བཀྲ་ཤིས་དབང་རྒྱལ་གྱིས་བརྩམས། ནོར་བསམ་གྱིས་བསྒྱུར།
ད་ལྟ་བཀའ་བློན་འོས་འདེམས་དང་། དམ་བཅའ་ཕུལ་ཟིན་པས་ཏན་ཏན་བཙན་བྱོལ་ནང་གི་བོད་མི་མང་པོ་ཞིག་གིས་དངངས་ཚབས་ངང་ཅིའི་ཕྱིར་ཁོ་དང་མོ་འོས་འདེམས་བྱས་པ་དང་། ཁོ་དང་མོ་འོས་འདེམས་མ་བྱས་པ་རེད་དམ་ཟེར་ནས་བགྲོ་གླེང་བྱེད་ཀྱི་ཡོད་ངེས། དེ་ནི་རྩེད་མོ་རྩེད་ཚར་རྗེས་སློབ་སྟོན་པ་དང་། རྩེད་མཁན། ལྟད་མོར་ལྟ་མཁན་བཅས་ཀྱིས་བསམ་འཆར་བཤད་པ་ལྟ་བུ་ལས་མ་འདས། གལ་ཏེ་ཁྱེད་ལ་ད་དུང་འགྲེལ་བརྗོད་དགོས་ཚེ་ངས་བཀའ་བློན་ཁྲི་པས་འདོན་སྤེལ་གནང་བའི་བཀའ་བློན་འོས་མི་ཚོའི་རྒྱབ་ཕྱོགས་སུ་ལངས་ནས་འགྲེལ་བརྗོད་ཞུ་རྒྱུ་ཡིན། ཐོག་མར་བཀའ་བློན་གསར་པ་དྲུག་གི་མཚན་ཐོ་རོབ་ཙམ་ཞུས་ན། འབྲོང་ཆུང་དངོས་གྲུབ། པདྨ་ཆོས་འབྱོར། རྒྱ་རི་སྒྲོལ་མ། ཚེ་རིང་དོན་གྲུབ། བདེ་སྐྱིད་ཆོས་དབྱངས། ཚེ་རིང་དབང་ཕྱུག་བཅས་རེད།
ཐོག་མར་སྲིད་སྐྱོང་༼བཀའ་ཁྲི་༽མཁས་དབང་བློ་བཟང་སེང་གེས་འོས་བསྡུའི་ལས་འགུལ་སྤེལ་སྐབས་བཞག་གནང་བའི་དམ་བཅའ་དང་། བགྲོ་གླེང་སྐབས་སུ་ད་ལྟ་ཐག་གཅོད་གནང་བའི་འོས་མིའི་སྐོར་ལ་གོ་བརྡ་སྤྲད་གནང་བ་བཅས་ལ་བསྐྱར་ཞིབ་བྱ་དགོས། ཚང་མས་དྲན་གསལ་ལྟར་ཁོང་གིས་གལ་ཏེ་ཁོང་ལ་འོས་བསྡུའི་རྒྱལ་ཁ་ཐོབ་ཚེ་བཀའ་བློན་རྒན་གྲས་ཁོངས་སུ་འབྲོང་ཆུང་དངོས་གྲུབ་བསྐོ་རྒྱུ་ཡིན་པའི་དཔེ་བཞག་གནང་བ་དེས་ཁོང་ལ་དབུས་བོད་མིའི་སྒྲིག་འཛུགས་ནང་ཕྱག་ལས་གནང་བའི་ཉམས་མྱོང་མེད་པའི་སྐྱོན་བརྗོད་བཀག་པ་རེད། གཉིས་པ། དངོས་གྲུབ་ལགས་ཀྱིས་གཞུང་ནང་ལོ་མང་ཕྱག་ལས་གནང་བའི་ཉམས་མྱོང་ཡོད་པ་ཙམ་དུ་མ་ཟད་མང་ཚོགས་ཀྱི་ངོས་ནས་གུས་བརྩི་བྱ་ཡུལ་གཅིག་ཡིན་པས་ཚང་མས་སྔོན་དཔག་བྱེད་རྒྱུ་ལས་སླ་པོ་ཆགས་ཡོད།
