རྒྱ་ནག་གི་མེ་འཁོར་གདོང་ཐུག་ཁྲོད་ཀྱི་ཤི་རྨས་ཚབས་ཆེན།

གཟའ་སྤེན་པའི་ཉིན་རྒྱ་ནག་གི་མེ་འཁོར་གཉིས་གདོང་ཐུག་བརྒྱབ་སྟེ་དོན་རྐྱེན་ཆེན་པོ་ཞིག་བྱུང་ཡོད་ཀྱང་། མྱུར་སྐྱོབ་ཀྱི་ལས་དོན་དུས་ཐོག་ཏུ་བསྒྲུབ་ཐུབ་མེད་པ་མ་ཟད། མི་ཤི་རྨས་ཀྱི་གྲངས་འབོར་ཡང་གཅིག་གྱུར་ཐོག་ཕྱིར་བསྒྲགས་བྱས་མེད།  

ཕྱི་ཚེས་ ༢༣ ཉིན་གྱི་དགོང་མོའི་ཆུ་ཚོད་ ༢༠ དང་སྐར་ ༣༨ སྟེང་། པེ་ཅིན་ལྷོ་ཁུལ་ནས་ཧྥུ་ཀྲིག་ཏུ་བསྐྱོད་བཞིན་པའི་ D301 རྟགས་ཅན་གྱི་མེ་འཁོར་དང་།  ཧང་ཀྲིག་ནས་ཧྥུ་ཀྲིག་ཏུ་སྐྱོད་བཞིན་པའི་ D3115 རྟགས་ཅན་གྱི་མེ་འཁོར་གཉིས་ཀྲུག་ཅང་ཞིང་ཆེན་ཝུན་ཀྲིག་གྲོང་ཁྱེར་མངའ་ཁུལ་གྱི་ཨོ་ཅཱང་ཟམ་ཆེན་སྟེང་གདོང་ཐུག་བརྒྱབ་སྟེ། ཉུང་མཐར་ཡང་མི་ ༣༩  རྐྱེན་འདས་སུ་སོང་ཡོད་པ་དང་། གཞན་མི་ ༡༩༢ ལ་རྨས་སྐྱོན་ཕོག་འདུག སྐབས་དེར་ D301 རྟགས་ཅན་གྱི་མེ་འཁོར་ནང་མི་ ༥༥༨ དང་། D3115 རྟགས་ཅན་གྱི་མེ་འཁོར་ནང་མི་ ༡༠༧༢ ཡོད་ཅིང་། གདོང་ཐུག་བྱུང་མ་ཐག་མེ་འཁོར་ D301 རྟགས་ཅན་གྱི་འཁོར་སྒམ་ ༡ ནས་ ༤ བར་དང་།  D3115 རྟགས་ཅན་གྱི་འཁོར་སྒམ་ ༡༣ ནས་ ༡༦ བར་ལྕགས་ལམ་ལས་ཁ་ཤོར་ཏེ་ཟམ་འོག་ཏུ་ལྷུང་ཡོད་ཅིང་། འཁོར་སྒམ་དེ་དག་ནང་མི་ ༦༠༠ ལྷག་ཡོད་འདུག

ཕྱི་ཚེས་ ༢༤ ཉིན་རྒྱ་ནག་ལྕགས་ལམ་བཟོ་སྐྲུན་སྡེ་ཁག་གི་མགྲིན་ཚབ་པ་ཝང་ཡུང་ཕེན་གྱིས་བརྗོད་པ་ལྟར་ན། དོན་རྐྱེན་ཁྲོད་མི་ ༣༥ ལས་རྐྱེན་འདས་སུ་སོང་མེད་ཚུལ་བརྗོད་ཡོད་ཀྱང་། གསར་ལམ་གཞན་མང་པོ་ཞིག་གིས་མི་ ༣༩ རྐྱེན་འདས་སུ་ཕྱིན་ཡོད་ཚུལ་བཀོད་འདུག་ལ། ཕྱི་ཚེས་ ༢༥ ཉིན་རྒྱ་ནག་ཞིན་ཧྭ་གསར་ཁང་གིས་མི་ ༤༠ རྐྱེན་འདས་སུ་སོང་ཡོད་པ་དང་། དེ་དག་ཁྲོད་བུད་མེད་ ༡༠ དང་ཕྱི་རྒྱལ་བ་ ༢ ། གཞན་མི་ ༡༩༢ ལ་རྨས་སྐྱོན་ཕོག་ཡོད་སྐོར་བཀོད་འདུག ཧྲང་ཧེ་ཏུང་ཧྥང་བརྙན་འཕྲིན་གསར་ཁང་གིས་ས་གནས་གནས་ཚུལ་གཏོང་སྐབས་མི་ ༦༣ རྐྱེན་འདས་སུ་གྱུར་ཡོད་ཚུལ་བསྒྲགས་འདུག གཞན། དང་བླངས་སྨན་ཞབས་ཞིག་གིས་གསར་ལམ་ཁག་ཏུ་བརྗོད་པ་ལྟར་ན།  ཕྱི་ཚེས་ ༢༦ ཉིན་གྱི་ཕྱི་དྲོའི་བར་མི་ ༡༧༩ རྐྱེན་འདས་སུ་ཕྱིན་ཡོད་པ་དང་། ཝུན་ཀྲིག་མི་དམངས་སྨན་ཁང་གསུམ་པའི་ཐོག་ཁང་བཅུ་དྲུག་པའི་ནང་ད་དུང་སྲོག་ཉེན་ཅན་གྱི་རྨས་མས་ཁེངས་ཡོད་སྐོར་བརྗོད་འདུག 

