དེ་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་ཏུ་༧གོང་ས་མཆོག་དབུ་བཞུགས་ཐོག དཔལ་རྒྱལ་བ་ཀརྨ་པ་མཆོག་དང་བཀའ་ཟུར་ཀིརྟི་རིན་པོ་ཆེ། བཀའ་ཁྲི་བློ་བཟང་སེང་གེ་གཙོས་པའི་བོད་མིའི་སྒྲིག་འཛུགས་ཀྱི་ལས་བྱེད་ཆེ་ཕྲ་ཡོངས་དང་། བཞུགས་སྒར་ཉེ་ཁུལ་གྱི་དགོན་སྡེ་དང་སློབ་གྲྭ་ཁག་གི་སློབ་ཕྲུག་བཅས་སྐྱ་སེར་ ༥༠༠༠ ལྷག་གིས་སྨོན་ལམ་མཆོད་འབུལ་དང་ཟས་བཅད་སྨྱུང་གནས་གནང་ཡོད།
བཀའ་སྤྱི་ཐུན་མོང་གི་གོ་སྒྲིག་གི་འོག དེ་རིང་རྒྱ་གར་གཙོས་པའི་འཛམ་གླིང་རྒྱལ་ཁབ་ ༦༠ ཙམ་གྱི་ནང་བཙན་བྱོལ་བོད་མི་ཚོས་ཉིན་བརྒྱ་དུས་གཅིག་ལ་ཞལ་འདོན་སྨོན་ལམ་དང་ཟས་བཅད་སྨྱུང་གནས་གྱི་ལས་འགུལ་སྤེལ་གྱི་ཡོད་པ་ལྟར། དེ་རིང་ཞོགས་པའི་ཆུ་ཚོད་ ༩ སྟེང་བཞུགས་སྒར་ངྷ་ས་ཐེག་ཆེན་གླིང་གཙུག་ལག་ཁང་དུ། ༧གོང་ས་མཆོག་དབུ་བཞུགས་ཐོག དཔལ་རྒྱལ་བ་ཀརྨ་པ་མཆོག་དང་སྐྱབས་རྗེ་ཀིརྟི་རིན་པོ་ཆེ། བཀའ་བློན་ཁྲི་པ་གཙོས་པའི་བོད་མིའི་སྒྲིག་འཛུགས་ཀྱི་སྲི་ཞུ་ལས་བྱེད་ཡོངས། གཞུང་འབྲེལ་མིན་པའི་ཚོགས་སྡེ་ཁག་གི་འགན་འཛིན་དང་ལས་བྱེད། བཞུགས་སྒར་ཉེ་ཁུལ་གྱི་དགོན་སྡེ་ཁག་གི་གྲྭ་བཙུན་དང་། སློབ་གྲྭ་ཁག་གི་སློབ་ཕྲུག་བཅས་སེར་སྐྱ་ལྔ་སྟོང་ ༥༠༠༠༠ ལྷག་མཉམ་ཞུགས་ཀྱིས་བོད་ནང་གི་རྒྱལ་གཅེས་དཔའ་བོ་དཔའ་མོ་རྣམས་ལ་སྨོན་ལམ་མཆོད་འབུལ་དང་། ཛ་དྲག་གཉན་འཕྲང་གི་དཀའ་སྡུག་འོག་གནས་པའི་གཞིས་བཞུགས་སྤུན་ཟླ་ཚོར་གདུང་སེམས་མཉམ་སྐྱེད་ཆེད། ཉིན་ཧྲིལ་བོའི་ཟས་བཅད་སྨྱུང་གནས་དབུ་འཛུགས་གནང་ཡོད།
