ཤིན་ཅང་དུ་དྲག་པོའི་ངོ་རྒོལ།

གཟའ་སྤེན་པ་དང་ཉི་མ་ལ་ཤིན་ཅང་གུ་ཧྲི་གྲོང་ཁྱེར་ནང་བསྟུད་མར་དྲག་པོའི་ངོ་རྒོལ་ཐེངས་གཉིས་བྱུང་སྟེ། མི་ ༡༢ རྐྱེན་འདས་དང་མི་ ༣༢ ལ་རྨས་སྐྱོན་བྱུང་འདུག

ཟླ་འདིའི་ཕྱི་ཚེས་ ༣༠ ཉིན་གྱི་དགོང་མོའི་ཆུ་ཚོད་ ༡༡ ཙམ་ལ་ཤིན་ཅང་གུ་ཧྲི་གྲོང་ཁྱེར་ནང་རྒྱ་གཞུང་ལ་དྲག་པོའི་ངོ་རྒོལ་གྱི་དོན་རྐྱེན་བྱུང་སྟེ། མི་ ༧ རྐྱེན་འདས་དང་མི་ ༢༨ ལ་རྨས་སྐྱོན་ཕོག་ཡོད་འདུག་ལ། ཚེས་ ༣༡ ཉིན་གྱི་ཕྱི་དྲོའི་ཆུ་ཚོད་ ༤ པའི་ཐོག་ཡང་བསྐྱར་ངོ་རྒོལ་འགས་གཏོར་གྱི་དོན་རྐྱེན་བྱུང་སྟེ་མི་ ༤ རྐྱེན་འདས་དང་མི་ ༡༢ ལ་རྨས་སྐྱོན་ཕོག་ཡོད་འདུག  རྒྱ་གཞུང་དྲ་ལམ་ཁག་ཏུ་དྲག་པོའི་ངོ་རྒོལ་བ་མི་ ༡༤ ཡོད་པ་ལས་རྒྱ་གཞུང་ཉེན་རྟོག་པས་མེ་མདའ་བརྒྱབ་སྟེ་ངོ་རྒོལ་བ་ ༥ དམར་གསོད་དང་། མི་ ༥ འཇུ་བཟུང་བྱས་ཡོད་སྐོར་བརྗོད་འདུག་པ་མ་ཟད།  ཟླ་ ༨ ཚེས་ ༡ ཉིན་རྒྱ་གཞུང་གི་བརྒྱུད་ལམ་ཁག་ཏུ་གསལ་བསྒྲགས་སྤེལ་ཏེ། ཐེངས་འདིར་གཏོར་རྒོལ་དོན་རྐྱེན་བཟོ་མཁན་གྲས་ལོ་ ༢༩ ཅན་གྱི་ཐིས་ལིས་ཝ་ཨེར་ཏིས་དང་། ལོ་ ༣༤ ཡིན་པའི་ཐའོ་སུང་ཨེ་ཧྲན་གཉིས་འཇུ་བཟུང་རྩིས་སྤྲོད་བྱེད་མཁན་ལ་རྒྱ་སྒོར་ཁྲི་ ༡༠ ཡི་བྱ་དགའ་སྤྲོད་རྒྱུ་ཡིན་ཚུལ་བསྒྲགས་འདུག

ཕྱི་ཚེས་ ༣༡ ཉིན་གྱི་ཕྱི་དྲོ་ནས་བཟུང་རྒྱ་གཞུང་གིས་ཤིན་ཅང་གུ་ཧྲི་གྲོང་ཁྱེར་ནང་དམག་མི་མང་པོ་འགྲེམས་འཇོག་བྱས་ཏེ། ཚོང་ར་དང་མགྲོན་ཁང་། ཟ་ཁང་སོགས་མི་ཚོགས་འདུས་སྡོད་ས་ཁུལ་ཁག་ཏུ་ཡུ་གུར་མི་རིགས་ཡིན་པ་ཚང་མར་དྲི་གཅོད་དང་བཀག་ཉར་བྱེད་མགོ་བརྩམས་ཡོད་པར་མ་ཟད། གྲོང་ཁྱེར་གྱི་ལམ་མདོ་ཁག་དང་གནམ་ཐང་སོགས་ལའང་བཀག་སྡོམ་ནན་མོ་བྱས་ཏེ་ཡུ་གུར་བ་མི་གཅིག་ཀྱང་གྲོང་ཁྱེར་གྱི་ཕྱི་ལོགས་སུ་འགྲོ་སྐྱོད་བཀག་སྡོམ་བྱས་ཡོད་འདུག   