དེ་བཞིན་དུ་ང་ཚོ་འདྲ་བའི་འཛིན་སྐྱོང་ཆུང་ཁག་ཚང་མའི་ནང་ལ་འོས་ཤིང་མཚམས་པའི་དཔལ་འབྱོར་གྱི་འོས་མི་འདོན་རྒྱུ་ལས་སླ་པོ་ཞིག་མ་རེད། ཚེ་རིང་དོན་གྲུབ་ལགས་ལྟ་བུ་རྒྱུན་རིང་འཛིན་སྐྱོང་ནང་ཕྱག་ལས་གནང་བས་ཉམས་མྱོང་ལྡན་ལ་རྩིས་ཁྲ་ཉར་ཕྱོགས་ཐད་དམིགས་བསལ་མཁས་པ་ཡིན་མཁན་མི་མང་པོ་མེད་པས། མཁས་དབང་བློ་བཟང་སེང་གེའི་རྣམ་དཔྱོད་ལ་བརྟེན་ནས་བསྐྱར་དུ་འདེམས་ཐོན་བྱས་པར་ཧང་སངས་དགོས་དོན་མེད།
རྒྱ་རི་སྒྲོལ་མ་ལགས་ནི་ལྷག་བསམ་དང་། སེམས་ཚོར་དྲག་པོ་ཡོད་མཁན་གྱི་མགོ་ཁྲིད་གཅིག་ཡིན་པས་ངའི་བསམ་པར་མཁས་དབང་བློ་བཟང་སེང་གེས་ཁོང་གི་སྟེང་ལ་ཁྱད་ཆོས་མི་འདྲ་བ་ཁ་ཤས་གཟིགས་ཡོད་ངེས། དང་པོ། ཁོང་ལ་འཛིན་སྐྱོང་གི་ཉམས་མྱོང་ཡོད་པ་དང་། ཁོང་ལ་ཁྲིམས་ལུགས་ཤེས་ཡོན་གི་རྒྱབ་ལྗོངས་ཡོད་པས་ཁོང་ནི་རྒྱ་གར་ས་གནས་ཀྱི་དབུ་ཁྲིད་ཚོ་དང་། ས་གནས་དང་རྒྱལ་ཡོངས་རང་བཞིན་གྱི་ཁྲིམས་ཀྱི་གནད་དོན་སེལ་རྒྱུར་ནུས་ཤུགས་ལྡན་ཡོད། ལྷག་པར་དུ་ཁོང་ནི་བུད་མེད་གཅིག་དང་ཆོལ་ཁ་ཁམས་ནས་ཡིན་པས་མཁས་དབང་བློ་བཟང་སེང་གེའི་ཆོལ་ཁ་དང་ཕོ་མོ་འདྲ་མཉམ་གྱི་སྡེ་ཁག་ཅིག་བསྒྲུབ་རྒྱུའི་འཆར་གཞིར་ཕན་ཐོགས་བྱུང་ཡོད།
སྐུ་ཞབས་པདྨ་ཆོས་འབྱོར་ལགས་ནི་ཁོང་གི་བཀའ་ཤག་ནང་རྒན་གཞོན་འདྲ་མཉམ་ཡོང་རྒྱུར་གལ་ཆེའི་འོས་མི་གཅིག་ཆགས་ཡོད། མཁས་དབང་བློ་བཟང་སེང་གེ་མཆོག་གིས་མི་སྣ་རྒན་གྲས་ཤིག་དང་། བཙན་བྱོལ་གྱི་འཛིན་སྐྱོང་ནང་ཉམས་མྱོང་མང་པོ་ཡོད་མཁན་ཞིག་ཡོང་རྒྱུར་འབད་བརྩོན་གནང་བ་རེད། ངའི་གོ་ཐོས་ལ་སྐུ་ཞབས་པདྨ་ཆོས་འབྱོར་ལགས་ནི་རྙིང་ཞེན་རིང་ལུགས་ཀྱི་མགོ་ཁྲིད་རྒན་གྲས་ལྟར་མ་ཡིན་པར་དེང་རབས་ཀྱི་བསམ་བློ་ཡོད་མཁན་ཞིག་ཡིན་པས་མཉམ་དུ་ལས་ཀ་བྱེད་བདེ་པོ་ཡོད་འདུག