མཛད་སྒོ་དབུ་འཛུགས་ཀྱི་ཐོག་མར་དབུས་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་མཆོག་གིས་གསུང་བཤད་གནང་སྟེ། རྒྱ་ནག་གཞུང་གིས་བོད་ས་བཙན་བཟུང་བྱས་པའི་མི་ལོ་དྲུག་ཅུའི་རིང་བོད་ཐོག་གདུག་རྩུབ་མནར་གཅོད་ཚད་མེད་བཏང་ཡོད་པ་དང་། རྒྱ་གཞུང་གི་མི་སེར་སྤེལ་བའི་ལམ་ལུགས་འོག་བོད་མིའི་ཆོས་དང་རིག་གཞུང་། སྐད་ཡིག་སོགས་ལ་གཏོར་བརླག་ཚབས་ཆེན་བཟོས་ཡོད་སྟབས། ༢༠༠༨ ལོ་བོད་མདོ་དབུས་ཁམས་གསུམ་ནང་ཞི་བའི་གྱེན་ལངས་བྱུང་བ་འཛམ་གླིང་ཡོངས་ཀྱིས་མཁྱེན་གསལ་ཡིན་སྐོར་དང་། ཁོང་གིས་ “ བློ་ཕམ་པ་ཞིག་ལ་རྒྱ་གཞུང་གི་མགོ་ཁྲིད་ཚོས་དངོས་ཐོག་བདེན་འཚོལ་གྱི་ལམ་ནས་བོད་མིའི་དཀའ་ངལ་སེལ་ཐབས་བྱ་རྒྱུའི་ཚབ་ཏུ་མུ་མཐུད་སྲིད་བྱུས་མཁྲེགས་བཟུང་ཁོ་ནས། བོད་མི་རྣམས་ཨུ་ཐུག་ཐབས་ཟད་ཀྱི་གནས་ལ་གྱར་བ་དང་། ཆོས་བྱེད་དགེ་འདུན་གྱི་སྡེ་དང་། དགོན་པ་གྲྭ་ཚང་ཁག་ལ་དམིགས་བསལ་སྡང་ཟུག་གིས་ལས་དོན་རུ་ཁག་ཟེར་བའི་མི་སྣ་ཆེད་གཏོང་གིས། ཆོས་ཀྱི་བྱ་བར་དམ་བསྒྲགས་དང་སུན་བཙིར་ཐེ་བྱུས་གང་བྱུང་བྱེད་ཀྱི་ཡོད་སྟབས། ད་ལོའི་ཕྱི་ཟླ་ ༣ པ་ནས་རྔ་པ་དང་རྟའུ། གསེར་རྟ་སོགས་སུ་བོད་མི་མང་པོ་བཀག་ཉར་གྱིས་གནས་སྟངས་ཛ་དྲག་ཏུ་ཕྱིན་པ་དང་། ད་བར་བོད་རིགས་ན་གཞོན་ ༩ ཙམ་གྱིས་སྐུ་ལུས་ཞུགས་མེར་བསྒྲོན་པའི་ལམ་ནས་བོད་ནང་རང་དབང་བསྐྱར་གསོ་དང་། ༧གོང་ས་མཆོག་བོད་ལ་གདན་ཞུ་དགོས་པ། རྒྱ་གཞུང་གི་མཁྲེགས་བཟུང་སྲིད་བྱུས་ལ་བཟོད་ཐབས་མེད་པར་ངོ་རྒོལ་གནང་བའི་གནས་ཚུལ་བྱུང་ཡོད་པས། ཁོང་ཚོའི་རྒྱལ་གཅེས་ལྷག་བསམ་དང་སྙིང་སྟོབས་ལ་རྗེས་དྲན་གྱིས་གདུང་སེམས་མཉམ་སྐྱེད་ཞུ་རྒྱ་ཡིན་ ” ཞེས་འཁོད་འདུག