འཛམ་གླིང་ཡུ་གུར་མཐུན་ཚོགས་ཀྱི་མགྲིན་ཚབ་པ་ཏིས་ལིས་ཞཱ་ཐིས་ཀྱིས།  རྒྱ་གཞུང་གིས་ཡུ་གུར་མི་རིགས་ལ་ཞི་བའི་ལམ་ནས་ངོ་རྒོལ་བྱེད་པའི་གོ་སྐབས་སྤྲོད་དགོས་པ་དང་།  རྒྱ་དམར་གཞུང་གིས་ཐད་ཀར་ཡུ་གུར་མི་མང་དང་གྲོས་མོལ་གྱི་ལམ་ནས་གནད་དོན་སེལ་ཐབས་བྱ་དགོས་པ། དེ་བཞིན། ཤིན་ཅང་ནང་འཆར་གཞི་ལྡན་པའི་སྲིད་ཇུས་ཀྱི་ལམ་ནས་རྒྱ་རིགས་མང་པོ་གནས་སྤོར་གྱིས་ཡུ་གུར་མི་རིགས་ཀྱི་རིག་གནས་འཚོ་བར་ཉེན་ཁ་བཟོ་བཞིན་པ་དང་། སྒྲིག་གཞི་རང་བཞིན་གྱི་སྒོ་ནས་ཡུ་གུར་བ་རྣམས་ལ་དྲག་གནོན་བྱེད་རྒྱུ་མཚམས་འཇོགས་དགོས་པའི་འབོད་སྐུལ་གནང་ཡོད་པར་མ་ཟད། ཁོས་རྒྱལ་སྤྱིའི་གསར་ལམ་ཁག་ཏུ་ “ཤིན་ཅང་ནང་བསྟུད་མར་དོན་རྐྱེན་བྱུང་པའི་རྒྱུ་རྐྱེན་གཙོ་བོ་ནི།  རྒྱ་གཞུང་གིས་སྒྲིག་གཞི་རང་བཞིན་ཅན་གྱི་དྲག་གནོན་སྲིད་ཇུས་སྤེལ་ཏེ། ཡུ་གུར་མི་མང་ལ་དུས་ནམ་ཡང་ཞི་བའི་ལམ་ནས་ངོ་རྒོལ་དང་རང་གི་བསམ་འདུན་སྟོན་པའི་གོ་སྐབས་མེད་སྟབས། རེ་ཆད་ཐབས་རྡུགས་ཀྱི་གནས་སྟངས་འོག་དྲག་པོའི་ངོ་རྒོལ་མི་བྱེད་མཐུ་མེད་དུ་གྱུར་བ་ཞིག་རེད། དེང་སྐབས་རྒྱ་གཞུང་གིས་དོན་རྐྱེན་དེ་དག་དྲག་སྤྱོད་པའི་ལས་འགུལ་གྱི་ངོ་བོར་སྒྱུར་ཐབས་བྱས་ཏེ། ཡུ་གུར་མི་རིགས་ལ་འཁོན་འཛིན་གྱི་འདུ་ཤེས་བཟུང་སྟེ། འགྲོ་བ་མིའི་སྤྱི་ཚོགས་ཁྲོད་སྤྱོད་མི་འོས་པའི་མི་རིགས་དམར་གསོད་ཀྱི་ཡ་ང་བའི་དྲག་སྤྱོད་སྣ་ཚོགས་སྤེལ་བཞིན་པ་འདིས། རྒྱ་དམར་གཞུང་ནི་དྲག་སྤྱོད་དབང་སྒྱུར་བའི་རྒྱལ་ཁབ་ཅིག་ཡིན་པའི་མཚོན་བྱེད་གསལ་ཤོས་དེ་རེད” ཅེས་བརྗོད་ཡོད་པ་རེད།