གནས་ཚུལ་དེ་བྱུང་མ་ཐག་རྒྱ་ནག་དབུས་གཞུང་གིས་ཐད་ཀར་བཀའ་རྒྱ་བཏང་སྟེ། དོན་རྐྱེན་བྱུང་ཡུལ་མཐའ་འཁོར་དམག་མིས་སྐོར་ཏེ་མི་མང་དང་གསར་འགོད་པ་ས་གནས་སུ་འགྲོ་སྐྱོད་བཀག་སྡོམ་བྱས་ཤིང་། ལྕགས་ལམ་ཟམ་པའི་སྟེང་འོག་གི་འཁོར་སྒམ་ཆག་རོ་རྣམས་གཙང་འཕྱག་བྱས་ཏེ།  ཕྱི་ཚེས་ ༢༦ ཉིན་དོན་རྐྱེན་བྱུང་ཡུལ་གྱི་ལྕགས་ལམ་སྟེང་བསྐྱར་ཏུ་མེ་འཁོར་ཤར་བསྐྱོད་ཐུབ་པ་བཟོས་ཡོད་འདུག དོན་རྐྱེན་དེའི་ཁྲོད་ནང་མི་ལྔ་རྐྱེན་འདས་སུ་གྱུར་ཟིན་པའི་ཊེ་ཅང་ས་ཁུལ་གྱི་ཡུལ་མི་ཡཱང་ཧྥུན་གྱིས་བརྗོད་པ་ལྟར་ན། གནས་ཚུལ་དེ་ཐོས་མ་ཐག་ཆུ་ཚོད་ ༤ ལམ་ཐག་ལ་རླངས་འཁོར་ཤར་གཏོང་བྱས་ཏེ་ཕྱི་ཉིན་ཞོགས་པར་དོན་རྐྱེན་བྱུང་ཡུལ་དུ་འབྱོར་སྐབས། དམག་མི་མང་པོས་མཐའ་བསྐོར་ཏེ་མི་མང་རྣམས་དོན་རྐྱེན་བྱུང་ཡུལ་དུ་བསྐྱོད་རྒྱུར་བཀག་སྡོམ་བྱས་ཡོད་པ་མ་ཟད། དོན་རྐྱེན་བྱུང་ཡུལ་གྱི་མེ་སྐྱོབ་རུ་ཁག་གིས་རྨས་མ་རྣམས་སྐྱོབ་རྒྱུ་བཞག་སྟེ་གཞུང་གི་བཀའ་མངགས་ལ་སྒུག་ཡོད་པ་དང་། ལྕགས་ལམ་ལས་བཟོ་སྡེ་ཁག་བསླེབས་མ་ཐག་མེ་སྐྱོབ་རུ་ཁག་རྣམས་དེ་མ་ཐག་ཕྱིར་འཐེན་བྱས་ཤིང་། དམག་མི་ཚོས་གོང་རིམ་བཀའ་མངགས་ལྟར་ལྕགས་ལམ་བསྐྱར་བཟོ་བྱ་རྒྱུ་གལ་ཆེན་དུ་འཛིན་བཞིན་པ་ལས། རྨས་མ་རྣམས་བསྐྱབ་རྒྱུར་སྣང་ཆུང་བྱེད་ཀྱི་ཡོད་ཚུལ་བརྗོད་འདུག གསར་འགོད་པའི་དྲི་བའི་ལན་དུ་ཡཱང་ཧྥུན་གྱིས” རྒྱ་གཞུང་ལྕགས་ལམ་སྡེ་ཁག་གིས་མྱུར་སྐྱོབ་ལས་གཞི་མཇུག་བསྒྲིལ་ཟིན་པ་ཕྱིར་བསྒྲགས་བྱས་ཏེ། ཆུ་ཚོད་ ༢༠ རྗེས་ལ་ཆག་རལ་དུ་གྱུར་བའི་འཁོར་སྒམ་ནང་ནས་ངས་ཨ་མ་དང་ཚ་བོ་གཉིས་ཀྱི་བེམ་པོ་རྙེད་སོང་ལ། གཞན་གསོན་པོར་གནས་ཡོད་པའི་ལོ་ ༢ ཅན་གྱི་ཕྲུ་གུ་ཆུང་ཆུང་ཞིག་ཀྱང་རྙེད་སོང་། ད་དུང་འཁོར་སྒམ་གཞན་དག་ཏུ་རྐང་ལག་མེད་པའི་བེམ་པོ་མང་པོ་འདུག་ཀྱང་། ཁོ་ཚོས་མིའི་བེམ་པོ་དེ་དག་ལ་བདག་པོ་མ་བརྒྱབ་པར། འཁོར་སྒམ་རྣམས་ཟམ་ཐོག་ནས་མར་གཡུགས་ཏེ་གད་སྙིགས་ཁྲོད་བསྡུ་རུབ་བྱས་སོང་། ” ཞེས་བརྗོད་འདུག