བཀའ་ཁྲི་མཆོག་གིས་མུ་མཐུད་དུ། “ དབུས་བོད་མིའི་སྒྲིག་འཛུགས་ཀྱི་འབོད་སྐུལ་ལྟར་བཙན་བྱོལ་བོད་མིའི་སྡོད་སྒར་ཡོངས་སུ། ས་གནས་ཀྱི་གནས་བབ་ལ་གཞིགས་པའི་གདུང་སེམས་མཉམ་སྐྱེད་ཀྱི་ལས་འགུལ་སྣ་ཚོགས་སྤེལ་གྱི་ཡོད་སྟབས། ལས་འགུལ་དེ་དག་ཞི་བའི་སྒོ་ནས་ཡུལ་ཁྲིམས་དང་མ་འགལ་བ་དང་། ཆེ་མཐོང་ལྡན་པ་ཞིག་ལ་ངོས་འཛིན་གནང་དགོས་པ་གོ་སྐབས་འདི་བརྒྱུད་འབོད་སྐུལ་ཞུ་རྒྱུ་ཡིན། རྒྱ་གཞུང་གི་མགོ་ཁྲིད་ཚོས་དྲག་གནོན་སྲིད་བྱུས་མྱུར་དུ་མཚམས་འཇོག་དང་། ཞི་བའི་སྒོ་ནས་བོད་མིའི་དཀའ་ངལ་སེལ་དགོས་པའི་འབོད་སྐུལ་ནན་མོ་ཞུ་རྒྱུ་ཡིན། དེ་བཞིན། མཉམ་འབྲེལ་རྒྱལ་ཚོགས་དང་རྒྱལ་སྤྱིའི་སྤྱི་ཚོགས་ཀྱིས་བོད་ནང་གི་དངོས་ཡོད་གནས་ཚུལ་ཤེས་རྟོགས་ཡོང་ཆེད། རྟོག་ཞིབ་མི་སྣ་དང་གསར་འགོད་པ་ཚོགས་པ་ཞིག་བོད་ནང་ངེས་པར་གཏོང་དགོས ” ཞེས་འཁོད་འདུག
སྐབས་དེར་གསར་འགོད་པས་ལས་འགུལ་འདིའི་ཐད། དབུས་བོད་མིའི་སྒྲིག་འཛུགས་ཕྱི་དྲིལ་དྲུང་ཆེ་ཨ་ཏི་ཤཱ་བསྟན་འཛིན་ཕུན་ཚོགས་ལགས་སུ་བཅར་འདྲི་ཞུས་པར། ཁོང་གིས་ “ ཕྱི་ཟླ་གསུམ་པ་ནས་ཨ་མདོ་རྔ་པའི་ནང་བོད་རིགས་ན་གཞོན་ཚོས། རང་གི་རྒྱལ་ཁབ་དང་མི་རིགས་ཆེད་རང་ལུས་མེར་བསྲེགས་བཏང་དང་གཏོང་བཞིན་པའི་ཡིད་སྐྱོའི་གནས་ཚུལ་ཐོན་པ་རེད། དཔའ་པོ་དཔའ་མོ་དེ་ཚོར་གདུང་སེམས་མཉམ་སྐྱེད་མཚོན་ཆེད། དེ་རིང་བཀའ་སྤྱི་གཉིས་ཐུན་མོང་ཐོག་འཛམ་གླིང་གང་སར་ཉིན་བརྒྱ་དུས་གཅིག་ལ། ༧གོང་ས་མཆོག་གི་སྐུའི་བླ་གཟའ་དང་བསྟུན་ཏེ་ལས་འགུལ་སྤེལ་གྱི་ཡོད། ལས་འགུལ་འདི་ལ་༧གོང་ས་མཆོག་གིས་ཀྱང་མཛད་བྲེལ་ཡོད་མིན་ལ་མ་ལྟོས་པར། ཞོགས་པ་ཚོགས་མགོན་དུ་ཞབས་སོར་བཀོད་དེ། དེ་རིང་ཉིན་ཧྲིལ་བོར་སྨྱུང་གནས་ལ་བཞུགས་རྒྱུ་རེད། བོད་མིའི་སྒྲིག་འཛུགས་ཀྱི་ངོས་ནས་འདས་གྲོངས་སུ་གྱུར་བ་ལ་སྨོན་ལམ་མཆོད་འབུལ་གནང་གི་ཡོད་ལ། ཁོང་ཚོའི་བྱས་རྗེས་དེ་ཆུད་ཟོས་དུ་མི་འགྲོ་རྒྱུའི་ཆེད་དུ། བཀའ་བློན་ཁྲི་པའི་མཚན་ཐོག་ནས་མཉམ་འབྲེལ་རྒྱལ་ཚོགས་དང་། འཛམ་གླིང་རྒྱལ་ཁག་ཁག་གི་མགོ་ཁྲིད། བོད་དོན་རྒྱབ་སྐྱོར་ཚོགས་པ། འགྲོ་བ་མིའི་ཐོབ་ཐོབ་ཐང་ཚོགས་པ་ཁག་ལ་ཡིག་ཐོག་ནས་འབོད་སྐུལ་ཞུས་ཏེ། བོད་ནང་གི་སྲིད་བྱུས་གུ་ཡངས་དང་གསར་འགོད་པ་ཆེད་གཏོང་ཐུབ་རྒྱུར་འབད་བརྩོན་གནང་གི་ཡོད ” ཅེས་བརྗོད་སོང་།
ཐེངས་འདིའི་ཉིན་བརྒྱ་དུས་གཅིག་གི་ཟས་བཅད་སྨྱུང་གནས་དེ་ནི། འདས་པའི་བོད་པའི་རྩ་དོན་འཐབ་རྩོད་ཁྲོད་ཀྱི་གཞུང་དམངས་མཉམ་ཞུགས་ཀྱི་ལས་འགུལ་གཞི་རྒྱ་ཆེ་ཤོས་ཤིག་ཆགས་ཡོད།
གསར་འགོད་པ། དཔལ་ལྡན།
གོང་ས་མཆོག་དང་ས་སྐྱའི་གདུང་སྲས་རྣམས་པས་དབུས་པའི་བོད་ཀྱི་བླ་ཆེན་ཁག་གིས་གཙོས་པའི་བོད་ཀྱི་མི་ཆེན་རྣམས་དེ་རིང་གི་ལས་འགུལ་ཞུགས་པ་ལ་རྗེས་སུ་ཡི་རང་དང་བསྔགས་བརྗོད་ཡོད། གང་ཡིན་ཟེར་ན། འདི་ནི་ད་བར་བྱུང་མ་མྱོང་བའི་གནས་ཚུལ་གསར་པ་ཞིག་ཀྱང་རེད་ལ། མ་ཟད་བོད་ཀྱི་ཆབ་སྲིད་ལ་མཚོན་ན་ཤིན་ཏུ་དོན་སྙིང་ལྡན་པ་ཞིག་ཀྱང་རེད།
གནས་སྟངས་འདི་འདྲའི་སྐབས་ལ་ཡང་ཁ་ཤས་ཀྱིས་འཐོབ་དང་གོ་སའི་སྡུག་འདོན་གྱི་འདུག་པ་འདི་དག་ནི། སོ་སོ་ལ་འོས་བབ་མེད་པའི་གོ་ས་ཞིག་ལ་རེ་ནས་ཡོད་པའི་རང་མཚང་སྟོན་བྱེད་ཙམ་རེད། ཁོ་ཚོ་ཤ་ཚ། ནམ་ཡང་འདི་ལྟར་དངས་འཚབ་དང་སེམས་འཁྲལ་ཁོ་ནས་སྡོད་དགོས་ཀྱི་འདུག་ག
ཉིན་བརྒྱ་དུས་གཅིག ཅེས་པའི་རྟོག་བཏགས་ཚིག་འདི་ལས། ཉིན་གཅིག་དུས་གཅིག ཅེས་པའི་ཁ་ཡོད་ལག་ཡོད་ཀྱི་ཚིག་འདི་བེད་སྤྱོད་བྱས་ན་མི་བཟང་ངམ།
འབྲེལ་ཡོད་ཚང་མས་གཏན་གཏན་ཡིད་གཟབ་དགོས་བ་ཞིག་ལ་བླ་མ་ཚོ་བཞུགས་ལྡན་རྒྱག་དུས་རང་སྣང་གར་ཤར་བྱ་མི་ཉན་པ་དེ་ཤེས་དགོས།
བོད་མི་རིགས་མཐུན་འབྲེལ་ཡོང་མིན་དེ་བླ་མ་ཚོ་གོ་རིམ་སྒྲིག་སྟངས་ལ་རག་ལས་ཡོད་བཤད་ན་ཐལ་ཆ་མེད་པའི་གནས་སྟངས་ཤིག་ཆགས་ཡོད་པས་འབྲེལ་ཡོད་ཚང་མས་དུས་ནས་དུས་སུ་གནས་ཚུལ་འདིའི་སྐོར་བ་ཡིད་གཟབ་གཏན་གཏན་གནང་དགོས།
