ཁ་སང་ཕྱི་ཚེས་ ༢༧ ཉིན་གྱི་ཕྱི་དྲོའི་ཆུ་ཚོད་ ༧ པའི་སྟེང་། བྱང་ཨ་རིའི་ཁེལི་ཧྥོར་ནྱིའི་གྲོང་ཁྱེར་སན་ཧྥིརན་སྶིཀོ་བོད་རིགས་སྤྱི་མཐུན་ཚོགས་པའི་གོ་སྒྲིག་འོག ཉེ་ཆར་བོད་རྒྱལ་ཁབ་དང་མི་རིགས་ཀྱི་ཆེད་དུ་རང་ལུས་མེར་བསྲེགས་གཏོང་མཁན་རྒྱལ་གཅེས་དཔའ་བོ་གྲྭ་བློ་བཟང་བསྐལ་བཟང་ལགས་དང་། གྲྭ་བློ་བཟང་དཀོན་མཆོག་ལགས་རྣམ་གཉིས་ལ་མྱ་ངན་གུས་འདུད་དང་གདུང་སེམས་མཉམ་བསྐྱེད་མཚོན་ཕྱིར། བོད་རིགས་སྤྱི་མཐུན་ཚོགས་པའི་ཚོགས་ཁང་སྡེ་བཞི་ཕུན་ཚོགས་གླིང་དུ་སྨོན་ལམ་གསོལ་འདེབས་དང་མར་མེ་མཆོད་འབུལ་གྱི་ལས་འགུལ་ཞིག་སྤེལ་ཏེ་ས་གནས་བོད་རིགས་ ༡༠༠ ལྷག་འདུ་འཛོམས་བྱུང་འདུག
ལས་འགུལ་གོ་སྒྲིག་ཞུ་མཁན་ཚོའི་དམིགས་ཡུལ་ཐད། རྒྱ་གཞུང་གིས་བོད་ལ་ཁྲིམས་འགལ་གྱིས་བཙན་འཛུལ་བྱས་པ་ནས་བཟུང་ད་ལྟའི་བར་བོད་རིགས་འབུམ་བཅུ་གཉིས་ལྷག་གི་ཚེ་སྲོག་འཕྲོག་པ་དང་། བོད་ཀྱི་རྩ་ཆེའི་ཆོས་དང་རིག་གཞུང་གི་བསྟི་གནས་དགོན་སྡེ་དང་། བསྟན་འཛིན་བླ་སྤྲུལ་མང་པོ་འཛིན་བཟུང་གསོད་རྡུང་བྱས་པ་མ་ཟད། དུས་རབས་ཉེར་གཅིག་པའི་མཚམས་འདིར་ཡང་གཏིང་ནག་པའི་སྲིད་བྱུས་དེ་ལ་འགྱུར་བ་མེད་པར་བོད་པའི་རིག་གཞུང་མི་རིགས་དང་བཅས་པ་རྩ་མེད་གཏོང་ཐབས་དང་། སྐྱ་སེར་རྒན་གཞོན་མེད་པར་མནར་གཅོད་གཏོང་བཞིན་ཡོད་པ་འདི་དང་།
རྒྱ་གཞུང་གིས་བོད་རིགས་ཁྲི་ཚོ་མང་པོར་བྲན་གཡོག་ལམ་ལུགས་འོག་ནས་རང་དབང་སྤྲད་ཡོད་རབ་དང་། བོད་མི་ཚོས་ཆོས་དད་རང་དབང་དང་། ཆབ་སྲིད་ཀྱི་རང་དབང་ལོངས་སུ་སྤྱོད་ཀྱི་ཡོད་ལུགས་ཀྱི་འཁྱོགས་བཤད་བྱས་ཏེ། རྒྱ་ནག་མི་མང་གཙོས་པའི་འཛམ་གླིང་མི་མང་ལ་མགོ་སྐོར་གཏོང་བཞིན་པའི་སྐབས་འདིར། བོད་ས་ཡོངས་སུ་རྒྱ་གཞུང་ལ་ངོ་རྒོལ་རབ་དང་རིམ་པ་བྱས་ཏེ། ཉེ་བའི་ཆར་ཨ་མདོ་རྔ་བ་དང་ཁམས་རྟའུ་ཁུལ་སོ་སོ་ནས་དགེ་འདུན་པས་རང་ལུས་མེར་བསྲེགས་བཏང་སྟེ་ངོ་རྒོལ་སྐད་འབོད་བྱས་པ་སོགས། བོད་མི་བོད་ཡུལ་ནས་གྲངས་ཉུང་མི་རིགས་སུ་གྱུར་དང་འགྱུར་བཞིན་པའི་གནས་སྟངས་རྒྱལ་སྤྱིའི་ཁྱོན་དུ་བསྒྲག་རྒྱུ་དང་། དྲང་བདེན་དང་ཞི་བདེ་ལ་དགའ་མཁན་ཚོས་བོད་དོན་ལ་རྒྱབ་སྐྱོར་ཡོང་བའི་འབོད་སྐུལ་ཞུ་བཞིན་ཡོད་ཟེར།
སྨོན་ལམ་འདུ་འཛོམས་དབུ་འཛུགས་ཐོག་ས་གནས་བོད་རིགས་སྤྱི་མཐུན་ཚོགས་པའི་དྲུང་གཞོན་བསོད་ནམས་ཚེ་བརྟན་ལགས་ཀྱིས་ཐེངས་འདིའི་བོད་ནང་གི་ཛ་དྲག་གི་གནས་ཚུལ་མི་མང་ལ་ངོ་སྤྲོད་དང་འབྲེལ་ཚོགས་བཅར་བ་ཚོས་ལས་བྲེལ་ལ་མ་འཛེམས་པར་ཕེབས་པར་ཐུགས་རྗེ་ཆེ་ཞུས་སོང་། དེར་མཐུད་དེ་ཕྱི་འབྲེལ་དང་དྲིལ་བསྒྲགས་འགན་འཛིན་ཐེ་པོ་སྤྲུལ་སྐུ་ལགས་ཀྱིས་ “ ད་ལྟའི་ཆར་བོད་ནང་དུ་རང་སྲོག་བློས་གཏོང་མཁན་ཇེ་མང་ནས་ཇེ་མང་དུ་འགྲོ་བཞིན་པའི་གནས་སྟངས་ཤིག་ཆགས་ཀྱིན་འདུག་པ་འདིས། རྒྱ་ནག་སྲིད་གཞུང་ལ་བརྡ་ལན་ཞིག་སྤྲོད་ཀྱི་ཡོད་པ་མ་ཟད། ང་ཚོས་བོད་ཕྱི་ལོགས་སུ་ཡོད་མཁན་ཚོར་ཡང་བརྡ་ལན་ཞིག་སྤྲོད་ཀྱི་པ་ཡིད་ལ་ངེས་དགོས ” ཞེས་བརྗོད་བྱུང་།
ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ་བསྟན་འཛིན་ཚེ་གྲུབ་ལགས་ཀྱིས་གསར་འགོད་པར་བརྗོད་པར། “ བོད་རིགས་ཚོགས་པའི་ངོས་ནས་ལས་འགུལ་དང་དུས་དྲན་སོགས་གང་ཞིག་བྱས་ཀྱང་གཟའ་མཇུག་ཏུ་གོ་སྒྲིག་བྱེད་ཀྱི་ཡོད་ཀྱང་། ཐེངས་འདིར་ཛ་དྲག་གི་ཐོག་ནས་རེས་གཟའ་མིག་དམར་ལ་ལས་འགུལ་འདི་གོ་སྒྲིག་ཞུ་དགོས་བྱུང་སོང་། སློབ་གྲྭ་བ་དང་མཚན་མོར་ལས་ཀར་ཕེབས་མཁན་མང་ཡང་མི་གང་འཚམས་འཛོམས་ཐུབ་སོང ” ཞེས་བརྗོད་བྱུང་།
