ཁ་སང་ཕྱི་ཚེས་ ༡༩ ཉིན་རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་ཆགས་གཉིས་ཀྱི་ཁྱབ་ཁོངས་དགོན་སྡེ་ཁག་དང་སློབ་གྲྭ། གཞིས་གྲོངས་ཁག་བཅས་ཀྱིས་སེར་སྐྱ་མི་མང་ ༡༣༠༠༠ ལྷག་གིས་བོད་ནང་གི་བོད་མི་ཚོར་གདུང་སེམས་མཉམ་སྐྱིད་ཀྱི་སྨོན་ལམ་མཆོད་འབུལ་དང་། ཟས་བཅད་སྨྱུང་གནས་ཀྱི་ལས་འགུལ་གཞི་རྒྱ་ཆེན་པོ་ཞིག་སྤེལ་ཡོད་འདུག
གནས་ཚུལ་བཏང་འབྱོར་ལ། ཁ་སང་ཞོགས་པའི་ཆུ་ཚོད་ ༩ སྟེང་རྒྱ་གར་ལྷོ་ཕྱོགས་སེ་ར་བླ་སྤྱི་རུ། བྱང་རྩེ་ཆོས་རྗེ་རིན་པོ་ཆེ་མཆོག་དང་སེ་ར་བྱེས་སྨད་གཉིས་ཀྱི་མཁན་རིན་པོ་ཆེ། སྦེལ་ཀོབ་ཉེ་འཁོར་གྱི་རིས་མེད་དགོན་སྡེ་ཁག་གི་མཁན་སློབ་ལས་སྣེ། བོད་མི་མང་སྤྱི་འཐུས། སྦེལ་ཀོབ་ལུགས་ཟུང་བསམ་འགྲུབ་གླིང་བདེ་སླར་གཉིས་ཀྱི་གཞིས་མགོ་བཅས་ཀྱི་སྣེ་ཁྲིད་འོག གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ། སེ་ར་བྱེས་སྨད་གཉིས་དང་རྒྱུད་སྨད། རྣམ་གྲོལ་གླིང་། བཀྲ་ཤིས་ལྷུན་པོ། ས་སྐྱ། བཀའ་རྒྱུད་དགོན་པ་བཅས་ཀྱི་དགེ་འདུན་པ་དང་། སློབ་གྲྭ་ཁག་གི་སློབ་ཕྲུག སྦེལ་ཀོབ་གཞིས་གྲོང་ཁག་གི་མང་ཚོགས་བཅས་མའེ་སོར་རྫོང་ཐོག་ཏུ་འཛོམས་ཏེ་ལས་འགུལ་སྤེལ་ཡོད་འདུག
ལས་འགུལ་གྱི་ཐོག་མར་མི་མང་ཚང་མ་སྐུ་བཞེངས་ཐོག་འཕགས་བོད་རྒྱལ་ཁབ་གཉིས་ཀྱི་རྒྱལ་གླུ་སྐྱོར་རྗེས་རྒྱལ་གཅེས་དཔའ་བོ་དཔའ་མོ་རྣམས་ཀྱི་ཆེད་དུ་མྱ་ངན་གུས་འདུད་ཞུས་ཤིང་། བདེན་ཚིག་སྨོན་ལམ་གདངས་དབྱངས་སུ་གྱེར་ཡོད་འདུག