༸ གོང་ས་མཆོག་སྐུ་བཞུགས་ཐོག་ཐུགས་སྨོན་དང་གདུང་སེམས་མཉམ་བསྐྱེད་གནང་བ་དེར་སྙིང་ནས་རྗེས་སུ་ཡི་རང་དང་དགའ་འོས་པ་ཞིག་རེད།
ཡིན་ནའང་སྐུ་དཔར་འདིའི་ནང་གི་གནས་སྟངས་ལ་དཔྱད་ཞིབ་ཡག་པོ་ཞིག་བྱས་ན་ད་དུང་བོད་སྡེ་པ་གཞུང་གི་ཆབ་སྲིད་ཁྲོད་དུ་གནས་ཆུང་གི་ལུང་བསྟན་གྱིས་ལུང་བསྟན་ཞིག་ཡོད་པ་གཤམ་གསལ་ལྟར་ཡིན།
ནུབ་ཀྱི་རྒྱལ་མཚན་མར་ལ་ཕབ། །བྱང་གི་སྟག་མོ་བསྙལ་ནས་ཞོག །
ལྷོ་ཡི་གཡུ་འབྲུག་ཡང་ཡང་གསོལ། །བྱང་གི་འབྲི་མོ་ཡང་སེ་བཞོས། །
ཞེས་བོད་ས་མ་ཤོར་བའི་སྐབས་སུ་སྡེ་པ་གཞུང་གི་ཆབ་སྲིད་བེད་སྤྱད་དེ་གནས་ཆུང་ལུང་བསྟན་ཡིན་ཁུལ་བྱས་ཏེ་མི་དམངས་མགོ་རྨོངས་སུ་བཅུག་ཡོད།
ད་ཆ་བོད་ས་ཤོར་ནས་སྐྱབས་བཅོལ་དུ་ཡོད་པའི་སྐབས་སུ་གནས་ཆུང་གི་ལུང་བསྟན་ཡོད་མེད་མི་ཤེས་ཀྱང་སྐུ་བཅར་རྣམ་རྒྱལ་གྲྭ་ཚང་གི་གོ་སྒྲིག་བྱེད་སྟངས་དེ་ལ་བལྟས་ན་ཡང་བསྐྱར་གནས་ཆུང་གི་ལུང་བསྟན་གསར་པ་ཞིག་ཁ་སྣོན་བརྒྱབ་ཡོད་འདྲ།
དེ་ཡང་། ནུབ་ཀྱི་རྒྱལ་མཚན་མར་ལ་ཕབ། །བྱང་གི་སྟག་མོ་བསྙལ་ནས་ཞོག །
ལྷོ་ཡི་གཡུ་འབྲུག་ཡང་ཡང་གསོལ། །བྱང་གི་འབྲི་མོ་ཡང་སེ་བཞོས། །གངས་ཅན་སྐྱིད་གཤོངས་ཟུར་དུ་འཇོག ། ཅེས་ལུང་བསྟན་ཞིག་གནང་བའི་བཟོ་འདུག།
དེ་རིང་རྡ་སའི་ཁུལ་དུ་མགོ་༸གོང་ས་མཆོག་དང་བཀའ་བློན་ཁྲི་པ། བར་དགེ་འདུན་གྱི་སྡེ་དང་སློབ་ཕྲུག