དེ་རིང་ཁ་བ་དཀར་པོ་བོད་ཀྱི་རིག་གཞུང་སྲི་ཞུ་ཁང་དུ་སྣར་སྐྱིད་ངག་དབང་དོན་གྲུབ་ལགས་ཀྱིས་རྩོམ་སྒྲིག་བྱས་པའི་རྒྱལ་དབང་སྐུ་འཕྲེང་བཅུ་གསུམ་པའི་སྲི་བྱ་བ་སྐོར་ཞིག་གི་ལོ་རྒྱུས་དེབ་ཆུང་ཞིག་དབུ་འབྱེད་གནང་སོང་།
དེ་རིང་ཕྱི་ཟླ་ ༡༠ ཚེས་ ༡༧ ཉིན་ཏེ་༧གོང་ས་མཆོག་ལ་ཨ་རིའི་གྲོས་ཚོགས་ནས་གསེར་གྱི་གཟེངས་རྟགས་ཕུལ་ཏེ་ལོ་ ༤ འཁོར་པའི་དུས་ཆེན་དང་བསྟུན་ཏེ། ཁ་བ་དཀར་པོ་བོད་ཀྱི་རིག་གཞུང་སྲི་ཞུ་ཁང་གི་ཡིག་ཚང་དུ་སྣར་སྐྱིད་ངག་དབང་དོན་གྲུབ་ལགས་ཀྱིས་རྩོམ་སྒྲིག་བྱས་པའི་ ༼ ༧རྒྱལ་དབང་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་བོད་རྒྱལ་ཁབ་ཀྱི་ལུགས་ཟུང་ཆབ་སྲིད་འཛིན་སྐྱོང་མཛད་འགན་བཞེས་སྐབས་སྲི་ཞུའི་ཞབས་འདེགས་གཟེངས་ཐོན་ཞུ་མཁན་མི་སྣ་ངོ་སྤྲོད་ཟུར་བཏོན ༽ ཞེས་པའི་ལོ་རྒྱུས་མི་སྣ་ངོ་སྤྲོད་ཀྱི་དེབ་ཆུང་ཤོག་ངོས་ ༥༠ ཅན་ཞིག སྐུ་མགྲོན་གཙོ་བོ་ཆོས་རིག་བཀའ་བློན་པདྨ་ཆོས་འབྱོར་མཆོག་གིས་དབུ་འབྱེད་གནང་སོང་།
དཔེ་དེབ་དེའི་ནང་རྒྱལ་དབང་སྐུ་ཕྲེང་བཅུ་གསུམ་པར་སྲི་ཞུ་སྒྲུབ་མཁན་གྱི་མི་སྣ་ ༡༣ ཡི་ལོ་རྒྱུས་སྙིང་བསྡུས་ངོ་སྤྲོད་གནང་ཡོད་པ་དག་ནི། སྲིད་བློན་བཤད་སྒྲ། སྲིད་བློན་ཞོལ་ཁང་། སྲིད་བློན་ཆང་ཁྱིམ། བཀའ་བློན་བླ་མ་བྱམས་པ་བསྟན་དར། མགྲོན་གཉེར་ཆེན་མོ་བསྟན་པ་དར་རྒྱས། རྩིས་དཔོན་ལུང་ཤར་རྡོ་རྗེ་ཚེ་རྒྱལ། ཛ་སག་ཚ་རོང་ཟླ་བཟང་དགྲ་འདུལ། སྤྱན་བསལ་ཐུབ་བསྟན་ཀུན་འཕེལ། མཚན་ཞབས་བློ་བཟང་ངག་དབང་། འབྲུག་གཞུང་ནང་གཟིམ་ཀ་ཇི་ཨོ་རྒྱན་རྡོ་རྗེ། འབྲས་སྤྱི་བློན་ཆེན་སཱར་ཅཱལ་སེ་འབེལ། རྒྱལ་ཟུར་རྭ་སྒྲེང་སྐུ་ཕྲེང་ལྔ་པ། མཚན་ཞབས་ཀེའུ་ཚང་རིན་པོ་ཆེ་བཅས་རེད།
