ཁ་སང་ཉི་ཧོང་དང་ཐེ་ཝན། ཨ་རི་བཅས་སུ་བོད་མི་དང་བོད་དོན་རྒྱབ་སྐྱོར་བ་ཚོས་བོད་ནང་གི་གནས་བབ་ལ་གདུང་སེམས་མཉམ་སྐྱེད་ཀྱི་ལས་འགུལ་སྤེལ་འདུག
ཁ་སང་ཐེ་ཝན་ནང་བོད་མི་དང་བོད་དོན་རྒྱབ་སྐྱོར་བ་ཚོས་བོད་ནང་གི་བོད་མི་ཚོར་གདུང་སེམས་མཉམ་སྐྱིད་ཀྱི་ལས་འགུལ་སྤེལ་ཡོད་ཅིང་། མི་ ༡༡ ཙམ་གྱིས་མགོ་སྐྲ་བཞར་ཏེ་རྒྱ་གཞུང་ལ་ངོ་རྒོལ་གྱི་རྣམ་འགྱུར་བསྟན་ཡོད་པ་དང་། ཐེ་ཝན་འགྲོ་བ་མིའི་ཐོབ་ཐང་སྐུལ་སྤེལ་ཚོགས་པའི་མགོ་ཁྲིད་ཀྱིས་རྒྱ་ནག་གཞུང་གིས་ཕྱི་ཕྱོགས་སུ་དྲིལ་བསྒྲགས་བདེན་རྫུན་གང་ཞིག་བྱས་ཀྱང་། བོད་ནང་གི་འགྲོ་བ་མིའི་ཐོབ་ཐང་གི་གནས་ཚུལ་ཧ་ཅང་སྐྱོ་བོ་ཡིན་པ། ཉིན་འདི་གར་བོད་ནང་སྔ་འབྱུང་བཞིན་པའི་གནས་ཚུལ་དེ་དག་གིས་གསལ་བོར་བཤད་ཡོད་ཅེས་བརྗོད་ཡོད།
དེ་བཞིན། ཉི་ཧོང་རྒྱལ་ས་ཊོཀ་ཁྱོའི་ནང་རྟེན་གཞི་བྱས་པའི་ཇོན་ཇི་ནང་པའི་ལྷ་ཁང་དུ་ཉི་ཧོང་ས་གནས་བོད་རིགས་ཚོགས་པ་དང་། ཉི་ཧོང་བོད་དོན་རྒྱབ་སྐྱོར་བ་རྣམས་ཀྱིས་རྒྱ་ནག་གཞུང་གིས་བོད་མི་ཚོར་འཛིན་པའི་དམ་དྲག་གི་སྲིད་བྱུས་ལ་ངོ་རྒོལ་དང་། བོད་ནང་རང་དབང་དགོས་པ། ༧གོང་ས་མཆོག་བོད་དུ་གདན་འདྲེན་ཞུ་དགོས་པ་བཅས་ཀྱི་འབོད་ཚིག་འོག བོད་ནང་རང་ལུས་མེར་བསྲེགས་གཏོང་མཁན་དག་ལ་མཆོད་འབུལ་སྨོན་ལམ་གནང་ཡོད་འདུག སྐབས་དེར་ཉི་ཧོང་ནང་པའི་མཐུན་ཚོགས་ཀྱི་མཁན་པོ་སྐུ་ཞབས་ཀོ་བྷ་ཡ་ཤི་མཆོག་གིས་བོད་ནང་བོད་མི་ཚོའི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ་དང་། ཉི་ཧོང་གསར་འགྱུར་བརྒྱུད་ལམ་ཁག་གིས་གསལ་སྟོན་མ་བྱས་པའི་གནས་སྟངས་དེར་བློ་ཕམ་སྐོར་བརྗོད་ཡོད་འདུག
ཨ་རིའི་རྒྱལ་ས་ཝ་ཞིན་ཊོན་གྱི་རྒྱ་ནག་གཞུང་ཚབ་ཁང་གི་མདུན་དུ། བོད་མི་དང་བོད་དོན་རྒྱབ་སྐྱོར་བ། བོད་རང་བཙན་སློབ་ཕྲུག་ཚོགས་པའི་ཚོགས་མི་བཅས་ཀྱིས་བོད་ནང་གི་བོད་མི་ཚོར་གདུང་སེམས་མཉམ་སྐྱེད་སྒྲོན་མེ་སྤར་བ་དང་། བོད་ཐོག་འཛིན་པའི་རྒྱ་གཞུང་གི་སྲིད་ཇུས་ལ་ངོ་རྒོལ་སྐད་འབོད་བཅས་གནང་ཡོད་འདུག
![AfD party members celebrate victory in Saxony-Anhalt on Sunday [Matthias Schrader/AP]](https://tibettimes.net/wp-content/uploads/2026/09/WhatsApp-Image-2026-09-11-at-4.20.04-PM-360x180.jpeg)
ཕལ་ཆེར་བོད་པ་གང་དུ་ཡོད་པ་དེར་ལས་འགུལ་རེ་ཡོད་པ་ཐག་ཆོད་པ་འདྲ་བོ་རེད། ང་ཚོ་ཡོད་སའི་ཝན་ཁོ་ཝར་ནས་དེ་དགོང་དུས་ཚོད་དྲུག་པ་ནས་བརྒྱད་དང་ཕྱེད་ཀ་བར་དུ་རྒྱ་གཞུང་གི་དོན་གཅོད་ལས་ཁུངས་ཀྱི་སྒོ་ཁ་ནས་མར་མེ་སྒྲོན་ཞིང་། བོད་ཀྱི་རྒཉཡལ་དར་དང་དར ལྕོགས་ཀྱིས་ཁྲ་གྱིག་གེར་སྒར་བཏབ་ནས་བསྡད་པ་ཡིན། མ་གཞི་ས་འདིར་བོད་པ་ཉུང་ཉུང་ཡིན་ཡང་། ཉུང་བའི་ཚོད་ཀྱི་མང་པོ་བསླེབས་འདུག ང་ཚོར་ད་དུང་ལས་འགུལ་མང་པོ་བང་སྒྲིག་ནས་ཡོད།