འཇུག་མི་དམངས་རྣམས་པས་ཉིན་གང་པོར་འདས་གྲོང་དུ་སོང་བའི་དཔའ་བོ་དཔའ་མོ་དག་གྱི་ཆེད་དུ་སྔོ་སྨོན་དང་བོད་ཀྱི་བདེན་དོན་དག་འཛམ་གླིང་ཤར་ནུབ་ཀུན་གྱི་ཡུལ་སྐོར་བ་རྣམས་ལ་དྲིལ་སྒྲགས་ཤུགས་ཆེ་ཡོང་ཆེད་བཟས་བཅད་ངོ་རྒོལ་གནང་ཡོད་ཀྱང། དགོངས་མོའི་ཆུ་ཚོད་ལྔ་དང་ཕྱེད་ཙམ་ལ་རྡ་སའི་ཁུལ་གྱི་བཟའ་ཁང་བཟུང་མཁན་ཨ་མདོ་བ་དང་སློབ་ཕྲུག་ཁག་ཅིག་ནས་གླུ་ལེན་གར་དང་བཞད་གད་བཅས་ཀྱི་ངང་སྤྲོ་སྐྱིད་གཏང་གྱི་ཡོད་པ་ངའི་གྲོགས་པོ་ཞིག་རྒྱུད་ནས་གོ་མཐོས་བྱུང་གཤམ་གྱི་ཚིགས་བཅད་དེ་སོམ་སྙིའི་དྲ་བར་ཚུད་ནས་བྲིས་ཐལ། །
གཞིས་ཞུགས་བོད་མིས་དལ་མེད་རང་བཙན་ཆེད་དུ་སྐུ་ལུས་མེ་ལ་ལྕེབ། །
བྱེས་འབྱོར་ཁྱམས་པོས་དལ་ལྷོད་ངང་ནས་གླུ་ལེན་གར་འཁྲབ་སྤྲོ་སྐྱིད་གཏང། །
གཞིས་སྡོད་བོད་མི་སྐྱིད་ངོ་མ་ཟིན་མེ་ལ་ལྕེབ་བམ་ཡང་ན་ཅི། །
བྱེས་འབྱོར་འཁྱམ་པོ་གཞན་ཡུལ་སྒྲིམ་སྐབས་དཀའ་ངལ་མེད་དམ་ཡང་ན་ཅི། །
དེ་རིང་བཙན་འབྱོར་བོད་མི་ཡོངས་རྫོགས་ཟས་བཅད་ངོ་དགོལ་བྱེད་བཞིན་ཡོད་ཀྱང་ནོར་གླིང་བོད་ཀྱི་རིགས་གཞུང་གཅེས་སྐྱོང་ཁང་སྒོར་མོ་བཟོ་རྒྱུ་ལ་བྲེལ་ནས་བསྡོད་ཡོད་པར་འདྲ་
ཧ་ཧ་་་་་་འདི་ཡང་གསར་འབྱོར་ཚ་བོ་ཞིག་མ་རེད་དམ།
བཀའ་ཁྲི་མཆོག་སྔོ་སྨོན་ཐོག་དབུ་བཞུགས་མཛད་པ་ལས་ཕྱི་ཕོགས་སུ་ཡོད་པའི་ཆབ་སྲིག་པ་དང་བོད་དོན་རྒྱབ་བསྐྱོར་བ་རྣམས་ལ་འབྲེལ་བ་བྱས་ན་མི་བཟང་ངམ།
དེ་རིང་བོད་མི་ཚང་མ་དུས་གཅིག་ཏུ་འདུས་ནས་ཟས་བཅད་གནང་སྟངས་ལ་ལྟས་ན་དགའ་འོས་པའི་བྱ་བ་ཞིག་རེད། གཞིས་བཞུགས་བོད་མི་ཚོ་སྙིང་རྗེ་བསམ་ནས་ཕེབས་པ་ཡིན་གྱི་རེད་འོན་ཀྱང་རང་ཉིད་བོད་མི་ཞིག་ཡིན་དུས་འགན་ཡོད་པ་ཤེས་པ་ཡིན་ཡག་པོ་རེད་ད་དུང་མར་མེའི་ཁྲོམས་སྐོར་སོགས་ལས་འགུལ་གང་ཡིན་རུང་མཉམ་བཞུགས་གནང་རོགས་ཞུ།
ཨ་ཁ་ཞོགས་ཇ་བཏུངས་ཟིནད་ཀྱང་། །
འདི་རིང་ཉིན་ཟས་དགོང་ཟས་གཉིས། །
མི་ཟ་དམ་བཅའ་ཆག་ཀྱོག་གཅིག །
བཞག་ནས་ང་ཡང་སྨྱུང་གནས་ཡིན། །