ཕྱི་ཚེས་ ༢༥ ཉིན་རྒྱ་གཞུང་གིས་དོན་རྐྱེན་ཁྲོད་རྐྱེན་འདས་སུ་ཕྱིན་པ་རྣམས་ལ་མི་རེར་རྒྱ་སྒོར་ཁྲི་ ༥༠ གུན་གསབ་སྤྲོད་རྒྱུ་ཡིན་ཚུལ་བརྗོད་ཡོད་པ་དང་།  ཕྱི་ཚེས་ ༢༦ ཉིན་རྐྱེན་འདས་སུ་གྱུར་བའི་མི་ ༡༧ གྱི་མིང་ཐོ་ཕྱིར་བསྒྲགས་དང་། ཚེས་ ༢༧ ཉིན་མི་ ༧ གྱི་མིང་ཐོ་བཅས་ཕྱིར་བསྒྲགས་བྱས་པའི་ནང་ཁྱོན་བསྡོམས་བུད་མེད་ ༡༤ ཡོད་པ་དང་། དེའི་ནང་མིང་ལ་ཨ་སིན་ཋ (Liguori Assunta) ཟེར་བའི་ཨི་ཊ་ལི་ཡི་བུད་མེད་གཅིག་ཡོད་འདུག  དོན་རྐྱེན་ཁྲོད་འདས་གྲོངས་སུ་སོང་བ་ཚོའི་ནང་མི་རྣམས་ས་གནས་སྲིད་གཞུང་དུ་སོང་སྟེ། རྒྱ་ནག་དབུས་ལྕགས་ལམ་སྡེ་ཁག་གིས་དོན་རྐྱེན་འདིའི་གནས་ཚུལ་ཡོངས་རྫོགས་གསལ་བོ་བཟོ་དགོས་པའི་རེ་སྐུལ་ཞུ་བཞིན་ཡོད་འདུག

འབྲེལ་ཡོད་ཉམས་ཞིབ་པ་དག་གིས་གནས་ཚུལ་རྒྱུས་ལོན་བྱུང་བ་ལྟར་ན། D3115 རྟགས་ཅན་གྱི་མེ་འཁོར་དེ་ཆུ་ཚོད་ ༨ ། ༡༤ སྟེང་ཡོན་ཅཱ་འབབ་ཚིགས་ནས་བསྐྱོད་མགོ་བརྩམས་ཡོད་པ་དང་། ལམ་བར་དུ་དབུས་སྤྱི་ཁྱབ་སྟངས་འཛིན་སྡེ་ཁག་གིས་གློག་དམར་ཉེན་བརྡ་འབྱོར་བ་ལྟར་མྱུར་ཚད་སྤྱི་ལེ་ ༢༠ བར་ཇེ་དལ་དུ་བཏང་ཡོད་འདུག  ཆུ་ཚོད་༨།༢༤ སྟེང་ D301 རྟགས་ཅན་གྱི མེ་འཁོར་དེ་གཞི་ནས་ཡོན་ཅཱ་འབབ་ཚིགས་ནས་ཆས་མགོ་བརྩམས་ཏེ། མྱུར་ཚད་སྤྱི་ལེ་ ༡༠༠ ཐོག་ཆུ་ཚོད་སྐར་མ་ ༡༤  བསྐྱོད་མཐར་སྔོན་དུ་བསྐྱོད་བཞིན་པའི་ D3115 རྟགས་ཅན་གྱི་མེ་འཁོར་གྱི་རྗེས་ཆོད་དེ་གདོང་ཐུག་བརྒྱབ་ཡོད་འདུག  གནད་དོན་དབྱེ་ཞིབ་པ་དག་གིས་ཐེངས་འདིའི་མེ་འཁོར་དོན་རྐྱེན་ནི་གློ་བུར་ཐོལ་བྱུང་བ་ཞིག་མ་ཡིན་པར། དབུས་སྤྱི་ཁྱབ་སྟངས་འཛིན་སྡེ་ཁག་གི་ནོར་འཁྲུལ་ཡིན་པ་བརྗོད་འདུག 