དེའི་རྗེས་བདེ་སླར་ས་གནས་འགོ་འཛིན་ཕུན་ཚོགས་ཚེ་རིང་ལགས་ནས་ངོ་སྤྲོད་གསུང་བཤད་དང་། འཇམ་མགོན་བསྟན་པའི་སྲོག་ཤིང་བྱང་རྩེ་ཆོས་རྗེ་རིན་པོ་ཆེ་བློ་བཟང་བསྟན་འཛིན་མཆོག་གིས་བཀའ་སློབ་གསུང་བཤད་གནང་ཡོད་ཅིང་། སྤྱི་འཐུས་རོང་པོ་བློ་བཟང་སྙན་གྲགས་ལགས་ནས་བོད་ནང་གི་ཛ་དྲག་གནས་སྟངས་དང་འབྲེལ་བའི་གཏམ་བཤད་གནང་ཞིང་། བོད་མི་མང་སྤྱི་འཐུས་ལྷན་ཚོགས་ཀྱི་གཏན་འབེབས་ལས་འགུལ་སྐབས་ཀྱི་སྲུང་བྱ་ཁག་ལམ་སྟོན་གནང་ཡོད། དེའི་རྗེས་ལུགས་བསམ་ས་གནས་མགོ་འཛིན་ཨང་ཀེ་ཚང་མགོན་པོ་བཀྲ་ཤིས་ལགས་ནས་ཐུགས་རྗེ་ཆེ་ཞུའི་གསུང་བཤད་གྲུབ་རྗེས། བོད་མི་མང་སྤྱི་འཐུས་ལྷན་ཚོགས་ཀྱིས་དྲ་རྒྱ་ནང་བཀྲམས་པའི་ཞལ་འདོན་དང་། མཆོད་འབུལ་སྨོན་ལམ་གནང་ཡོད་འདུག
ཉིན་རྒྱབ་ཆུ་ཚོད་ ༡།༠༠ ཐོག་རྒྱ་གར་གྱི་གསར་འགོད་པ་རྣམས་ལ་སྤྱི་འཐུས་རོང་པོ་བློ་བཟང་སྙན་གྲགས་ལགས་ཀྱིས་གསར་འགོད་གསལ་བསྒྲགས་བསྐྱངས་ཡོད་པ་དང་། གཞོན་ནུའི་ཚོགས་ཟུར་བློ་བཟང་ཡེ་ཤེས་ལགས་ཀྱིས་དབྱིན་སྐད་ཐོག་སྐད་བསྒྱུར་བྱས་ཡོད་འདུག ཆུ་ཚོད་ ༢།༠༠ ཐོག་སེ་ར་ཚོགས་ཆེན་དུ་མ་ཤོང་བར་སེར་བྱེས་ཆོས་རའི་ནང་དགེ་འདུན་པ་དང་། སློབ་ཕྲུག རྒྱ་ཆེའི་མང་ཚོགས་ ༡༣༠༠༠ ཙམ་བསྐྱར་དུ་གོང་གསལ་མཛད་རིམ་ཁག་དང་། གསུང་བཤད་རིམ་པར་གནང་ཡོད་འདུག་ལ། སེ་ར་ཆོས་སྒར་གྱི་རྩིག་ངོས་དག་ཏུ་སེ་ར་བྱེས་སྨད་གཉིས་དང་། སེ་ར་བླ་སྤྱི་བཅས་ཀྱིས་དཔར་སྐྲུན་འགྲེམས་སྤེལ་བྱས་པའི་བོད་མི་མང་སྤྱི་འཐུས་ལྷན་ཚོགས་ཀྱིས་མཁོ་འདོན་གནང་བའི་བོད་ནང་གི་རྒྱལ་གཅེས་དཔའ་བོ་དཔའ་མོ་རྣམ་པའི་པར་རིས་དང་། མཆོད་མེ། འཕྲེད་དར་ཚིག་གཞི་བཀོད་པའི་ཚོན་ལྡན་དར་དཔྱངས་ཀྱིས་ཁེངས་པར་བྱས་ཡོད་འདུག
དེ་བཞིན། ཕྱི་ཚེས་
རྩོམ་སྒྲིགས་པ་ལགས། གནས་ཚུལ་བྱང་རྩེ་ཆོས་རྗེ་རིན་པོ ཆེ་དབུ་བཞུགས་ཀྱིས་ལས་འགུལ་སྤེལ་ཡུལ་ནི་སེ་ར་བླ་སྤྱི་ལས་མའེ་སོར་རྫོང་ཐོག་ཏུ་ག་ལ་ཡིན།