བོད་ནང་གི་རྒྱལ་གཅེས་ཞི་རྒོལ་དཔའ་བོ་རིམ་བྱོན་དང་ལྷག་པར་དུ་རང་ལུས་མཆོད་མེར་སྦར་བའི་དགེ་འདུན་པ་གསར་བུ་རྣམ་པས། བོད་ཀྱི་ཆེ་དགུ་ཚང་མ་ཡང་འདི་ལྟར་བསྒུལ་བྱུང།
སྒུལ་སྟངས་དང་འགུལ་སྟངས་འདིས་ད་གཟོད་ཚེ་སྲོག་ཅིག་གི་རིན་ཐང་མཚོན་ཐུབ་ལ། ད་གཟོད་སྐྱིད་སྡུག་གཅིག་གི་འདུ་ཤེས་དང་ཆིག་སྒྲིལ་ཞིག་གི་སྟོབས་ཤུགས་ཀྱང་མཚོན་ཐུབ་སོང།
སྐབས་འདིར་བདག་གིས་སུ་ཞིག་ལ་བཀའ་དྲིན་ཆེ་ཞུ་འོས་པ་མི་ཤེས་ལ། སུ་ཞིག་ལ་གསོལ་བ་འདེབས་དགོས་པ་ཡང་མི་ཤེས། གང་ལྟར་ཡིད་ཆེས་ཤིག་དང་སྤོབས་པ་ཞིག རེ་བ་ཞིག་ལྷོག་ལྷོག་ཏུ་འཕྱུར་འོང་གིན་འདུག འདི་ནི་འུ་ཅག་ཚང་མའི་བྲང་ཁོང་ན་ལྷོག་ལྷོག་ཏུ་འཕྱུར་བཞིན་པ་དེ་ཡང་ཡིན་ངེས། གལ་ཏེ་སྙིང་གི་འཕར་རྩ་འདི་འཇགས་པ་མེད་པར་འདི་ལྟར་འཕར་སྲིད་ན། བདེན་མཐའི་སྐྱ་རེངས་དེ་ཡང་མི་རིང་འཆར་བར་འོང་ངེས།
བདེན་པའི་སྟོབས་ཀྱིས་འགྲེངས་པའི་མི་རིགས་འདི་བདེན་པའི་མཐུ་ཡིས་རྣམ་པར་རྒྱལ་གྱུར་ཅིག
ཉིན་བརྒྱ་དུས་གཅིག་ཟེར་བ་དེ་ ཉིན་གཅིག་དུས་གཅིག་མ་རེད་དམ།
གསོལ་འདེབས་སྨོན་ལམ་དང་་་་་་་་་་དད་པ་ཡིད་ཆེས་ཀྱིས་མི་རིགས་ཤིག་གི་དཀའ་ངལ་སེལ་སོང་བའི་ལོ་རྒྱུ་བྱུང་མྱོང་མེད་པ་ཤེས་དགོས།
དེ་ལྟར་གསོལ་བ་བཏབ་པའི་སྐད་གཅིག་དེར།།
མི་ལོ་ལྔ་བཅུའི་སྡུག་བསྔ་སེལ་བར་ངེས།
མེར་བསྲེགས་བྱས་པའི་རྣམ་ཤེས་འཁྱམ་པོ་རྣམས།།
ཐར་པའི་ལམ་སྣ་དྲངས་བར་ཐེ་ཚོམ་མེད།།
བཀའ་ཁྲི་མཆོག་གིས་རྒྱ་མི་གཞུང་ལ་འབོད་སྐུལ་ཞུ་རྒྱུ་ད་དུང་ཉུང་དྲགས་འདུག མ་ཟད་རྒྱལ་ཁབ་ཁག་གི་དབུ་འཁྲིད་རྣམ་པ་དང་། ཆབ་སྲིད་པ། ཤེས་ཡོནཅན། དེ་བཞིན་དྲང་བདེན་དང་ཞི་བདེ་ལ་དགའ་བའི་དཔོན་རིགས་ཚོར་ང་ཚོའི་གནད་དོན་ངོ་མ་ཡིག་རིགས་སོགས་ཀྱི་ལམ་ནས་བརྒྱུད་བསྒྲགས་བྱེད་ཐུབ་ན་ཕན་ཐོགས་ཡོང་ས་རེད།