ཚེས་ ༢༤ ཉིན་རྒྱ་གཞུང་གི་སྲིད་བློན་གཞོན་པ་ཀྲང་ཏིག་ཅཱང་གིས་དོན་རྐྱེན་འདིའི་ཐད་རྒྱ་ནག་དབུས་རྒྱལ་སྲིད་སྤྱི་ཁྱབ་ཁང་གིས་ཐད་ཀར་ཚན་ཆུང་བཙུགས་ཏེ་ཞིབ་བཤེར་བྱ་རྒྱུ་ཡིན་སྐོར་བརྗོད་ཡོད་པ་དང་། ཧྲང་ཧེ་ལྕགས་ལམ་སྡེ་ཁག་གི་དམར་ཤོག་དྲུང་ཆེ་ལིས་ཅཱ་དང་མགོ་གཙོ་ལུང་ཅིན།  གློག་དང་ལས་བཟོ་དོ་དམ་སྡེ་ཁག་གི་མགོ་གཙོ་གཞོན་པ་ཧི་ཧྲིན་ལི་བཅས་གནས་དབྱུང་བཏང་ཡོད་འདུག ཕྱི་ཚེས་ ༢༧ ཉིན་ཧྲང་ཧེ་ལྕགས་ལམ་སྡེ་ཁག་གི་མགོ་ཁྲིད་ཅིག་གིས་དྲ་ལམ་ཁག་ཏུ་གནས་ཚུལ་སྤེལ་བ་ལྟར་ན། རྒྱ་ནག་དབུས་གཞུང་གིས་གནད་དོན་དངོས་ལ་ཞིབ་བཤེར་མ་བྱས་པར།  དྲང་བདེན་མ་ཡིན་པའི་ཐོག་ནས་ཐད་ཀར་ཧྲང་ཧེ་ལྕགས་ལམ་སྡེ་ཁག་གི་མགོ་བ་རྣམས་ཀྱི་གོ་གནས་བླངས་ཡོད་པ་དང་། ལྕགས་ལམ་སྡེ་ཁག་གི་གསལ་བཤད་དེ་དག་ལྕགས་ལམ་སྡེ་ཁག་རང་གི་གསལ་བཤད་མ་ཡིན་པར་རྒྱ་ནག་དབུས་གཞུང་གི་བཀོལ་བྱུས་ཁོ་ན་ཡིན་སྐོར་བརྗོད་ཡོད་འདུག  ཆབ་སྲིད་དཔྱད་བརྗོད་པ་རེ་འགས་ཐེངས་འདིའི་མེ་འཁོར་དོན་རྐྱེན་གྱི་རྒྱབ་ལྗོངས་སུ་རྒྱ་གཞུང་གི་མཐོ་རིམ་དཔོན་རིགས་བར་གྱི་སྲིད་དབང་འཐབ་རྩོད་ཀྱི་གནད་དོན་ཡོད་པའི་དོགས་པ་བྱེད་ཀྱི་ཡོད་འདུག   

ལོ་སྔོན་མའི་ཟླ་ ༨ ཚེས་ ༡༢ ཉིན་རྒྱ་གཞུང་ལྕགས་ལམ་སྡེ་ཁག་གིས་ད་ལྟ་རྒྱ་ནག་ནི། འཛམ་གླིང་ཐོག་མྱུར་བགྲོད་ལྕགས་ལམ་འཛུགས་སྐྲུན་གཞི་རྒྱ་ཆེ་བ་དང་ལམ་ཐག་རིང་བ། ལག་རྩལ་འཐུས་ཚང་གི་རྒྱལ་ཁབ་ཅིག་ཡིན་ཚུལ་འུད་བརྗོད་བྱས་ཡོད།  

གསར་འགོད་པ། ཚེ་རིང་རྒྱལ།