བྱང་ཁེ་ལི་ཧྥོར་ནྱི་བོད་རིགས་སྤྱི་མཐུན་ཚོགས་པ་ནི་ ༡༩༩༠ ལོར་དབུ་བརྙེས་པ་དང་། ད་ལྟའི་ཆར་ཚོགས་མིའམ་ས་གནས་འདི་གར་གཏན་སྡོད་བྱེད་ཀྱིན་པའི་བོད་རིགས་མི་གྲངས་ ༡༥༠༠ ནས་ ༢༠༠༠ ཙམ་ཡོད་འདུག ཕྱི་འབྲེལ་དང་དྲིལ་བསྒྲགས་འགན་འཛིན་ཐེ་པོ་སྤྲུལ་སྐུ་ལགས་ཀྱིས་བརྗོད་ན། ཚོགས་ཁོངས་སུ་མི་ ༢༠༠༠ ལྷག་ཡོད་ཀྱང་། ཁ་ཤས་གནས་སྐབས་རིང་བསྡད་རྗེས་ས་གནས་གཞན་ལ་གནས་སྤར་གྱི་ཡོད་ཡོད་སྟབས། གཏན་འཇགས་ཀྱི་ཚོགས་མི་ ༡༥༠༠ ཙམ་ལས་མེད་པ་དང་། དེ་དག་ཕལ་ཆེ་བས་རང་བཙན་ལག་དེབ་ཀྱི་དངུལ་འབབ་སོགས་དུས་ཐོག་ཏུ་འབུལ་བཞིན་ཡོད་ཟེར།
ཚོགས་མི་ ༡༥༠༠ ལྷག་གིས་གྲུབ་པའི་ཚོགས་པ་འདིར་དམངས་གཙོའི་ལམ་ནས་འོས་བསྡུ་བྱས་པའི་ཚོགས་གཙོ་ཚོགས་གཞོན་དང་དྲུང་ཆེ་སོགས་ཀྱིས་མཚོན་པའི་རྒྱུན་ལས་ ༡༤ ཡོད་འདུག་པ་དང་། རྒྱུན་ལས་དག་ལ་གསོལ་ཕོགས་སོགས་གང་ཡང་མེད་པར་སོ་སོའི་ལས་ཞོར་གྱི་དུས་ཚོད་སྟོང་པ་སྤྱད་དེ་སྤྱི་མཐུན་ཚོགས་པར་མ་དངུལ་མཁོ་སྒྲུབ་དང་། ས་གནས་བོད་རིགས་ཚོར་རོགས་ཕན་སྒྲུབ་བཞིན་ཡོད་འདུག
སྤྱི་མཐུན་ཚོགས་པའི་དྲུང་ཆེ་བསྟན་འཛིན་དཔལ་འཛོམས་ལགས་ཀྱིས་བརྗོད་ན། རྒྱུན་ལས་ཚོའི་ངོས་ནས་༼ སུམ་བརྒྱ་དྲུག་ཅུའི་ལས་འགུལ ༽སྟེ། ས་གནས་བོད་མི་རེ་རེས་ཉིན་རེའི་ཡོང་འབབ་ལས་ཨ་སྒོར་གཅིག་རེ་ཚོགས་པར་གནང་ རྒྱུར་འབོད་ཞུས་ཏེ་ཚོགས་པར་མ་དངུལ་མཁོ་སྒྲུབ་བྱེད་བཞིན་ཡོད་པ་དང་། ས་གནས་དེར་བོད་རང་གི་སྤྱི་ཚོགས་ཆེན་པོ་ཞིག་གྲུབ་སྟེ། ཁོང་ཚོའི་བྱིས་པ་ཚོར་བོད་ཡིག་བོད་སྐད་སྦྱང་སའི་སློབ་གྲྭ་དང་དགེ་རྒན་ཡོད་ལ། དེར་སློབ་ཕྲུག་གྲངས་ ༡༥༠ ཙམ་ཡོད་སྐོར་ངོ་སྤྲོད་གནང་བྱུང་།
ས་གནས་གསར་འགོད་པ། སངས་རྒྱས་བཀྲ་ཤིས།
བོད་ཕྱི་ནང་གཉིས་ཀྱི་དཔའ་བོའི་མཛད་རྗེས་ལ་བསྟོད་པ།
རང་བྱུང་ཡིད་དགའ་དྲི་བསུང་འཐུལ་བའི་ཡུལ། །
དྭངས་གཙང་བཞུར་རྒྱུན་རྒྱུ་བའི་སྒྲ་དང་འགྲོགས། །
དཀར་གཙང་གངས་རིས་བསྐོར་བའི་ཡུལ་ལྗོངས་དེ། །
ཤར་ཕྱོགས་སྤྲིན་ནག་གིས་ནི་ཡོངས་སུ་གཏུམས། །
ཡུལ་ལུང་གཅིག་ཀྱང་ཡུལ་མི་ཁག་གཉིས་སུ། །
བྲལ་ནས་ལོ་ངོ་ལྔ་བཅུ་འདས་མོད་ཀྱི། །
ཕྱི་ནང་གཉིས་ནས་འབོད་སྒྲ་གཅིག་སྒྲོགས་འོག །
གངས་ལྗོངས་གནད་དོན་འཛམ་གླིང་ཀུན་ལ་ཁྱབ། །
གཞིས་ཀྱི་ཆོད་སེམས་སྙིང་སྟོབས་ལ་རྒྱ་དང་། །
ལྷག་བསམ་གཡོ་མེད་ལྕགས་ཀྱུ་ལ་བརྟེན་ནས། །
བྱེས་ཀྱི་རྒན་གཞོན་དབྱེ་མེད་ཆིག་སྒྲིལ་གྱིས། །
ལས་འགུལ་རྣམ་པ་འདྲ་མིན་ཨ་ལོང་བཏབ། །
གཞིས་ལུས་རང་དབང་བྲལ་བ་ཡིན་མོད་ཀྱང་། །
རང་ལུས་མེ་ལྕེ་འོག་ནས་ཡར་ལངས་བྱེད། །
བྱེས་ཡུལ་རང་དབང་གསོར་འགོད་ཐབས་བྱུས་ཀྱིས། །
རང་ཡུལ་གནས་སྟངས་ཇི་བཞིན་ཡོངས་ལ་སྤེལ། །
དེ་ལྟའི་ཞི་བའི་ཐབས་ལམ་འོད་སྣང་གིས། །
གདུག་རྩུབ་ཆེ་བའི་སྤྲིན་ནག་རྡུལ་དུ་བརླག །
གངས་ལྗོངས་ཞིང་དུ་སླར་ཡང་ཞི་བདེའི་དཔལ། །
གཞིས་བྱེས་མཉམ་གནས་རོལ་བ་མྱུར་དུ་འོང་། །
ཐུགས་རྗེ་ཆེ། ས་མཐའ་ནས་འུ་ཚོས་འདི་ལྟར་འདས་པོ་ཚོའི་ཆེད་དུ་མཆོད་འབུལ་དང་འབྲེལ་བའི་ཁྱབ་བསྒྲགས་རེ་བྱ་རྒྱུ་ལས་གཞན་ཅི་ཞིག་བྱེད།ཁ་སང་རྒྱ་གར་ལྷོ་ཕྱོགས་མོན་གྷོ་ས་གནས་ཀྱི་བྱེད་སྟངས་དེ་འདྲ་བྱས་ན་ངོ་མ་སེམས་ཕམས་སྐྱེད་ཅིག་རེད།
གོང་གི་གནས་ཚུལ་དེའི་སྐོར་ལ་གུས་ཞབས་ཡོད་མོད། ནང་དོན་སྤྱིར་བཏང་ཙམ་རེད། གསར་འགྱུར་ངོ་མ་དང་། ཆེས་དགའ་འོས་པའི་གནས་ཚུལ་དེ་བྱང་ཨ་རིའི་ཁ་ལེ་ཧྥོ་ནི་ཡའི་བོད་རིགས་བྱིས་པ་ཚོར་བོད་སྐད་བོད་ཡིག་བསླབ་སའི་སློབ་གྲྭ་གྱ་ནོམ་པ་ཞིག་དང་། དེའི་ནང་སློབ་ཕྲུག་ ༡༥༠ ལྷག་ཡོད་པ་དེ་རེད། ཐུགས་རྗེ་ཆེ། བོད་རིགས་སྤྱི་མཐུན་ཚོགས་པ།
རི་བོ་ཧི་མ་ལ་ཡའི་ཕར་ནང་དུ།།
ཚེ་སྲོག་གསོན་པོ་མེ་ལ་སྒྲོན་པའི་ཚེ།།
འཇིག་རྟེན་ཀུན་ཏུ་ཡོད་པའི་གདོང་དམར་པ།།
ས་སྟེང་འདི་རུ་མིད་ཆུ་ཤིན་ཏུ་མང།།
ཨེ་དྲ་ངོས་ཀྱི་བུ་མོ་དེ་མཛེས་མ་འདྲ་ཞིག་འདུག་ཧེ་ཧེ་སྣང་བ་འགྲོ་སོངཧཧཧཧཧ