ཁོང་གིས་བོད་ཀྱི་སྐད་ཡིག་དང་ལོ་རྒྱུས་མཁྱེན་རྒྱ་ཟབ་པས་གནད་དོན་འགའ་ཞིག་ཐད་དགོས་ངེས་ཀྱི་ཞབས་འདེགས་ཞུ་ཐུབ་ངེས་རེད།
བདེ་སྐྱིད་ཆོས་དབྱངས་ལགས་ནི་ཆེས་ཧང་སངས་དགོས་པ་ཞིག་ཆགས་ཡོད། གང་ཡིན་ཟེར་ན་ཁོང་བཙན་བྱོལ་གྱི་ཆབ་སྲིད་ནང་ཉེ་ཆར་ཕེབས་པ་ཞིག་དང་དོན་དངོས་ཐོག་ཁོང་བྱང་ཨ་རིའི་སྤྱི་འཐུས་འོས་ཐོན་བྱུང་བར་མི་མང་པོ་ཞིག་ཧོན་འཐོར་བ་བྱུང་ཡོད། ཁོང་འོས་གཞིར་དམིགས་འཛུགས་བྱས་པར་བཙན་བྱོལ་ནང་ཕྱག་ལས་གནང་མཁན་རྒན་གྲས་ཕོ་མོ་མང་པོ་ཞིག་གིས་སྐད་ཅོར་བརྒྱབ་ཡོད་ངེས། བདེ་སྐྱིད་ལགས་ལ་དབུས་བོད་མིའི་སྒྲིག་འཛུགས་ནང་ཕྱག་ལས་གནང་བའི་ཉམས་མྱོང་མེད་པ་ཕུད་འོས་ཞིང་འཚམ་པའི་འོས་མི་ཞིག་ཆགས་ཡོད། ཁོང་གི་ཤེས་ཡོན་རྒྱབ་ལྗོངས་དང་ནུབ་ཕྱོགས་ཀྱི་ཚོར་ཤེས་དེས་ཏན་ཏན་བཀའ་ཤག་ལ་འགྱུར་བ་འགྲོ་ངེས་རེད། ཁོང་གིས་རྒྱ་ནག་པེ་ཅིན་གྱི་སྤྱི་སྐད་ཚུད་པའི་སྐད་ཡིག་མང་པོ་མཁྱེན་གྱི་ཡོད་པས་རྒྱ་ནག་ཕྱོགས་ཁག་དང་གྲོས་མོལ་བྱ་རྒྱུར་ལག་ཆ་གལ་ཆེན་ཆགས་ཡོད། ཁོང་གིས་ནུབ་ཕྱོགས་ཀྱི་གསར་འགྱུར་བརྒྱུད་ལམ་ཁག་ལ་ནུས་པ་ལྡན་པའི་བཀའ་མོལ་གནང་ཐུབ་ངེས་ལ། རྒྱ་རི་སྒྲོལ་མ་དང་འདྲ་བར་ཁོང་ནི་བུད་མེད་ཅིག་དང་ཆོལ་ཁ་ཨ་མདོ་ནས་རེད།
མཐའ་མ་དགུང་ན་གཞོན་པའི་ཕྱི་ལུགས་སྨན་པ་ཚེ་རིང་དབང་ཕྱུག་ལགས་ནི་ལོ་ན་ཆུང་ཆུང་དེ་འདྲའི་སྐབས་ནས་བཀའ་བློན་ཆགས་ཐུབ་པ་སུ་གཅིག་གི་རྨི་ལམ་དུ་ཡང་འཁོར་མི་སྲིད་པ་ཞིག་རེད། དབང་ཕྱུག་ལགས་འོས་མིར་འཛུགས་པ་དེས་བོད་པའི་སྤྱི་ཚོགས་ནང་དངོས་གནས་ཧོན་འཐོར་དུ་བཅུག་ཡོད། གང