དགའ་ལྡན་བྱང་རྩེ་གྲྭ་ཚང་གི་དགེ་འདུན་པ་ ༡༡ གིས་ཕྱི་ཟླ་ ༨ ཚེས་ ༡༦ ནས་བཟུང་༼མྱ་ངན་གོམ་བགྲོད་༽ཞེས་པའི་ལས་འགུལ་མགོ་འཛུགས་ཀྱིས་རྒྱ་གར་མངའ་སྡེ་མང་པོའི་ནང་གོམ་བགྲོད་གནང་མཐར། དེ་རིང་སྔ་དྲོར་མི་མང་གི་ཕེབས་བསུའི་ཁྲོད་ངྷ་རམ་ས་ལར་འབྱོར་སོང་།
རྒྱ་གར་གྱི་མངའ་སྡེ་མང་པོའི་ནང་༼ མྱ་ངན་གོམ་བགྲོད་༽ལས་འགུལ་སྤེལ་མཁན་དགའ་ལྡན་བྱང་རྩེ་གྲྭ་ཚང་གི་དགེ་འདུན་པ་རྣམས། དེ་རིང་སྔ་དྲོའི་ཆུ་ཚོད་ ༡༢ སྟེང་བཞུགས་སྒར་དྷ་རམ་ས་ལར་འབྱོར་ཏེ་གཙུག་ལག་ཁང་ནང་མཇལ་སྐོར་གནང་རྗེས། དཔའ་བོའི་རྗེས་དྲན་རྡོ་རིང་གི་མདུན་ཐང་དུ་སྐྱ་སེར་མི་མང་བརྒྱ་ཕྲག་བརྒལ་བ་ཞིག་གི་ཕེབས་བསུའི་འོག གོམ་བགྲོད་གནང་མཁན་དགེ་འདུན་པ་ ༡༡ ལྷན་འཛོམས་ཐོག ལས་འགུལ་སྤེལ་དེའི་དམིགས་ཡུལ་དང་ད་ལྟའི་བོད་ནང་གི་གནས་སྟངས་སོགས་ཀྱི་ཐད་གསར་འགོད་གསལ་བསྒྲགས་སྤེལ་སོང་། སྐབས་དེར་དྷ་ས་ས་གནས་མགོ་འཛིན་དང་རང་བདེན་ཚོགས་ཆུང་། གཞུང་འབྲེལ་མིན་པའི་ཚོགས་པ་ཁག་གི་མགོ་གཙོ་བཅས་ནས་མཇལ་དར་བསྒྲོན་ཏེ་རྒྱབ་སྐྱོར་གྱི་གཏམ་བཤད་གནང་སོང་ལ། ས་གནས་སེར་སྐྱ་མི་མང་རྣམས་ཀྱིས་ཀྱང་གོམ་བགྲོད་པ་རྣམས་ལ་མཇལ་དར་བསྒྲོན་པ་དང་། ༼ བོད་རྒྱལ་ལོ ༽ཞེས་འབོད་ཚིག་བསྒྲགས་ཏེ་ཁོང་ཚོའི་ལས་འགུལ་ལ་རྒྱབ་སྐྱོར་གྱི་རྣམ་པ་བསྟན་སོང་། གོམ་བགྲོད་གནང་མཁན་དགེ་འདུན་པ་དེ་དག་གིས་སང་ཉིན་ནས་བཟུང་ཉིན་གསུམ་རིང་གཙུག་ལག་ཁང་གི་སྒོ་འགྲམ་དུ་ཟས་བཅད་ངོ་རྒོལ་གནང་རྒྱུ་ཡིན་འདུག
གྲྭ་བློ་བཟང་བྱམས་པ་ལགས་ཀྱིས་༼མྱ་ངན་གོམ་བགྲོད་༽དེ་སྤེལ་དགོས་པའི་དམིགས་ཡུལ་སྐོར་ངོ་སྤྲོད་གནང་དོན། “ ང་ཚོས་ལས་འགུལ་དེ་སྤེལ་དགོས་པའི་རྒྱུ་མཚན་གཙོ་བོ་ནི། དང་པོ། གཞིས་བཞུགས་བོད་མི་རྣམས་ལ་གདུང་སེམས་མཉམ་བསྐྱེད་དང་། ད་ལྟའི་བོད་ནང་གི་དཀའ་སྡུག་གི་གནས་སྟངས་མཐའ་དག་རྒྱལ་སྤྱིའི་སྤྱི་ཚོགས་ཀྱིས་མཁྱེན་རྟོག་ཡོང་སླད་ཡིན། གཉིས་པ། རང་ཉིད་བོད་པ་ཞིག་ཡིན་ཕྱིན་བོད་རང་དབང་མ་ཐོབ་བར་དུ་ལས་འགུལ་སྤེལ་དགོས་པ་དེ་སོ་སོའི་འོས་འགན་ཆགས་ཡོད་པས་ཡིན། ང་ཚོས་སྤྱང་པོ་ག་ཚོད་འཁྲབ་ཏེ་མི་ཚེ་འདི་ལ་སྐྱིད་པོ་ཙམ་བྱུང་བ་ཡིན་ནའང་། འཆི་དུས་ག་འདྲ་འབྱུང་མིན་ལའང་བསམ་བློ་གཏོང་དགོས་པ་རེད།” ཅེས་གསུང་སྟེ། ཁོང་ཚོ་དགེ་འདུན་པ་ ༡༡ ཀྱིས་ངོས་ནས་གཞིས་བཞུགས་བོད་མི་རྣམས་ལ་གདུང་སེམས་མཉམ་བསྐྱེད་མཚོན་ཆེད། ཕྱི་ཟླ་ ༨ ཚེས་ ༡༦ མ་སྐུལ་དང་བླངས་ཀྱི་ཐོག་ད་ལྟའི་བར་རྒྱ་གར་མངའ་སྡེ་ནང་གོམ་བགྲོད་གནང་སྟེ་བོད་དོན་ཡིག་ཆ་འགྲེམས་སྤེལ་དང་། རྒྱ་གར་ས་གནས་གསར་ལམ་ཁག་ ༣༧ ལྷག་ལ་བོད་ནང་གི་གནས་ཚུལ་འགྲེལ་བརྗོད་བཅས་གནང་ཡོད་སྐོར་བརྗོད་སོང་།
མཇུག་ཏུ་གསར་འགོད་པས་ཁོང་ཅག་ལ་གོམ་བགྲོད་སྐབས་དཀའ་ངལ་གང་འདྲ་འཕྲད་ཡོད་མེད་དང་། ས་གནས་ཁག་གི་མི་མང་ཚོས་རྒྱབ་སྐྱོར་གང་འདྲ་ཡོད་མེད་དྲིས་པར། གྲྭ་བློ་བཟང་ལགས་ཀྱིས་ས་གནས་ཁག་གི་མི་མང་ཚོས་རྒྱབ་སྐྱོར་ཤུགས་ཆེན་པོ་གནང་ཡོད་པར་ཐུགས་རྗེ་ཞུས་པ་དང་སྦྲགས། གོམ་བགྲོད་སྐབས་ཀྱི་དཀའ་ངལ་གཙོ་བོ་དག་ནི། རྒྱ་གར་དང་དབྱིན་ཇིའི་སྐད་ཡག་པོ་མཁྱེན་མཁན་མེད་སྟབས་ལམ་ཁ་མ་ཤེས་པ་དང་། གསར་འགོད་པར་གནས་ཚུལ་འགྲེལ་བརྗོད་སྐབས་སྐད་བརྡ་མ་འཕྲོད་པ། རྒྱ་གར་ཉེན་རྟོག་པས་གནས་ཚུལ་འདྲི་བརྩད་སྐབས་གནས་ལུགས་རྒྱུ་མཚན་འགྲེལ་བཤད་གསལ་བོ་བསྐྱོན་མ་ཤེས་པ་བཅས་ཀྱི་དཀའ་ངལ་འཕྲད་སྐོར་བརྗོད་བྱུང་ལ། བཞུགས་སྒར་དུ་འབྱོར་སྐབས་རྒྱལ་གཅེས་དཔའ་བོ་ཚེ་དབང་ནོར་བུ་ལགས་འདས་གྲོངས་སུ་ཕྱིན་ཏེ་དགུང་ཞག་ཞེ་དགུ་མ་ཕྱིན་གོང་། ཡང་བསྐྱར་རྒྱ་གཞུང་གི་བཙན་དྲག་འོག་བོད་ནང་རྒྱལ་གཅེས་དཔའ་བོ་གཉིས་ཀྱིས་རང་ལུས་མེར་བསྲེགས་གཏོང་དགོས་བྱུང་བའི་གནས་ཚུལ་ཐོས་སྐབས་སེམས་པ་སྐྱོ་བོ་བྱུང་ཚུལ། བོད་ནང་གི་བོད་མི་ཚོ་གཅིག་རྗེས་གཉིས་མཐུད་ཀྱིས་སྐུ་སྲོག་རྒྱལ་ཁབ་དང་མི་རིགས་ཀྱི་ཆེད་དུ་གཏོང་གི་ཡོད་སྐབས། འདི་ནས་ཕན་ཚུན་ལ་ཁ་བཏགས་གཡོགས་ཏེ། མི་མང་གི་མདུན་དུ་སྐད་ཆ་བཤད་རྒྱུར་ཧ་ཅང་འཚེར་བོ་དང་། ལས་འགུལ་ལེགས་འགྲུབ་བྱུང་སོང་སྙམ་པའི་དགའ་ཚོར་གང་ཡང་མེད་སྐོར་བརྗོད་བྱུང་། མཇུག་ཏུ་ཁོང་གིས་ནན་བརྗོད་གནང་དོན། “ སང་ཉིན་ནས་བཟུང་ངེད་ཅག་གིས་ཉིན་གསུམ་རིང་འདིར་ཟས་བཅད་ངོ་རྒོལ་བྱ་རྒྱུ་ཡིན། སྐབས་དེར་མི་མང་ག་ཚོད་མང་མང་མཉམ་ཞུགས་གནང་རོགས། མི་མང་ཅི་ཙམ་མང་ན་དེ་ཙམ་གྱིས་ལས་འགུལ་ལ་ནུས་པ་འཐོན་པ་རེད། ཐུགས་རྗེ་གཟིགས་ཡིན་གཅིག་མིན་གཅིག་མི་མང་གང་མང་མཉམ་ཞུགས་གནང་རོགས་ཞུ ” ཞེས་བརྗོད་སོང་།
ཐེངས་འདིའི་གོམ་བགྲོད་དབུ་འཛུགས་སྐབས་དགེ་འདུན་པ་ ༡༢ མཉམ་ཞུགས་གནང་ཡོད་པའི་ཁྲོད་ནས། ལམ་བར་ནས་གཟུགས་གཞི་བདེ་མིན་གྱི་དབང་གིས་ཕྱིར་འཐེན་གནང་ཡོད་འདུག
གསར་འགོད་པ། ཚེ་རིང་རྒྱལ།
བོད་མི་རིགས་ཡོངས་ཀྱི་ཆེད་དུ་མྱ་ངན་གོམ་བགོད་དང་ཟས་བཅད་ངོ་རྒོལ་གནང་ཐུབ་པ་ཀུན་ལ་སྙིང་ནས་རྗེས་སུ་ཡི་རང་ཡོད། དཔའ་བོ་ཚོ།
རྗེས་སུ་ཡི་རངས་ཞུ།
ཤ་ཁྲག་རུས་གསུམ་གངས་རིའི་ལྗོངས་སུ་ཐོར།།
རྣམ་ཤེས་ཁྲི་འབུམ་ཁ་བའི་ལྗོངས་སུ་རྒྱུ།།
རང་དབང་ཞི་བདེར་ལུས་སྲོག་ལོངས་སྤྱོད་བརྗེས།།
ཕ་ས་ཕ་ཡུལ་མྱ་ངན་གླིང་དུ་གྱུར།།
མྱ་ངན་གོམ་བགྲོད་གདུང་སེམས་མཉམ་བསྐྱེད་ཆེད།།
སྣ་མང་ལས་འགུལ་བོད་དོན་དྲིལ་བསྒྲགས་ཆེད།།
གཞིས་བྱེས་བོད་འབངས་རང་དབང་ཞི་བདེའི་ཆེད།།
ཚེ་སྲོག་ཁྲི་འབུམ་བདེ་སྐྱིད་འཚོལ་ཕྱིར་བསྙེགས།།
དགའ་ལྡན་བྱང་རྩེ་གྲྭ་ཚང་གི་དགེ་འདུན་པ་ ༡༡ གིས་མྱ་ངན་གོམ་བགྲོད་གནང་བ་ཐུགས་རྗེ་ཆེ་ཞུ།
བོད་དོན་ལས་འགུལ་བ་རྣམས་བདེ་འཚམས་ངང་བཞུགས་སྒར་ཁུལ་དུ་ཞབས་སོར་བདེ་འཁོད་ཐུབ་པར་གུས་བརྩིའི་འཚམས་འདྲི་ཞུ་རྒྱུ་དང་། ལྷན་རྒྱས་ཚོའི་ཐུགས་སྨོན་ལེགས་འགྲུབ་དང་། དཀའ་སྤྱད་འབད་བརྩོན་གྱི་སེམས་སྟོབས་ནམ་ཡང་མི་ལྷོད་པའི་གཞེན་སྐུལ་གྱིས་དུས་རྟག་ཏུ་རྒྱབ་སྐྱོར་ཡོད་ཞུ་རྒྱུ་ཡིན།