གནས་ཚུལ་སྐྱོག་པ་དང་། ཁུང་ལུངས་མེད་པ། གོ་མི་བདེ་བ་དེ་འདྲ་རིགས་མ་བཟོས་ན་མཚམས་ཀི། མ་ཟད་གཞན་གྱི་མཁོ་སྤྲོད་བྱས་པའི་གནས་ཚུལ་ལ་དཔྱད་པ་གནང་ཏེ་དྲ་རྒྱར་ཁུངས་དག་ཞིག་འདོན་སྤེལ་གནང་བ་ལས་གསར་འགྱུར་གྱི་གལ་ཆེའི་རང་བཞིན་ཡུལ་དང་། དུས། ཅི་ཞིག་གི་ཆེད་དུ། ཅི་ཞིག་བྱས་པ། བྱེད་པོ་སུ་སོགས་འགོད་ནོར་བྱུང་ན་གསར་འགྱུར་ནང་དོན་འབད་དེ་ཕྱིན་ཅི་ལོག་འགྲོ་བས་གཟབ་པར་དགོངས་འཇགས་ཞུ།
བཀའ་སྤྱི་གཉིས་ཀྱིས་སྣེ་ཁྲིད་པའི་གཞི་རྒྱ་ཆེ་བའི་ལས་འགུལ་འདིར་བསྔགས་བརྗོད་ཡོད། ལས་འགུལ་གྱི་རྣམ་པ་ཇི་ལྟར་ཡང་རྒྱལ་སྤྱིའི་གསར་ལམ་བརྒྱུད་དེ་རྒྱ་ནག་ལ་གནོན་ཤུགས་སྤྲོད་ཐུབ་པའི་ལས་འགུལ་འདི་ལྟ་བུ་ལས་ཅི་ཞིག་སྤེལ།
གཙོ་བོ་གྲུབ་འབྲས་ལ་བལྟ་རྒྱུ་ལས་རྒྱ་ནག་གིས་ཆོས་ཁས་ལེན་མི་ལེན་ལ་ཐུག་མེད།
མ་གཞི་ལས་འགུལ་མ་སྤེལ་བ་ལ་ལྟོས་ན། འདིའི་རིགས་ཀྱི་ལས་འགུལ་ཡག་པོ་རེད་དེ། གནད་འགག་གཙོ་བོ་ནི། རྒྱ་གཞུང་དེ་ཆོས་དང་དེའི་ལུགས་སྲོལ་ལ་བརྩི་འཇོག་མི་བྱེད་མཁན་གྱི་ལྟ་བ་འཛིན་མཁན་ཞིག་ཡིན་པས་ན། ང་ཚོའི་ངོས་ནས་ང་ཚོའི་རིག་གཞུང་དང་དེའི་ངོས་འཛིན་དེ་རྒྱ་གཞུང་དང་དེའི་དབང་འཛིན་པ་རྣམས་ལ་ཇི་ལྟར་བསྒྲགས་ཀྱང་བཤད་རུང་། མིག་མེད་ལ་ནམ་མཁའ་བསྟན་པ་གཅིག་པ་མ་རེད་དམ།
དེ་ལས། བོད་རྒྱའི་དཀའ་རྙོག་འདི་ཇི་ལྟར་སེལ་བའི་ཐབས་ཚུལ་ཞིག་འཚོལ་རན་སོང་བ་མ་ཡིན་ནམ། དེ་ཡང་། བཙན་བྱོལ་བོད་མིའི་གཞུང་དང་ཚོགས་པ་ཁག ཆབ་སྲིད་ཆེད་མཁས་མི་སྣ་གང་མང་ཞིག་བསྐོང་འཚོགས་གནངས་ནས། བོད་ཀྱི་འཐབ་རྩོད་བྱེད་སྟངས་ཀྱི་སྲིད་བྱུས་ལ་བསྐྱར་ཞིབ་དོན་ལ་སྨིན་པ་ཞིག་བྱེད་རྒྱུ་གལ་ཆེ།
དེ་མིན། ཆོས་དང་ཆོས་ཀྱི་ཆོ་གའི་སྟོབས་ཤུགས་ཀྱིས་རྒྱ་གཞུང་དང་དེའི་དབང་འཛིན་པ་རྣམས་འགྱུར་བ་གཏོང་ཐུབ་རྒྱུ་ན། གནའ་ཞིག་ནས་བོད་མི་རིགས་ལ་ཐོབ་དགོས་པ་དེ་ཐོབ་ཡོད་ཡ།