་ཡིན་ཟེར་ན། མི་ཕལ་ཆེ་བས་ཁོང་འོས་འདེམས་བྱ་རྒྱུར་སྔོན་དཔག་བྱས་མེད། སླར་ཡང་དེ་ནི་འདྲ་མཉམ་བཟོས་པ་གཅིག་པོ་མ་ཡིན་པར་མཁས་དབང་བློ་བཟང་སེང་གེས་ཁོང་གི་བཀའ་ཤག་ནང་ནས་ཁོང་ཉིད་ལོ་ན་ཆུང་ཤོས་ནས་ཕྱིར་ཐོན་པ་རེད།
ད་ལྟ་སླར་ཡང་ཁོང་གི་འོས་མི་དག་ལ་ཕྱིར་ལྟ་ཞིག་བྱས་ན། བཀའ་ཤག་གསར་པའི་ནང་ཕོ་མོ་གཉིས་ཀ་དང་ཆོལ་ཁ་གསུམ་གྱི་སྐུ་ཚབ་ཡོད་ཚེ། མཁས་དབང་བློ་བཟང་སེང་གེས་འདྲ་མཉམ་གྱི་སྤུས་ཚད་ཇེ་ལེགས་སུ་བཏང་ཡོད་དམ། ༌༌༌༌༌༌༌ངའི་བསམ་ཚུལ་ལ་ཇེ་ལེགས་སུ་བཏང་མི་འདུག༌༌༌༌༌༌༌
༢༠༡༡།༩།༢༢ ཞོགས་པ་འགྱུར།
སྙིང་རྗེ། འགྱུར་མེད་ཅིས་པ་འདིས་མི་མང་ནི་ནམ་ཡང་སྟོབས་ཤུགས་འགྲན་ཟླ་དང་བྲལ་བ་ཡིན་པའི་ཆབ་སྲིད་པ་དག་གི་གཏིང་གི་དོག་སྣང་བྱ་ཡུལ་དེ་མཁྱེན་མི་འདུག རང་ཉིད་གང་ལས་ཀྱང་རྣམ་པར་རྒྱལ་དགོས་ན་ནམ་ཡང་མི་མང་གི་སྟོབས་ཤུགས་རང་ལག་ཏུ་ལྡན་དགོས་སོ། །དེ་ལྟར་མིན་ཆུས་ཁྱེར་བའི་རྩྭ་ཕུང་དྲུང་ཕྱུང་ལ་འཇུ་བ་དང་འདྲའོ། །སྙིང་རྗེ་དེང་སང་ཆབ་སྲིད་ཀྱི་གནད་དང་ཆོས་ཀྱི་འགག་རྩ་དེ་མི་ཤེས་པར་ཆབ་སྲིད་དང་ཆོས་ལ་ཇུས་ཏོག་བྱེད་མཁན་མང་པོ་དག་སྤྱི་ཚོགས་ཀྱི་ན་ཚ་ཞིག་གོ །
མཁས་དབང་བློ་བཟང་སེང་གེ་མཆོག་གིས་བཀའ་བློན་འདེམས་སྟངས་ཐད་གུས་པས་གཞིག་ན་འགྲིག་འདུག་འདོད་བྱུང་། མ་གཞི་བཀའ་ཁྲི་ཁོང་དུས་རབས་ཀྱི་འགྲོས་དང་བསྟུན་མཁས་ཀྱི་མཁས་དབང་ཞིག་ཡིོན་པས། ཁོང་གི་ཕྱག་རོགས་ཀྱང་དུས་རབས་གསར་བའི་ཤེས་འཇོན་ཡོད་པ་ཞིག་ལས། ཀླད་རྙིང་མཁྲེགས་འཛིན་ཆོལ་ཁའི་ཞེན་ཁོག་ཅན་ཞིག་འདེམས་པ་ཡིན་ན་མཁས་དབང་ཁོང་ལ་འཇོན་ཐང་ག་ཚོད་ཡོད་ཀྱང་ཕྱིར་མངོན་པའི་སྐལ་བ་མེད་པས།
དེ་རིང་ཁ་སང་སྤྱི་ཚོགས་ནང་དུ་བཀའ་བློན་སྟེང་ལ་གླེང་སློང་ཧ་ཅང་ཆེ་བས་དྲ་རྒྱ་སོགས་ཀྱི་གནས་སྐབས་སྒོ་ཡང་རྒྱག་དགོས་པའི་གནས་ཚུལ་ཡང་འབྱུང་གི་འདུག འདི་ནི་བློ་སེང་གི་ཁ་གཡང་གི་གྲུབ་འབྲས་ཞིག་ཀྱང་ཅི་ལ་མིན། བོད་མི་ཚོས་གཡབ་རྒྱུག་དང་རེ་བ་བྱེད་རྒྱུ་འདི་གོམས་གཤིས་ཤིག་ཆགས་བསྡད་འདུག ང་ནི་བོད་པའི་མིའི་སྐད་ཆ་ལ་ཐང་ཆད་ནས་རེ་བ་གཞན་ལ་བཅོལ་རྒྱུ་མིན་པ་རང་ཉིད་ཀྱི་རང་ཉིད་ལ་རེ་བ་བྱེད་བཞིན་རྒྱུ་ཡིན།
རྨོངས་དད་ཀྱི་འཁོར་ཡུག་འདི་ནས་ངའི་ཁ་དབུགས་ཡོད་ཚད་ཉི་མ་དེ་རིང་ནས་བརླག་སོང་ནུབ་སོང་ཚར་སོང་། ང་རང་ཉིད་ཀྱི་བསམ་གཞིག་ཡོད་ཚད་འགྲིགས་སོང་འཁྱོངས་སོང་མཐུན་སོང་། ལ་ལ་ལས་ཀྱི་འཁོར་སོང་། ལ་ལ་ཆུ་ལ་བསྐུར་སོང་། ལ་ལ་གཉིད་ནས་སད་སོང་། ལ་ལ་སྨྱོན་པ་ཆགས་སོང་། ལ་ལས་རྨི་ལམ་བཏང་སོང་། ལ་ལས་བཤད་རྒྱུ་ཆགས་སོང་། ལ་ལས་བསྟོད་རྒྱུ་བོར་སོང་། ལ་ལས་རེ་བ་ཆགས་སོང་། འདི་ཐམས་ཅད་ནི་སྟོང་སང་ཡིན།
བློ་སེང་གི་ལོ་ལྔའི་འཆར་གཞི་ཚང་མ་རྨི་ལམ་ནང་བཞིན་ཆགས་སོང་བའི་ཉི་མ་དེ་རིང་ནས་ངས་བཙན་བྱོལ་བའི་སྐུ་དྲག་ང་དྲག་ཚང་མ་རིམ་པ་བཞིན་དུ་ངོ་ཤུབ་བཤུས་རྒྱུ་ཡིན། གནས་ལུགས་དང་མང་གཙོའི་གར་ལ་རོལ་ཏེ་ང་ཉིན་དེ་རིང་ནས་ལམ་ཁ་གཞན་ཞིག་ནས་དུ་བསྐྱོད་དགོས་རྒྱུ་བྱུང་སོང་བས་དྲ་གྲོགས་ཚོས་བསམ་ཚུལ་ཡོད་ན་བདག་པོ་རྒྱག་རྒྱུ་ཡིན།
སྨན་པ་བཀའ་བློན་ལ་བསྐོས་པར་ཉམས་མྱོང་ཡོད་མེད་དང་བློ་སེང་བཀའ་ཁྲི་ལ་བསྐོས་པའི་ཉམས་མྱོང་ཡོད་མེད་གཉིས་བཟང་ན་བཟང་མཉམ་དང་ངན་ན་ངན་མཉམ་རེད། སྨན་པ་འདིས་ད་བར་དུ་མི་དམངས་ལ་ཕན་པའི་བྱ་བ་བསྒྲུབས་ཡོད་པས་འཕྲོད་བསྟེན་བཀའ་བློན་ལ་བསྐོས་ན་ཡག་པོ་རེད། བཀའ་ཁྲི་ལ་ཆབ་སྲིད་ཀྱི་རྐུབ་སྟེགས་རིམ་བརྒྱུད་མི་དགོས་ས་ནས་བཀའ་བློན་ལ་དགོས་དོན་དེ་ཙམ་མེད། གཙོ་བོ་མི་དམངས་ལ་ཞབས་ཞུ་ཞུས་པའི་རྒྱབ་ལྗོངས་ཡོད་མེད་དེ་རེད།