དེབ་ཆུང་དབུ་འབྱེད་ཀྱི་ཐོག་མར་བང་ཆེན་རྩོམ་སྒྲིག་པ་གསེར་རྟ་ཚུལ་ཁྲིམས་ལགས་ཀྱིས་ངོ་སྤྲོད་རྒྱུར། ༧གོང་ས་མཆོག་ལ་ཨ་རིའི་གསེར་གྱི་རྟགས་མ་ཕུལ་ཏེ་ལོ་ ༤ འཁོར་པའི་དུས་ཆེན་དང་སྟབས་བསྟུན་དབུ་འབྱེད་བྱས་པའི་དཔེ་དེབ་དེ་ཆུང་ཆུང་ཞིག་ཡིན་ཡང་། ནང་དོན་གལ་ཆེན་པོ་ཡིན་པ་དང་། ༧རྒྱལ་དབང་སྐུ་ཕྲེང་བཅུ་གསུམ་པ་ཆེན་པོ་སོག་ཡུལ་དང་རྒྱ་ཡུལ། རྒྱ་གར་སོགས་སུ་ཆབ་སྲིད་ཀྱི་དཀའ་རྙོག་འོག་ཉེན་གཡོལ་དུ་ཕེབས་དགོས་བྱུང་པ་དང་། བོད་རང་བཙན་གསལ་བསྒྲགས་རྐྱང་པ། ཕྱི་ལོ་ ༡༩༡༤ ནས་ ༡༩༤༩ བར་འཛམ་གླིང་ནང་བོད་རང་བཙན་གཙང་མའི་རྒྱལ་ཁབ་ཅིག་ཡིན་པ་བསྙོན་མེད་དུ་སྒྲུབ་ཐུབ་པ་དེ་༧གོང་ས་སྐུ་ཕྲེང་བཅུ་གསུམ་པ་ཆེན་པོའི་མཛད་འཕྲིན་ཆེ་ཤོས་ཡིན་ཞིང་། སྐབས་དེ་དག་ནང་ཁོང་གི་རྗེས་འབྲང་པ་དང་རོགས་འདེགས་བྱེད་མཁན་གྱི་མི་སྣ་གལ་ཆེན་དག་ནི་དེབ་ཆུང་དེར་ངོ་སྤྲོད་བྱས་ཡོད་ཚུལ་སོགས་ངོ་སྤྲོད་གནང་བྱུང་།
སྐུ་མགྲོན་གཙོ་བོ་ཆོས་རིག་བཀའ་བློན་མཆོག་གིས་དཔེ་དེབ་དབུ་འབྱེད་གནང་རྗེས། གཞོན་ནུ་ལྷན་ཚོགས་ཐོག་མར་འཛུགས་སྐབས་སྐུའི་གཅེན་པོ་རྒྱལ་ལོ་དོན་གྲུབ་མཆོག་གིས་གནང་པའི་གསུང་བཤད་ཅིག་ལུང་འདྲེན་གྱིས་གསུངས་དོན། “ ཕྱི་ལོ་ ༡༩༧༡ ལོར་གཞོན་ནུ་ལྷན་ཚོགས་དབུ་འཛུགས་ཀྱི་མཛད་སྒོ་དང་བསྟུན་ནས་རྒྱལ་ལོ་དོན་གྲུབ་མཆོག་ཕེབས་ཏེ། སྔོན་མ་ལྷ་སར་སྐུ་དྲག་རིགས་གཅིག་ཡོད་པ་རེད། ཁོང་ལྷ་སར་ཕེབས་སྐབས། གཅིག་ནས་༧གོང་ས་མཆོག་གི་སྐུ་མཆེད་དང་གཉིས་ནས་རྒྱ་ནག་ནས་སློབ་སྦྱོང་ཡུན་རིང་བྱས་མྱོང་ཡོད་སྟབས། སྐབས་ཤིག་ལྷ་སའི་ནོར་བུ་གླིང་ཁ་རུ་སྡེ་བ་གཞུང་གི་ལྷན་ཚོགས་ཤིག་ལ་ཞུགས་སྐབས། སྲི་ཞུ་བ་ཀླུ་ཁང་དང་བློ་བཟང་བཀྲ་ཤིས་གཉིས་མ་གཏོགས། རྒྱ་མགོ་མཐོ་དུས་རྒྱ་དང་བོད་མགོ་མཐོ་དུས་བོད་ཅེས་པའི་དཔེ་ལྟར་བྱུང་སོང་། དེ་ལྷ་སའི་གནས་སྟངས་རེད། དེ་བཞིན་མདོ་སྟོད་སྨད་གཉིས་གང་ས་གང་ལ་བལྟས་ཡོང་ན། ས་ཁུག་ཁུག་རེར་རྡོ་འབུར་འབུར་རེ་ཡོད་པ་རེད་ཅེས་བརྗོད་བྱུང་། ས་ཁུག་ཁུག་རེར་རྡོ་འབུར་འབུར་རེ་ཞེས་པ་ནི་ས་ཁུག་རེ་ལ་དཔོན་ཆུང་རེ་ཡོད་ཅིང་། དཔོན་ཆུང་དེ་དག་གིས་ཡུལ་མིར་བཙན་ཤེད་དང་ཁྲལ་བསྡུ་རྒྱུ་ལས་མི་མང་གི་བདེ་སྡུག