམ་མཁའི་མེ་ཏོག་དང་གཉིས་སུ་མ་མཆིས་སོ།
ཕྱོགས་བཅུའི་རྒྱལ་བ་སྲས་དང་བཅས་པའི་ངོ་བོའི་མཁྱེན་བརྩེ་གཅིག་ཏུ་འདུས་པའི་བདག་ཉིད། འཛམ་གླིང་སྤྱི་དང་ཆེད་པར་བོད་ཁ་བ་གངས་ཅན་པའི་སྐྱེ་འགྲོ་ཡོངས་ཀྱི་མགོན་སྐྱབས། རྒྱལ་བ་བསྟན་འཛིན་རྒྱ་མཚོའི་སྐུ་ཚེ་སྐལ་བརྒྱ་བར་དུ་བཞུགས་རོགས་ཞུ།།
༧གོང་ས་སྐྱབས་མགོན་ཡིད་བཞིན་ནོར་བུའི་མཛད་འཕྲིན་གྱི་འོད་སྟོང་ཕྱོགས་ཀུན་རྒྱས་ཏེ་བདེ་སྐྱིད་ཀྱི་དཔལ་ཡོན་འཛམ་གླིང་གོ་ལའི་སྟེང་དུ་གཟི་བརྗིད་མངོན་པར་བཀྲ།
༸གོང་ས་མཆོག་རང་ཡུལ་དུ་ཞབས་སོར་འཁོད་པ་རེད་དམ།
རེད་ཕལ་ཆེར་བོད་ཀྱི་ས་མཐོའི་དབྱར་གཞུང་ཞིག་ཏུ།
རེ་སྒུག་གི་སྨྲེང་སྐྱོ་འདྲེས་མས་སྐུ་ཉིད་ལ་ད་དུང་བསྒུག་ཡོད་ལ།
མཛད་འཕྲིན་གྱི་ཉི་འོད་རབ་ཏུ་རྒྱས་དུས་མེ་ཏོག་དང་།
ཁ་བཏགས་ནམ་ཡང་སྐུ་ཉིད་ཀྱི་ཕྱོགས་སུ་བསྲིངས་ཡོད།
ཕ་ཡུལ་གྱི་གུས་འབངས་ཡོངས་ཀྱི་ཚབ་ཏུ།
༧གོང་ས་སྐྱབས་མགོན་ཡིད་བཞིན་ནོར་བུའི་མཛད་འཕྲིན་གྱི་འོད་སྟོང་ཕྱོགས་ཀུན་རྒྱས་ཏེ་བདེ་སྐྱིད་ཀྱི་དཔར་ཡོན་འཛམ་གླིང་གོ་ལའི་སྟེང་དུ་གཟི་བརྗིད་མངོན་པར་བཀྲ།
༧གོང་ས་སྐྱབས་མགོན་ཡིད་བཞིན་ནོར་བུའི་མཛད་འཕྲིན་གྱི་འོད་སྟོང་ཕྱོགས་ཀུན་རྒྱས་ཏེ་བདེ་སྐྱིད་ཀྱི་དཔར་ཡོན་འཛམ་གླིང་གོ་ལའི་སྟེང་དུ་གཟིད་བརྗོད་མངོན་པར་མངོན་པར་བཀྲ།