ང་ཆུང་ཆུང་ཡིན་དུས་ངའི་ཕ་ཡུལ་དུ་ཚེ་ཐར་འབུམ་ཞེས་པའི་གློག་བརྙན་སྟོན་མཁན་ཞིག་ཡོད། ཁོས་རིག་གནས་སྐབས་ནས་རིག་གསར་མཇུག་མ་རྫོགས་བར་དུ་ཁ་ཆར་གྲང་རླུང་གང་ཞིག་གི་ནང་དུ་ཡིན་ཡང་མང་ཚོགས་ལ་གསར་བརྗེའི་ནང་དོན་ལྡན་པའི་གློག་བརྙན་སྣ་ཚོགས་སྟོན་རྒྱུར་དཀའ་ངལ་ལ་གཏན་ནས་འཛེམས་མ་མྱོང་ཞིང་། ནམ་རྒྱུན་ཤིང་རྟ་ཞིག་གི་ནང་དུ་གློག་བརྙན་སྟོན་ཆས་བཞག་སྟེ་དབྱར་ས་དང་དགུན་ས་གང་ཞིག་ཡིན་ཡང་ཐོན་ཡོང་ལ། ལྷག་པར་དུ་ང་ཚོའི་སློབ་གྲྭའི་ནང་དུ་ཡོང་ཐེངས་རེ་རེ་ནི་ང་དང་ང་ལྟ་བུའི་གློག་བརྙན་ལ་དགའ་བའི་བྱིས་པ་ཚོར་ཡེ་ཤུའི་སྤོ་བོ་བྱིས་པར་བྱི་རིལ་སྤྲོད་མཁན་དེ་དང་འདྲ་བོ་ཡོད། ཁོས་གློག་འདོན་འཕྲུལ་ཆས་དེའི་ཁ་ཕྱེས་ནས་ཅིག་སྔོག་སྐབས་ཀྱི་རྡོ་སྣུམ་གྱི་དྲི་མ་དེ་དུས་དེ་རིང་ཡང་ངའི་སྣ་ལམ་དུ་འཐུལ་བཞིན་པའི་སྣང་བ་ཞིག་སྟེར།
གང་ལྟར་ལོ་རབས་བརྒྱད་ཅུ་པའི་ནང་གི་ཉིན་ཞིག་ཆབ་ཆའི་དཔོན་པོ་དོན་གྲུབ་རྒྱལ་གྱིས་བཀའ་བབས་ཐེངས་གཅིག་གིས་གློག་བརྙན་སྟོན་མཁན་ཚེ་ཐར་འབུམ་ང་ཚོའི་ཡུལ་ཚོའི་དཔོན་པོར་གྱུར་སོང་བས། མི་རྣམས་ཧང་སངས་ཏེ་དང་པོར་བདེན་པ་མིན་ལུགས་བརྗོད་ཅིང་། རྗེས་སུ་བདེན་པ་ཡིན་དུས་གུས་གུས་ཞུམ་ཞུམ་གྱིས་ཁོའི་རྩར་བཅར་ཏེ་བཀྲ་ཤིས་བདེ་ལེགས་ཞུས་འདུག
སྔོན་དུ་བཀའ་ཤག་དང་སྤྱི་འཐུན་གཞན་དྲུང་ཆེ་འདྲ་བ་གཞུང་གི་ལས་ཀ་བྱས་མེད་ལ་། འཇོན་ཐང་ཡོད་པའི་མིང་སྣེ་གཅིག་མེད་པའི་རང་གི་ཉེ་འབྲེལ་ཚེ་རིང་དབང་ཕྱུག་བཀའ་ཤག་ལ་གདམ་པ་དེ་དྲང་ལྡན་སྐད་ཆ་བཤད་ས་ལྷག་མེད་། ཡིན་ཡང་ཆབ་སྲིད་པ་ནི་དྲང་པོ་མདའ་ནང་བཞིན་ཡོད་དགོས་པ་ངའི་སེམས་ལ་མེད་། གཞན་ལ་མགོ་སྐོར་། རྣག་པོ་བྱེད་། སེམས་འཛིན་བྱེད་རྒྱུ་ནི་ཆབ་སྲིད་པའི་ཆབ་སྲིད་རེད་