ལུང་པའི་འཛུགས་སྐྲུན་དང་ཤེས་ཡོན་ཡར་རྒྱས་གཏོང་རྒྱུ་བཅས་ལ་བསམ་བློ་འཁོར་གྱི་མེད་པ་དང་། དེ་ལྟ་བུའི་གནས་བབ་ཅིག་གི་འོག་རྒྱ་དམར་བོད་དུ་བསླེབས་པ་ཞིག་ཡིན་པ་ཁྱེད་ཚོས་ཤེས་དགོས་རེད། སྐུ་དྲག་དང་དཔོན་ཆུང་དེ་དག་རྐང་པ་ཕར་རྐྱང་ཉི་མ་ཚུར་ཕུད་དེ་སྤྲོ་བོ་བྱས་ཏེ་སྡོད་མཁན་རྐྱང་ཡིན་པ་དང་། ད་ཆར་སོ་སོའི་ལུང་པ་ཤོར་ཏེ་མི་ཡུལ་ལ་སླེབས་དུས་ཀྱང་༧གོང་ས་མཆོག་ལ་ཕྱག་རོགས་ཞུ་ཐུབ་མཁན་དེ་འདྲ་སུ་མི་འདུག་ཀ་ཞེས་གསུངས་པ་རང་ཉིད་ཀྱིས་གོ་མྱོང” ཞེས་གསུངས་སོང་། བཀའ་བློན་མཆོག་གིས་མུ་མཐུད། བོད་ལ་ནང་ཆོས་སྐོར་ཀྱི་དཔེ་དེབ་རིགས་ཧ་ཅང་མང་པོ་ཡོད་པ་རེད་དེ། ལོ་རྒྱུས་རང་བཞིན་གྱི་ཆབ་སྲིད་དཔེ་དེབ་དཀོན་པོ་ཡིན་སྟབས། དཔེ་དེབ་འདི་ཆུང་ཆུང་ཡིན་ཡང་རིན་ཐང་ལྡན་པ་ཞིག་ཡིན་སྐོར་གསུངས་སོང་།
གསར་འགོད་པ། བནྡེ་སྐྱབས།
གང་ཡིན་ཟེར་ན།གནའ་སྔ་མོའི་སྡེ་བ་གཞུང་གིས་བྱས་སྟངས་དེ་ཚོ་གཅེན་པོའི་ལུང་དང་བསྒྲགས་ཏེ་སྒྲུབ་ཡོང་དུས་སུ་ལའང་ཞེད་དགོས་ཡ་མི་འདུག་ཡག་པོ་འདུག་དངོས་ཡོད་གནས་སྟངས་སྦས་བསྡད་ན་ཕན་ཐོགས་ཀྱི་མ་རེད།སྔ་མོའི་སྡེ་བ་གཞུང་གི་བག་ཆགས་དེ་ད་ལྟ་གྲྭ་མ་ཞིག་པར་ལྷག་ཡོད་པ་དེ་ཚོའང་སྐབས་འདིར་ཅུང་ཟད་གླེང་ན་ག་འདྲའི་ཡག་པོ་མེ་དམ།།
ཆོས་རིག་བློན་ཆེན་གྱིས་བཀའ་སློབ་ཡག་པོ་ཞི་དྲག་གནང་འདུག
ལོ་རྒྱས་ཀྱི་དཔེ་དེབ་དེ་བཙོང་གི་ཡོད་ན་འདྲ་རིན་མེད་ཐོག་གནང་གི་ཡོད་འདྲ་གང་ལྟར་ཀྱང་ཁ་བྱུང་འདིའི་ཐོག་གཅིག་གཉིས་ཞིག་བསྐུར་རོགས་གནོང་དང་འགྲོ་ལུགས་གང་ཡིན་ཀྱང་དེ་ལྟར་བསྒྲུབ་ཆོག sera je jadrel khangtsen
hous No.777 P.O.Bylakuppe-571004
D.Mysore (K.S) INDIA ཁ་པར་ཨང་འདི་ཡིན། 9980129500 འདི་ཡིན།