གཞན་ཡང་། ཧོང་ཀོང་སློབ་ཆེན་གྱི་ཆབ་སྲིད་སྡེ་ཁག་གི་དགེ་རྒན་ཆེན་མོ་ཁྲིན་ཡུས་ཀྱིས་ཀྱང་། རྒྱ་གཞུང་གིས་དྲག་གནོན་གྱི་བྱེད་ཐབས་དེར་འགྱུར་བ་མ་བཏང་བ་ཡིན་ན། ཤིན་ཅང་གི་གནད་དོན་སྔར་བས་ཛ་དྲག་ཏུ་འགྱུར་རྒྱུའི་ཉེན་ཁ་ཡོད་པ་དང་། པེ་ཅིན་སྲིད་གཞུང་གིས་མུ་མཐུད་ཡུ་གུར་མི་རིགས་ཀྱི་ཆོས་དད་རང་དབང་དང་སྐད་ཡིག་སློབ་གསོར་བཀག་སྡོམ་བྱས་ཚེ།  དུས་ནམ་ཡང་གཞི་རྩའི་གནད་དོན་མཐའ་དག་སེལ་ཐབས་བྲལ་བར་མ་ཟད། དེང་སྐབས་རྒྱ་ནག་གི་ནོར་འཁྲུལ་ཅན་གྱི་སྲིད་ཇུས་ལམ་ལུགས་འོག་ཉིན་རེ་བཞིན་དབུལ་ཕྱུག་ཀྱི་ཧེ་བག་ཆེ་རུ་འགྲོ་བཞིན་པ་དང་། དཔལ་འབྱོར་ཁེ་ཕན་འཐབ་རྩོད་ཁྲོད་ཡུ་གུར་མི་རིགས་ཀྱི་སེམས་ལ་ཕོག་ཐུག་ཆེན་པོ་བཟོ་བཞིན་པ་འདིས། མི་རིགས་ཡར་ལངས་ཀྱི་འདུ་ཤེས་སྔར་བས་དྲག་ཏུ་འགྱུར་སྲིད་པ་བརྗོད་འདུག   

ཕྱི་ཟླ་ ༧ ཚེས་ ༡༧ ཉིན་ཤིན་ཅང་ཧི་ཐེན་གྲོང་ཁྱེར་ནང་ཡུ་གུར་མི་མང་གི་ཞི་བའི་ངོ་རྒོལ་ཁྲོམ་སྐོར་སྐབས། རྒྱ་དམག་གིས་དྲག་གནོན་བྱས་ཏེ་མི་ ༢༠ དམར་གསོད་དང་།  ༡༠༠ ལྷག་འཇུ་བཟུང་བྱས་པའི་གནས་ཚུལ་བྱུང་སྟེ་བདུན་ཕྲག་གཅིག་གི་རྗེས་སུ།  ཤིན་ཅང་ཧི་ཐེན་གྲོང་ཁྱེར་དང་བར་ཐག་སྤྱི་ལེ་ ༥༠༠ ས་མཚམས་ན་ཡོད་པའི་ཤིན་ཅང་གུ་ཧྲི་གྲོང་ཁྱེར་ནང་དོན་རྐྱེན་འདི་བྱུང་ཡོད་པ་རེད། ཆབ་སྲིད་དཔྱད་བརྗོད་པ་དག་གིས་ཉེ་བའི་ཟླ་ཕྱེད་རིང་ཤིན་ཅང་ནང་བསྟུད་མར་བྱུང་བའི་དྲག་པོའི་ངོ་རྒོལ་དེ་དག་གིས། ཤིན་ཅང་ཡུར་གུར་རང་སྐྱོང་ལྗོངས་ཀྱི་སྲིད་འཛིན་ལྟེ་གནས་ཝུ་རའོ་མུའུ་ཆི་གྲོང་ཁྱེར་ནང་། ཟླ་རྗེས་མའི་ཚེས་ ༡ ནས་ ༥ བར་ཚོགས་འཆར་ཡོད་པའི་རྒྱ་ནག་གི་ཐེངས་དང་པོའི་ཨེ་ཤ་ཡའི་དངོས་ཚོང་འགྲེམས་སྟོན་བྱ་འགུལ་གྱི་བདེ་འཇགས་ལ་ཤུགས་རྐྱེན་ཐེབས་རྒྱུ་ཡིན་པ་བརྗོད་འདུག

ཕྱི་ལོ་ ༢༠༠༩ ལོར་ཤིན་ཅང་གུ་ཧྲི་གྲོང་ཁྱེར་ནང་འགས་གཏོར་དོན་རྐྱེན་བྱུང་སྟེ་མི་ ༡༦ རྐྱེན་འདས་དང་མི་ ༡༦ ལ་རྨས་སྐྱོན་ཕོག་ཡོད་པ་དང་། དེ་བཞིན་ཝུ་རའོ་མུའུ་ཆི་གྲོང་ཁྱེར་དུ་ ༧་༥ ཡར་ལངས་ངོ་རྒོལ་བྱུང་སྐབས་ཡུ་གུར་བ་ ༢༠༠ ལྷག་དམར་གསོད་བཏང་ཡོད་པ་རེད།

གསར་འགོད་པ། ཚེ་རིང་རྒྱལ།