བདེ་སྐྱེད་ཆོས་དབྱངས་དང་ཚེ་རིང་དབང་ཕྱུག་གཉིས་ནི་མ་འོས་པའི་བཀའ་ཤག་རེད་།
ལྷག་པར་ཚེ་རིང་དབང་ཕྱུག་ནི་བཀའ་ཁྲི་མཆོག་གི་ཉེ་འབྲེལ་ཡིན་དུས་དེ་བས་དྲང་པོ་ཞིག་ག་ནས་ཡིན་།
བོད་དོན་སྐོར་ལ་རྒྱུས་མངའ་མེད་པའི་བདེ་སྐྱིད་ཀྱིས་རྒྱལ་སྤྱིའི་ནང་ག་རེ་བཤད་དགོས་རེད་། སྤྱིར་ནི་བདེ་སྐྱེད་ལགས་ཆབ་སྲིད་པ་ཡང་མིན་པས་། ཕྱི་འབྲིལ་ཐད་ཚམ་མ་ཆབ་སྲིད་ལས་ཀ་ཡིན་ཕྱིར་མ་འོས་པའི་རྒྱུ་མཚན་དེ་རེད་
བཀའ་བློན་ཁྲི་བ་མཆོག་གིས་ཐོག་མར་་གསུང་དོན་་ལ་ངས་བཀའ་བློན་ལ་ངེས་པར་དུ་མ་མཐའ་ཡང་གསར་འབྱོར་ཞིག་དང་དབུ་མེད་གསུམ་འཇོག་གི་ཡིན་ཞེས་གསུངས་སོང་ལ་ད་སྔ་དེ་་འདྲ་རེད་མི་འདུག་ཟླ་བ་གཉིས་གསུམ་ཞིག་མ་འགྲོ་འདུག་
༑འགྱུར་བསྟན་ལག་སྐུ་སྒེར་ཡིག་ཚང་དང་བླ་་ཆེན་མི་ཆེན་དག་གི་བཟུང་པའི་དབང་ཆ་དེ་ག་རི་རེད།།
སྐུ་སྒེར་ཡིག་ཚང་དང་བླ་ཆེན་མི་ཆེན་སྐུ་དྲག་ཚོ་སྟག་སེང་ཁ་འཐབ་པའི་བར་ནས་བཀའ་ཁྲི་དང་བཀའ་བློན་སྤྱི་འཐུས་ཚོ་ལ་ས་འབུ་གྲོག་མའི་ནུས་ཤུགས་ཙམ་ལས་མེད་པ་ཤེས་དགོས།བཀའ་ཁྲི་དང་བཀའ་བློན་ཚོས་གནམ་ས་མགོ་སྟེང་བསྒྱུར་བའི་རེ་བ་བྱས་ན་རེ་སྟོང་རང་རེད།གནད་འགག་འདི་མ་ཤེས་ན་ཁྱོད་ཀྱིས་བཙན་བྱོལ་ནང་གི་ཆབ་སྲིད་ཀྱི་ལམ་ཁ་ངོ་མ་དེ་མ་ཤེས་པ་རེད།འོན་ཀྱང་ང་ཚོས་གཞུང་འཛིན་མི་སྣ་ཚོ་ལ་རྒྱལ་སྐྱོར་བྱ་རྒྱུ་གལ་ཆེ་པོ་རེད།དགག་སྒྲུབ་བྱ་ཐུབ་ན་བྱས་རྗེས་ལ་འཛིན་པ་དེ་ནོར་ན་རང་རེད།གནས་ཚུལ་འདི་དྲ་གྲོགས་ཚོས་ཁ་གསལ་པོ་བྱ་ནས་མཁྱེན་དགོས།