མཉམ་གནས་དང་ཡར་རྒྱས།

དེ་རིང་ངྷ་ས་སུ་རི་ཡཱ་མགྲོན་ཁང་དུ་ཧིན་བོད་ཚོགས་པ་ཁག་ ༣༠ ཡི་འགན་འཛིན་ཚོས་ངྷ་ས་ཁུལ་གྱི་ཁོར་ཡུག་གཙང་བཟོ་དང་བོད་པ་དང་ཡུལ་མིའི་མཐུན་ལམ་ཡར་རྒྱས་སྐོར་ལ་བགྲོ་གླེང་གནང་སོང་།

ངྷ་ས་བདེ་དོན་ལས་ཁུངས་དང་བོད་ཀྱི་རྩོད་རྙོག་འདུམ་འགྲིག་ལྟེ་གནས་ཁང་གཉིས་ཐུན་མོང་གི་གོ་སྒྲིག་འོག དེ་རིང་ཕྱི་ཚེས་ ༢༠ ཉིན་གྱི་སྔ་དྲོའི་ཆུ་ཚོད་ ༩ དང་ཕྱེད་ཀའི་སྟེང་། ངྷ་ས་མེག་གྷན་པདྨ་ཐང་སུ་རུ་ཡཱ་ (Hotel Surya) མགྲོན་ཁང་དུ། ༼མཉམ་གནས་དང་ཡར་རྒྱས་༽ (Coexiting and Flourishing )  ཞེས་པའི་བརྗོད་གཞིའི་ཐོག་བགྲོ་གླེང་ཚོགས་འདུ་ཞིག་ཚོགས་ཡོད་ཅིང་། བགྲོ་གླེང་དེར་ངྷ་ས་ཁུལ་གྱི་བོད་དང་རྒྱ་གར་གྱི་གཞུང་འབྲེལ་མིན་པའི་ཚོགས་པ་ཁག་ ༣༠ ཙམ་གྱི་འགན་འཛིན་རྣམས་མཉམ་ཞུགས་གནང་ཐོག བཞུགས་སྒར་ངྷ་ས་ཁུལ་གྱི་ཁོར་ཡུག་གི་གནས་སྟངས་དང་། བོད་པ་དང་རྒྱ་གར་ཡུལ་མིའི་མཐུན་ལམ་ཡར་རྒྱས་གཏོང་ཕྱོགས་སྐོར་སྐོར་ལ་བགྲོ་གླེང་གནང་སོང་།  

དེའི་ཐད་ལ་ངྷ་ས་ས་གནས་མགོ་འཛིན་སྐུ་ཞབས་བསོད་ནམས་རྡོ་རྗེ་ལགས་ཀྱིས་བརྗོད་དོན། བོད་ཀྱི་རྩོད་རྙོག་འདུམ་འགྲིག་ཁང་ལ་སྤྱི་ཚོགས་ནང་རྩོད་རྙོག་རིགས་སེལ་རྒྱུར་ནུས་པ་ཡོད་སྟབས། ཐེངས་འདིར་ང་ཚོས་རྩོད་རྙོག་འདུམ་འགྲིག་ཁང་དང་མཉམ་འབྲེལ་བྱས་ཏེ། ཁོང་ཚོར་བགྲོ་གླེང་སྟངས་འཛིན་བྱེད་དུ་བཅུག་པ་ཡིན། དེ་རིང་གི་བརྗོད་གཞི་གཙོ་བོ་ངྷ་སའི་ཁོར་ཡུག་སྲུང་སྐྱོབ་དང་རྒྱ་གར་ཡུལ་མིའི་མཐུན་ལམ་གོང་འཕེལ་དུ་གཏོང་རྒྱུའི་སྐོར་རེད། ཁོར་ཡུག་ལ་ཆ་བཞག་ན། ངྷ་ས་ནི་གཅིག་ནས་༧གོང་ས་མཆོག་གི་བཞུགས་གནས་ཡིན་པ་དང་། གཉིས་ནས་ཁུལ་འདིར་ཉིན་རེར་ཡུལ་སྐོར་སྤྲོ་འཆམ་པ་ཧ་ཅང་མང་པོ་ཕེབས་ཀྱི་ཡོད་སྟབས། སྔོན་དང་མ་འདྲ་བར་གཙང་བཟོ་དགོས་ཀྱི་ཡོད་པ་རེད། ཟླ་སྔོན་མ་ནས་བདེ་དོན་ལས་ཁུངས་ཀྱི་གོ་སྒྲིག་འོག ཟླ་རེར་མེག་གྷན་ཁུལ་དུ་ཁོར་ཡུག་གཙང་བཟོའི་ལས་འགུལ་ཞིག་མགོ་འཛུགས་བྱས་ཡོད། ཡུལ་མིའི་མཐུན་ལམ་གྱི་ཕྱོགས་ནས་ཀྱང་། ངྷ་སར་ཚོང་རྒྱག་མཁན་སུ་འདྲ་ཞིག་ཡིན་རུང་། བོད་པ་དང་རྒྱ་གར་ཚོང་པའི་སྐྱིད་སྡུག་ནང་ཞུགས་མེད་མཁན་ཡོད་པ་མ་རེད། ཚོགས་པ་དེ་གཉིས་ཀྱི་འབྲེལ་ལམ་ཡག་པོ་བྱུང་ན། ཚོགས་མི་ཚོའི་འབྲེལ་ལམ་ཡག་པོ་ཡོང་གི་རེད། དེ་ལྟར་བྱུང་ན། མ་འོངས་པར་དཀའ་ངལ་འཕྲད་ནའང་། ང་ཚོ་ཐུན་མོང་གིས་སེལ་ཐུབ་པ་ཞིག་ཡོང་གི་རེད། ཅེས་བརྗོད་བྱུང་།

ད་ཆར་བཞུགས་སྒར་ངྷ་སར་བོད་པ་ཆིག་ཁྲི་ ༡༠༠༠༠ ལྷག་གནས་སྡོད་བྱེད་བཞིན་ཡོད་འདུག

 གསར་འགོིད་པ། དཔལ་ལྡན།